Kōjatdikdik ilo Kraist

Ro jeiū im jatū, ilo iien Ijtō in jej ļōmņak kōn aiboojoj in Jerkakpeje eo an ad Irooj im Rilo̧mo̧o̧r, Jisōs Kraist. Jej keememej kūr in iakwe eo An n̄an “itok n̄an ippa, kom̧ otemjej rej jerbal im ban, im Inaaj kakkijeik kom̧.

‟Kom̧win bōk Aō ine im likūte iaerami, katak Ippa, bwe Ij ineem̧m̧an im ettā būruō, kom̧ naaj lo ami kakkije.

Bwe Aō ine ej em̧m̧an, im men eo Ij ineke e mera.”¹

Karuwainene eo an Rilo̧mo̧o̧r n̄an itok n̄an E ej juon karuwainene eo im ejjab wōt n̄an itok n̄an E wōt ak bwe kwon pād ilo Kabun̄ eo An.

Ilo eoon in ej letok karuwainene in iakwe eo, Jisōs ekar katakin ewi wāween an menin bōk jikin ej ilo am̧ pukōt n̄an Ļoor E. Eaar ba, “Ejjeļo̧k [m̧aan ak kōrā] en e jeļā Nejin, a Jema wōt; im ejjeļo̧k [m̧aan ak kōrā] en e jeļā Jema, a Nejin, im jabdewōt eo Nejin e kōņaan kwaļo̧k E n̄an e.”²

Jisōs ekōņaan bwe jen jeļā ke Anij ej Jemedwōj Ilan̄ eo ej Iakwe.

Ilo ad jeļā bwe Jemedwōj Ilan̄ ej iakwe kōj jeļā wōn kōj im jeļā bwe jej m̧ōttan baam̧le eo An n̄an indeeo.

Mayo Clinic eo ekar jei: “En̄jake ad m̧ōttan ļo̧k juon men eaorōk elukkuun aorōk. … Eitōn aolepān m̧ōttan ko ilo mour kein ad ej pedped ioon ad m̧ōttanļo̧k juon men eaorōk.” Riboot in ej kakobaik, “Jejjab maron̄ kōjeņoļo̧k aorōkin ad en̄jake ad aorōk jān ājmour ko ad ilo ānbwin im kōļmenļo̧kjeņ”³im, Inaaj kakobaik ļo̧k ājmour ilo jetōb.

Ilo joteenin eo m̧okta jān An kar en̄taan ilo Gethsemane im mij ilo debwāāl eo, Rilo̧mo̧o̧r ekar pād ippen rikaļoor ro An ilo kōjota eo āliktata. Eaar ba n̄an er, “Ilo laļ kom̧ij en̄taana kwom̧win m̧ōņōņō; N̄a Iar bōk anjo̧ ioon laļ.”⁴ Mokta jān an tulo̧k aļ, Jisōs Kraist ekar en̄taan im “mej [ioon debwāāl] kōn jerawiwi ko ad.”⁵

Ij kōļmenļo̧kjen ewi jon̄an an kōrā im em̧m̧aan in tōmak ro ajimakeke ro raar ļoor E kar en̄jake ilo Jerusalem ilo iien eo aļ ej tulo̧k im marok im mijak eaar itok iooer.⁶

Einwōt rikaļoor rein etto enan̄in 2,000 iiō ko remootļo̧k, elōn̄ iaami emaron̄ en̄jake ami ajimakeke jān iien n̄an iien. Em̧ōj aō en̄jake ajimakeke in jān iien eo eaar mej kōrā eo pāleeō, Barbara, ruo im jimettan iiō emootļo̧k. Ijeļā ta en̄jake eo ilo ad pād turin baam̧le ko ad, ro m̧ōttad, im ro jej iiaio ippāer ak jej en̄jake wōt ajimakeke—kōnke riakwe eo aō ejako ilo tūrū.

Nan̄inmij in COVID-19 letok en̄jake in ajimakeke im būrom̧ōj kōn elōn̄ armej. Mekarta, men̄e apan̄ ko ilo mour in, einwōt kar jibbon̄ in Easter eo, rujlo̧k ilo juon mour ekāāl ilo Kraist kōn iien ko rem̧m̧an im kabwilōn̄lōn̄ im mour ekāāl ilo ad oktakļo̧k n̄an Irooj kōn kōjatdrikdik im m̧ōttanļo̧k juon men eaorōk.

