Kweilo̧k Eo Eļap
Bisop ro—Seperd ro n̄an Siip ko an Irooj
Eprōļ 2021 kweilo̧k eo eļap

Bisop ro—Seperd ro n̄an Siip ko an Irooj

Jān Elder Quentin L. Cook

Jān Doulul eo an Jon̄oulruo Rijilōk ro

Bisop eo ewōr juon an jerbal eaorōk n̄an jerbal āinwōt juon seperd n̄an tōl diktak in epepen in n̄an Jisōs Kraist.

Em̧m̧aan ro jeiū im jatū rejitenbōro ilo priesthood, juon iaan ļain ko rem̧m̧antata ilo al eo ej ba , “Shall the youth of Zion falter?”1 Ij en̄jake ilo būruwō im kwaļo̧k n̄an uwaake kajjitōk in ke “Jaab!”

N̄an kōm̧m̧an bwe uwaak in en dāpij wōt m̧ool in, ij kam̧ool rainin bwe n̄an jipan̄ diktakin epepen in ilo juon tōre apan̄ ko im kapo ko ej juon eddo eaorōk kar leļo̧k n̄an ro jinen im jemen im bisoprik ro jān Jemedwōj Ilan̄.2 Kōtļo̧k bwe in kōmeļeļeik aorōk eo an juon bisop jān juon aō make imminene.

Ke iaar juon tikōn, baam̧le eo aō kar em̧akūtļo̧k n̄an juon em̧ ekāāl ilo juon ward eoktak. Ikar kūlaaj ratimjuon, kōn menin ikar bar pād ilo juon jikuuļ ekāāl. Ekar wōr jet kurup in likao ro rūm̧m̧an ded ilo doulul eo an tikōn ro. Aolepān ro jineer im jemāer rekar aolep membōr ro reniknik. Jinō ekar jino niknik, jema ekar juon eo ej make wōt ilo elōn̄ jekjek ak ekar jab juon membōr eo eniknik.

Rikakpilōklōk eo kein karuo ilo bisoprik eo,3 Brother Dean Eyre, ekar juon ritōl eo ewūjlepļo̧k. Ke ikar kāāltok n̄an ward eo, juon m̧akūtkūt an baba ro im ļaddik ro nejier kar kōjjeļļā kake n̄an Bear Lake—emaron̄ 40 m̧aiļ (65 km) ettoļo̧k. Ij tōmak iban pād bwe baba eban pād. Ak Brother Eyre ekar letok juon kajjitōk bwe in etal ippān. Ekar ilo jouj im ettā kōn jema im kwaļo̧k aorōk bwe in pād ippān ro uwaan doulul eo an tikōn ro. Kōn menin iaar errā bwe in ilo̧k ippān Brother Eyre, im ekar wōr juon aō en̄jake em̧m̧an.

Brother Eyre ekar kwaļo̧k juon waanjon̄ak in iakwe Āinwōt Kraist eo ekabwilōn̄lōn̄ n̄an kakūrm̧ool eddo eo an bisoprik n̄an jipan̄ ro jinen im jemān lale im oņake jodikdik ro. Eaar letok n̄an eō juon ijjino eo em̧m̧an ilo ward eo ekāāl im ekar juon ritōl n̄an n̄a.

Jejjo̧ allōn̄ tokālik iaar etal n̄an juon mijen ilo 1960, Brother Eyre eaar mej kōn kāānjōr ke ej 39 an iiō. Eaar likūt kōrā eo im ajri ro ļalem nejierro, aolep reddikļo̧k jān 16 iiō. Ļaddik ro nejin rōrūttotata, Richard im Christ Eyre, raar ba n̄an n̄a ke ilo an kar jako jemāer, bisoprik ro raar jipan̄ im oņaka er im ļaddik ro jatier reddik im sister eo aer kōn iakwe Āinwōt Kraist, eo im ij m̧ōņōņō.

