Ko Hono Fakahā ʻo e ʻOfa kia Sīsū Kalaisí

Fakamatalaʻi ange kuó ke ʻosi fufuuʻi ʻa e ngaahi fakamatala lahi ʻi he loki akó ʻa ia ʻoku fekauʻaki mo e lēsoní. Tuku ke kumi fakalongolongo kinautolu ʻe he fānaú. Ko hono maʻu kotoa pē ʻa e ngaahi fakamatalá peá ke fekau ʻa e fānaú pe ko hoʻo tokoni kiate kinautolu ke nau fokotuʻutuʻu fakaholoholo kinautolu mei he taha ki he ono. Mou lau fakataha kinautolu mo e fānaú. Ko ʻene ʻosi pē hoʻomou lau ʻa e fakamatala taki taha pea kole ange ke nau fakahā ʻenau fakakaukaú.

Fakaʻaliʻali ʻa e fakatātā 3–9, Ko Sīsū ko e Kalaisí.

Tala ange ki he kalasí ʻoku tau ʻiloʻi ʻoku ʻofa ʻa Sīsū Kalaisi ʻiate kitautolu koeʻuhí he kuo lahi ʻa e ngaahi meʻa kuó ne fai maʻatautolú.

Fakamatalaʻi ange kuo fakahā mai ʻe Sīsū Kalaisi ʻa ʻene ʻofa kiate kitautolú ʻaki ʻene foaki mai ʻa e ngaahi tāpuaki fakaʻofoʻofa ko ʻení. Ko e toko taha makehe ʻa kitautolu fakafoʻituitui kiate ia pea mo e Tamai Hēvaní.

Fakamatalaʻi ange kuo ʻosi fakahā mai ʻe Sīsū Kalaisi ʻa ʻene ʻofa kiate kitautolú pea te tau lava foki ke fakahā ʻa ʻetau ʻofa kiate iá. Hiki ʻi he palakipoé pe ʻi ha laʻi pepa ʻa e foʻi sētesi ko ʻení, “Te u lava ʻo fakahā ʻa ʻeku ʻofa kia Sīsū Kalaisí ʻaki—” pea lau leʻo-lahi leva ia. ʻOsi ko iá pea fakahā ange ki he fānaú te mou aleaʻi he ʻahó ni ʻa e ngaahi founga ʻoku tau lava ʻo fakahāʻaki ʻa ʻetau ʻofa kia Sīsū Kalaisí. Hanga ʻo hiki ʻi he palakipoé ʻa e ngaahi foungá ʻi he lolotonga hoʻomou lāuela ki ai mo e tamaiki lalahi ʻoku lava ʻo laukongá. Pea ki he fānau iiki angé, hanga ʻo tā ha fanga kiʻi fakatātā faingofua pē ke fakatātaaʻi ʻaki ʻa e meʻa ʻoku mou aleaʻí.

Kole ki he kalasí ke nau fakafanongo ki ha toe founga ʻe taha ʻoku fakahāʻaki ʻa e ʻofa kia Sīsū Kalaisí ka ke lau ʻa e Sione 14:15.

Naʻe fakahā mai ʻe Sīsū Kalaisi ʻoku tau fakahā ʻetau ʻofa kiate iá ʻaki ʻetau tauhi ʻene ngaahi fekaú. ʻOku tau fai ha palōmesi ʻi he taimi ʻoku papitaiso ai kitautolú te tau talangofua ki heʻene ngaahi fekaú. Ko e taimi ʻoku tau talangofua ai ki heʻene ngaahi fekaú, ko ʻetau fakahā ia ʻoku tau ʻofa kiate iá. Hiki ʻi he lisi he palakipoé pe laʻi pepá ʻa e “Ko hono tauhi ʻo e ngaahi fekaú” pe ko haʻo tā ha mata malimali.

Hanga ʻo fekau ʻa e fānaú ke nau tuʻu kotoa hake; pea ko ʻene fakahā atu pē ʻe ha tamasiʻi pe taʻahine ha fekau, te ne nofo hifo leva ia ki lalo. (Teuteu ke ke tokoniʻi ʻa e fānau he ʻikai ke nau lava ʻo ʻilo ha fekaú.)

