Ro Rijeram̧ōļ

Āinwōt juon ļaddik, ij keememej kattōr ilo wa eo ippān jema im alooj an armej ro kajjojo iturin iaļ ko ro epen aer mour ak ro rej aikuj jipan̄. Ekkā an jema ba naan in “Pobrecito,” meļeļein “ro rijeram̧ōļ.”

Juon iien, iaar lale an jema kar jipan̄ elōn̄ iaan armej rein, eļaptata n̄e kōmim ej etal n̄an Mexico im loļo̧k bubu. Enaaj lale wōn ro rej aikuj jipan̄ innām make jibadekļo̧k im leļo̧k jipan̄ n̄an er. Tokālik iaar lo ke ekar jipan̄ kajukuuļ er, wia kijeeer m̧ōn̄ā, ak jipan̄ ilo jabdewōt wāween ak ko jet n̄an em̧m̧an eo aer. Ekar jerbal in karejar n̄an “ro rijeram̧ōļ” ro rej itok n̄an e. Ilo m̧ool, ilo aō rūttotak ilo iiō kein ijab keememej n̄e ewōr iien en kōmij jab jipan̄ jabdewōt ro rej jokwe ippam̧ me rekar aikuj jipan̄ kappukot jikier ilo aer kajjieon̄ in un̄are peier make. Loi en̄jake kein ekar ekar ejaake ilo n̄a jetōb in tūriam̧o n̄an em̧m̧aan im kōrā ipeļaakū im ro rej pād ilo aikuj.

Ilo Preach My Gospel ej kwaļo̧k: “Kwoj jepooļ kōn armej. Kwoj iiao̧ ippāer ilo iturin iaļ ko, lolo̧k er ilo m̧oko im̧weer, im ito-itak ippāer. Rej aolep ro nejin Anij, ro jeim im jatim. … Elōn̄ iaan armej rein rej pukot tokjān mour in. Rej ļōmņak kōn ilju im jeklaj eo aer im baam̧le ko aer” (Preach My Gospel: A Guide to Missionary Service [2018], 1).

Ilo iiō ko ilo aō kar jerbal ilo Kabun̄ in, iaar kajjieon̄ in pukot rein repād ilo aikuj ilo mour ko aer jim̧or ilo kanniōk im jetōb. Ekkā aō ron̄ an jema ba, “Pobrecito,” ro rijeram̧ōļ.

Ilo Baibōļ eo jej loe juon waanjon̄ak eo em̧m̧an n̄an kea kōn ro rijeram̧ōļ:

“Kiiō Piter im Jon rej wanlōn̄ļo̧k n̄an ilowaan tempeļ ilo awa in jar, ilo awa eo kein ruwatimjuon.

“Im juon armej e kūrro jān lo̧jien jinen, im raar bōktok im likūt e raan otemjej ņa iturin kōjam in tempel, etan kōjām eo Wūlio, ej kajjitōk m̧weien tūriam̧o jān ro rej deļo̧n̄ ilowaan tempel;

“Ke ej lo Piter im Jon re nan̄in deļo̧n̄ ilowaan tempel, ej kajjitōk m̧weiien tūriam̧o.

“Im Piter, ej kallimjeke kab Jon, im e ba, Kwōn lale kōmro.

“Im ej eo̧ron̄ erro, im ļōmņak enaaj bōk men eo jabdewōt jān er.

“A Piter ej ba, “Ejjeļo̧k silver ak gold ippa, ak men eo ewōr ippa, ij lewōj n̄an eok: Ilo etan Jisōs Kraist ri Nazeret, kwon jutak im etal.

“Im ej jibwe anmoonņōn im kajutak e, im e m̧ōkaj an pen neen im kwōlelein neen” (Jerbal 3:1–7; men eo eaorōk kar kobaiktok).

