Etetal ilo Iaļen Bujen
Oktak eo an iaļ in bujen in ejejjet im eaorōk indeeo.
Ilo aolepān jerbal in kwaļo̧k eo an, Būreejtōn Russell M. Nelson eaar ekkatak im kwaļo̧k bujen ko an Anij n̄an ro Nejin. E ej make wōt juon waanjon̄ak an juon eo ej etetal ilo iaļen bujen in. Ilo ennaan ko an jinointata āinwōt Būreejtōn eo an Kabun̄ in, Būreejtōn Nelson ekar kwaļo̧k:
Ami kallim̧ur n̄an ļoor Rilo̧mo̧o̧r eo im kōm̧m̧ani bujen ko Ippān innām kōjparoki bujen ko renaaj kōpeļļo̧k kōjām n̄an kajjojo jetōbin kōjeram̧m̧an im iien ko rem̧m̧an renaaj waļo̧k n̄an em̧m̧aan ro, kōrā ro, im ajri ro kajjojo jikin.
“… Kain̄i ko an tampeļ im bujen ko kwoj kōm̧m̧ane ewōr kii n̄an kōkajoorļo̧k mour eo am̧, m̧are eo am̧, im am̧ maron̄ n̄an jum̧ae menin kapo ko an rikōjdāt eo. Am̧ kabun̄jar ilo tampeļ im am̧ jerbal in jipan̄ ijeņ kōn ro jibum̧ im jim̧m̧am̧ naaj kōjeraam̧m̧an eok im kōļapļo̧k revelesōn eo am̧ make im aenōm̧m̧an im naaj kokwojarjar kallim̧ur eo am̧ n̄an dim wōt ilo iaļan bujen eo.”1
Ta in iaļ in bujen? Ej juon iaļ eo ej tōlļo̧k n̄an aelōn̄ in seletial eo an Anij. Jej pād ilo iaļen kōjām in peptaij innām “bun̄ m̧aanļo̧k kōn dim ilo Kraist, kōn juon kōjatdikdik emeram, im iakwe n̄an Anij im armej otemjeļo̧k [kōn kien ko ruo reļļap] … n̄an jem̧ļo̧kin.”2 Ilo iaļ in bujen in (me, jān iaļ eo, eļapļo̧k jān mour in), jej būki aolep kain̄i ko im bujen ko rekkar n̄an lo̧mo̧o̧r im mour ijo ilōn̄tata.
Bujen jibadbad in wūjlepļo̧k eo ad ej n̄an kōm̧anm̧an ankilaan Anij “n̄an pokake kien ko An ilo men otemjeļo̧k ko Enaaj jiron̄ kōj.”3 Ļoor pedped im kien ko an gospel eo an Jisōs Kraist jān raan n̄an raan ej juon lem̧ōņōņō im iaļ eo ejjejet ilo mour in. Kōn un in, juon armej emaron̄ anjo̧ ioon elōn̄ būrabōlōm̧ ko im būrom̧ōj ko. In kōjerbal jet kein ikkure n̄an katakin. Ilo tenij, ewōr juon men eo ņaetan bōd. Men kein āinwōt kalel nōt eo ak bwijin alen jōōb. Bōd rej tōprakin an juon rikkure likjab ijelo̧kin ikkure kōn kapeel ko make.