N̄a ij en̄jake metak ko an ro im rejjab en̄jake aer aorōk ak m̧ōttanļo̧k juon men eaorōk. Ilo aō kalimjōk nuuj ko jān peļaakin laļ in, ij lo elōn̄ ro rej en̄jake ajimakeke in. Ij ļōmņak bwe, elōn̄ ro rej en̄jake wāween in, ej kōnke remaron̄ jab jeļā ke Jemedwōj Ilan̄ ej iakwe er im bwe jej aolep m̧ōttanļo̧k baam̧le eo An indeeo. Tōmake bwe Anij ej iakwe kōj im kōj jej ajri ro Nejin im ej kaenōm̧m̧an im leļo̧k kōjatdikdik.

Kōnke jej jetōb ro nejin Anij, aolep ewōr aer kadkad, paaktok, im maron̄ erom̧ ekwojarjar. Kōjwōj kajojo jej “jetōb ro rejitenbōro Nejin Jemed im Jined Ilan̄.”⁷ En̄in ej kadkadid! En̄in ej lukkun wōn kōj!

Jetōb ko ad rej ļapļo̧k ilo ad meļeļe kōn elōn̄ kadkad ko ad ilo mour in, ekoba, laļ, manit, im jolet ko ad ilo joko jikid.

En̄jake in kōn kadkadid ilo jetōb im manit, iakwe, en̄jake ad aorōk emaron̄ letok kōjatdikdik im iakwe n̄an Jisōs Kraist.

Ij kōnono kōn kōjatdikdik eo ilo Kraist ejjab ļōmņak waan. Ijelo̧kin, ij kōnono kōn kōjatdikdik eo im ej āinwōt men ko im remaron̄ jeļā kaki. Kōjatdikdik rot in eaorōk n̄an eļļā ioon nana ko, lale jetōb ko rem̧m̧an im kōkajoorļo̧k, im jeļā bwe Jemed Indeeo ej iakwe kōj bwe kōj jej ajri ro Nejin, ro rej m̧ōttan ļo̧k wōt baam̧le eo An.

Eļan̄n̄e ewōr ad kōjatdikdik ilo Kraist, jenaj itok n̄an jeļā bwe ilo ad kōm̧m̧an im kōjparok bujen ko, kōņan eo ad im ettōņak ko remaron̄ bōk jikier kōn E.

Doulul eo an Jon̄oulruo Rijilōk ro raar rōjan̄ doon ilo jitōbōn jar im ilo aer jan̄nuwaad n̄an jeļā ewi wāween aer jipan̄ ro otemjej rej en̄jake aer ajimakeke ak en̄jake ke rejjab aorōk. Jej jan̄nuwad n̄an jipan̄ aolep ro rej en̄jake wāween in. Kōtļo̧k bwe in ba, n̄an, ro me ejjeļo̧k pāleer kiiō.

Ro jeiū im jatū, eļapļo̧k jān jimettan in rūtto ro ilo Kabun̄ in rainin ejjeļo̧k pāleer, rejepel, ak rejjan̄in kar m̧are. Jet rej ļōm̧nak kōn iien ta eo em̧m̧an n̄an er im likūt ilo karōk an Anij ilo Kabun̄ in. Kōjwōj kajojo jej aikuj meļeļe bwe mour indeeo ejjab juon kajjitōk epidodo n̄an kwaļo̧k jepād ia ilo m̧are bōtaab ej kwaļo̧k bwe jej Rikaļooran im āinwōt “kajoor ilo naan in kam̧ool kōn Jisōs.”⁸ Kōjatdikdik an ro rejjan̄in m̧are ej āinwōt n̄an aolep membōr ro an Kabun̄ eo an Irooj em̧ōj an jepļaktok—deļo̧n̄eļo̧k ilo meanwōd an Kraist jān “jān pokake kien ko im kain̄i ko an Gospel eo.”⁹

Imaron̄ ke kwaļo̧k ke ewōr jet naan ko raorōk jej aikuj in meļeļe kaki.