Ro jinen im jemān ewōr aer eddo n̄an baam̧le ko aer.4 Būreejtōnji ro an doulul remaron̄ bar leļo̧k jipan̄ im tōl ko raorōk n̄an ro uwaan doulul eo n̄an jipan̄ er kōļapļo̧k eddo ko im kajoor eo an Priesthood eo an Aron n̄an mour ko aer.5

Pija
Seperd ro ippān siip ko

Rainin jibadbad eo aō ej n̄an kōnono kōn bisop ro im rikakpilōklōk ro aer, ro maron̄ kūr āinwōt “seperd n̄an siip ko an Irooj”—kōn katak in n̄an erom̧ seperd ro n̄an diktak in epepen in.6 Ekabwilōn̄lōn̄ bwe Rijilōk Piter ekar kūr Jisōs Kraist āinwōt “Seperd eo im Bisop n̄an jetōb ko ami.”7

Ewōr ļalem wāween eddo ko rej pād ippān bisop eo ilo an tōl ward eo:

  1. E ej pris eo eutiej ej tōl ilo ward eo.8

  2. E ej būreejtōn eo an Priesthood eo an Aron.9

  3. E ej juon riekajet.10

  4. Ej lale jerbal in lo̧mo̧o̧r im mour ijo ilōn̄tata, ekoba kea kōn ro repād ilo aikuj.11

  5. Ej lale aolep rekoot ko, jāān ko, im wāween kōjerbal im kōjparok mōnjar ko.12

Ilo jerbal eo an āinwōt pris eo eutiej ej tōl, bisop eo ej juon “ritōl jetōb” ilo ward eo.13 Ej juon “rikaļoor eo etiljek an Jisōs Kraist.”14

N̄an kakkobaba, “bisop eo ej lale jerbal in lo̧mo̧o̧r im mour ijo ilōn̄tata ilo ward eo.”15 Bisop eo emaron̄ leļo̧k ijjitōn̄ in eddo jān raan n̄an raan n̄an kwaļo̧k gospel eo, kōkajoorļo̧k membōr ro rekāal im rej ro̧o̧ltok, jerbal in karejar, im tampeļ im jerbal in menmenbwij n̄an būreejtōnji ro an doulul eo an elder im Kōrā ro.16 Bisop eo ej lolorjake jerbal in ilo ward ko̧o̧njeļ eo im ko̧o̧njeļ eo an jodikdik ilo ward eo.

Bisop eo ewōr juon an jerbal eaorōk n̄an jerbal āinwōt juon seperd n̄an tōl diktak in epepen in, ekoba ro rūm̧m̧an ded, n̄an Jisōs Kraist.17 Būreejtōn Russell M. Nelson ekar kwaļo̧k jerbal eo an bisop eo im rikakpilōklōk ro an. Ekar kwaļo̧k bwe “eddo eo jinoin tata im eļap tata ej n̄an kea kōn likao ro im jiron̄ ro [an] ward eo”18 Bisoprik ro rej jipan̄ ro jinen im jemān n̄an lale im oņake ajri ro im jodikdik ro ilo ward eo. Bisop im būreejtōn eo an Doulul eo an Jiron̄ ro ilo ward eo rej kapilōk ippān doon. Rej kajjieon̄ in jipan̄ jodikdik ro mour kōn jon̄ak ko ilo N̄an Kōkajoorļo̧k Jodikdik ro, karbab n̄an būki kain̄i ko, im kōm̧m̧an im kōjparok bujen ko.

Komaron̄ ba, “Etke bisop eo eļap wōt an joļo̧k iien ippān jodikdik ro?” Irooj eaar ejaake Kabun̄ in An n̄an kadedeļo̧k men ko raorōk. Kōn menin, doulul eo an Kabun̄ in An ekar juon elaajrak bwe en wōr an bisop eo eddo. Ewōr an eddo n̄an aolepān ward eo, ak ak ebar wōr an eddo n̄an doulul eo an pris ro.19

