Kōttōparļo̧k n̄an Mejān Kajjik

Ilo aō riiti bok in Jerbal im leta eo an Paul, ij būlon̄ kōn ewi wāween an Paul kar emakūt kōn iakwe im kam̧oolol ilo an jerbal, katakin, im kamool kōn Jisōs Kraist. Elmen an juon armej jerbal, kōn iakwe im kam̧ooļol, eļaptata ilo an ļap an en̄taan? Ta eo ekar kaitoklimo in Paul n̄an jerbal? “Ij kōttōparļo̧k n̄an kakōļļeik mejān kajjik eo an kūr eo utiej an Anij ilo Kraist Jisōs.”¹

N̄an kōttōparļo̧k n̄an mejān kajjik eo ej n̄an wōnm̧aanļo̧k ilo tōmak ilo “ial eo eranin̄ im eaidik eo ej tōlļo̧k n̄an mour indeeo”² ippān ad Rilo̧mo̧o̧r im Jemed ilo Ilan̄. Paul ekar etale en̄taan ko an āinwōt “ejjab menin keidi ippan̄ aiboojoj eo enaaj waļo̧k n̄an kōj.”³ Leta eo an Paul n̄an Ripilippai ro, eo ekar je iien eo ekar ped ilo jikin kalibuuj, ej juon leta kōn lan̄lon im m̧ōņōņō im rōjan̄ n̄an kōj aolep, eļaptata ilo iien in epen im jaje ta ko imaan. Kōj aolep jej aikuj bōk peran jān Paul: “Aet e ṃool im ij watōki men otemjej jerata wōt kōn an kanooj eṃṃan aō jeḷā Kraist Jisōs aō Irooj: kōn Eo men ko otemjej aō re jako, im ij watōki kwōpej, bwe in jibadek Kraist.”⁴

Ilo ad lale ļo̧k jerbal eo an Paul, jej ikedeelel im lōn̄aj ad make “Pauls” ilo raan kein ad, eo ej barāinwōt jerbal, katakin, im kamool kōn iakwe im kamoolol jekdoon apan̄ ko rej jelm̧ae ilo mour ko aer im ilo mour ko an ro rej iakwe er. Juon aō kar en̄jake ratimjuon iiō ko remootļo̧k kar jipan̄ eō kile aorōk eo an kōttōparļo̧k mejān kajjik eo.

Ilo 2012 eo, jinoin aō kar deļo̧n̄ļo̧k ilo kweilo̧k an ritōl ilo kweilo̧k eo eļap, ikar jab maron̄ dāpij aō en̄jake etōr jān jon̄an im likjab. Ilo kōlmenļo̧kjān eo aō ewōr juon anikien ej ba, “Kwoj jab aikuj ped ijin! Juon bōd ļapļap em̧ōj kōm̧m̧ane!” Ke ikar etetal n̄an kajeon̄ kapukōte juon jikin aō jijōt, Elder Jeffrey R. Holland ekar loe n̄a. Ekar itok n̄an ippa im ba, “Edward, jem̧ōņōņō bwe jeloe eok,” im ekar jidik wot an jibwe meja. Ikar en̄jake āinwōt juon nin̄nin̄! An iakwe im atbo̧kwōj ekar kōmāņāāņ eō im jipan̄ eō en̄jake jetōb eo an m̧ōttanļo̧k, jetōb in jemdoon. Ilo raan eo juon, ikar lale an Elder Holland kōm̧m̧ane ejja wāween eo ekar kōm̧m̧ane n̄an n̄a ilo raan eo juon, kar barāinwōt jibwe mejen Elder Dallin H. Oaks, eo eritto jān e.

Ilo iien eo ikar en̄jake iakwe eo an Irooj ilo em̧m̧aan rein me jej rejtak er āinwōt rikanaan ro, rilolo ro, im rikwaļo̧k revelesōn ro. Elder Holland, kōn jouj eo an, m̧akūtkūt ko rej make, kar jipan̄ eō anjo̧ ioon makeļo̧k eo aō make im en̄jake in likjab ko aō. Ekar jipan̄ eō kalimjōk wōt jerbal eo ekwojarjar im lem̧ōņōņō eo me kar kūr eō n̄an e—n̄an bōktok jetōb ko n̄an Kraist. E, āinwōt Paul eo m̧okta, kar jitōn̄ eō kōttōparļo̧k n̄an mejān kajjik.

Ilo m̧ool, Paul ej kōketak kōj n̄an bun̄ m̧aanļo̧k, ilo an kūr kōj n̄an meļo̧kļo̧k ta eo ej pād itulik—mijak ko ad etto, pedped eo ad etto, likjab ko ad etto, im būrom̧ōj ko ad etto. Ej karuwainene kōj, āinwōt rikanaan eo ad ejitōnbōro, Būreejtōn Russell M. Nelson, n̄an “juon eo ekāālļo̧k, kepaakļo̧k eo ekwojarjarļo̧k.”⁵ Kallim̧ur eo an Rilo̧mo̧o̧r eo ej m̧ool in: “Bwe jabdewōt eo e kōņaan lo̧mo̧o̧ren mour eo an mour enaaj jako jān e: im jabdewōt eo mour enaaj jako jān e kōn N̄a enaaj lo e.”⁶

Ilo enaan eo aō jinoin tata juon iaan kweilo̧k eo eļap, ikar kwaļo̧k kōn an jinō katakin eō jerbal ilo jikin kallib eo am. “Lale kwaar reilikļo̧k,” ekar ba. “Reimaanļo̧k wōt n̄an ta eo jej aikuj bar kōm̧m̧ane!”⁷

Epaakeļo̧k n̄an jemļo̧k in mour eo an, ilo an Mama kar tariņaeik n̄aninmej in kāānjer, ekar jokwe ippen Naume im n̄a. Juon bon̄ ikar ron̄ an jan̄ ilo ruum̧ eo an. Metak eo an ekar kanooj lap, jekdo̧o̧ņ ālkin an kar idaake uno morphine eo nimen kar ruo wōt awa m̧oktakļo̧k.

