Ta eo Ad Rilo̧mo̧o̧r Ekar Kōm̧m̧ane n̄an Kōj?
Jisōs Kraist ekar kōm̧m̧ani aolep men ko remenin aikuj n̄an iaļ in ad ilo mour in n̄an mejān kajjik eo me kar kōlaajrake ilo karōk eo an Jemedwōj Ilan̄.
Ilo juon joteneen Jadede ilo juon kweilo̧k eļap an stake elōn̄ iiō ko remootļo̧k, ikar ioone juon kōrā eo me ekar ba bwe ro m̧ōttan rekar kajjitōk ippān bwe en bar rool tok im jar ālkin elōn̄ iiō ko in an jan̄in jar, ak ekar jab maron̄ ļōmņak kōn jabdewōt un ko etke ej aikuj. N̄an kōketak e, ikar ba, “N̄e kwoj ļōmņak kōn aolep men ko Rilo̧mo̧o̧r eo ekar kōm̧m̧ane n̄an eok, elōn̄ un ko n̄an bar rool tok im kabun̄ jar im jerbal n̄an E.” Ikar bwilōn̄ ke ekar uwaak, “Ta eo Ekar kōm̧m̧ane n̄an n̄a?”
Ta eo Jisōs Kraist ekar kōm̧m̧ane n̄an kōj kajjojo? Ekar kōm̧m̧ani aolep men ko remenin aikuj n̄an iaļ in ad ilo mour in n̄an mejān kajjik eo me kar kōlaajrake ilo karōk eo an Jemedwōj Ilan̄. Inaaj kōnono kōn emen pedped in katak ko kōn karōk in. Ilo kajjojo iaan men kein, Eo Nejin Emake Wōt, Jisōs Kraist, ej unleplep eo. Rejtake aolep men kein ej “iakwe eo an Anij, eo kajeeded e ijoko jabdewōt ilo būruōn ro nejin armej; kōn menin, e in elukkuun ļap kōttōpare jān men ko otemjej” (1 Nipai 11:22).
I.
M̧okta jān Jabōt in Ijtō eo, elukkuun jejjet n̄an kōnono kiiō m̧okta kōn Jerkakpeje eo an Jisōs Kraist. Jerkakpeje eo jān mej ej juon kam̧ool kōn jurōn tōmak eo ad make. Ej kōļapļo̧k meļeļein katak ko ad, kōketak m̧wil ko ad, im kōjatdikdik kōn ilju im jekļaj eo ad.
Kōnke jej tōmak ilo bwebwenato ko jim̧or ilo Baibōļ im ilo Bok in Mormon kōn Jerkakpeje eo an Jisōs Kraist, jej bar tōmak elōn̄ eoon in katak ko jet bwe ejja jerkakepe in wōt enaaj itok n̄an aolep armej ro raar mour ioon laļ in.1 Āinwōt an kar Jisōs katakin, “Kōn Aō mour, kom̧ naaj mour barāinwōt” (Jon 14:19). Im Rijilōk ro An rekar katakin bwe “ro re mej re naaj jerkakpeje re jabwabōnbōn” im “em̧ōj an wabanban in en kōņak jabwabōnbōn” (1 Korint 15:52, 54).
Ak Jerkakpeje ej letok n̄an kōj eļapļo̧k jān kam̧ool in kōn mour jab wabanban. Ej ukōt wāween ad ļōmņak kōn mour in.
Jerkakpeje eo ej letok n̄an kōj ļōmņak im kajoor n̄an niknik im anjo̧ ioon apan̄ ko an mour in me kōj kajjojo im ro rejitōnbōro ippād jej jelm̧ae. Ej letok n̄an kōj juon wāween ekāāl n̄an kalimjōk ak ļōmņak kōn wōtam̧we ko ilo ānbwin, kōļmenļo̧kjen, ak en̄jake ko jej bōki ilo iien ļōtak ak ilo mour in. Ej letok n̄an kōj kajoor n̄an anjo̧ ioon burom̧ōj, likjab, im inepata ko. Kōnke ewōr juon jerkakpeje eo kōj kajjojo jej kōjatdikdik kake, jejeļā bwe mour kōn wōtam̧we kein ilo ānbwin ilo mour in im menin jum̧ae ko rej an jidik wōt iien.
