Jeraam̧m̧an ilo Etan

M̧aan ro jeiū im jatū jitōnbōro, rikarejar ro m̧ōtta ilo priesthood eo an Anij, ej juon utiej n̄an eō n̄an ekōnono n̄an kom̧ joteen in. Kom̧ij bōk kautiej im kam̧m̧oolol eo aō em̧wilaļ tata. N̄e ij kōnono ippāmi im ron̄ kōn tōmak eo ami eļap, ej aō tōmak bwe ewōr juon ļapļo̧k in kajoor in priesthood eo jān-m̧okta ilo laļ in, kōn doulul ko rekajoorļo̧k jān m̧okta im eļapļo̧k jān m̧okta rikabwijer ro an priesthood eo retiljekļo̧k.

Ilo iien jejjo kein aō joteen in, inaaj kōnono n̄an kom̧ ro me rej kōņaan em̧ool eļapļo̧k jān m̧okta wejepedik ilo jerbal in jipan̄ eo ami make an priesthood eo. Kom̧ jeļā kōn eddo eo me kom̧ij aikuj in kōļapļo̧k kūr eo ami n̄an jerbal.¹ Bōtaab kom̧ maron̄ ļōmņak ta meļeļe in kōļapļo̧k kūr eo am̧ maron̄ meļeļe in n̄an kwe.

Inaaj ijjino ippān tikōn ro rekāāl tata kōnke rej er ro eļap tata aer en̄jake jab jeļā kōn ta kōļapļo̧k jerbal in priesthood eo aer maron̄ meļeļe in. Elder ro rekāāl tata rej kab ekkapit remaron̄ barāinwōt kōņaan ron̄jake. Im bisop eo ilo wiik ko an im̧aan tata in jerbal in jipan̄ eo an maron̄ itok limoin barāinwōt.

Emenin jipan̄ n̄an n̄a n̄an keememej raan ko aō āinwōt kar juon tikōn. Iakwe n̄e juon ekar jiron̄ eō tōre ko innām ta eo inaaj kiiō elmakote. Emaron̄ in kar jipan̄ ilo aolep ijjitōn̄ ko an priesthood eo me rekar itok n̄an n̄a jān tōre eo—em̧ool jekdo̧o̧n ko ij būke ilo raan kein.

Kar kapit eō juon tikōn ilo juon branch eo ekanooj in dik me kar n̄a wōt tikōn im eo jeiū Ted ekar e wōt rūkaki. Kar kōm wōt baam̧le ilo branch eo. Aolepān branch eo ekar kweilo̧k ilo m̧weo im̧ōm. Ritōl eo an priesthood eo n̄an ļeo jeiū im n̄a ekar juon rioktak kāāl me ej kab bōk priesthood eo. Ilo tōre eo ikar tōmak bwe jerbal eo de eo an priesthood ekar leto letak kwojkwoj eo ilo ruum̧ in m̧ōn̄ā eo aō make.

Ke baam̧le eo aō ekar em̧m̧akūt tok n̄an Utah, ikar lo eō make ilo juon ward kileplep ippān elōn̄ tikōn ro. Ilo kweilo̧k in kwojkwoj eo aō m̧oktata ijo, ikar lale an jetjet an tikōn ro—juon jarin tariņae, kar āinwōt n̄a— ito itak ilo aer kar leto letak kwojkwoj eo āinwōt juon kumi ekar kaminene.

Ikar kanooj in kor jon̄an Jabōt eo tok juon ekar m̧ōkaj aō etal n̄an m̧ōņ jar eo an ward eo n̄an aō make iaaō n̄e ejjeļo̧k juon emaron̄ lo n̄a. Ij keememej bwe ekar Yalecrest Ward eo ilo Salt Lake City, im ekar wōr juon annan̄ ioon bwidej. Ikar etal n̄an tulikin annan̄ eo im ekar kanooj kajoor aō jar kōn jipan̄ n̄an jeļā ekōjkan aō jab likjab ilo aō kar bōk jikū ilo leto letak kwojkwoj eo. Jar eo ekar uwaak.

