Rej Jamin Anjo̧, Jej Jamin Wōtlo̧k

Rikanaan eo ad ejitenbōro, Būreejtōn Russell M. Nelson, ekar ba ilo kweilo̧k eo eļap ļo̧k: “Ilo tōre in ekauwōtata eo me Rijilōk Paul eaar kanaan, Setan eban bar kajjieon̄ ņooj an kakkure karōk eo an Anij. Ainikien ko renana. Kōn menin, wāween eo wōt n̄an mour ilo jetōb ej n̄an kwaļo̧k bwe Anij en anjo̧ ilo mour ko ad, n̄an jeļā ron̄ Ainikien, im n̄an kōjerbal kajoor eo ad n̄an aiintok Israel.”¹

Ilo ad ļōmņake kajjitōk eo an rikanaan eo n̄an ron̄jake ainikien Anij, būruwōd ej kwaļo̧k ke ak kapene? Jen keememej kapilōk in kar letok ilo Jekab 6:6: “Aaet, rainin, eļan̄n̄e kom̧ naaj ron̄jake ainikien, jab kapene būruōmi; bwe etke kom̧ naaj kōņaan mej?” Jen kwaļo̧k bwe Anij en anjo̧ ilo mour ko ad.

Elmen ad maron̄ kōtļo̧k bwe Anij en anjo̧ ilo mour ko ad im jab rikapo eo? Ilo Katak im Bujen Ko 6:34 jej riit, “Kōn menin, jab mijak, bwij jidikdik in sip; kōm̧m̧an em̧m̧an; laļ im hell ren koba ņae kom̧, bwe eļan̄n̄e kom̧ij ekkal ioon Aō ejm̧aan, rej jamin anjo̧.” Ej juon kallim̧ur eaorōk. Men̄e laļ im hell remaron̄ koba ņae kōj, rej jamin anjo̧ eļan̄n̄e jej kālet bwe Anij en anjo̧ ilo ad kalōk mour ko ad ioon An ejm̧aan.

Kōnono n̄an rijilōk ro An, Jisōs Kraist ekar kwaļo̧k kōn armej eo emāletlet im armej eo ebwebwe, kar je ilo Matu jebta 7 in Kallim̧ur Ekāāl. Elōn̄ iami em̧ōj ami ron̄ al eo an Būraimere “The Wise Man and the Foolish Man.”² Eļan̄n̄e em̧ōj am̧ kar bōk iien im keidi eoon emen ilo al in, kwonaaj lo bwe eoon 1 im 2 ejjeļo̧k oktak jen eoon 3 im 4. Jim̧or armej eo emāletlet im armej eo ebwebwe raar kalōk m̧weeo im̧weer. Raar kōņaan kalōk baam̧le eo aer kōn juon em̧ eo epoļemen im jokne. Raar kōņaan mour lem̧ōņōņō ippān doon indeeo āinwōt juon baam̧le, āinwōt kwe im n̄a. Jekjek ko raar āinwōt juon: “Ej bun̄ wōt im ibwijleplep ej waļo̧k.” Jej al jiljino alen n̄e jej al kake. Oktak eo de eo ej bwe armej eo ekar ekkal ioon bar im m̧weeo ej jutak wōt, ak armej eo ebwebwe ekar kalōk m̧weeo im̧ōn ioon bok im m̧weeo im̧ōn ej bun̄. Kōn menin, n̄e elukkuun tōt okraņ pedped ko ad, im menin enaaj juon jem̧ļo̧k eo eaorōk im indeeo.

Ij kōjatdikdik im jar bwe jenaaj aolep loe im pen wōt ilo pedped eo ilo ad kalōk mour eo ad ilju im jeklaj. Jej riit ilo Hilamōn 5:12: “Im kiiō, ro nejū m̧aan, keememej, keememej bwe ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami; bwe n̄e devil enaaj jilkintok kōto ko an rekajoor, aaet, m̧ade ko an ilo aire, aaet, n̄e aolep wōt dekā im lan̄ rekajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄.”

En̄in ej juon kallim̧ur jān Anij! N̄e jej kalōk pedped eo ad ippān Jisōs Kraist, jej jamin wōtlo̧k! Ilo ad lukkuun niknik n̄an jem̧ļo̧kin, Anij enaaj jipan̄ kōj kalōk mour ko ioon ejm̧aan eo An, im aor ko an hell rej jamin naaj anjo̧ [iood] (Katak im Bujen Ko 10:69). Jeban ukōt ta ko rej itok, ak jemaron̄ kālet elmen ad pojak n̄an ta eo ej itok.

Jet iaad remaron̄ ļōmņak, “Gospel in em̧m̧an, jemaron̄ likūti ilo mour ko ad, emaron̄ juon katten ilo juon wiik.” Etal n̄an m̧ōnjar juon alen ilo juon wiik ejjab bwe n̄an ekkaļ ioon ejm̧aan eo. Aolepen mour ko ad eaikuj obrak kōn gospel eo an Jisōs Kraist. Gospel in ejjab m̧ōttan mour in ad, ak mour eo ad ej lukkuun m̧ōttan gospel eo an Jisōs Kraist. Ļōmņak Kake. Em̧ool ke menin? Mour in ad ej m̧ōttan wōt karōk in lo̧mo̧o̧r im mour ijo eutiejtata.

Anij ej Jemedwōj Ilan̄. E ej iakwe kōjwōj aolep. E ejeļā iaļ ko ad jen ad jeļā ko ad make. E ejeļā ejjab wōt laajrak in mour ko ad. Anij ejeļā laajrak ioon laajrak in mour ko ad.

Jouj ļoor rikanaan eo ad emour, kapilōk eo emāletlet an Būreejtōn Nelson. Āinwōt an kar ļook ilo Katak im Bujen Ko 21:5–6:

“Bwe naan an kom̧ naaj bōke, āinwōt n̄e jān Lo̧n̄iin make, ilo aolep kōmmaanwa im tōmak.

“Bwe jān kōm̧m̧ani men kein aor ko an hell rej jamin anjo̧ ņae kom̧; aaet, im Irooj Anij enaaj kajjeplōklōk kajoor ko an marok jān imami, im kōm̧m̧an bwe lan̄ ko ren wūdiddid n̄an em̧m̧an eo ami, im aiboojoj an Etan.”

Kōn un in, rej jamin anjo̧, im jej jamin wōtļo̧k!

Ij kam̧ool bwe Kraist enaaj bar itok kein karuo āinwōt An kar jinoin, ak ilo tōre in enaaj ilo aiboojoj eļap im utiejtata. Ij kōjatdikdik im jar bwe inaaj pojak n̄an bōk E, men̄e ilo mour in ak turājet eo juon. Ilo ad keememe jijen in Ijtō in eaiboojoj, ij kōjatdikdik, bwe kōn Pinmuur eo an Jisōs Kraist im kajoor in Jerkakpeje eo An (lale Moronai 7:41), inaaj maron̄ etal im ioon aō Rikōm̧anm̧an im ba, “Kom̧m̧ool.” Ilo etan Jisōs Kraist, amen.