Jerkakpeje ej barāinwōt letok n̄an kōj juon kōketak ekajoor n̄an kōjparok kien ko an Anij ilo mour in. N̄e jej jerkak jān mej im wōnm̧aanļo̧k n̄an iien Ekajet eo Āliktata me kar kanaan kake, jekōņaan bwe jen karbōb n̄an bōk kōjeraam̧m̧an ko kar kallim̧ur kaki n̄an ro rej jerkakpeje.2
N̄an kōmeļeļeikļo̧k, kallim̧ur eo bwe Jerkakpeje enaaj kobaik juon iien em̧m̧an n̄an bar ippān doon ippān baam̧le ko ad—ļeo pālele, lio pālele, ajri ro, jineer, jemeer, im ro jet ineer—ej juon kōketak ekajoor n̄an kakūrm̧ool eddo ko an kajjojo baam̧le ilo mour in. Ej barāinwōt jipan̄ kōj mour ippān doon ilo iakwe ilo mour in, im ej kaeņōm̧m̧an kōj ilo iien mej an ro rejitōnbōro ippād. Jejeļā bwe jenoļo̧k in ad ilo mour in ej an jidik wōt iien, im jej erreim̧aanļo̧k n̄an bar ippān doon im iiaio ko rekam̧ōņōņō ilju im jekļaj. Jerkakpeje eo ej letok n̄an kōj kōjatdikdik im kajoor n̄an kijenmej ilo ad kōttar. Ej barāinwōt kōpooj kōj kōn peran im utiej n̄an jelm̧ae mej eo ad make—jekdo̧o̧n juon mej me ņa etan m̧ōkaj mej.
Aolepān tokjen kein jān Jerkakpeje rej m̧ōttan ļo̧k uwaak eo jinointata n̄an kajjitōk in “Ta eo Jisōs Kraist ekar kōm̧m̧ane n̄an n̄a?”
II.
N̄an elōn̄ wōt iaad, iien eo em̧m̧an n̄an jeorļo̧k jerawiwi ko ad ej meļeļe eo eļap kōn Pinmuur eo an Jisōs Kraist. Ilo kabun̄jar, jej kautiej ilo ad al:
Bōtōktōk in eaorōk ekar toorļo̧k ilo ejjeļo̧k wōņāān;
Mour eo an ekar aje ilo ejjeļo̧k wōņāān,
Juon katok ekwojarjar kōn jerawiwi,
Lo̧mo̧o̧r juon laļ epaak an jako.3
Ad Rilo̧mo̧o̧r im Ripinmuur ekar anjo̧ ioon en̄taan eo me jejjab maron̄ kōmeļeļeiki kōn jerawiwi ko an aolep armej ro rej ukweļo̧k. Katok in pinmuur in kar letok men eo eļap ļaam eo ejjeļo̧k libijinjin ippān n̄an jon̄an nana eo eļap jerawiwi ko an aolepān laļ in. Ekar kōpeļļo̧k kōjem̧ eo n̄an kōj wōj kajjojo n̄an erreo jān jerawiwi ko ad make bwe jen maron̄ bar deļon̄e aelōn̄ in Anij, Jemed Indeeo. Kōjem̧ in epeļļo̧k epojak n̄an aolep ajri ro nejin Anij. Ilo kabun̄jar jej al:
Ej kabwilōn̄ eō bwe Ear wōnlōltak jen an tron
In lomor aō eo ej jumae im juwa,
Ij bwilōn̄ bwe ej wūjleptok an yokwe n̄ōn iō.4
Tokjān Pinmuur eo an Jisōs Kraist ekabwilōn̄lōn̄ im jeban kōmeļeļeiki ej pedped ioon iakwe eo an Anij n̄an kōj kajjojo. Ej kamool naan in kean̄ eo An bwe “aorōk in jetōb ko”—an aolep armej—“ekanooj ļap ilo mejān Anij” (Katak im Bujen Ko 18:10). Ilo Baibōļ Jemedwōj Ilan̄ ekar kōmeļeļeiki menin ilo naan in iakwe: “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo” (Jon 3:16). Ilo revelesōn ko raan kein, ad Ripinmuur, Jisōs Kraist ekar kwaļo̧k bwe E “jon̄an An iakwe laļ Eaar ajeļo̧k mour eo An make, bwe jon̄an wōt eo enaaj kar lōke remaron̄ erom m̧aan ro nejin Anij” (Katak im Bujen Ko 34:3).