N̄an riiti bwebwenato in, iaar itok limou kōn naan eo kōjerbali kallimjeke. Naan in kallimjeke meļeļe lukkuun kallimjek mejān ko ak ļōmņak ko n̄an ak lukkuun kallimjek (lale “fasten,” Dictionary.com). Ke Piter eaar kallimjek em̧m̧aaan in, eaar lo an lukkuun oktak jen ro jet. Eaar lo an kōņaan etetal im an m̧ōjņo̧ bwe tōmak eo an eaar kōm̧m̧an bwe en mour im deļo̧n̄e tampeļ eo n̄an bōk kōjeraam̧m̧an ko ekar pukoti.

Iaar kile bwe ekar jibwe anmooņōn in pein im kajutake. Ke eaar jipan̄ em̧m̧aan in ilo jekjek in, Irooj eaar kōmouri ilo kabwilōn̄lōn̄, im “em̧ōkaj an pen neen im kwo̧lelein neen” (Jerbal 3:7). An iakwe n̄an em̧m̧aan in im juon ikdeleel n̄an jipan̄ e ekar kōļapļo̧k maron̄ im kajoor ilo em̧m̧aan in eo ekar m̧ōjņo̧.

Ke iaar jerbal āinwōt juon Eria Jiljilimjounn̄oul, Iaar kōjenolo̧k kajjojo joteen in Juje bwe in kōm̧m̧an loļo̧k in jerbal in karejar ippān stake būreejtōn ro ilo eria in jerbal eo aō. Iaar kajjitōk ippāer n̄an karōk juon iien ippān ro raar aikuji kain̄i eo jān gospel eo an Jisōs Kraist ak ro kiiō rejjab kōjparok bujen ko rekar kōm̧m̧ani. Kōn wōt karōk im ikutkut in jerbal in karejar eo ammim, Irooj eaar kōļapļo̧k jerbal ko ammim im kōm kar maron̄ in lo armej ro kajjojo im baam̧le ko ro rej pād ilo aikuj. Rein raar “ro rejeram̧ōļ” me raar pād ilo stake ko reoktak jān doon ijo kōm ar jerbal ie.

Juon iien, iaar etal ippān Būreejtōn Bill Whitworth, būreejtōn eo an Sandy Utah Canyon View Stake, n̄an kōm̧m̧ane loļo̧k in jerbal in karejar ko. Eaar lukkuun jar kōn wōn ro kom̧ro naaj loļo̧k er, kajjieon̄ in bōk ejja en̄jake eo an Nipai, eo “Jetōb eaar tōl e, jab jeļā m̧okta men ko in kar kōm̧ani” (1 Nipai 4:6). Eaar kwaļo̧k bwe ilo ad jerbal in karejar, jej aikuj in tōl jān revelesōn eo n̄an ro rej lukkuun pād ilo aikuj, jen baj etal wōt ilo laajrakin loļo̧k ko an kajjojo armej ilo juon wāween em̧m̧an. Jej aikuj tōl jān kajoor in im̧we.

Ij keememej etal n̄an juon m̧ōn jet ripālele, Jeff im Heather, im ļaddik eo edik nejier, Kai. Jeff eaar rūttotak im juon membōr eo eniknik an Kabun̄ in. Ekar juon rikkure eo eļap kapeel im enaaj juon rikkure eo em̧m̧an. Ekar jino janiknikļo̧k ilo Kabun̄ in ke em̧m̧an ded wōt. Tokālik, ekar itaak ilo wa, eo ekar ukōt mour eo an. Ke kōmij deļo̧n̄eļo̧k m̧weeo im̧weer im jino bwebwenato, Jeff ekar kajjitōk ippāmro etke kom̧ro ej loļo̧k baam̧le eo an. Kōmro eaar uwaak bwe ewōr tarrin in 3,000 membōr ro rej pād ilo stake eo aer. Innām ikar kajjitōk ippān, “Jeff, ilo aolepen m̧oko kom̧ro naaj kar loļo̧k er joteenin, ba n̄an kom̧ro etke Irooj ekar jilkintok kom̧ n̄an ijin.”

