Jisōs Kraist: Rikāājmour Jetōb eo Ad

Ro jeiū im jatū jitōnbōro, ilo jibbon̄ in Ijtō in eaibojooj buruō ej m̧ōņōņō ilo aō keememejļo̧k juon kōm̧m̧an elukkuun kabwilōn̄lōn̄, lukkuun kwojarjar, im jeban maron̄ jon̄e me ekar bōk jikin ilo aolep bwebwenato an armej—katok in pinmuur eo an ad Irooj Jisōs Kraist. Naan ko rewājepdik an rikanaan Aiseia ej kōļapļo̧k em̧m̧an im meanwōr eo an Rilo̧mo̧o̧r im pinmuur eo an ilo etan aolep ajri ro nejin Anij.

“E m̧ool Ear ineek en̄taan ko ad, im bōkļo̧k būrom̧ōj ko ad; a jaar ļōmņak bwe Anij ear m̧an E, im den̄ļo̧k E, im kaen̄taan E.

“A em̧ōj wākare E kōn jero̧wiwi ko ad, im kakinejnej E kōn bōd ko ad; kaje eo an adwōj aenōm̧m̧an ear pād ioon, im kājmour kōj kōn depetpet ko An.”¹

Ilo an kar make ajeļo̧k mour eo An n̄an bōk ioon jerawiwi ko an aolep armej, kar kaen̄taan E ilo aer kar dilake pein ioon debwāāl, eļļā im anjo̧ ioon mej ālkin jilu raan,² Jisōs ekar leļo̧k eļapļo̧k meļeļein kain̄i eo an Kwojkwoj in Kijoone eo ekwojarjar me kar leļo̧k n̄an ri Israel ro ilo iien ko etto.³ N̄an kakūrm̧ool kanaan eo, E ekar aje ānbwinnin make im bōtōktōkin āinwōt katok indeeo im eļap,⁴ kōjerbale kōkaļļe in manit ko me kar kōjerbali ilo iien kakeememej Kwojkwoj in Kijoone eo an Irooj.⁵ Ilo kōm̧m̧ane menin, Kraist ekar en̄jake en̄taan ilo jetōb im ānbwin me armej rejjab maron̄ meļeļe kake. Rilo̧mo̧o̧r Make ekar ba:

“Bwe lo, N̄a, Anij, Iaar en̄taan kōn men kein n̄an aolep, …

“En̄taan eo eaar kōm̧m̧an bwe N̄a, em̧ool Anij, eo Eļaptata jān aolep, n̄an wūdiddid kōnke metak eo, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb—im Ikar kōņaan bwe In maron̄ kar jab idaak kap eo emeo̧, im jenlik—

“Mekarta, aiboojoj n̄an Jema, im Iaar bōke im kadedeļo̧k m̧aanjāppopo ko Aō n̄an ro nejin armej raņ.”⁶

Kraist ekar jouj ilo an kakūrm̧ool ankilaan Jemān⁷ kōn katok eo An eļap im etūriam̧o. E ekar eļļā ioon mej an ānbwin im jetōb,⁸ kar kwaļo̧k n̄an laļ in itok jān Wōtļo̧k eo,⁹ ej letok n̄an kōj maron̄ aiboojoj n̄an bōk lo̧mo̧o̧r indeeo.¹⁰

Jisōs ekar E wōt eo ekar maron̄ kile katok indeeo im wānōk in n̄an kōj wōj aolep.¹¹ Kar kālet E im kapiti ilo mour eo m̧okta ilo Ko̧o̧njeļ eo Eļap ilan̄, aeet m̧okta jān an kar laļ in ejaake.¹² N̄an kōmeļeļeikiļo̧k, Ekar ļōtak tok jān juon m̧am̧a ilo mour in, E ekar maron̄ mej ilo ānbwinnin, ak jān Anij, āinwōt Nejin Jemān eo Emake Wōt, E ekar maron̄ bōk kajoor n̄an ajeļo̧k mour eo An make innem bar bōke.¹³ N̄an kōmeļeļeikļo̧k, Kraist ekar mour kōn juon mour ewāppen me ekar ejjeļo̧k lipijinjin im ekar lukkuun erreo im, kōn menin, anemwkoj jān kaje ko an kien ko rekwojarjar.¹⁴ Ilo jet iien ko raorōk Rikanaan Josep Smith ekar katakin:

“Lo̧mo̧o̧r emaron̄ jab itok n̄an laļ in n̄e ejjab kōn pinmuur eo an Jisōs Kraist.

