Ɔfã 35
Nyikyerɛ a wɔdze maa Joseph Smith Nkɔnhyɛnyi no na Sidney Rigdon, wɔ Fayette anaa beebi a ɔbɛn Fayette, wɔ New York, Mumu 7, 1830. Dɛm aber no mu, nna Nkɔnhyɛnyi no n’edwuma a ɔyɛ no dabiara nye ɔkyerɛ Bible no ase. Wɔhyɛɛ nwoma no ase kyerɛ wɔ Ɔbiradzi, 1830, aber no, nna Oliver Cowdery na John Whitmer nyina asom dɛ akyerɛwfo. Ɔnam dɛ, afei wɔafrɛ hɔn ama hɔn edwuma fofor ntsi, wɔnam frɛ krɔnkrɔn do frɛɛ Sidney Rigdon dɛ ɔmbɛyɛ Nkɔnhyɛnyi no ne kyerɛwfo wɔ dwumadzi no mu (hwɛ nkyekyɛmu 20). Nsɛm a ɔyɛ nyikyerɛ yi ne nyienyim no, Joseph Smith n’abakɔsɛm kã dɛ: “Mumu mu na Sidney Rigdon [fii Ohio] baa dɛ oribebisa biribi efi Ewuradze hɔ, na Edward Partridge kã noho ma wɔbae. … Enuanom beenu no bodurii no, annkyɛr na Ewuradze kasaa dɛ.”
1–2, Mbrɛ ɔbɛyɛ ma nkorɔfo etum abɛyɛ Nyame ne mba; 3–7, Wɔfrɛ Sidney Rigdon dɛ onnuma na ɔmfa Sunsum Krɔnkrɔn no mma; 8–12, Wɔnam gyedzi do yɛ nsɛnkyerɛdze na anwanwadze; 13–16, Ewuradze no nkowaa nam Sunsum no tum do bɔpose aman; 17–19, Joseph Smith kura esumasɛm ne nsaafee; 20–21, Mpamufo no botum egyina Ewuradze ne mbaa da no ano; 22–27, Wɔbɛgye Israel nkwa.
1 Tsie Ewuradze wo Nyankopɔn ne ndze, nyia ɔyɛ Alpha nye Omega, ahyɛse nye ewiei no, nyia n’akwan yɛ kor na ɔkɔ aprɔw onnyiewiei, nyia ɔtse dɛm ndɛ dɛ ndeda, na afebɔɔ.
2 Emi nye Jesus Christ, Nyankopɔn ne Ba no, nyia wɔbɔɔ no mbeamudua mu dze maa wiadze nyina no bɔn, na dodowara a wɔbɛgye me dzin edzi no, ama wɔabɛyɛ Nyankopɔn ne mba, na wɔbɛyɛ kor mpo wɔ mo mu dɛ mbrɛ meyɛ kor wɔ Egya no mu no, dɛ mbrɛ Egya no yɛ kor wɔ mo mu no, ama yaayɛ kor.
3 Hwɛ, nokwar, nokwar, mese m’akowaa Sidney dɛ, mahwɛ ɔwo nye wo ndwuma. Matse wo mpaabɔ, na mesiesie wo ama edwuma kɛse bi.
4 Woehyira wo, na ebɛyɛ ndzɛmba akɛse. Hwɛ, wɔasoma wo tse dɛ mbrɛ wɔsomaa John dɛ ombesiesie mo kwan mu no, nye Elijah so a ɔbɛba no n’enyim, na ɔwodze innyim.
5 Na ɔwo edze nsu numae dze kɔr nnuho mu, na mbom woennya Sunsum Krɔnkrɔn no;
6 Na, hwɛ, merema wo mbrasɛm, dɛ fa nsu numa, na sɛ edze nsa gu hɔn do a, wobenya Sunsum Krɔnkrɔn no, tse dɛ mbrɛ tsetseberdo Asomafo no yɛe no.
7 Na ɔbɛba dɛ edwuma kɛse bi bɛba asaase no do, wɔ Amanamamfo no mu mpo, na hɔn nkwaseadze nye ebusudze bɛda edzi wɔ nkorɔfo nyinara enyim.
8 Na meyɛ Nyame, na m’abasa nnyɛ tsia; na mebɛda etumdze, nsɛnkyerɛdze, nye anwanwadze edzi akyerɛ hɔn a wɔgye me dzin dzi no.
9 Na hɔn a wobebisa wɔ me dzin mu wɔ gyedzi mu no, wobotu mbɔnsam; wɔbɛsa ayarfo yar, wɔbɛma efurafo ehu adze, na etsitsifo atse asɛm, na mmum akasa, na ebubuafo anantsew.