Ikar delon̄e ruum̧ eo an im jan̄ ippan̄. Ikar kwaļo̧k ainikiō eļap ilo jar im kajjitōk bwe en m̧ōkaj an jako metak eo an. Innām ekkar kōm̧m̧ane ejja wāween eo ekar kōm̧m̧ane iiō ko rem̧ootļo̧k ilo jikin kallib eo eļap: ekar bojrak im katakin eō juon katak. Iban meļo̧kļo̧k mejān ilo tōre eo: m̧ōjņo̧, būrom̧ōj, im obrak kōn metak, ilo an reitok kōn būrom̧ōj ioon ļaddik eo nejin ej inepata. Ekar etōtōn̄dikdik ibuļōn dān in kōmjaaļaļ ko mejān, reitok n̄an meja, im ba, “Ejjab am kālet ak an ro jet kālet, ak ej an Anij kālet eļan̄n̄e metak in enaaj jako ak jaab.”

Ikar jerkak ilo aō jab ba jabdewōt. Ekar barāinwōt jijiet. Iien in ej pād wōt ilo kōļmenļo̧kjeņ e aō . Bon̄ eo, kōn jinō, Irooj ekar katakin eō juon katak eo enaaj pād ippa n̄an indeeo. Ke jinō ekar eo̧ron̄ ankilaan Anij, ikar keememej unin an kar Jisōs Kraist en̄taan ilo Jikin Kallip Gethsemane im ilo ioon debwāāl ilo Golotha. Ekar ba “Lo Iaar lewōj n̄an kom̧ gospel eo Aō, im en̄in ej gospel eo [ao] Iaar lewōj n̄an kom̧—bwe Iaar itok n̄an laļin n̄an kōm̧m̧an ankilaan Jema, kōnke Jema eaar jilkintok Eō.”⁸

Pija

Kraist ej pād ilo Gethsemane

Ilo aō kōļmānļo̧kjeņ kōn rikanaan eo ad ejitōnbōro, kajjitōk in kanaan ko an Būreejtōn Nelson ilo kar kweiļo̧k eo eļap āliktata. Būreejtōn Nelson ekar kajitōk: “Kwoj ke kōņaan bwe Anij en anjo̧ ilo mour eo am̧? Kwoj ke kōņaan bwe kajoor eo an Anij en im̧we mour eo am̧? Kwon ke kōtļo̧k Ainikien … bwe en m̧oktata ioon jen ko jet jabdewōt? Kwoj ke kōņaan bwe ankilaam en oran̄ļo̧k Ankilaan?⁹ Jinō enaaj kar uwaak kōn juon en̄jake bōtaab pen “aaet,” im jet iaan ro uwaan Kabun̄ retiljek ilo aolepān laļ in renaaj kar barāinwōt uwaak kōn juon en̄jake ak edim “aaet”. Būreejtōn Nelson, kom̧m̧ool kōn im̧we im kotak kōm kōn kajjitōk in kanaan kein.

Ejjab to, ikar bwebwenato ilo Pretoria, South Africa, ippān juon bisop eo ekar kalbwin kōra eo ippān im leddik eo nejin erūtto ilo juon wōt raan. Mour ko aer kar bōke jān ajjedeed in coronavirus in. Ikar kajjitōk ejet an pād. Uwaak eo an Bisop Teddy Thabete ekar kōkajoor n̄a ilo aō ļoore naan ko im kapilōk jān rikanaan, rilolo, im rikwaļo̧k revelesōn ro an Irooj. Bisop Thabete ekar uwaak bwe jabdewōt iien ewōr kōjatdikdik im aenōm̧m̧an ilo ad jeļā ke Rilo̧mo̧o̧r eo emōj an bōk Ioon metak ko an armej ro an bwe En māron̄ jeļā jipan̄ kōj.¹⁰ Kōn juon tōmak em̧wūlaļ ekar kam̧ool, “Ij kam̧oolol kōn karōk in lo̧mo̧o̧r, karōk in m̧ōņōņō.” Innām kar kajjitōk juon kajjitōk ippa: “Ejjab ke men eo in rikanaan eo ad ekar kajjieon̄ katakin kōj ilo kar kweilo̧k eo eļap?”

Ilo an nej apan̄ ko ilo mour in itok n̄an kōj aolep ilo juon iien ak juon wāween, jān pedped wōt ilo kōttōpar ko ad n̄an “kōttōpar[ļo̧k] n̄an mejān kajjik,” eo ej “kawiniin eo kōn kūr eo euteij jān Anij.”¹¹

Kajjitōk eo aō ettā n̄an aolepādwōj ej n̄an jab ebbwer! Kar kūr kōj n̄an “joļo̧k men otemjej reddo im jero̧wiwi eo e nan̄in kōpooḷ kōj, im jen kijenmej im ettōr ilo iāekwōj eo eṃōj likūt e iṃaad, jān reiḷọk n̄an Jisōs, rijeje im rikajemļo̧k tōmak eo ad.”¹²

Ejjab lukkuun ļap kōn ta eo jej ioone ilo mour in ak ta eo jej erom̧. Ewōr lan̄lōn̄ ilo kōttōparļo̧k n̄an mejān kajjik. Ij kam̧ool bwe E eo ekar jeļmae aolep men im enaaj jipan̄ kōj ilo ad reilo̧k n̄an E. Ilo etan Jisōs Kraist, Amen.