Menin, Jeff eaar jino en̄jake im jino an kwaļo̧k n̄an komro jet iaan inepata ko an im jet menin kōnono ko me ej an wōt juon baam̧le. Kōm kar jino kwaļo̧k pedped in katak ko an gospel eo an Jisōs Kraist. Kōmro kar kajjitōk ippāer n̄an kōm̧m̧ane jet men ko rekkar me remaron̄ jino idajon̄jon̄e ak ilo iien kane tok enaaj bōk n̄an m̧ōņōņō im lan̄lōn̄ eļap. Innām Būreejtōn Whitworth ekar leļo̧k n̄an Jeff juon kōjeraam̧m̧an an priesthood n̄an jipan̄ er anjo̧ ioon apan̄ ko. Jeff im Heather raar errā n̄an kōm̧m̧ane ta eo kom̧ro ekar kajjitōk ippāer n̄an kōm̧m̧ane.

Juon iiō tokālik, ekar aō iien em̧m̧an n̄an lale an Jeff peptaiji kōrā eo ippān, Heather, juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Rej kiiō kepooj er make n̄an deļo̧n̄e tampeļ eo n̄an liāp āinwōt juon baam̧le n̄an indeeo im indeeo. Loļo̧k eo am̧ ekar ukōt mour ko aerro jim̧or ilo kanniōk im jetōb.

Irooj eaar kwaļo̧k:

“Irooj eaar kean̄: kōn menin “kwōn niknik; jutak ilo opij eo me Iaar jitōn̄ n̄an eok; rie ro reban, kotak lōn̄ļo̧k pā ko rej allitoto, im kōkajoor bukwe ko rem̧ōjņo̧” (Katak im Bujen Ko 81:5).

“Im ilo kōm̧m̧ani men kein kwo naaj kōm̧m̧an eļap em̧m̧an n̄an armej ro am, im kwo naaj iuunm̧aanļo̧k aiboojoj E eo ej am Irooj” (Katak im Bujen Ko 81:4).

Ro jeiū im jatū, Rijilōk Paul ekar kwaļo̧k juon kilen jerbal in karejar n̄an kōj. Ekar kwaļo̧k bwe kōj aolep rej “ānbwinnen Kraist, im ra ko ilo kajju raan” (1 Korint 12:27) im bwe kajjojo ra ilo ānbwinnen emennin aikuj ilo karōk n̄an lale bwe aolep ren lan̄lōn̄. Innām ekar kwaļo̧k juon m̧ool ekajoor me eaar deļo̧n̄e būruwō ke iaar riiti. Ekar ba, “A eļapļo̧k raan ānbwin, ko āinwōt re m̧ōjņo̧, em̧m̧an ren jab jako; im raan ānbwin, ko jej ļōmņak e dikļo̧k aer aiboojoj, jej koorļo̧k aer aiboojoj” (1 Korint 12:22–23; kakkobaba in katak).

Kōn menin, jej aikuji aolep ilo ward im branch ko—ro me remaron̄ in kajoor im ro bōlen rej m̧ōjņo. Aolep rej menin aikuj im aorōk n̄an lan̄lōn̄ ilo aolepān “ānbwinnen Kraist.” Ekkā aō ļōmņak wōn ro rejako ilo iien jar ko ad me ren kar kōkajoor kōj im im kōm̧m̧an bwe jen juon wōt.

Elder D. Tood Christofferson ekar kwaļo̧k: “Ilo Kabun̄ in jejjab wōt ekkatak kōn katak ko rem̧ool, jej bar en̄jake aorōk eo an. Āinwōt ro ānbwinin Kraist, membōr ro an Kabun̄ rej katakin n̄an doon ilo mour in jen raan n̄an raan. Ejjeļo̧k iaad en ewāppen. … Āinwōt ro ānbwinin Kraist, jej mour kake katak ko im naan ko n̄an leļo̧k ‘jipan̄’ ilo ad en̄jake n̄an ‘mour ippān doon ilo iakwe’ [Katak im Bujen Ko 42:45]” (“Why the Church,” Liahona, Nov. 2015, 108–9).