10 Na mber no reba ntsɛm ama woeeyi ndzɛmba akɛse akyerɛ adasamba;
11 Na mbom sɛ woennya gyedzi a wonnkeyi biribiara akyerɛ hɔn, gyedɛ amamfoyɛ nko na ɔbɛba Babylon do, ɔno a ɔmaa Amanamamfo nyina noom ne ndwamanyɛ ebufuw wenyin no.
12 Na obiara nnyi hɔ a ɔyɛ papa, gyedɛ hɔn a wɔayɛ krado dɛ wɔbɛgye m’asɛmpa ne mãhyɛ no, dza medze ama ebusuasantsen yi no.
13 Dɛm ntsi, mefrɛ wiadze ndzɛmba a ɔyɛ mberɛw, hɔn a wonnyi nyimdzee na wɔnnsɛ hwee no, ma wɔdze mo Sunsum no tum no apose aman.
14 Na hɔn abasa bɛyɛ m’abasa, na mebɛyɛ hɔn akokyɛm na nkataenyim; na mobɔbɔ hɔn asen do, na wɔbɔkõ mbarimba mu ama me; na wɔdze hɔn atamfo bɛba hɔn ananadze; na mobɔtwe nkrantsee wɔ hɔn afã, na medze m’ebufuhyew gyatanaa bɔkora hɔn do.
15 Na wɔbɛkã asɛmpa no akyerɛ ehiafo na hɔn a wɔdwe, na wɔbɔhwɛ me mbae no kwan, osiandɛ abɛn—
16 Na wobosũa adɔmbadua no ho abɛbusɛm no, osiandɛ seseiara mpo ɔhyewber no abɛn.
17 Na masoma m’akowaa Joseph, na medze m’asɛmpa ne mãhyɛ no ahyɛ ne nsa; na ne mberɛwyɛ mu na meehyira no;
18 Na medze dɛm ndzɛmba no a ɔyɛ esumasɛm a wɔasɔw ano no ne nsaafee ama no, nye ndzɛmba a ɔwɔ hɔ fi wiadze ne fapem no mpo, nye ndzɛmba a sɛ ɔtsena mo mu a ɔbɛba, ofi ber yi dze kesi ber a mebɛba, na sɛ nnyɛ dɛm a, obi fofor na medze no besi n’ananmu.
19 Dɛm ntsi, hwɛ no do amma ne gyedzi ammpa, na Ɔwerɛkyekyefo a ɔyɛ Sunsum Krɔnkrɔn no a onyim adze nyinara no dze bɛma no.
20 Na mbrasɛm yi na medze ma wo—dɛ kyerɛw ma no; na wɔdze kyerɛwsɛm no a ɔwɔ mankasa mo bo mu no bɛma, dze ama mankasa me mpamufo no eenya nkwagye.
21 Na wɔbɛtse me ndze, na woehu me, na wɔnnkɛda, na wobegyina wɔ da a mebɛba no mu; na wɔbɛtsew hɔnho, dɛ mbrɛ mo ho tsew no.
22 Na afei mese wo dɛ, tsena ne nkyɛn, na ɔnye wo botu kwan, mma mmpow no, na ndzɛmba yinom bɛba mu ampa.
23 Na mber dodowara a erennkyerɛw no, hwɛ, wɔbɛma ɔahyɛ nkɔm; na ɔwo so bɛkã m’asɛmpa no na abɔ nkɔnhyɛfo krɔnkrɔn no hɔn edzin dze ada ne nsɛm no nokwar no edzi, dɛ mbrɛ wɔdze bɛma no no.
24 Dzi mbrasɛm nye ahyɛmu a wɔdze ama wo no nyinara do; na mebɛma sor awosow ama wo yieyɛ, na Satan no ho bɔpopo na Zion bedzi ehurusi wɔ mbepɔw no do na ɔayɛ prɔmprɔm;
25 Na wɔbɛgye Israel nkwa wɔ mankasa me mber pa mu; na nsaafee a medze ama no bɛkyerɛ hɔn kwan, na hɔn enyim runngu ase bio da.
26 Hom mma hom akoma do na hom enyi ngye, osiandɛ hom ɔpon abɛn.
27 Mma hom nnsuro, nguankuw ketseaba, ahenman no yɛ hom dze kesi dɛ mebɛba. Hwɛ, mereba ntsɛm. Ɔnyɛ hɔ dɛm. Amen.