Likao ro me rej pris im leddik ro me ejja ilo iiō eo wōt repād ilo juon jikin eo eļap an aorōk ilo mour ko aer n̄an eddōkļo̧k. Ilo iien in ekadu kitien, rej kōm̧m̧ani jokālet ko me raorōk an mour in. Rej ļōmņak n̄e rekarbab er n̄an tampeļ, jerbale juon mijen,20 kajjieon̄ in m̧are ilo tampeļ, im pojak n̄an jerbal ko aer ilo mour. Jokālet kein, n̄e rekōm̧m̧an, mour in jetōb im imminene ko renaaj pād ilo aolepān mour ko aer. Bisop ro, jouj jeļā bwe joļo̧k jidik iien ippān juon pris edik, juon jiron̄, ak juon rūm̧m̧an ded emaron̄ jipan̄ er meļeļe kōn kajoor in Pinmuur eo an Jisōs Kraist n̄an er. Emaron̄ kwaļo̧k juon visōn me enaaj im̧we aolepān mour eo aer.

Pija
Bisop Moa Mahe im rikakpilōklōk ro an

Juon iaan waanjon̄ak ko rem̧m̧antata iaar loe ippān juon bisop eo ekar leļo̧k visōn in em̧m̧an n̄an jodikdik ro nejin ej Bisop Moa Mahe. Ekar bisop eo jinointata kar kūri ilo San Francisco Togan ward.21 Ekar juon eo ekar em̧m̧akūt tok jen Vava’u, Tonga. Ward eo an epād epaake San Francisco, California airport, ijo ikar jerbal ie.22

Pija
Ward eo an Ritonga

Ward eo ekanooj lōn̄ jodikdik ie, enan̄in baam̧le ko rekar em̧m̧akūt tok n̄an Amedka in. Bisop Mahe ekar jab katakin wōt er ilo naan im kōn waanjon̄ak elmen rijilōk ro rōwānōk an Jisōs Kraist, ak ekar bar jipan̄ leļo̧k n̄an er juon visōn in ta eo remaron̄ erom̧ im kar jipan̄ er kōppopo n̄an tampeļ, mijen, jeļāļo̧kjeņ, im jerbal. Ekar jerbal enan̄in ralitōk iiō, im ettōņak im kōtmen ko an n̄an jodikdik rekar m̧ool.

Enan̄in 90 bōjjāān in likao ro ilo doulul ko an Priesthood eo an Aron rekar jerbale mijen ko. Jon̄oul ļalem likao ro im jiron̄ ro rekar ro jinoin tata jān baam̧le ko aer kar deļo̧n̄e.23 Eaar ioon būrinjibōļ eo an high school eo (ejjab jān tōmak in ad), im rej ejaake juon jem̧jerā n̄an jerbal ippān doon kilen jipan̄ kajjojo jodikdik ro bōki kōttōbar ko im anjo̧ ioon būrabōļōm̧ ko. Būrinjibōļ in ekar ba n̄an n̄a ke Bisop Mahe ekar jipan̄ e jerbal ippān aolep ro rej em̧m̧akūt tok jān aolep kabun̄ ro rej m̧ōjņo. Jodikdik ro rejeļā bwe bisop eo ekar iakwe er.

Ekaburom̧ōjm̧ōj, Bisop Mahe ekar mej ke ej jerbal āinwōt juon bisop. Ijamin meļo̧kļo̧k ilomej eo an em̧m̧an. Ekar kanooj obrak armej. Kumi in al eo ekar kobain elōn̄ļo̧k jān 35 membōr ro rem̧m̧an ded ro rekar jerbale mijen ko ak kar pād ilo college im ro rekar jodikdik ilo iien jerbal eo an āinwōt juon bisop. Juon rikōnono ekar kwaļo̧k en̄jake in kam̧m̧oolol jān jodikdik ro im ro rūm̧m̧an ded ilo ward eo an. Ekar kwaļo̧k naan in būrom̧ōj n̄an Bisop Mahe kōn visōn eo ekar leļo̧k n̄an er n̄an kōppopo n̄an mour in im jerbal in jipan̄ eo ekwojarjar. Ak men eo eaorōktata, Bisop Mahe ekar jipan̄ er kalōk tōmak ilo Irooj Jisōs Kraist āinwōt pedped in mour ko aer.