Bōtaab kiiō ijeļā ewōr juon wāween em̧m̧anļo̧k n̄an jar im n̄an ļōmņak ilo ad kejjieon̄ eddōkļo̧k ilo jerbal in jipan̄ eo ad an priesthood. Ekar itok n̄an meļeļe eo aō etke priesthood eo kar leļo̧k n̄an kajjojo armej. Jibadbad eo n̄an ad bōk priesthood eo ej n̄an kōtļo̧k ad kōjeraam̧m̧an armej ro n̄an Irooj, kōm̧m̧ane menin ilo Etan.²

Ekar ilo iiō ko ālkin aō kar juon tikōn ke ikar ekkatak ta meļeļe in opiij eo an tikōn ilo kōjerbal. N̄an waanjon̄ak, āinwōt juon pris eutiej, kar kappeik eō n̄an loļo̧k juon kweilo̧k in kwokwoj ilo juon im̧ōn lale rūtto. Kar kajjitōk ippa n̄an leto letak kwojkwoj eo. Ijello̧kin ļōmņak kōn jekjek eo ak jetjet in wāween aō kar leto letak kwojkwoj eo, ijjelo̧kin ikar kalimjōk turin māj ko mejān kajjojo rūtto ro. Ikar lo elōn̄ wōt iaer raar jan̄. Juon leļļap ekar jibwe pein aitok pā eo aō, reitok, im ba ilo eļaaj, “O, kom̧m̧ool, kom̧m̧ool.”

Irooj ekar kōjeraam̧m̧an jerbal in jipan̄ eo aō kar leļo̧k ilo Etan. Raan eo ikar jar kōn kain mennin bwilōn̄ in n̄an an itok ijello̧kin jar kōn ewi em̧m̧an in aō maron̄ kar kōm̧m̧ane ijo kuņaō. Ikar jar bwe armej ro ren en̄jake iakwe eo an Irooj jān jerbal in jipan̄ eo aō em̧m̧an. Ikar ekkatak menin ej kii eo n̄an jerbal im kōjeraam̧m̧an ro jet ilo Etan.

Ikar ron̄ ejjab to juon en̄jake me ekar kakeememej eō kōn kain iakwe in. Ke aolep kweilo̧k ko an Kabun̄ in raar bōjrak kōn wōt ajedede in nan̄inmej in COVID-19, juon rikarejar jeiū ak jatū m̧aan ekar bōk juon ijjtōn̄ jān būreejtōn eo doulul eo an elder ro an n̄an kōjeraam̧m̧an im leto letak kwojkwoj eo n̄an kōrā eo ekar jerbal in karejar n̄an e. Ke lein ekar kūrļo̧k liin n̄an bōkļo̧k kwojkwoj eo, liin ekar bōk ilo āliklik, dike kōn an kajjitōk bwe en itok jān m̧weo im̧ōn ilo iien rōt in ekauwōtata im barāinwōt tōmak bwe men ko enaaj kar m̧ōkaj aer ro̧o̧l n̄an m̧okta.

Ke lein ekar itaakļo̧k m̧weo im̧ōn liin jibbon̄ in Jabōt eo, liin ekar wōr juon an kajjitōk. Remaron̄ ke etal n̄an m̧weo juon im barāinwōt leļo̧k kwojkwoj eo n̄an eo rūturin 87 iiō-dettan? Kōn mālim an bisop eo, ekar errā.

Ium̧win elōn̄, elōn̄ wiik ko, im kōn lukkuun mejmejkaruo kōn kōtaan im jekjek in kōjparok ko, bwe kumi eo edik an Rikwojarjar ro raar koba kajjojo Jabōt n̄an juon iien jar in kwojkwoj eo eļem waan. Kōn wōt jejjo bukōn in pilawe ko kar ruje im kab in dān ko—bōtaab elōn̄ dān in kemejaaļaļ ko raar ro̧o̧rļo̧k kōn em̧m̧aan eo an juon Anij em̧m̧an.