Būrabōļōm̧ im apan̄ ko ad ekkā aer oktak, tōprak in kālet ko rebōd, ak, jemaron̄ ba tōprakin ej “bōd.” N̄e jej tiljek jibadōk iaļ in bujen in, jej lukkuun anjo̧ jen elōn̄ “bōd ko.” Jej etal jen jekjek ko an an̄ūrlep. Jeban likjab kōn m̧wil ko renana. Jej anjo̧ ioon m̧ōm̧ ko an kanniōk im ettoon. Jej ļe jān armej ro im men ko me, men̄e ebun̄bun̄, remaron̄ kauwōtata n̄an ānbwinnid im ājmour eo an jetōb eo ad. Jej bōbrae kālet ko me rekōmetak ak kakkure ro jet ijelo̧kin būki m̧wiļ ko n̄an katakin eok make n̄an jerbal in jipan̄.4
Elder J. Golden Kimball eaar ba menin, “Imaron̄ jab [iien otemjej] etetal ilo iaļ in eaidik, ak imaron̄ [kajjieon̄] n̄an kijone jon̄an wōt aō [maron̄].”5 Ilo juon iien ekauwōtata, ijeļā ke brother Kimball en kar errā bwe en pād wōt, en jab baj kijone wōt, iaļ in bujen in ej kōjatdikdik eo ad eļap n̄an bōbrae men ko rejekkar kōjekdoon būrom̧ōj ilo turājet eo juon im tōprak n̄an anjo̧ n̄an jab bōbrae anjiwiwi ko an mour in ilo turājet eo juon.
Jet remaron̄ ba, “imaron̄ kōm̧m̧ani kālet ko rem̧m̧an ak jab peptaij; ijjab aikuji bujen ko bwe in juon armej eo em̧m̧an im ejejjet.” Ilo m̧ool, elōn̄ ro me, rejjab make pād ilo iaļ in bujen in, kōm̧m̧an ilo juon wāween antoone kālet ko im wūjlepļo̧k ko an ro rej pād ilo iaļ in. Komaron̄ ba rej jeraam̧m̧an jen etetal kōn iaļ in “bujen eo ejejjet.” Innām, ta, oktak eo an iaļ in bujen in?
Ilo m̧ool, oktak eo ejejjet im elukkuun aorōk. Ekoba n̄an ad lukkuun pokake, an Anij lukkuun wūjleptok n̄an kōj, jipan̄ eo ekwojarjar jej būki, kōjeraam̧m̧an ko rej lukwōj n̄an aiintok āinwōt armej in bujen ro, im men eo eaorōktata, jolet eo ad indeeo.
Wūjlepļo̧k ilo Pokake
Moktata ej piktokin ad pokake n̄an Anij. Eļapļo̧k n̄an bōk ļōmņak ko, jej kallim̧ur n̄an mour kake aolep naan otemjeļo̧k ej diwōjtok jān lo̧n̄iin Anij. Ilo peptaij, “Ej kwaļo̧k n̄an ro nejin armej bwe, ekkar n̄an kanniōk Ej kōttāiki E im̧aan eo Jemān, im kam̧ool n̄an Jemān bwe Enaaj pokake E ilo kōjparok kien ko An.”6
Ilo bujen ko, jej ļōmņak elōn̄ļo̧k ijelo̧kin baj bōbraik bōd ko ak imminene ilo jokālet ko ad. Jej bōk eddo n̄an Anij kōn kālet ko ad im mour ko ad. Jej bōk iood etan Kraist. Jej mije wōt Kraist—peran kōn naan in kam̧ool eo kōn Jisōs im kōļapļo̧k m̧wiļ ilo Kraist.
Ilo bujen ko, pokake pedped in gospel in ej jino tōt okran ilo mour ko ad. Ij ememejļo̧k jet ripālele me, ilo tōrein m̧are eo aer, kōrā eo ekar jab niknik ilo Kabun̄ in im ļeo pālele ekar jab juon membōr in Kabun̄ in. Inaaj ņaetaer Meri im Jon, ejjab lukkuun etaer. Ke ej jino lōn̄ ajri, Meri ekar en̄jake ke emennin aikuj n̄an kōkaajririik er, āinwōt an jeje ko rekwojarjar ba, “kōkaajriri im katak ko an Irooj.”7 Jon ekar lukkuun jipan̄. Meri ekar kōm̧m̧an jet kaarmejete ko raorōk n̄an pād ilo m̧weeo n̄an katakin gospel eo ilo juon wāween eo ejejjet. Liin eaar lukkuun lale bwe baam̧le eo ren lukkuun bōk kōjeraam̧m̧an eo an kabun̄jar ilo Kabun̄ in im m̧akūtkūt ko. Meri im Jon rekar riwaanjon̄ak ro, n̄an ajri ro nejier (aolep ļaddik ro) raar rūttotak ilo tōmak im wūjlepļo̧k n̄an pedped ko an gospel in im jon̄ak ko.
