Ad Make Rilo̧mo̧o̧r

Jilun̄oul emān iiō ko remootļo̧k, mijenede kam̧pānien eo aō im n̄a, kom̧ro kar ioon im kar katakin juon em̧m̧aan eo eļap jeļāļo̧kijeņ ippān ilo Davao City, Philippines, eo ekar juon rijeje eļap koņaan ilo juon nuujpepa an jikin eo. Ekar itok limoum am katakin e kōnke ekar kanooj lōn̄ an kajjitōk im ekar lukkuun kautiej tōmak ko am. Kajjitōk eo epen meļo̧kļo̧k e im ekar kajjitōk ippemro ekar “Ta Am̧ Ļōmņak kōn Kraist?”² Em̧ool kom̧ro ekar lukkuun m̧ōņōņō ilo am̧ro kwaļo̧k en̄jake ko am̧ro im kwaļo̧k kam̧ool kōn Jisōs Kraist. Ekar tokālik jeik juon nuuj kōn ejja unin kōnono in wōt me ewōr ie naan ko rekabwilōn̄lōn̄ im naan ko kōn Rilo̧mo̧o̧r eo. Ij kemeemej an kar em̧m̧an ippa bōtaab ekar jab kōketak eō. Ewōr ie meļeļe ko rem̧m̧an ak kar en̄jake bwe ejjab aorōk im ekar ejjeļo̧k kajoor in jetōb ie.

“Ta Am̧ Ļōmņak kōn Kraist?” Ij kileļo̧k bwe wāween aō epaake im jeļā kajjeen Rilo̧mo̧o̧r eļap unin ilo an jelōt maron̄ eo aō n̄an ron̄jake E, im barāinwōt wāween aō m̧akūtkūt. Jejjo iiō ko remootļo̧k, Elder David A. Bednar ekar kajjitōk kajjitōk kein m̧ōttanļo̧k wōt ekōnono eo an: “Jej wōt ke jeļā kōn Rilo̧mo̧o̧r eo, ak jej ke ļapļo̧k wōt ad jeļā kajjeen E?” Elmen ad jeļā kōn Irooj?”³

Ilo aō kar ekkatak im kōļmenļokjeņ, ikar kanooj kile bwe ta eo ijeļā kōn Rilo̧mo̧o̧r ekar ļapļo̧k jān jon̄an aō lukkuun jeļā kajjeen E. Ikar kapene ippa n̄an likūt eļapļo̧k kijejeto n̄an jeļā kajjeen E. Eļap aō kam̧m̧oolol kōn jeje ko rekwojarjar im naan in kam̧ool ko an em̧m̧aan ro im kōrā ro retiljek ro rikaļooran Jisōs Kraist. Iaļ eo aō make ilo iiō ko remootļo̧k ekar bōk eō laļļo̧k ilo elōn̄ iaļ in ekkatak im elolo uwaak. Ij jar bwe Jetōb Kwojarjar enaaj lewaj n̄an eok rainin juon enaan eo eļapļo̧k jān naan kein rekadu ikar jeiki.

M̧okta, jej aikuj kile bwe jeļā kajjeen Rilo̧mo̧o̧r eo ej menin kōttōbar eo aorōktata ilo mour ko ad. Ej aikuj ļap unin jān jabdewōt ko jet.

“Bwe men in ej mour indeeo, bwe ren jeļā Kwe juon wōt Anij e m̧ool, im Jisōs Kraist, eo Kwaar jilkintok.”⁴

“Jisōs e ba n̄an e, N̄a iaḷ, im ṃool, im mour. Ejjeḷọk armej ej itok n̄an Jema, eļan̄n̄e jab kōn Eō.”⁵

“N̄a, meram in laḷ; eo ej ḷoor Eō e jāmin etal ilo marok, a enaaj an meram in mour.”⁶