Ilo iien eo, eo rikarejaran jeiū ak jatū m̧aan, baam̧le eo an, im sister eo ej jerbal in karejar n̄an e raar maron̄ bar jepļaak n̄an jar. Bōtaab lio emej pāleen 87 iiō-dettan, eo riturin, kōn lukkuun in mejmejkaruo eļap, kar aikuj in pād wōt ilo m̧weo im̧ōn. Rikarejar jeiū ak jatū m̧aan—keemememej bwe ijjitōn̄ eo an ekar n̄an lio ej pād iturin im em̧ool ejjab n̄an sister in erūtto—ekab de wōt n̄an rainin ej etal wōt n̄an m̧weo im̧ōn kajjojo Jabōt, jeje ko rekwojarjar im juon m̧ōttan pilawe edik epojak n̄an kōjerbale, n̄an leļo̧k kwojkwoj in Kōjota eo an Irooj.

Jerbal in jipan̄ in priesthood eo an, āinwōt eo aō raan jab eo ilo im̧ōn lale rūtto eo, ej kōm̧m̧an kōn iakwe. Ilo m̧ool, rikarejar jeiū ak jatū m̧aan eo ejjab to ekar kajjitōk ippān bisop eo an eļan̄n̄e ekar bar wōr ilo ward eo emaron̄ kōjparok er. An ikdeelel n̄an kōļapļo̧k jerbal in jipan̄ an priesthood eo an ekar eddōkļo̧k ilo an kar jerbal ilo etan Irooj im ilo juon wāween ejjeļo̧k ejeļā kake ijello̧k in wōt E. Ijjab jeļā eļan̄n̄e rikarejar jeiū ak jatū m̧aan eo ekar jar, āinwōt kar n̄a, kōn ro ekar jerbal n̄an er n̄an jeļā kōn iakwe eo an Irooj, ak kōnke kōn jerbal in jipan̄ eo an ekar ilo etan Irooj, tōprak eo ekar ejja āinwōt.

Ejja tōprak eo wōt aiboojoj ej itok n̄e ij jar m̧okta jān aō leļo̧k kōjeraam̧m̧an ko an priersthood eo n̄an juon eo me ej nan̄inmej ak ilo juon iien aikuj. Ekar waļo̧k juon iien ilo juon aujpitōļ ke taktō ro ejjeļo̧k aer kijenmej kar kakijoror eō—eļapļo̧k kakijororo eō—kar kajjitōk ippa—n̄an ekairir im etal jān im̧aer bwe ren maron̄ kōm̧m̧ane jerbal eo aer, ijello̧kin letok n̄an eō juon iien em̧m̧an n̄an leļo̧k kōjeraam̧m̧an an priesthood eo. Ikar pād, im ikar leļo̧k kōjeraam̧m̧an eo. Im bwe leddik eo edik ikar kōjeraam̧m̧ane raan eo, eo taktō ro raar ļōmņak enaaj kar mej, eka mour. Ij kam̧m̧oolol kōn iien in me ilo raan eo, ikar jab kōtļo̧k an en̄jake ko aō make pād ilo wāween eo ak kar en̄jake bwe Irooj ekōņaan bwe leddik eo edik en bōk kōjeraam̧m̧an eo. Im ikar jeļā ta kar kōjeraam̧m̧an eo: Ikar kōjeraam̧m̧an liin bwe en kar mour. Im liin ekar mour.

Ekar waļo̧k elōn̄ alen ko ke ikar leļo̧k juon kōjeram̧m̧an n̄an juon eo ealikkar epaak an jako, ippān ro uwaan baam̧le eo rej jepooļe jikin kiki eo, kōjatdikdik kōn juon kōjeraam̧m̧an in kemour. Jekdo̧o̧n eļan̄n̄e ewōr wōt jidik aō iien, ij jar iien otemjej n̄an jeļā ta kōjeraam̧m̧an eo Irooj epād ippān me imaron̄ leļo̧k ilo Etan. Im ij kajjitōk n̄an jeļā ewi wāween An kōņaan kōjeraam̧m̧an armej jab eo im ejjab ta eo ij ak armej eo ej jutak epaake ekōņaan. Jeļā eo aō ej bwe jekdo̧o̧n n̄e kōjeraam̧m̧an eo ejjab ta eo ro jet rej kōņaan n̄an er make ak ro rejitōnbōro ippāer, Jetōb eo ej un̄ur bōro ko n̄an en̄jake uwaak eo im kaenōm̧m̧ane eo ijello̧kin inepata.