Ro jinen im jemen Jon, jibun im jim̧aan ļaddik ro, raar m̧ōņōņō kōn mour im tōprak ko kōn ļaddik ro jibwier, ak kōn jet abwilōn̄lōn̄ ko ņae Kabun̄ in, rekar kōņaan kajim̧we bōd in kapeel ko an Jon im Meri. Jon, men̄e ekar jab juon membōr in Kabun̄ in, ekar jab kōtļo̧k bwe oktak in en oktak. Eaar kam̧ool bwe rekar lo leen katak ko an gospel in—ta eo ļaddik eo nejin ekar en̄jake ilo kabun̄ in barāinwōt ta eo ej waļo̧k ilo m̧weeo.
Jon make ekar en̄jake Jetōb, kōn iakwe im waanjon̄ak eo an kōrā eo ippān, im kōn oktak ilo ippān ļaddik eo nejin. Ilo m̧ool, ekar peptaij, ward membōr ro im ro m̧ōttaer rekar m̧ōņōņō.
Ilo an ban ejjeļo̧k apan̄ ko n̄an er im ļaddik ro nejierro, Meri im Jon rekar kam̧ool bwe em̧ool bujen gospel in ekar katōt kōjeraam̧m̧an ko aer, er kajjojo im āinwōt juon baam̧le. Rekar lo naan ko an Irooj n̄an Jeremaia rekar kūrm̧ool ilo mour ko an ajri ro nejier barāinwōt mour ko aer make: “Inaaj likūt kien eo Aō ilo er, im Inaaj je e ioon būrueir; im Inaaj Anij eo aer, im renaaj armej ro doō.”8
Pen n̄an Anij
Juon iaan iaļ in bujen eo ejejjet ej jemdo̧o̧n eo ad ippān Anij. Bujen ko Anij ej litok n̄an ro Nejin eļapļo̧k kōm̧m̧ani jān tōl kōj. 9
Iaar riiti juon nuuj peba ejjab em̧m̧an jān eo ekar kōmeļeļeiki wāween ad kōm̧m̧an peptaij n̄an ro remej ej n̄an katulo̧k kein pija eo ilo dān. Innām aolep ro etaer kar waļo̧k ilo pija eo rekar aolep peptaij. Kōm̧m̧an in emaron̄ jejjet, lukkuun jejjet, ak ekowaane aorōk eo an kajjojo jetōb im lukkuun aorōk ilo bujen eo an juon make ippān Anij.
“[Jisōs] ekar ba … : Deļo̧n̄ ilo kōjām eo erānin̄, bwe erānin̄ kōjām eo, im eaidik iaļ eo ej tōlļo̧k n̄an mour, im jet wōt renaaj lo e.”10 Ilo juon wāween ba, kōjām eo elukkuun in aidik me ej kōtļo̧k an jejjo̧ wōt deļo̧n̄ juon ilo̧k juon. Ilo an juon make wūjelepļo̧k n̄an Anij im n̄an bōk jān E juon bujen an juon make, kōn etan, e emaron̄ pedped kōn tōre in im indeeo. Ilo kain̄i ko im bujen ko, “kajoor in āinwōt anij ej waļo̧k” ilo mour ko ad.11
Jipan̄ eo Ekwojarjar
Menin ej tōlļo̧k kōj n̄an ļōmņake kōjeraam̧m̧an eo ejenolo̧k kein kajilu ilo iaļ in bujen in. Anij ej letok juon menin letok eo eaiboojoj n̄an jipan̄ armej ro rej kōm̧m̧an bujen n̄an erom̧ armej ro rej kōjparok bujen ko: eo ej letok eo an Jetōb Kwojarjar. Menin letok in ej jim̧we eo n̄an jemjerā, kōjparok, im tōl an Jetōb Kwojarjar.12 Barāinwōt jeļā āinwōt Rikaenōm̧m̧an, eo Jetōb Kwojarjar “eo ej kobrak kōn kōjatdikdik im iakwe eweeppān.”13 Eo “ejeļā aolep men, im ej kam̧ool kōn Jemān im kōn Nejin,”14 eo ej kam̧ool ad wujlepļo̧k.15