Ilo 1849, Brigham Young ekar wōr juon ettōņak eo ekar lo Rikanaan Josep Smith tōl juon jarlepju in sip im goat eļap. Jet iaan mennin mour kein rekar kilep im aiboojoj; jet reddik im ettonoon. Brigham Young ekar keememej kalimjōk mej ko mejen Rikanaan Josep Smith im ba, “Josep, kobōk ro rej make wōt … me ijjan̄in kar loe ilo mour e aō; ta eo kwoj tin kōm̧m̧ane n̄an er?” Rikanaan eo, eo ekar jab lukkuun n̄ūrbōktak kake sip ko, ekar uwaak, “[Brigham,] er aolep em̧m̧an im kar pād ilo jikier.”

Ke Būreejtōn Young ekar ruj, ekar meļeļe bwe n̄e Kabun̄ in enaaj kar aiintok aolep “siip im goat,” ej an eddo n̄an bōktok er aolep im kōm̧m̧an bwe ren kile aorōk eo aer ilo aer bōk jikier ilo Kabun̄ in. (Adapted from Ronald W. Walker, “Brigham Young: Student of the Prophet,” Ensign, Feb. 1998, 56–57.)

Ro jeiū im jatū, ilo ekōnono in aō ekar itok ke iaar lukkuun ļōmņak kōn juon eo ejjab kiiō pād ilo Kabun̄ in an Jisōs Kraist. Ilo jidik iien inaaj kōnono n̄an kajjojo iaer. Elder Neal A. Maxwell ekar kwaļo̧k bwe “kajjojo armej rej epake doon—ak rejjab lukkuun bōk kuņaer ilo—Kabun̄ in. Reban deļo̧n̄etok im̧ōnjar eo, ak rej diwōjļo̧k. Errein ro aikuji im eļap an Kabun̄ in aikuji er, ak wōn, ilo m̧ōttan, ‘rej mour ijello̧kun Anij ilo laļ’ [Mosaia 27:31]” (“Why Not Now?,” Ensign, Nov. 1974, 12).

Ij ālij kajjitōk eo an Būreejtōn Russell M. Nelson eo ejitenbōro ke eaar jino kōnono n̄an membōr in Kabun̄ in. Ekar ba: “Kiiō, n̄an membōr ro an Kabun̄ in ij ba: Dāpij wōt iaļen bujen eo. Ami kallim̧ur n̄an ļoor Rilo̧mo̧o̧r eo n̄an kōm̧m̧ani bujen ko Ippān innām kōjparoki bujen ko renaaj kōpeļļo̧k kōjām n̄an kajjojo kōjeraam̧m̧an ko an jetōb im iien ko rem̧m̧an renaaj waļo̧k n̄an em̧m̧aan ro, kōrā ro, im ajri ro kajjojo jikin.”

Eaar akweļap: “Kiiō, eļan̄n̄e em̧ōj am̧ etal jān iaļ in, ij karuwaineneik eo kōn aolep kōjatdikdik ilo būruwō jouj im ro̧o̧ltok. Jekdo̧o̧n ta inepata ko ami, jekdo̧o̧n ta apan̄ ko ami, ewōr juon jikin n̄an kom̧ ilo menin, Kabun̄ eo in Irooj. Kom̧ im epepen ko rejjan̄in lo̧tak naaj jeraam̧m̧an kōn jerbal ko ami kiio ro̧o̧ltok n̄an iaļen bujen in” (“Jen Wōnm̧aanļo̧k Wōt,” ak Kweilo̧k eo Eļap, Epr. 2018, 7; katak eo eaorōk kar kobaiktok).

Ij kwaļo̧k aō kam̧ool kōn E, em̧ool Jisōs Kraist, Maajta an jerbal in karejar im Rilo̧mo̧o̧r an aolep. Ij kajjitōk ippād wōj n̄an pukot “pobrecitos,” ro “rijeram̧ōļ” ro rijeram̧ōļ ipeļakid. En̄in ej aō kōjatdikdik jar ilo etan Jisōs Kraist, amen.