Juon Oktak in Bōro Ekajoor:

Ilo Bōļaide, Oktoba 28, 1588, an jorrāān aļaļ eo ippān pikpik wa eo im wāween eo de eo n̄an kōjebwebweik wa eo ej kōjerbal jōbwe La Girona, waan great Spanish Armada, ekar itaak ippān dekā ko an Lacada Point ilo Northern Ireland.¹

Wa eo ekar merā. Juon iaan armej ro ekar pen an mour ekar kōnak juon gold ring kar leļo̧k n̄an e jejjo allōn̄ ko m̧oktaļo̧k jān lio pāleen kōn kōmeļeļe eo, “Ejjeļo̧k men eļapļo̧k n̄an aō lewaj n̄an eok.”²

“Ejjeļo̧k men eļapļo̧k n̄an aō lewaj n̄an eok”—juon naan eļam waan im juon riin̄ kōn design eo kōm̧m̧an in pā ej jibwe juon menono, juon kakōļļe in iakwe jān lio pālele n̄an ļeo pāleen.

Ke iaar riiti bwebwenato in, ekar kōm̧m̧ane juon im̧we eļap ilo n̄a, im ikar ļōmņak kōn kajjitōk eo an Rilo̧mo̧o̧r eo: “Im naaj ajeļo̧k āinwōt juon katok n̄an Eō bōro e rup im jetōb ettā.”³

Ikar barāinwōt ļōmņak kōn wāween an armej ro lale kōn naan ko an Kiin̄ Benjamin: “Aaet, kōm̧ij tōmak aolep naan ko kwaar kōnono n̄an kōm … , eo Eaar jerbale juon oktak ekajoor ilo kōm, ak ilo buruōm, bwe kom̧in jab bar itok wōt in kōm̧m̧an nana, ak n̄an kōm̧m̧an em̧m̧an wōt.”⁴

In kwaļo̧k ippām̧i juon aō kar en̄jake ke ekar 12 iiō detta, ta eo ekar waļo̧k ej pād wōt ippa n̄an rainin.

Jinō ekar ba, “Eduardo, ekkairiirļo̧k. Jerum̧wij n̄an jar.”

“M̧am̧a, inaaj pād wōt ippān baba rainin,” ikar uwaak.

“Kwoj m̧ool ke?” Kwoj aikuj pād ilo kweilo̧k eo an doulul eo an priesthood,” ekar ba.

Ikar uwaak, “Jerata baba! Enij bar make iaan. Inaaj pād wōt ippān baba rainin.”

Baba ekar jab juon membōr in Kabun̄ eo an Jisōs Kraist im Armej ro Rekwōjarjar ilo Raan Ko Āliktata.

Mam̧a im leddik ro jatū rekar etal n̄an kweilo̧k ko an Jabōt. Kōn menin iaar etal n̄an jikin jerbal eo an baba, ijo em̧m̧an ippān pād ie ilo Jabōt ko, āinwōt aō kar ba n̄an jinō, iaar pād jidik, ebwe, jejjo minit ippān, im innām iaar kajjitōk, “baba, em̧m̧an ke aolep men?”

Eaar joļo̧k jen an kōm̧m̧ani ratio ko im waj ko, im ettōn̄tok n̄an eō.

Innām iaar ba n̄an e, “ij tin ikkure ippān ro m̧ōtta?”

Baba, ilo an jab relōn̄tak, ekar ba n̄an eō, “Rainin ej Jabōt. Kwojjab aikuj in kar etal n̄an jar ke?”

“Aaet, bōtaab rainin ikar jiron̄ m̧am̧a ijjab maron̄ etal,” ikar uwaak. Baba ekar kōm̧m̧ani wōt jerbal ko an, im n̄an n̄a, ekar mālim eo n̄an ilo̧k.

Jibbon̄ōn eo ekar wōr juon ikkure in jōkad aorōk, im ro m̧ōtta rekar ba n̄an n̄a bwe ijjab aikuj in jako kōnke kōmij aikuj in wini ikkure eo.

Apan̄ eo aō ekar bwe ikar aikuj in eļļāļo̧k im̧aan im̧ōn jar eo n̄an etal n̄an meļaaj in jōkad eo.

