Gospel in Meram in M̧ool im Iakwe

Al in jar eo aiboojoj an Armej ro Rekwojarjar ilo Raan Ko Āliktata “Hark, All Ye Nations!” ej kalikkar kajoor im lan̄lōn̄ in an tarlep in gospel in ajedeed ilo aolepān laļ in. Ilo al in jar in jej al:

Louis F. Mönch, rijeje eo an al in ekam̧ōņōņō, ekar juon rioktak in German eo ekar jeiki naan ko reim̧we n̄an al in jar in ke ear jokwe ilo Switzerland ilo tōre eo ej jerbal in mijenede aolep raan ilo Europe.² M̧ōņōņō eo me em̧ōkaj an waļok jān ad loe im kam̧ool an Jepļaaktok eo jelōt aolepān laļ in ealikkar ilo naan kein ilo al in jar in:

Kom̧m̧ool n̄an ijjino eo ej wōnm̧aanļo̧k wōt an Jepļaaktok eo ilōn̄inļo̧k wōt 200 iiō ko remootļo̧k “gospel in meram in m̧ool im iakwe”⁴ ej kiiō rōmaakļo̧k ilo aolepān laļ in. Rikanaan Josep Smith ekar katak ilo 1820 eo, im millien elōn̄ļo̧k armej em̧ōj aer katak, bwe Anij “ej wūjlep n̄an armej otemjej, im jab eņo̧uk kake.”⁵

Jidik iien tokālik in ejaak eo an Kabun̄ in ilo tōre in bōk eddo in āliktata, Irooj ekar kōnono n̄an Josep Smith im kwaļo̧k iakwe eo An eļap n̄an kōj ke E ekar ba:

“Kōn menin, N̄a Irooj, kōn Aō jeļā kōn ko̧kkure eo enaaj itok ioon ro rej pād ioon laļ, Iaar kūr rikarejera Josep Smith, Jun., im kar kōnono n̄an e jān lan̄, im kar leļo̧k n̄an e kien ko; …

“Bwe bujen eo Aō ejjeļo̧k jem̧ļo̧kin en maron̄ jutak;

“Bwe tarlep in gospel eo Aō maron̄ in kean̄ kake jān ro rem̧ōjņo̧ im ļam waan n̄an jem̧ļo̧k ko an laļ.”⁶

Jidik iien tokālik in an kar bōk revelesōn in, mijenede ro rekar jino kūr er im jilkinļo̧k er n̄an elōn̄ laļ ko ilo laļ in. Āinwōt kar baj an rikanaan Nipai kōtmeāe, ennaan eo an jepļaaktok eo an gospel in em̧ōj an ijjino kwaļo̧k kake “ilubwilijin aolep laļ, bwij, lo, im armej otemjej.”⁷

“Kabun̄ eo an Jisōs Kraist im Armej ro Rekwojarjar ilo Raan Ko Āliktata kar kajutake ilo juon em̧ aļaļ ilo iturilik in New York ilo 1830.

“Ekar bōk 117 iiō ko—m̧ae 1947—n̄an an Kabun̄ in eddōkļo̧k jān jiljino membōr ro m̧oktatata n̄an juon millien. Mijenede ro rekar juon m̧ōttan eo aorōk an Kabun̄ in jān jinoin, errerakļo̧k n̄an āne ko an Native American, n̄an Canada im, ilo 1837, errerakļo̧k itulikinļo̧k laļ an North American n̄an England. Ejjab to tokālik, mijenede ro rekar jerbal ilo laļ ko reļļap ilo Europe im ettoļo̧k ļo̧k wōt āinwōt India im Āne ko ilo Pacific.

“Kar tōpar ruo millien-membōr ālikin wōt 16 iiō ko tokālik, ilo 1963, im kar tōpar jilu-millien ilo koba in bar 8 iiō ko.”⁸

Kalikkar an m̧ōkaj an eddōk Kabun̄ in, Būreejtōn Russell M. Nelson ekar ba: “Rainin, jerbal eo an Irooj ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata ej wōnm̧aanļo̧k wōt ilo an m̧ōkaj. Kabun̄ in enaaj wōr an ilju im jekļaj eo em̧m̧anļo̧k jān jon̄an eo kwoj antooneļo̧k.”⁹