“Anij … ekar kōpooj juon katok n̄an letok Nejin Emake Wōt, eo aikuj jilkintok ilo iien eo ekkar n̄an… kōpeļļo̧k juon kōjem bwe aolep armej ren maron̄ deļo̧n̄ n̄an im̧aan mejān Irooj.”¹⁵

Kōn pinmuur eo An, Rilo̧mo̧o̧r ekar joļo̧k aolep jekjek ko rejelet mej ilo ānbwin ilo ejjeļo̧k watōk,¹⁶ Ekar jab joļo̧k eddo ko ad kajjojo n̄an ukweļo̧k jān jerawiwi ko reļļap jekar kōm̧m̧ani.¹⁷ Ijjelo̧kin, E ekar erļo̧ke n̄an kōj juon kūr ejeņoļo̧k n̄an kōkm̧anm̧an aolep men n̄an Jemed Indeeo. Kōn Jisōs Kraist im katok in pinmuur eo An, jemaron̄ en̄jake juon oktak ekajoor in kōļmenļo̧kjeņ im bōro, bōktok m̧wil ko rekāāl, jim̧oor n̄an Anij im n̄an mour.¹⁸ N̄e jej m̧ool ilo ad ukweļo̧k jān jerawiwi ko ad, leļo̧k ukōt buruōd im ankilaad n̄an Anij im kien ko An, jemaron̄ bōk An jeorļo̧k in bōd im en̄jake im̧we eo an Jetōb Kwojarjar eo An ilo eļapļo̧k. Kōn tūriam̧o̧, jej kajejļo̧k ad en̄jake m̧wūlaļ in en̄taan eo an Rilo̧mo̧o̧r me ekar anjo̧ jān e.¹⁹

Menin letok in ukweļo̧k ej juon kōkaļļe in jouj an Anij n̄an ajri ro Nejin im ej kwaļo̧k kōn kajoor eo An me jab maron̄ keidi n̄an jipan̄ kōj eļļā ioon jerawiwi ko reļļap jekar kōm̧m̧ani. Ej barāinwōt juon kam̧ool kōn kijenmej im kem̧m̧aanwa an Jemed eo ej iakwe kōn m̧ōjņo im mellijon̄ ko ad. Būreejtōn Russell M. Nelson, rikanaan eo ad emour, ekar kōnono kōn menin letok in āinwōt “Ej kii eo n̄an lem̧ōņōņō im aenōm̧m̧an ilo kōļmenļo̧kjeņ.”²⁰

Ro jeiū im jatū, ij kam̧ool n̄an kom̧ bwe ilo ad m̧ool in ukweļo̧k jān jerawiwi ko ad,²¹ jej kōtļo̧k bwe katok in pinmuur eo an Kraist n̄an lukkuun jerbal ilo mour ko ad.²² Jenaaj anemkwoj jān to ko an jerawiwi, lo m̧ōņōņō ilo mour in, im maron̄ bōk lo̧mo̧o̧r indeeo, eo kar kōpooje jān jinoin pedped eo an laļ n̄an aolep ro rej tōmak ilo Jisōs Kraist im itok n̄an E.²³

N̄an kōmeļeļeikļo̧k menin letok in lo̧mo̧o̧r eo, Rilo̧mo̧o̧r ekar letok n̄an kōj deor im kaeņōm̧m̧an ilo ad jelm̧ae kaen̄tanaan ko, kapo ko, im m̧ōjņo ko an mour in, ekoba jekjek ko jej jelm̧aeiki ilo iien in ajedeed nan̄inmej in ekapopo. Imaron̄ kallim̧ur n̄an kom̧ bwe Kraist ejeļā kōn apan̄ ko jej jelm̧aiki ilo mour in. Emeļeļe bwe metak ko remeo̧, en̄taan, im metak ilo ānbwin barāinwōt apan̄ ko ilo en̄jake im jetōb ko me jej jelm̧aeiki. Buruōn Rilo̧mo̧o̧r robrak kōn tūriam̧o̧, im E ej aolep iien bojak n̄an jipan̄ kōj. Menin emaron̄ bōk jikin kōnke E make kar en̄jake im ekar bōk Ioon Make ilo kanniōk metak in m̧ōjņo ko im nan̄inmej ko.²⁴

Kōn inem̧m̧an im ettā bōro, Ekar walaļtak im pād ilaļ in aolep men ko otemjej im kar m̧ōņōņō in jelm̧ae matōrtōr, jum̧ae, im kajirere jān armej, im kakinejnej e kōn bōd ko reļļap im en̄taan ko ad. Ekar en̄taan kōn aolep men kein kōn kōj aolep, im bōk Ioon Make jerawiwi ko an laļ,²⁵ im kōn menin ej erom̧ juon ad rikāājmour eo ad eļap ilo jetōb.