Fakaʻaliʻali ʻa e ngaahi fakatātaá ʻi honau taimi totonu he lolotonga hono fokotuʻu atu ʻe he fānaú ʻa e ngaahi fakakaukau hangē ko e ʻalu ki he ngaahi fakatahaʻanga ʻa e Siasí, fakakaukau kia Sīsū he lolotonga hono fai ʻo e sākalamēnití, totongi vahehongofulú, lea moʻoní, lotú, lau mo ako mei he folofolá, tokoni ʻi ʻapi ki hotau ngaahi fāmilí, mo e hā fua.

Tala ange ki he fānaú te ke fie maʻu kinautolu ke nau fanongo ki ha foʻi talanoa ʻoku fekauʻaki mo hono fakahā ʻe Kimi ʻa ʻene ʻofa kia Sīsū Kalaisí:

Naʻe toki ʻosi atu ʻeni ha fuʻu matangi mālohi naʻe fou mai ʻi he feituʻu naʻe nofo ai ʻa Kimí. Naʻe nofo ofi atu pē ʻa e fāmili ʻo Kimí ki honau fale lotu foʻoú, ko ia naʻe telefoni hake ai ʻa e pīsopé ki heʻene tangataʻeikí ke ne vakaiʻi atu muʻa ʻa e fale lotú ʻi he ʻosi ʻa e matangí. Naʻe luelue fakataha atu ʻa Kimi mo ʻene tangataʻeikí, ʻo na manga holo pē he ngaahi vaʻakau naʻe fesi hifo mo puhi holo ʻe he matangí. Naʻe mafahifahi ʻa e matapā sioʻata ia ʻo e ngaahi ʻapi ʻe niʻihi, peá na fakalaka atu ʻi ha ngaahi meʻalele kuo maumau. Naʻe hohaʻa ʻa e loto ʻo Kimí na kuo maumau mo e fale lotú.

ʻI heʻena ofi atu ki he fale lotú, naʻe lava pē ke na ʻiloʻi atu kuo mafahi ʻa e matapā sioʻata ʻe taha ʻi he matangí. Pea hū ki loto ʻa e vaí fakataha mo e pelepelá, laʻi ʻakaú, vevé, mo e ʻū vaʻakau lalahi mo iiki. Naʻe fekau ʻe he tangataʻeiki ʻa Kimí ke ne talitali pē mei tuʻa kae hū ʻo vakaiʻi pe naʻe malu feʻunga pē ʻa e falé ke na hū ki loto. Taimi siʻi pē kuó ne hū mai ʻo ne tala ange ʻoku hao pē ʻa e toenga ia ʻo e falé. Naʻá na hū atu leva ki loto. ʻI he takai holo ʻa e tangataʻeikí ke vakaiʻi fakalelei ʻa e maumau kuo hokó, naʻe kamata ke ngāue ʻa Kimi ia. Naʻe ʻikai ke ne toe tatali ke toki tala ange ʻa e meʻa ke ne faí, ka naʻe kamata ke ne hiko ʻa e vevé mo e ngaahi vaʻakaú mo e laʻi ʻakau naʻe puhi mai ki loto fale lotu ʻe he matangí.

Naʻe ʻalu ʻa e tangataʻeiki ʻa Kimí ʻo ʻomi mo e toko taha pē ʻi he uōtí ke tokoni ange ʻo na tāpuni ʻa e matapā sioʻata naʻe mafahí. Lolotonga ʻa e ngāue ko ʻeni ʻa e ongo tangatá, naʻe femoʻuekina pē ʻa Kimi ia hono fakamaʻa e fale lotú. Naʻe ʻikai ke fuoloa kuo ʻosi ʻa e ʻū vakaʻakaú ʻi hono fetuku ki tuʻa. Naʻe tala ange ʻe heʻene tangataʻeikí ke na ō ʻo ʻave ia ki honau ʻapí ke mālōlō, ka naʻe loto pē ʻa Kimi ke ne tokoni ki hono fakamaʻa ʻo e fale lotú. Naʻá ne nofo ʻo tokoni ki hono fakamaʻa e pelepelá pea fufulu mo e falikí.