Kein karuo, ilo an ļapļo̧k ad jeļā kajjeen Rilo̧mo̧o̧r eo, eoon ko ilo jeje ko rekwojarjar im naan ko an rikanaan ro renaaj ļapļo̧k meļeļeier n̄an kōj jon̄an renaaj erom̧ naan ko ad make. Ejjab kōn kape naan ko, en̄jake ko, im en̄jake ko an ro jet ak kōn itok n̄an jeļā kōn kōj make, ilo wāween eo ad ejenolo̧k, ilo ad mour kōn naan eo⁷ im bōk juon kam̧ool jān Jetōb Kwojarjar. Āinwōt an rikanaan eo Alma ba:

‘Kom̧ij jab kōtmāne bwe i jeļā men kein make ke? Lo, ij kam̧ool n̄an kom̧ bwe i jeļā men kein ko iaar kōnono kaki rem̧ool. Im ekōjkan ilo ami kōtmāne bwe i jeļā kōn aer m̧ool?

“Lo, ij ba n̄an kom̧ men kein kar kwaļo̧k n̄an eō jān Jetōb Kwojarjar an Anij. Lo, iaar jitlo̧k im jar elōn̄ raan ko bwe in maron̄ jeļā men kein n̄an eō make. Im kiiō i jeļā make bwe rem̧ool; bwe Irooj Anij Eaar kwaļo̧ki n̄an eō kōn An Jetōb Kwōjarjar; im en̄in ej jitōbōn revelesōn eo ej ilo n̄a.”⁸

Kein kajilu, juon meļeļe eo eļapļo̧k bwe Pinmuur eo an Jisōs Kraist ej n̄an kōj make im kajjojo iaad enaaj jipan̄ kōj jeļā kajjeen E. Eiten aolep iien epidodoļo̧k n̄an ad ļōmņak im ekōnono kōn Pinmuur eo an Kraist ilo ad jab tipdiki jān ad kile aorōk in ilo mour ko ad. Pinmuur eo an Jisōs Kraist eļap im n̄an indeeo im ekūtbuuj men otemjej im e m̧wilaļ ak ej lukkuun n̄an kōj make im kajjojo iaad ilo an jerbal. Kōn pinmuur eo An, Rilo̧mo̧o̧r ewōr ippān kajoor eo n̄an karreoik, kōmour, im kōkajoor kōj juon ilo̧k juon.

Ikdeelel eo an Rilo̧mo̧o̧r eo emake, un eo An emake, jān jinoin, kar n̄an kōm̧m̧ane ankilaan Jemān. Ankilaan Jemān ekar n̄an E n̄an jipan̄ “[boktok] kakūrm̧ool jab wabanban im mour indeeo an armej”⁹ jān erom̧ juon ad “Ri Jojomar ippān Jemed.”¹⁰ Kōn un in, “meñe Nejin, Ear katak im pokake kōn men ko Ear eñtaan kaki; Im ke eṃōj koweeppān E, Ej Ri Lọmọọr indeeo n̄an ro otemjej rej pokake E.”¹¹

“Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k. …

“Im Enaaj bōk Ioon mej, bwe E en maron̄ kōtļo̧k to ko an mej … im Enaaj bōk Ioon m̧ōjņo̧ ko aer, bwe būruōn ren maron̄ obrak kōn tūriam̧o, … bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer.

“… Eo Nejin Anij ej en̄taan ekkar n̄an kanniōk bwe En maron̄ bōk Ioon jerawiwi ko an armej ro An, bwe en jeorļo̧k bōd ko aer ekkar n̄an kajoor im lo̧mo̧o̧ren eo An.”¹²

Ikōnan kwalok juon en̄jake ekadu me ej kalikkar m̧ojņo̧ eo jet iien ej pād ippād n̄an kaorōk lukkuun piktokin Pinmuur eo an Irooj.