Moktata, jeje ko rekwojarjar im rikanan ro raan kein rej kalikkar bwe aolep ro rej tōmak ilo kōjparok bujen ko an gospel renaj wōr aer iien em̧m̧an n̄an mour ijo eutiejtata. Būreejtōn Russell M. Nelson eaar katakin: “Ilo wāween ko an Irooj make im iien ko An, ejjeļo̧k kōjeraam̧m̧an naj dāpiji jān Rikwojarjar ro An retiljek. Irooj enaj ekajet im letok jenōkjej n̄an kajojo ekkar n̄an ikdelel in buruōer im kōm̧m̧an ak jerbal ko aer.”¹⁰

Kein Karuo, iien eo ejejjet im jekjek eo me aolep kōjeram̧m̧an ko an mour eo eutiejtata naaj litok ejjan̄in alikkar ak waļo̧k, ak rej lukkuun m̧ool.¹¹ Būreejtōn Dallin H. Oaks eaar kameļeļeik bwe jet iaan wāween kein “an mour in renaj karōki ilo jejjet ilo Millennium, eo im ej iien n̄an kakūrm̧ool aolep men ko rekar jab dedeļo̧k ilo karōk eo eļap im ekam̧ōņōņō n̄an aolep ajri ro nejin Jemed ro im reerreo.”¹²

Ejjab meļeļein bwe aolep kōjeraam̧m̧an rej karumijļo̧k m̧ae Millennium eņ, jet em̧ōj ad būki im ko jet rej itok wōt m̧ae raan eņ.¹³

Kein kajilu, kōttar Irooj ej meļeļe in wōnm̧aanļo̧k ilo pokake im eddōkļo̧k ilo jetōb n̄an E. Kōttar wōt Irooj ejjab baj kwaļo̧k an juon iien. Kwojjab aikuj en̄jake āinwōt kwoj pād ilo ruum in kōttar.

Kōttar wōt Irooj ej tōlļo̧k n̄an jerbal. Iaar ekkatak ium̧in elōn̄ iiō ko bwe ad kōjatdikdik ilo Kraist ej ļapļo̧k ilo aer jerbal n̄an ro jet. Jipan̄ āinwōt an kar Jesōs jipan̄, jenaj kajju eddōkļok ilo kōjatdikdik ilo E.

Eddōkļok eo am̧ make juon emaron̄ tōbare kiō ilo am̧ kōttar Irooj im kallim̧ur ko An ej juon men elukkuun aorōk, ittiņo m̧ōttan ļo̧k karōk eo An n̄an kōj kajojo. Juon menin leļo̧k eo juon emaron̄ kōm̧m̧ane n̄an jipan̄ kalōk Kabun̄ in ilo laļin im n̄an aiintok Israel rej menin aikuj. Kadkadid eļan̄n̄e em̧ōj ad m̧are ak jaab ejjab maron̄ kōbōjrak kōj jān ad jerbal n̄an Irooj. Irooj ej kautiej ro rej jipan̄ im kōttar E ilo kijenmij im tōmak.¹⁴

Kein Kāmen, Anij ej letok mour indeeo n̄an aolep ajri ro Nejin. Aolep ro rej bōk menin letok in kam̧m̧oolol eo an Rilo̧mo̧o̧r kōn ukweļo̧k im mour kōn kien ko An renaj bōk mour indeeo, men̄e rejjab bōk aolepen lememen im wānōk ilo mour in kanniōk in. Ro rej ukweļo̧k renaaj en̄jake an Irooj maron̄ jeorļo̧k bōd ko aer āinwōt an kar ba: “Aaet, im jon̄an emmakijkij in wōt an armej ro aō ukeļo̧k Inaaj jeorļo̧k aer bōd im bōd ko aer ņae Eō.”¹⁵

Ilo ialale in aō āliktata, maron̄ eo an juon armij, kōņaan, iien em̧m̧an ilo anemkwoj im kāālet, ekoba men ko im rej kōjeraam̧m̧an n̄an mour indeeo, aorōk im Irooj wōt emaron̄ ekajet kaki.