Ilo iaļ in bujen in jej bar lo kōjeraam̧m̧an ko raorōk kōn jeorļo̧k bōd im erreeo jān jerawiwi. En̄in ej jipan̄ eo emaron̄ waļo̧k wōt jen tiriam̧o eo ekwojarjar, tōl kōn Jetōb Kwojarjar. “Kiiō en̄in ej kien eo,” Irooj eaar ba, “Kom̧in ukeļo̧k, kom̧ aolep jeban ko an laļ, im itok n̄an Eō im peptaij ilo Eta, bwe kom̧in maron̄ kokwōjarjar jān bōke Jetōb Kwōjarjar, bwe kom̧in maron̄ jutak ilo ejjeļo̧k libbijinjin im̧aō ilo raan eo āliktata.”16
Aiintok doon ippān Armej in Bujen ro
Kein kemen, ro rej ļoor iaļ in bujen in rej lo kōjeraam̧m̧an ko rejenolo̧k ilo aiintok doon in ekwojarjar. Kanaan ko kōn aiintok in ekar baj kōm̧m̧an wōt etto jen ro bwijjin Israel n̄an āneen jolet ko aer rej waļo̧k ilo jeje ko rekwojarjar.17 Kakūrm̧ool eo an kanaan im kallim̧ur kein ej kiiō waļo̧k n̄an aiintok armej in bujen ro n̄an Kabun̄ in, aelōn̄ in kiin̄ eo an Anij ioon laļin. Būreejtōn Nelson eaar ba, “N̄e jej kōnono kōn aintok, jej ba m̧ool in eaorōk: aolep kajjojo ajri ro nejin Jemedwōj Ilan̄ … raikuj ron̄jake ennaan eo an gospel eo an Jisōs Kraist me em̧ōj an jepļaaktok.”18
Irooj eaar jiron̄ ro uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata n̄an “jerkak im erromaakļo̧k, bwe meram eo ami en juon jon̄ok n̄an laļ ko; … bwe kuktok eo ippān doon ioon āneen Zaion, im ioon stake ko an, en maron̄ n̄an juon jojomar, im n̄an juon likōpejn̄ak jān lan̄ eo, im jān libabane n̄e naaj lutōkleplepļo̧k ilo ejjeļo̧k kāre ioon aolepen laļ.”19
Ebar wōr juon aiintok ilo kajjojo wiik n̄an armej in bujen ro n̄an n̄an im̧ōnjar ilo raan eo an Irooj, bwe jen maron̄ “kanooj kōjparok [kōj] jān libbijinjin jān laļ.”20 Ej juon aiintok eo n̄an bōk m̧ōttan kwojkwoj in pilawe im dān n̄an keememej Pinmuur eo an Jisōs Kraist im juon iien “n̄an jitlo̧k im n̄an jar, im n̄an kōnono ippān doon kōn em̧m̧anļo̧k eo an jetōb ko [ad].”21 Āinwōt juon jodikdik, ikar make wōt membōr an Kabun̄ in ilo kūlaaj eo aō ilo jikuuļ. Iaar m̧ōņōņō in iaio̧ ippān elōn̄ ro m̧ōtta rem̧m̧an ilo jikuuļ, aaet iaar lo bwe iaar lukkuun mije wōt aiintok doon in ilo Jabōt in kajjojo wiik n̄an kōkāāl eō ilo jetōb, barāinwōt ilo kanniōk. Ewi jon̄an ad kar en̄jake jamakijkij in aiintok doon in bujen ilo tōre in nan̄inmej in, im ewi jon̄an ad kijejer n̄an ad bōk kuņaad ilo iien eo jemaron̄ bar itok āinwōt m̧okta.