Jepļaaktok eo an tarlep in gospel eo an Jisōs Kraist, doulul in Kabun̄ in emour an Irooj ioon laļ in juon alen, im kabwilōn̄lōn̄ in an eddōk ekar jān jinoin kōm̧m̧an bwe kōjeraam̧m̧an ko an priesthood eo ren pād n̄an bōki ilo aolepān laļ in. Kain̄i ko rekwojarjar im bujen ko me rej liāpe kōj n̄an Anij im likūt kōj ilo iaļ in bujen eo ej kalikkar “kajoor in āinwōt anij ej waļo̧k.”¹⁰ Ilo ad bōk koņaad ilo kain̄i kein rekwojarjar n̄an ro remour im ro remej, jej aiintok Israel ilo jait ko jim̧ōr in ran̄ōl eo im kōpooj laļ in n̄an Itok eo Kein Karuo an Rilo̧mo̧o̧r.

Ilo Eprōļ 1973, ro jinō im jema, im n̄a ekar em̧m̧akūtļo̧k jān aelōn̄ eo amim Argentina n̄an liāp ippān doon ilo tampeļ. Kōnke ekar ejjeļo̧k tampeļ ilo aolepān Latin Amedka ilo iien eo, kōm ekar kelo̧k elōn̄ļo̧k jān 6,000 m̧aiļ (9, 700 km) ilo kajjojo tūreep ko n̄an liāp ilo Salt Lake Temple. Men̄e ekar ruo aō iiō ilo iien eo im ijab kemeemej aolepān men jān iien eo aurōk, jilu pija ko ralikkar jān tūreep eo rekar bin ilo kōļmenļo̧kijeņ eo aō im reļakkar pād jān iien eo.

Pija

Laleļo̧k jān wūntō in baļuun eo

M̧okta, ij kemeemej aer kar likūt eō epaakeļo̧k wūnto in baļuun eo im aō loe kedo̧ ko remouj itulaļ.

Kedo̧ ko reaiboojoj, im remeram rekar pād wōt ilo kōlmenļo̧kijeņ eo aō āinwōt n̄e rekar bo̧o̧ļ kotin kileplep.

Bar juon pija me ej pād wōt ilo aō ļōmņak ej kōn jet jekjek in armej rekōjak ilo jikin kaloojoj eo ilo Los Angeles. Jekjek in armej rein elikun bin meļo̧kļo̧ki.

Ak ļaptata an aurōk ej pija in aiboojoj im bin meļo̧kļo̧k e:

Pija

Rūūm̧ in liāp eo ilo Salt Lake Tampeļ

Ij lukkuun kemeemejļo̧k aō pād ilo juon ruum̧ ekwojarjar ilo Salt Lake Temple ijo ej kōm̧m̧an liāp an ripālele ro im baam̧le ko n̄an indeeo. Ij kemeemej lokatok eo aiboojoj ilo tam̧peļ eo im kemeemej meram in aļ ekajoor ej romaaktok ilo wūņtō eo nam̧ōj ilo ruum̧ eo. Innem ikar en̄jake, im ij wōnm̧aaļo̧k wōt ilo aō en̄jake, okmāānān, jokne, im aenōm̧m̧an ilo gospel in meram in m̧ool im iakwe.

Āinļo̧k wōt en̄jake kein rekar bar kalikkari ilo būruō 20 iiō ko tokālik, ke ikar deļo̧n̄e tampeļ eo n̄an liāp bar juon alen—ilo tōre in, eo pāleeō im n̄a kar liāp n̄an indeeo. Bōtaab, ilo iien in, kōm ekar jab aikuj n̄an em̧m̧akūt taujin m̧aiļ ko kōnke em̧ōj kalōke im kōjeraam̧m̧ane Buenos Aires Argentina Temple, im ekar kadu ettōrļo̧k n̄ane jān m̧weo im̧ōm.

Pija

Walker baam̧le

Ron̄oul-ruo iiō ko tokālik in m̧are im liāp eo am̧ro, kōm ekar bōk kōjeraam̧m̧an eo n̄an jepļaakļo̧k n̄an ejja tam̧peļ eo wōt, ak tōre in ippān leddik eo nejim aiboojoj, im kōm ekar liāp āinwōt juon baam̧le n̄an indeeo.