Ejja im̧weo eo wōt ej itok n̄e petriak ro rej jitlo̧k im jar kōn tōl n̄an leļo̧k kōjeraam̧m̧an eo Irooj ekōņaan n̄an armej eo. Bar juon alen, ikar bar ron̄ kōjeraam̧m̧an ko kar liļo̧k me ekar kailbōk eō im barāinwōt kailbōk armej eo ej bōk kōjeraam̧m̧an eo. Ealikkar, kōjeraam̧m̧an eo ekar jān Irooj—jim̧or kakkōl ko repād ie im barāinwōt kallim̧ur ko kar kwaļo̧k ilo Etan. Jar eo im jitlo̧k eo an petriak eo kar liļo̧k jān Irooj.

Āinwōt juon bisop, ikar ekkatak ilo aō kōm̧m̧ane intōrpiu ko kōn erreo n̄an jar n̄an Irooj n̄an kōm̧m̧an bwe in en̄jake ta eo Ekar kōņaan n̄an armej eo, dāpij wōt jabdewōt im̧we eo Enaaj kar letok eban kar katinade kōn ekajet eo aō make. Bwe epen eļan̄n̄e Irooj, ilo iakwe, emaron̄ kōņaan kōjeraam̧m̧an juon kōn kajim̧we. Ebōk kijejeto n̄an kile ta eo Irooj ekōņaan jān ta eo kom̧ij kōņaan im armej eo juon emaron̄ kōņaan.

Ij tōmak bwe jemaron̄ kōļapļo̧k jerbal in jipan̄ eo an priesthood eo ad ilo tōre in mour eo ad im bōlen eļapļo̧k. Enaaj pedped wōt ioon niknik eo ad ilo kajjieon̄ jeļā ankilan Irooj im kijejeto ko ad n̄an ron̄jake Ainikien bwe en em̧m̧anļo̧k ad jeļā ta eo Ekōņaan n̄an armej eo jej jerbal n̄an e ilo Etan. Kōļapļo̧k jab in enaaj itok ilo bun̄tōn ko reddik. Emaron̄ in rūm̧ūj an itok, bōtaab enaaj itok. Irooj ej kallim̧uri menin n̄an kōj:

“Bwe jabdewōt eo ej tiljek n̄an bōki priesthood kein ruo ko me Iaar kōnono kaki, im kōļapļo̧k kūr eo aer, rej kokwōjarjar jān Jetōb n̄an kōkāāl in ānbwin ko ānbwinnier.

“Rej erom m̧aan ro nejin Moses im nejin Aron im ineen Ebream, im kabun̄ in im aelōn̄ in, im rikāālet an Anij.

“Im barāinwōt aolep ro rej bōk priesthood in rej bōk Eō, Irooj ej ba.”³

Ej aō naan in kam̧ool bwe kii ko an priesthood eo kar kōjepļaaktok n̄an Rikanaan Josep Smith. Ro rikarejeran Irooj raar waļo̧ktok jān lan̄ n̄an kōjepļaaktok priesthood eo n̄an m̧akūtkūt ko reļļap me em̧ōj kar kwaļo̧ki Naaj aiintok Israel. Armej ro doon Irooj renaaj pojak n̄an Itok eo Kein Karuo An ekwojarjar. Jepļaaktok eo ej wōnm̧aanļo̧k wōt. Irooj enaaj kwaļo̧k eļapļo̧k An kilaan n̄an rikanaan ro An im n̄an ro Rikarejeran.

Emaron̄ dik ami en̄jake keidi eo n̄an oktak ko reļļap kōn ta eo Irooj enaaj kōm̧m̧ane. Eļan̄n̄e kom̧ij, ij kajjitōk ippāmi n̄an kajjitōk ilo jar ekōjkan an Irooj kalimjōk kom̧. Ejeļā kom̧ kajjojo, Ekar door ioomi priesthood eo, im kom̧ij uwaake kūr eo im kōļapļo̧k jerbal an priesthood eo n̄an E kōnke Ej iakwe kom̧ im Ej lōke kom̧ n̄an kōjeraam̧m̧an armej ro Ej iakwe er ilo Etan.

Ij kōjeraam̧m̧an kom̧ kiiō n̄an ami maron̄ en̄jake An iakwe im An lōke, ilo etan Irooj Jisōs Kraist, amen.