Ej ke juon menin bwilōn̄, ke, bwe Bok in Mormon, “Bar Juon Kallim̧ur Kōn Jisōs Kraist, ej kōjjem̧ļo̧k kōn katak in bwe n̄an erom̧ “weepān” im “kwojarjar ilo Kraist” jej aikuj “iakwe Anij kōn aolep [ad] maron̄, ļōmņak im kajoor”? (Moronai 10:32–33). Karōk eo An kar rejtake kōn iakwe me aikuj bōke kōn iakwe.
III.
Ta ko jet ad Rilo̧mo̧o̧r, ekar kōm̧m̧ane n̄an kōj? Jān katak ko an rikanaan ro An im kōn jerbal in kwaļo̧k naan eo An make, Jisōs ekar katakin kōj kōn karōk in lo̧mo̧o̧r eo. Karōk in ekoba Kōm̧anm̧an eo, jibadbad eo an mour in, jum̧ae ko remenin aikuj, im menin letok eo an anemkwoj in kāālet. Ekar barāinwōt katakin kōj kien ko im bujen ko me jej aikuj pokake im kain̄i ko jej aikuj en̄jake n̄an bar kōjepļaakļo̧k kōj n̄an ippān jined im jemedwōj Ilan̄.
Jisōs Kraist eaar katakin rikaļoor ro An, “N̄a, meram in laļ; eo ej ļoor Eō e jāmin etal ilo marok, a enaaj an meram in mour.” (Jon 8:12). Im ilo revelesōn ne raan kein jej riiti, “Lo, N̄a, Jisōs Kraist, … juon meram eo ejjab maron̄ ņojak ilo marok” (Katak im Bujen Ko 14:9). Eļan̄n̄e jej ļoor katak ko An, E ej kōmeram iaļ ko ad ilo mour im kallim̧ur kōn mejān kajjik ilo mour eo tok juon.
Kōn An iakwe kōj, E idajon̄jon̄ e kōj n̄an mije E, ijjelo̧kin men ko an mour in ilo laļ in. Ilo iien katakin eo An eļap kōn bread in mour, Jisōs ekar katakin bwe jejjab aikuj pād ibwiljin ro me rej m̧ōm̧ kōn men ko an laļ in—men ko me rej kam̧ōņōņōik mour ko ad ilo laļ in ak rejjab letok ōōn n̄an mour.5 Āinwōt an Jisōs kar bar kūr kōj elōn̄ alen, “Loor eō.”6
IV.
Āliktata, Bok in Mormon ej katakin bwe āinwōt m̧ōttan ļo̧k wōt Pinmuur eo An Jisōs Kraist “[ekar] en̄taan kōn metak ko im kaen̄tanaan ko im kapo ko otemjeļo̧k, im menin bwe naan eo en maron̄ kūrm̧ool eo kar ba Enaaj bōk ioon metak ko im nan̄inmej ko an armej ro An” (Alma 7:11).
Etke ad Rilo̧mo̧o̧r eo ekar en̄taan kōn metak kein “otemjeļo̧k” ilo mour in? “Im Enaaj bōk Ioon m̧ōjņo̧ ko aer, bwe buruōn ren maron̄ obrak kōn tiriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej [meļeļein n̄an kōmerāik er ak leļo̧k jipan̄] ro An ekkar n̄an m̧ōjņo̧ ko aer” (Alma 7:12).