Kiiō, bisop ro, ijo kwoj jerbal ie, ilo intōrpiu ko im iien ko jet, komaron̄ leļo̧k kain visōn in im kalōk tōmak ilo Jisōs Kraist. Komaron̄ leļo̧k kūr ko rekajoor n̄an ukōt m̧wiļ, kōpooj er n̄an mour, im im̧we er n̄an pād wōt ilo iaļen bujen in.

N̄an kakkobaba, komaron̄ jipan̄ jet jodikdik ro rej jum̧ae ro jineer im jemāer kōn men ko me rejjab aorōk.24 Ilo juon tōre n̄e jodikdik ro edik aer jum̧ae ro jineer im jemāer, armej eo ej tōl ilo doulul eo aer im eo ej uwaak ej barāinwōt armej eo me ro jinen im jemān rej jibadōkļo̧k n̄an peba in mālim an tampeļ. Menin elikūt bisop eo ilo juon jerbal eo ej make wōt n̄an kapilōk jim̧or jodikdik eo im ro jineer im jemāer n̄e jum̧ae ej ejaak n̄an juon jepelļo̧k. Bisop ro remaron̄ jipan̄ jim̧or loe men ko raorōk n̄an mijaļ men ko rellōn̄ ak men ko redik aer aorōk. Kōmij rōjan̄ bwe en ejjeļo̧k an bisop ro jerbal in karejar n̄an baam̧le ko bwe en mije iien ko an n̄an jerbal in karejar n̄an jodikdik ro im baam̧le ko ilo kain jekjek rot in.25

Ijeļā kōn juon bisop eo ekar maron̄ in jipan̄ kabōjrak iakweleel eo kōtaan ļaddik eo im ro jinen im jemān, ebōktok aenōm̧m̧an n̄an kapijuknen im kōļapļo̧k wūjlepļo̧k n̄an gospel in. Bisop in ekar jipan̄ ro jinen im jemān meļeļe n̄an kajjieon̄ in juon rikaļooran Jisōs Kraist ekar make wōt aorōktata ijelo̧kin kilen im n̄āāt n̄an kadedeļo̧k jerbal ko an baam̧le.

N̄an joļo̧k eļap iien ippān jodikdik ro, jekdo̧o̧n ijo rej pād ie, ekoba iien ak m̧akūtkūt ko an jikuuļ, bisoprik ro kar kapilōk n̄an leļo̧k kweilo̧k ko rekkar im iien kapilōk ippān ro rūm̧m̧an ded. Ilo an bisop ro maron̄ lukkuun kapilōk ilo men ko rekkar, kōmij rōjan̄ bwe en leļo̧k kapilōk ko ejjeļo̧k jem̧ļo̧kin, men ko me ejjab lukkuun menin ekajet n̄an erreeo n̄an jitōn̄ ro uwaan doulul eo an elder im Doulul eo an Kōrā ro—ekkā būreejtōnji ro ak karejar jeiū em̧m̧aan ro ak kōrā ro. Jetōb enaaj tōl ritōl ro26 n̄an kālet membōr ro rekkar n̄an bōk kapilōk in. Ro renaaj bōk ijjitōn̄ kapilōk in remaron̄ bōk revelesōn. Aaet, rej, iien otemjej kōm̧m̧an ilo ittiņo.

Ritōl ro rej aolep iien wūjlepļo̧k n̄an diktakin epepen in. En̄in ej ijo ro uwaan bisoprik ro rej joļo̧k aer iien ie ilo jerbal in jipan̄ an Kabun̄ in.

Kiiō ikōņaan kwaļo̧k jejjo̧ men ko n̄an jodikdik ro im n̄an bisop ro ad.

