Naan in Karuwainene
Kom̧ij ruwainene n̄an kweilo̧k in eļap im n̄an jeraam̧m̧an in n̄an ron̄jake ainikien Irooj.
Brother ro rejitōn bōro im sister ro im ro m̧ōttad ipeļaakin laļ in, ij lewaj aō naan in karuwainene n̄an kweilo̧k in eļap. Jej kobatok āinwōt juon baam̧le eļap peļaakin laļ in n̄an kabun̄jar n̄an Irooj im Rilo̧mo̧o̧r, Jisōs Kraist. Kom̧m̧ooltata kōn ami kobatok ippem.
Iiō eo ļo̧k ekar juon eo jeban meļo̧kļo̧k e. Ejjeļo̧k pere kōj kajjojo kar ekkatak men ko jekar jab jeļā m̧okta. Jet katak ko me ikar jeļā m̧okta jān aer kar jeje ilo būruwō ilo wāween ko rekāāl im ļap tokjāer.
N̄an waanjon̄ak, ilukkuun in jeļā bwe Irooj ej kōjekiik m̧akūtkūt ko an Kabun̄ in An. Ekar ba, “Inaaj kwaļo̧k n̄an [eok] bwe Imaron̄ make kōm̧m̧ane jerbal eo Aō.”1
Emakijkij, an rikakpilōklōk ro aō im n̄a lale jān mej ko reto̧o̧rļo̧k kōn dān in kōmjaļļaaļ ke Ekar kipel e make ilo jekjek eo epentata ālkin ad maron̄ kōm̧m̧ane jon̄an eo em̧m̧antata jemaron̄ in kōm̧m̧ane im jejjab maron̄ kōm̧m̧ane eļapļo̧k. Jej jutak ilo kam̧m̧oolol ilo an ļo̧kjenad.
Barāinwōt eļapļo̧k aō meļeļe kiiō kōn meļeļe in An kar ba, “Lo, Inaaj kōm̧ōkaj jerbal eo Aō ilo iien eo an.”2 Jān iien n̄an iien, ikar lan̄lōn̄ ilo An kōjekiik im kōm̧m̧ane kōm̧ōkajļo̧k eo an Jerbal in An—aaet ilo juon iien ajadeed in nan̄inmej in ipeļaakin laļ in.
Ro jeiū im jatū, kajoor eo an Kabun̄ in ej pād ilo jerbal in kijejeto ko im naan in kam̧ool ko rekajoor an membōr ro an. Naan in kam̧ool ko em̧m̧anlok aer ejaak ilowaan m̧weo. Ilo iiō in em̧ootļo̧k, elōn̄ iami rekar kōļļapļo̧k aer ekkatak gospel eo ilo mōko im̧ōmi. Ij kam̧m̧oolol kom̧, im ajri ro nejimi renaaj kam̧m̧oolol e kom̧.
Project eo ekilep n̄an kōkāāle Salt Lake Temple ej wōnm̧aanļo̧k wōt. Jān opiij eo aō, ewōr juon jea ilo row eo im̧aan n̄an aō alooje jerbal ko rej kōm̧m̧an ilo temple plaza eo.
Ke ij alooje an rijerbal rein kūbwij okar ko an wōjke eo emo̧r, baib ko, to in jarom̧ ko, im juon fountain eo ettal, ikar ļōmņak kōn aikuj eo emenin aikuj me jej aikuj kōm̧akūti, kōn jipan̄ an Rilo̧mo̧o̧r eo, meno̧kno̧k ko rōm̧o̧r ilo mour ko ad.
Gospel eo an Jisōs Kraist ej juon gospel in ukweļo̧k.3 Kōnke Pinmuur eo an Rilo̧mo̧o̧r eo, gospel eo An ej letok juon karuwainene n̄an jab bōjrak in oktak, eddōkļo̧k, im erom̧ erreo. Ej juon gospel in kōjatdikdik, kōmour, im eddōkļo̧k. Mekarta, gospel eo ej juon ennaan in lan̄lōn̄! Jetōb ko ad rej lan̄lōn̄ kōn aolep bun̄tōn ko reddik m̧aanļo̧k jej būki.
Mōttan wōt ad aiintok Israel, im juon m̧ōttan elukkuun aorōk, ej eddo eo ad āinwōt armej ej bwe jen erreo im m̧ōņōņō in jipan̄ kōpooj laļ in n̄an Itok eo Kein Karuo an Irooj.
Ilo ad ron̄jake ennaan ko me rekar lukkuun pojak jān ritōl ro ad ium̧win tōl eo an Jetōb Kwojarjar eo, ij kajjitōk ippemi n̄an jar im kalikkar meno̧kno̧k eo kwoj aikuj kōm̧akūti jān mour eo am̧ bwe kwōn maron̄ erreo.
Ij iakwe kom̧, ro jeiū im jatū rejitōn bōro, im ij kam̧ool bwe Jemedwōj Ilan̄ im Nejin Jitōn Bōro rejeļā kajjeim̧ im rej iakwe kom̧ kajjojo. Rej jutak im pojak n̄an aer jipan̄ kom̧ ilo aolep bun̄tōn nee ko neem kwoj jo̧m̧aanļo̧k. Kom̧ij ruwainene n̄an kweilo̧k in eļap im n̄an jeraam̧m̧an in n̄an ron̄jake ainikien Irooj. Ilo etan Jisōs Kraist, amen.