Armej in bujen ro rej bar aiintok doon n̄an tampeļ, m̧weeo im̧ōn Irooj, n̄an būki kain̄i ko, kōjeraam̧m̧an ko, im revelesōn repād ijeņ. Rikanaan Josep Smith ekar kwaļo̧k: “Ta kōttōpar eo n̄an aiintok doon … armej ro an Anij ilo aolepen laļin? … Kōttōbar eo ej n̄an kalōk n̄an Irooj juon em̧ ijo E emaron̄ kwaļo̧k n̄an armej ro An kain̄i ko ilo m̧weeo Im̧ōn im aiboojoj ko ilo aelōn̄ in kiin̄ eo An, im katakin armej kōn iaļen lo̧mo̧o̧r; bwe ewōr jet kain̄i ko im pedped ko me, bwe n̄e raar ekkatak im kar kōm̧m̧ani, eaikuj in kōm̧m̧an ilo juon jikin ak m̧weeo kar kalōke kōn un in.”22
Jolete Kallim̧ur ko ilo Bujen in
Ilo jem̧ļo̧kin, ej iaļ eo wōt n̄an pād ilo iaļ in bujen in me jej jolete kōjeraam̧m̧an ko an Ebream, Aisek, im Jekab, kōjeram̧m̧an ko lo̧mo̧o̧r ejjeļo̧k jem̧ļo̧kin im mour ijo ilōn̄tata me Anij emaron̄ letok.23
Eoon in jipan̄ eo kōn armej in bujen ej meļeļe ro bwijjin Ebream ak “m̧weeo im̧ōn Israel.” Ak armej in bujen ro ebar kobain ro rej bōk gospel eo an Jisōs Kraist.24 Paul eaar kwaļo̧k:
“Bwe ro otemjej iaami em̧ōj peptaij er ilo Kraist raar kōnak Kraist. …
“A eļan̄n̄e kom̧ ro doon Kaist, innām kom̧ ineen Ebream, ri jolōt ekkar n̄an kallim̧ur.”25
Ro rej kōjparok bujen ko aer “renaaj jerkaktok ilo jerkakpeje eo an ro rem̧m̧an.”26 Errein ro “kōweeppān er kōn Jisōs rijojomar eo an bujen eo ekāāl. … Errein rej ro im ānbwinnier rej seletial, eo aiboojoj eo an Anij, eo eutiejtata jān aolep.”27 “Kōn menin, aolep men otemjeļo̧k rej aer, men̄e mej ak mour, ak men ko kiiō, ak men ko rej itok, aolep rej aer im er rej an Kraist, im Kraist an Anij.”28
Kōtļo̧k bwe kajjojo iaad im āinwōt juon armej jen ron̄jake kūr eo an rikanaan eo n̄an pād wōt ilo iaļ in bujen in. Nipai eaar lo tore in ad ilo juon vison eļap: “Im ālkin men kein, n̄a, Nipai, iaar lo kajoor in Lam an Anij, bwe ekar bun̄ ioon armej in bujen ro an Irooj, ro raar ejjeplo̧klōk ioon aolepān mejān laļ; im raar ro rekwojarjar jān kabun̄ eo an Lam eo, im ioon ko an Irooj, pojak kōn jim̧we im kōn kajoor in Anij ilo aiboojoj eļap.”29
Nipai ekar ba, “aō ej lan̄lōn̄ ilo men ko an Irooj.”30 Ilo Jabōt in Ijtō in, ij kwaļo̧k aō naan in kam̧ool bwe Jisōs Kraist, eo Jekakpeje ej ad kōjatdikdik im jeļā kōn aolep ko kar kallim̧ur kōn jem̧ļo̧kin iaļ in bujen in. Ilo etan Jisōs Kraist, amen.