Elōn̄ iami ro rem̧m̧an komaron̄ jab bōk juon visōn eo ealikkar kōn wōn kwe im wōn eo komaron̄ in erom̧. Aaet kwonaaj kōm̧m̧ani kālet ko relukkuun aorōk ilo mour eo am. Jouj bōk kapilōk jim̧or jen ro jinōm̧ im jem̧ōm̧ im bisop eo am̧ kōn kālet ko raorōk me repād im̧aam̧. Kōm̧m̧an bwe bisop eo en m̧ōttam̧ im rikakpilōklōk.

Kōm jeļā bwe kwoj ioon apan̄ im kapo ko rej itok n̄an eok kajjojo raan. Jej aolep aikuj ukweļo̧k kajjojo raan, āinwōt an kar Būreejtōn Nelson kwaļo̧k. Jouj kōnono ippān bisop eo am̧ kōn jabdewōt men eo me juon riekajet emaron̄ jipan̄ eok kōm̧m̧an bwe mour eo am̧ en elaajrak ippān Irooj n̄an kōppopo n̄an “jerbal eļap” E ekar lewaj n̄an eok ilo epepen in āliktata.27 Āinwōt an kar Būreejtōn Nelson kar karuwaineneik kom̧, jouj kōkarbab eok make n̄an m̧ōttan jarin tariņae in jodikdik ro an Irooj!28

Kiiō jidik naan n̄an kom̧ bisop ro rem̧m̧an ilo etan ritōl ro im membōr ro an Kabun̄ in. Kōmij lukkuun kam̧m̧oolol kom̧. Kōn oktak ko kar kajjitōk bwe komin kōm̧m̧an ilo iiō ko ļo̧k, bisop ro rejitōnbōro, jouj jeļā ewi jon̄an am̧ iakwe im kam̧m̧oolol kom̧. Ami jerbal n̄an aelōn̄ in kiin̄ in eļap jen maron̄ kōmeļeļeiki. Ilo Kabun̄ in ewōr 30,900 bisop ro im branch būreejtōn ro rej jerbal ipeļaakin laļ in.29 Kōmij nōbar kom̧.

Naan im kūr ko rekwojarjar rej elaajrak robrak kōn jetōb, im make wōt aorōk. Kūr eo an bisop ej kōmeļeļeiki ilo naan kein ilōn̄. Jerbal n̄an Irooj ilo menin ekabwilōn̄lōn̄ ilo elōn̄ wāween ko. Kūr, rejetak, im kōjenolo̧k juon bisop ej juon en̄jake ban meļo̧kļo̧ke. N̄an n̄a, ekitbuuj aiboojoj in en̄jake ko reļļap kōn en̄jake ko rem̧wilaļ. Ej juon en̄jake n̄e juon bisop ej kūr me epen kōmeļeļeiki ilo naan.30

Bisop ro, kōmij rejetak kom̧! Bisop ro, kōmij iakwe kom̧! Kwoj seperd eo em̧ool n̄an siip ko an Irooj. Rilo̧mo̧o̧r eban kowaan eok ilo kūr kein rekwojarjar. Kōn menin ij kam̗ool, ilo Ijtō weekend in, ilo etan Jisōs Kraist, amen.

Kakeememej ko

  1. “True to the Faith,” Hymns, no. 254

  2. Ritōl ro an jodikdik, doulul im kūlaaj būreejtōn ro, im ritōl ro jet an Kabun̄ in rej aeran doon e jerbal in.

  3. Bisop eo ej būreejtōn eo an dolulul eo an pris ro. Rikakpilōklōk eo kein kajuon ej eddoiki doulul eo an rikaki ro, im rikakpilōklōk eo kein karuo ej eddoiki doulul eo an tikōn ro. (Lale Bok in Bōk Meļeļe: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 10.3, ChurchofJesusChrist.org.)

  4. Lale Katak im Bujen Ko 68:25–28.

  5. Lale Quentin L. Cook, “Oktak ko n̄an Kōkajoorļo̧k Jodikdik ro,” Kweilo̧k eo Eļap, Nov. 2019, 40–43.

  6. Naan eo bisop ej iokļo̧k branch būreejtōn ro ad rejiten bōro.

  7. 1 Piter 2:25.