Ļōmņak kake, iaar ettōr m̧ōkaj n̄an meļaaj in jikin jekad eo im kar bōjrak m̧okta ilo juon kein kabbōjrak kileplep, m̧ōnjar eo. Ikar ettōrļo̧k ilo jikin etetal eo iturejet, ijo ekar wōr jet wōjke ko reļļap, im kar kāālet n̄an ettōr ikōtaer bwe en ejjeļo̧k emaron̄ kar lo eō kōnke ekar iien eo membōr ro rej jikrōkļo̧k ilo kweiļo̧k ko.

Iaar m̧ōkajļo̧k m̧okta jen an ikkure eo jinoe. Iaar maron̄ in ikkure im ro̧o̧l n̄an m̧weeo m̧okta jen an m̧am̧a itok.

Aolep men raar em̧m̧an; tiim eo amim rekar win, im ikar m̧ōņōņō. Bōtaab ekar jab jejjet kōm̧adm̧ōd in ettōrļo̧k eo aō n̄an meļaaj in jikin jōkar eo ilo aō kar jab peljo̧ jān rikapilōk eo an doulul eo an tikōn ro lo eō.

Brother Félix Espinoza ekar lo aō ettōr ekairir jān wōjke n̄an wōjke, kajjieon̄ bwe ren jab lo eō.

Ilo jinoin wiik eo, Brother Espinoza ekar itok n̄an m̧weo im̧ō im kar kajjitōk bwe en kōnono ippa. Ekar jab ba jabdewōt men kōn ta eo ekar loe ilo Jabōt eo, ak ekar jab kajjitōk ippa etke ikar jako ilo kweilo̧k eo aō.

Ekar letok n̄an eō bok in ekkatak eo im ba, “Ikōņaan bwe kwon katakin priesthood kūlaaj eo ilo Jabōt. Em̧ōj aō kōkaļļeiki katak eo n̄an kwe. Ejjab pen. Ikōņaan bwe kwon riiti, im inaaj bōjraktok ruo raan jān kiiō n̄an jipan̄ eok kōn kōppopo eo n̄an katak eo.” Ālkin an ba menin, ekar letok bok in katakin eo im ilo̧k.

Ikar jab kōņaan katakin kūlaaj eo, bōtaab ikar jab kōņaan jiron̄ e jaab. Ekar wōr aō karōk Jabōt eo, n̄an bar pād wōt ippān baba—meļeļe in, ekar bar wōr juon ikkure aorōk.

Brother Espinoza ekar juon armej eo rūm̧m̧an ded eo rej nebar e.⁵ Ekar lo gospel eo kar kōjpeļaaktok im ekar ukōt mour eo an ak, ilo naan ko jet, būruōn.

Ke raelepān Jādede ekar jikrōk, ikar ļōmņak, “Ekwe, bōlen ilju inaaj ļak ruj inan̄inmej, im iban aikuj etal n̄an jar.” Ekar jab ikkure in jekad men eo me ekar kaeinepataik eō; ekar kūlaaj eo ij aikuj in katakin, eļaptata juon katak kōn raan in Jabōt.

Jabōt eo ekar itok, im ikar rujlo̧k ājmourļo̧k jān kar m̧okta. Ejjeļo̧k menin aō jekpen ņae—ejjeļo̧k iaļen ko.

Enaaj kein kajuon in aō kwaļo̧k juon katak, ak Brother Espinoza ekar pād ijo ituru, im bwe ekar juon raan ekajoor n̄an ukōt būrowō.

Jān iien eo m̧aanļo̧k, ikar jino kōjparok im kokwojarjar raan in Jabōt, im ilo iien ko, ilo naan ko an Būreejtōn Nelson, Jabōt en juon menin lan̄lōn̄.⁶

“Irooj, ij lewaj n̄an eok aolep men; ejjeļo̧k men eļapļo̧k n̄an lewaj n̄an eok.”