Fakamatalaʻi ange ʻoku lahi ʻa e ngaahi founga te tau lava ʻo tokoni ai ki hono tokangaʻi ʻo e falelotú pea mo hono ngaahi nāunaú. Te tau lava ʻo tokoni ki hono tokangaʻi ʻo hotau falelotú pea fai mo hotau lelei tahá ke tauhi ai ke maʻa mo fakaʻofoʻofa. Te tau lava ke tufi ʻa e ʻū laʻi pepa aí pea fakamāʻopoʻopo ke maau. ʻE lava ke tau tokangaʻi lelei ʻa e ʻū tohi himí pea mo e ʻū tohi tapú. ʻOku tau lava ke tokoni ʻi he taimi ʻe niʻihi ki he ngaahi ngāue-ʻofa makehé ki hono fakamaʻa ʻo e loto falelotú pe ko tuʻa. ʻOku ʻi ai pē ʻa e meʻa ʻe lava ke tokoni ai ʻa e toko taha kotoa ʻi hono tokangaʻi ʻo e ngaahi koloa ʻa e Siasí.

Tohiʻi ʻa e “Ko hono tokangaʻi ʻo e ngaahi koloa ʻa e Siasí” pe ko haʻo tā pē ha kiʻi fale lotu ʻi he palakipoé pe laʻi pepa ʻi lalo ʻi he “Te u lava ʻo fakahā ʻa ʻeku ʻofa kia Sīsū Kalaisí ʻaki—.”

Kole ange ki he fānaú ke nau fakafanongo fakalelei ke nau ʻiloʻi ha foʻi fekau mahuʻinga ʻaupito.

Hivaʻi pe lau fakataha mo e fānaú ʻa e lea ʻo e “Ke Mou Feʻofaʻaki.”

Fakamatalaʻi ange ko Sīsū Kalaisí ko e toko taha ʻofa taha ia mo faʻa fakaʻatuʻi kuo moʻui ʻi he māmaní. Kapau ʻoku tau fie maʻu ke tau ʻofa ʻo hangē ko iá, kuo pau ke tau ʻofa lahi ki he niʻihi kehé. ʻOku moʻoni ʻa e ngaahi lea ʻo e hiva ko ʻení pea ko e toʻo pē ia mei he Tohi Tapú. Naʻe folofola ʻa Sīsū ʻo pehē, “Hangē ko ʻeku ʻofa kiate kimoutolú, … ke mou feʻofaʻaki foki kiate kimoutolu” (vakai, Sione 13:34; vakai foki, Sione 15:12, 17). ʻOku tau ʻiloʻi ʻokú ne ʻofa lahi ʻiate kitautolu. ʻOku fie maʻu ke tau ʻofa ki he kakai kehé ʻaki ʻa e ʻofa tatau pē mo ia. ʻI heʻetau ʻofa ki he kakai kehé, ʻoku tau fakahā ai kia Sīsū ʻoku tau ʻofa foki kiate ia.

Tohiʻi ʻa e “ʻOfa ki he kakai kehé,” pe ko haʻo tā ha foʻi haati ʻi he tafaʻaki ki lalo ʻo hoʻo lisí.

ʻOange ke taki taha ʻa e fānaú ha peni vahevahe mo ha pepa pe laʻi kaati. Fekau ʻa e fānau ʻoku nau lava ʻo tohí ke nau tohiʻi ʻi heʻenau laʻi pepá ʻa e “Te u lava ʻo fakahā ʻeku ʻofa kia Sīsū Kalaisí ʻaki—.” Mahalo pē ʻe fie maʻu ke ke hanga ʻo tohiʻi ʻeni ʻi he ʻū laʻi pepa ʻa e fānau iiki angé. Tala ange ki he fānaú ke nau tohiʻi pe tā ha meʻa ʻe taha te nau fai ʻi he uiké ni ke fakahāʻaki ʻenau ʻofa kia Sīsū Kalaisí. Tala ange te ke fie fanongo he uike hoko maí pe naʻe fēfē ʻenau fakahoko ʻa e ngāue ko ʻení. Poupouʻi e fānaú ke nau ʻalu mo ʻenau ʻū laʻi pepá ki honau ʻapí ʻo tuku kinautolu ʻi ha feituʻu te nau lava ke mamata ki ai ʻi he lolotonga ʻo e uiké mo ne fakamanatuʻi kiate kinautolu ʻa e ngāue ke nau faí.

Fakaafeʻi ha taha ʻo e fānaú ke ne fai ʻa e lotu tukú.