  8. Lale Bok in Bōk Meļeļe, 6.1.1.

  9. Lale Bok in Bōk Meļeļe, 6.1.2.

  10. Lale Bok in Bōk Meļeļe, 6.1.3.

  11. Lale Bok in Bōk Meļeļe, 6.1.4.

  12. Lale Bok in Bōk Meļeļ, 6.1.5.

  13. Bok Bōk Meļeļe, 6.1.1; bar lale Bok in Bōke Meļeļe, 6.1.1.1–6.1.1.4.

  14. Bok in Bōk Meļeļe, 6.1.1.

  15. Bok in Bōk Meļeļe, 6.1.4.

  16. Lale Bok in Bōk Meļeļe, 21.2; 23.5; 25.2.

  17. Lale Bok in Bōk Meļeļe, 6.1; 14.3.3.1; bar lale Quentin L. Cook, “Oktak ko n̄an Kōkajoorļo̧k Jodikdik,” 40–43. Bisop eo ej barāinwōt rōjan̄ im joļo̧k eļap iien ippān kōrā eo pāleen im baam̧le eo. Mije in ej kōm̧m̧an bwe rikapilōk ro rōrūtto im rijipan̄ ro ren kūr rijipan̄ būreejtōnji ro an doulul eo an Priesthood eo an Aron im bisoprik ro ilo eddo ko aer.

  18. Russell M. Nelson, “Rikam̧ool ro, Doulul eo an Prietshood eo an Aron, im Kūlaaj ko an Doulul eo an Jiron̄ ro,” Kweilo̧k eo Eļap,, Nov. 2019, 39.

  19. Lale Katak im Bujen Ko 107:87–88.

  20. “Irooj aikuji kajjojo likao ro rem̧m̧an ded n̄an keppopo n̄an jerbale [juon mijen] (lale Katak im Bujen Ko 36:1, 4–7). Jiron̄ ro im membōr ro rōrūtto me rekōņaan jerbal raikuj bar pojak. Ej juon m̧ōttan keppopo eo eaorōk n̄an kajjieon̄ erom rioktak n̄an Jisōs Kraist im gospel eo An em̧ōj an kar jepļaaktok. Ro jre kōņaan jerbal rej barāinwōt pojak ilo ānbwin, kōmālij, en̄jake, im jāān” (Bok in Bōk Meļeļe, 24.0).

  21. Ward eo ekar ejaak ilo Tijem̧ba 17, 1980. Elder John H. Groberg jen Doulul eo Kein Kajuon an Jiljilimjuonn̄oul ekar jipan̄ ejaake ward in an riTonga. (Lale Gordon Ashby, chairman, and Donna Osgood, ed., History of San Francisco California Stake, 1927–87 [1987], 49–52.)

  22. Bisop Mahe ekar utiejļo̧k n̄an jerbal in tōl ilo Pan American Airlines ilo San Francisco, California, international airport.

  23. Lale History of San Francisco California Stake, 49.

  24. Remaron̄ kar bar jum̧aik men ko me raorōk indeeo.

  25. Lale Bok in Bōk Meļeļe, 21.2.1.

  26. Bisop eo enaaj lale ippān būreejtōnji ro ro an doulul eo an elder ro im Doulul eo an Kōrā Ro kōn kautiej n̄an ro kar ijjitōn̄ im elmen kwaļo̧k kea im iakwe n̄an bar lale bwe en tōbrak.

  27. Katak im Bujen Ko 64:33.

  28. Lale Russell M. Nelson “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org.

  29. Ilo Pāpode 19, 2021, ekar wōr 24,035 bisop ro im 6,865 branch būreejtōn ro rej jerbal ipeļaakin laļin.

  30. Ikar kūr āinwōt juon bisop n̄an Burlingame Ward ilo California ilo 1974 jān Būreejtōn David B. Barlow im kar kōjenolo̧k ilo Jeptōm̧ba 15, 1974, jān Elder Neal A. Maxwell, eo ej kab m̧ōj an kūr āinwōt juon Rijipan̄ n̄an Doulul eo an Jon̄oulruo Rijilōk ro.