Iiō ko remootļo̧k, ilo kūr eo an file ritōl eo aō, ikar riiti Bok in Mormon jān kilin n̄an kilin im kalikkare eoon ko me rej kwaļo̧k kōn Pinmuur eo an Irooj. Ritōl eo aō ekar barānwōt kajjitōk ippa n̄an kōpooj juon peij in naan in kōmeļeļe ko kōn ta eo ikar ekkatak. Ikar ba n̄an n̄a make, “Juon peij? Aaet, men eo epidodo.” Ikar bwilōn̄, ijoke, ikar lo bwe jerbal eo ekar juon men eo ekanooj pen, im ikar jab tōprak ilo kōm̧m̧ane.

Ilakkar kile kiiō bwe ikar jab tōprak ilo kōm̧m̧ane kōnke ikar likjab jān un eo im ekar bōd ļōmņak ko aō kake. M̧okta, ikar kōtmene bwe naan in kōmeļeļe eo en im̧we aolep. Unin naan in kōmeļeļe eo ekar n̄an n̄a im ejjab bar juon. Unin ekar n̄an kwaļo̧k en̄jake ko aō im aō ļōmņak kōn Rilo̧mo̧o̧r im ta eo Ekar kōm̧m̧ane n̄an n̄a bwe aolep iien n̄aij riiti, enaaj boktok n̄an mejatoto eo ekabwilōn̄lōn̄, ajļo̧k, im en̄jake ko an juon make ilo jetōb.

Kein karuo, ikar kōtmene naan in kōmeļeļe eo bwe en ļap im en wōr ie naan ko im enaan ko rem̧wilaļ. Ejjāmin kar kōn naan ko rem̧wilaļ. Unin ekar n̄an juon naan in kam̧ool eo alikkar im kadu. “Bwe aō ej lan̄lōn̄ ilo alikkar; bwe ilo wāween in Irooj Anij ej jerbal ilubwiljin ro nejin armej.” Bwe Irooj Anij ej letok meram n̄an koļmānļo̧kijeņ;”¹³

Kein kajilu, ikar kōtmene bwe en wānōk, juon naan in kōmeļeļe n̄an kōjem̧ļo̧k aolep naan in kōmeļeļe ko—Juon naan in kōmeļeļe āliktata me juon ejjab maron̄ im ejjab aikuj bar kakobaba—ijjelo̧kin juon jerbal eo ejjan̄in dedeļo̧k me imaron̄ kobaik juon naan ijin ak juon enaan ijo ilo an meļeļe eo aō kōn Pinmuur eo an Jisōs Kraist ļapļo̧k.

Āinwōt juon likao, ikar ekkatak eļap kōn jān iien kōm̧m̧ao ko aō ippān bisop eo aō. Ilo iiō ko reaorōk, ikar ekkatak n̄an iakwe naan kein ilo juon al in jar em̧m̧antata ippa:

Rikanaan Moronai ekar karuwaineneik kōj: “Im kiiō, ikōnaan kōketak kom̧ n̄an kappukot Jisōs in eo rikanaan ro im rijjilōk ro rekar jeje kake.”¹⁵

Būreejtōn Russell M. Nelson ekar kallim̧ur bwe “eļan̄n̄e [jej] etal wōt im ekkatak aolep men [jemaron̄] kōn Jisōs Kraist … maron̄ eo [ad] n̄an elļo̧k jān jerawiwi enaaj ļapļo̧k. Ikdeleel eo [ad] n̄an kōjparok kien ko enaaj ļapļo̧k.”¹⁵

Ilo Jabōt in Ijtō in, ejjeļo̧k āinwōt an kar Rilo̧mo̧o̧r jerkak tok jān lōb eo An, jen barāinwōt ruj jān ad kiki ilo jetōb im jutak ilōn̄ in kedo in bere, dāpdāp ko an mijak, uteej bōro ekajoor, im ļōmņak in jab eddōkļo̧k jān jon̄an eo kobed ie. Jisōs Kraist im Jemedwōj Ilan̄ rej mour. Ij kam̧ool kōn iakwe eo Aer rejjab likjab n̄an kōj. Ilo etan Jisōs Kraist, amen.