Rilo̧mo̧o̧r ej en̄jake im jeļā mellijon̄ ko ad, apan̄ ko ad, ad burom̧ōj, im en̄taan ko ad, bwe Ekar kōņaan en̄jaki aolepeer āinwōt m̧ōttan Pinmuur eo An. Eoon ko jet rej kam̧ool menin. Kallim̧ur Ekāāl ej kwaļo̧k, “Bwe kōn An en̄taan ke ar kapo E, Ej maron̄ in jipan̄ ro im ewor aer kapo” (Hibru 2:18). Aiseia ej katakin, “Kwōn jab mijak; bwe N̄a ippam̧: … Inaaj kakajoor eok; aet, Inaaj jipan̄ eok” (Aiseia 41:10). Aolep ro rej en̄taan kōn jabdewōt nan̄inmej ko an mour in rej aikuj keememej bwe ad Rilo̧mo̧o̧r rekar en̄jake kain bar metak rot in, im bwe kōn Pinmuur eo An, Ekar letok n̄an kōj kajjojo kajoor n̄an jelm̧aeiki.
Rikanaan Josep Smith ekar kōkadudu meļeļein aolep men in ilo: laajrak in tōmak ko jilu: “Kōmij tōmak bwe kōn Pinmuur eo an Kraist, aolep armej remaron̄ bōk lo̧mo̧o̧r, jān pokake kien ko im kain̄i ko an Gospel eo.”
“Ta eo Jisōs Kraist ekar kōm̧m̧ane n̄an n̄a?” sister eo ekar kajjitōk. Ium̧win karōk eo an Jemedwōj Ilan̄, Ekar “kōm̧anm̧an lan̄ ko im laļ” (Katak im Bujen Ko 14:9) bwe kajjojo iaad jen maron̄ bōk en̄jake ko remein aikuj iio mour in n̄an kappukot mejān kajjik eo ad ekwojarjar. Āinwōt m̧ōttanļo̧k karōk eo an Jemān, Jerkakpeje eo an Jisōs Kraist ekar anjo̧ ioon mej n̄an kam̧ool n̄an kōj kajjojo kōn mour jab wabanban. Katok in pinmuur eo an Jisōs Kraist ej letok n̄an kōj kajjojo iien ko rem̧m̧an n̄an ukweļo̧k jān jerawiwi ko ad im jepļaakļo̧k ilo erreo n̄an m̧weo im̧ōn Jemedwōj Ilan̄. Kien eo An im bujen ko rej kwaļo̧k iaļ eo, im priesthood eo An rekar letok mālim n̄an kōm̧m̧ane kain̄i ko me raorōk n̄an tōpar mejān kajjik eo. Im ad Rilo̧mo̧o̧r ekar m̧ōņōņō in en̄jake ak jelm̧ae aolep metak im nan̄inmej ko ilo mour in bwe En jeļā wāween an maron̄ jipan̄ im kōkajoor kōj ilo en̄taan ko ad.
Jisōs Kraist ekar kōm̧m̧ane aolepān men kein kōnke Ej iakwe kōj aolep ajri ro nejin Anij. Iakwe ej rejtake aolep men kein, im ekar baj wōt jān jinoin. Anij ekar jiron̄ kōj ilo revelesōn ko raan kein bwe “Eaar kōm̧anm̧an … m̧aan im kōrā, ilowaan wōt nememen … ; im kar leļo̧k n̄an er kien ko bwe ren iakwe im jerbal n̄an E” (Katak im Bujen Ko 20:18–19).
Ij kam̧ool kōn aolep men kein im jar bwe jenaaj aolep keememej ta eo ad Rilo̧mo̧o̧r ekar kōm̧m̧ane n̄an kōj kajjojo im bwe jenaaj aolep iakwe im jerbal n̄an E, ilo etan Jisōs Kraist, amen.