Ilo aō ļōmņak likļo̧k kōn iien kein rekwojarjar ilo mour in aō, ij obrak kōn lan̄lōn̄ eļap, im ejjeļo̧k jem̧ļo̧kin. Ikar en̄jake im ij wōnm̧aanļo̧k wōt im en̄jake iakwe eo an juon Jemed Ilan̄ eo obrak kōn iakwe, eo ejeļā aikuj ko ad kajjojo im ikdeelel ko an buruōd.

Ilo kwaļo̧k kōn aiintok Israel ilo raan ko āliktata, Irooj Jeova ekar ba, “Inaaj likūt kien eo Aō ilo er, im Inaaj je e ioon būrueir, im Inaaj Anij eo aer, im renaaj armej ro doō.”¹¹ Eļap aō kam̧m̧oolol bwe jān juon iiō eo edik, kien eo an Irooj kar jino m̧wijm̧wij ilo būruō kōn kain̄i ko rekwojarjar ilo m̧weo Im̧ōn ekwojarjar. Eļap an aorōk n̄an jeļā bwe E ej ad Anij, bwe jej armej ro An, im bwe mekarta jekjek ko rej jepooļe kōj, eļan̄n̄e jenaaj tiljek im kōjparok bujen ko ad em̧ōj deļo̧n̄i, jemaron̄ “pooļ indeeo ilo pein iakwe eo An.”¹²

Ilo m̧wen̄an eo an kōrā ilo kweilo̧k eo eļap ilo Oktoba 2019, Būreejtōn Nelson ekar ba “Aolep kijejeto ko ad n̄an jerbal in karejar n̄an doon, kwaļo̧k gospel eo, kōwāppenļo̧k Armej ro Rekwojarjar, im lo̧mo̧o̧ren ro remej kōkkejeli im kobaiki er ilo tampeļ eo ekwojarjar.”¹³

Barāinwōt, ilo ejja wōt kweilo̧k eo eļap, Būreejtōn Nelson ekar katakin: “Aaet, m̧ōttan eo aorōk tata an Jepļaaktok eo ej tampeļ eo ekwojarjar.” “Kain̄i ko im bujen ko rekwojarjar rej lukkuun in aorōk tata n̄an kōpooje juon armej eo epojak n̄an karuwaineneiki Rilo̧mo̧o̧r eo ilo Itok eo An Kein Karuo.”¹⁴

Jepļaaktok in ej wōnm̧aanļo̧k wōt em̧ōj kile jān an ekkal im kōjeraam̧m̧an tampeļ ilo jon̄ak eo eļap. Ilo ad aiintok doon ilo jait ko jim̧ōr ilo ran̄ōl eo, ilo ad kōm̧m̧ani kaarmejete ko n̄an jerbal im kōm̧m̧an bwe tam̧peļ en men eo aorōktata ilo mour ko ad, Irooj ej lukkuun kalōk kōj—E ej kalōk armej in bujen ro An.

Ij kam̧ool bwe gospel in meram in m̧ool im iakwe ej romaak eļap ilo aolepān laļ in rainin. Juon “jerbal men in bwilōñ” eo kar kanaan kake jān rikanaan Aiseia¹⁶ im kar loe jān Nipai¹⁷ ej bōk jikin ilo an m̧ōkaj, em̧ool ilo bar iien kein reppen. Āinwōt an kar Josep Smith kanaan: “Jon̄ak in Mool em̧ōj an ijjinoe; ejjeļo̧k pā ettoon emaron̄ kabōjrake jān an wōnm̧aanļo̧k … m̧ae un ko an Anij renaaj dedelo̧k, im Jeova Eļap enaaj ba jerbal eo em̧ōj.”¹⁸

Ro jeiū im jatū, en wōr ad ikdeelel im kālet rainin n̄an kōmad ad make im baam̧le ko ad ilo ron̄jake ainikien lan̄, em̧ool ainikien ad Rilo̧mo̧o̧r. Jen kōm̧m̧an im kōjparok bujen ko ippān Anij, ko im renaaj kapen kōj ilo iaļ eo me ej tōlļo̧k n̄an Im̧aan Mejān, im jen m̧ōņōņō ilo kōjeraam̧m̧an ko in meram aiboojoj im m̧ool an gospel eo An. Ilo etan Jisōs Kraist, amen.