Ilo ad epaakeļo̧k E, ajeļo̧k kōj make ilo jetōb n̄an kōjparok eo An, jenaaj maron̄ bōk iood ine eo An, eo epidodo, im An eddo, eo emera, em̧ool pukot kaeņōm̧m̧an im kakkije eo kar kallim̧ur kake. Eļaptata, jenaaj bōk kajoor eo jej aolep aikuji n̄an eļļā ioon men ko reppen, m̧ōjņo, im buromōj ko an mour in, eo me elukkuun pen n̄an jelm̧aiki n̄e ejjab kōn jipan̄ im kajoor eo An.²⁶ Jeje ko rekwojarjar rej katakin kōj n̄an “joļo̧k men in eddo ko am̧ ioon Irooj, im Enaaj bo̧ur eok.”²⁷ “Innām Anij en lewōj n̄an kom̧ bwe eddo ko [ad] ren mera, kōn lan̄lōn̄ [An] Nejin.”²⁸

Pija

Regina im Mario Emerick

Epaake jem̧ļo̧kin ļo̧k iiō eo ļo̧k, ikar ekkatak kōn jako eo an ruo ripālele, Mario im Regina Emerick, ro rekar lukkuun tiljek n̄an Irooj im rekar jako 4 raan kōtaan raan ko rekar jako ie, kōn wōt kauwōtata in nan̄inmej in COVID-19.

Juon iaan ļaddik ro nejim, eo ej kiiō jerbal āinwōt juon bisop ilo Brazil, ekar kwaļo̧k naan in n̄an eō: “Ekar lukkuun pen n̄an eō ke ro jinō im jema rekar jako jān mour in ilo jekjek in, ak ekar alikkar ilo aō en̄jake pein Irooj ilo mour eo aō ilubwiljin iien ko rekaburomōjmōj, kōnke ikar en̄jake kajoor im aenōm̧m̧an me ekar jarjar jān jeļā eo aō make. Kōn tōmak eo ilo Jisōs Kraist im Pinmuur eo An, ikar bōk jipan̄ jān lan̄ n̄an kōkajoorļo̧k im kaeņōm̧m̧an ro uwaan baam̧le eo aō im aolep ro rekar jipan̄ kōj ilo iien idajon̄jon̄ in. Men̄e menin kabwilōn̄lōn̄ ko me aolep rej kōjatdikdik kaki rejjab waļo̧k, n̄a make ij juon rikam̧ool kōn oktak eo me ekar bōk jikin ilo mour eo aō im ilo mour eo an ro uwaan baam̧le eo aō. Ikar en̄jake juon aenōm̧m̧an kar jab maron̄ kōmeļeļeiki me ej un̄ūr buruō, letok n̄an eō kōjatdikdik im lōke ilo iakwe eo an Rilo̧mo̧o̧r n̄an eō im ilo karōk eo ekam̧ōņōņō an Anij n̄an ajri ro Nejin. Ikar ekkatak bwe lukkuun raan ko me rekaburomōjmōj, pein tūriam̧o eo an Rilo̧mo̧o̧r rej aolep iien erļo̧k n̄e jej kappukot E kōn aolepān buruōd, kajoor, ļōmņak, im kajoor.

Pija

Baam̧le eo an Emerick

Ro jeiū im jatū, ilo raan in Ijtō ilo Jabōt in, ij kwaļo̧k aō kam̧ool bwe Jisōs ekar bar jerkak jān mej im bwe E ej mour. Ij kam̧ool n̄an kom̧ bwe kōn E im katok in pinmuur eo An eļap, Rilo̧mo̧o̧r ej letok n̄an kōj wāween ko n̄an eļļā jān mej, jim̧or ilo kanniōk im jetōb. N̄an kakobaba n̄an kōjeraam̧m̧an ko reļļap, E ear letok n̄an kōj kaeņōm̧m̧an im kam̧ool ilo iien ko reppen. Ij kallim̧ur n̄an kom̧ bwe ilo ami likūt ami lōke ilo Jisōs Kraist im Pinmuur eo An, niknik ilo tōmak in ad n̄an jem̧ļo̧kin, jenaaj lan̄lōn̄ kōn kallim̧ur ko an Jemedwōj Ilan̄ ejitōnbōro, eo ej kōm̧m̧ani aolep men ko n̄an jipan̄ kōn kajoor eo An n̄an kōjepļaak kōj n̄an im̧aan Mejān juon raan. En̄in ej jerbal eo An im An aibojooj!²⁹ Ij kam̧ool n̄an kom̧ bwe Jisōs ej Kraist eo, Ripinmuur eo an laļ, Messaia eo kar kallim̧ur kake, jerkakpeje eo im mour eo.³⁰ Ij kwaļo̧k m̧ool kein n̄an kom̧ ilo et eo ekwojarjar Etan, nejin eo emake nejin Jemed Ilan̄, ad Irooj, Jisōs Kraist, amen.