Kein Kōļalem, lōke ko ad ilo Jisōs Kraist ko eo men An jouj aolep men ko ej iookļo̧k mour in em̧ōj karōki ilo jejjet¹⁶ Aolep kōjeram̧man ko em̧ōj kallimur kaki remaron̄ kūrm̧ool kōn E eo, kōn Pinmuur eo An, “wanlaļtak ium̧win aolep men ko otemjeļo̧k”¹⁷ im “anjo̧ ioon laļ.”¹⁸ E “kar jijet ianbwijmaron̄ in pein Anij, n̄an bōk jān Jemān jim̧we ko an in tūriam̧okake eo kar An ioon ro nejin Armej ran… ; kōn menin E ej errā ilo jibadbad eo kōn ro nejin armej raņ.”²⁴ Ilo āliktata, “ro rekwojarjar renaaj obrak kōn aiboojoj eo An, im bōk aer jolōt”²⁵ āinwōt “ri jolōt ippān Kraist.”²⁶

Kōņaan ko ad ej bwe katak kein ren maron̄ jipan̄ kōj kaddōkļo̧k kōjatdikdik ilo Kraist im en̄jake ad aorōk.

Jab meļo̧kļo̧k bwe kwoj nejin Anij, Jemed Indeeo, kiō im n̄an indeeo. E ej iakwe eok, im Kabun̄ in ej kōņaan kwe im aikuji kwe. Aaet, kōmij aikuji eok! Jej aikuji ainikiem̧, kapeel ko am̧, jeļā ko am̧, im wāppen ko am̧.

Ium̧in elōn̄ iiō ko, em̧ōj ad kōnono kōn “ro ejjeļo̧k ipper,” “ro rej make iaer,” im “rūtto ro.” Kōttōbar ko remaron̄ ilo jet wāween jipan̄ jet iien ak remaron̄ ukōt wāween ad lōmņak kōn ro jet.

Ewōr ke wāween ko n̄an ad joļo̧k en̄jake in im rej kōjenolo̧k kōj jān ro jet?

Būreejtōn Nelson eaar kajjitōk bwe jān ba wōn kōj einwōt membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Einwōt ekūtbuuj kōjwōj kajojo, einwōt ke?

Gospel eo an Jisōs Kraist ewōr an kajoor n̄an kakobaik kōj. Kōjwōj jej eļapļo̧k ad āinwōt juon jān ad oktak jān doon. Āinwōt membōr in baam̧le eo an Anij, jej lukkuun jemjān jemjati. Paul eaar ba, “Im [Anij] eaar kōm̧anm̧an jān juon wōt, ri aelōn̄ kaņ otemjeļo̧k rej jokwe i mejān laļ.”²²

N̄an kom̧ stake būreejtōn ro, bisop ro, im doulul im ritōl ro an sister ro, Ij kajjitōk ippami bwe komi ļōmņak kōn aolep membōr ro ilo stake eo ami, ward, doulul āinwōt juon membōr ro im remaron̄ lewaj im jipan̄ kūr ko im bōk koņaer ilo elōn̄ wāween ko.

Aolep membōr ro ilo quorum eo ad, doulul ko, ward ko, im stake ko ewōr ippāer menin letok in jān Anij im kapeel ko remaron̄ jipan̄ kalōk Aelōn̄ eo An kiō.

Jen kūr n̄an membōr ro ad ro im rej make iaer n̄an bōk koņaer ilo jipan̄, lōn̄aj, im katakin. Joļo̧k men ko rem̧or im ļōmņak ko im ewōr men ko rejjab em̧m̧an n̄an en̄jake ko aer kōn ajimakeke im rejjab aorōk ak jab maron̄ jipan̄ ro jet.

Ij kwaļo̧k aō kam̧ool ilo weekend in Ijtō in an ad Rilo̧mo̧o̧r, Jisōs Kraist, im kōjatdikdik eo ejjeļo̧k jem̧ļo̧kin Eaar letok n̄an n̄a im aolep ro rej tōmak ilo Etan. Im Ij kwaļo̧k aō kam̧ool ilo ettā ilo āt eo Etan aorōk, Jisōs Kraist, amen.