Elmen ad bōk juon oktak in bōro ekajoor? Ej ijjino im āliktata ej waļo̧k

1. ilo ad ekkatak jeje ko rekwojarjar n̄an bōk jeļāļo̧kjeņ eo me enaaj kōkajoorļo̧k ad tōmak ilo Jisōs Kraist, eo enaaj ejaake juon ikdeelel n̄an oktak;⁷

2. n̄e jej jino ikdeleel kōn jar im jitlo̧k;⁸

3. n̄e jej jerbal, ekkar n̄an naan ko kar ekkatak im kar būki, n̄an ad kōm̧m̧ane juon bujen n̄an leļo̧k būruwōd n̄an E, āinļo̧k wōt armej ro an Kiin̄ Benjamin.⁹

Ekōjkan ad jeļā bwe būruōd ej oktak?¹⁰

1. N̄e jej kōņaan kam̧ōņōņōik Anij ilo men otemjeļo̧k.¹¹

2. N̄e jej kōm̧m̧an em̧m̧an n̄an ro jet ilo iakwe, kautiej, im kile.¹²

3. N̄ej jej lo bwe m̧wil ko an Kraist rej erom m̧ōttan paotok eo ad.¹³

4. Ilo ad en̄jake an ļapļo̧k tōl eo an Jetōb Kwojarjar.¹⁴

5. Ilo ad kōjparok juon kien me epen n̄an kōj n̄an pokake innām wōnm̧aanļo̧k wōt in mour kake.¹⁵

Ilo ad lukkuun ron̄jake naan in kapilōk ko an ritōl ro ad im m̧ōņōņō in kāālet n̄an ļoori, jaar jab ke en̄jake juon oktak in bōro ekajoor?

“Irooj, ij lewaj n̄an eok aolep men; ejjeļo̧k men eļapļo̧k n̄an lewaj n̄an eok.”

Ekōjkan ad dāpij wōt oktak eo ekajoor?

1. Ilo ad bōk m̧ōttan kwojkwoj eo kajjojo wiik im kōkāāl bujen eo n̄an bōk iood etan Kraist, keememej E iien otemjej, im kōjparok kien ko An.¹⁶

2. N̄e jej ukōt mour ko ad n̄an tampeļ eo.¹⁷ Emakijkij etal n̄an tampeļ enaaj jipan̄ kōj dāpij wōt juon bōro kāāl im kōkāāl ilo ad bōk koņad ilo kain̄i ko.

3. N̄e jej iakwe im jerbal n̄an ro riturid kōn jerbal in karejar im mijenede.¹⁸

Innām n̄an lan̄lōn̄ eo ad eļap, oktak eo itulowa ej kōkajoorļok im ej kajeeded m̧ae iien ej pādejake jerbal ko rem̧m̧an.¹⁹

Oktak in bōro eo ekajoor ej bōktok n̄an kōj juon en̄jake in anemkwoj, lōke, im aenōm̧m̧an.²⁰

Oktak in bōro in ejjab juon makūtkūt; ebōk tōmak, ukweļo̧k, im jebal in jetōb eo ejjab bōjrak n̄an an waļo̧k. Ej ijjino ilo ad ikdeleel n̄an ajeļo̧k ankilaad n̄an Irooj, im bwe oktak in bōro en waļo̧k n̄e jej deļo̧n̄e im kōjparok bujen ko Ippān.

M̧akūtkūt in wōt ewōr juon an jelet em̧m̧an jim̧or n̄an kōj im ioon armej ro ipeļaakid.

Ilo naan ko an Būreejtōn Russell M. Nelson, “Ļōmņak mōk ewi jon̄an an m̧ōkaj poktak kein renana ipeļaakin laļ in—im ro otemjej ilo mour ko ad kajjojo—enaaj maron̄ ņa mejļaer eļan̄n̄e kōj aolep ej kāālet n̄an ļoore Jisōs Kraist im eo̧ron̄ katak ko An.”²¹ Jerbal eo n̄an ļoore katak ko an Rilo̧mo̧o̧r ej tōļ n̄an juon oktak ekajoor ilo būruōd.

Ro jeiū im jatū, jodikdik ro, im ajri ro, ilo ad bōk kuņaad ilo kweilo̧k in wiiken in, kōm̧m̧an bwe naan ko an rikanaan ro ad, ko me renaaj itok jān Irooj, ren deļo̧n̄ ilo būruwōd n̄an en̄jake juon oktak ekajoor.

N̄an ro me rejjan̄in de kobatok ilo Kabun̄ eo kar kōjepļaaktok an Irooj, ij kajjitōk ippāmi n̄an ron̄jake mijenede ro kōn juon ikdeleel em̧ool n̄an jeļā ta eo Anij ej kōtmene jān kom̧ im en̄jake oktak eo itulowa.²²

Rainin ej raan eo n̄an kāālet n̄an ļoore Irooj Jisōs Kraist. “Irooj, ij lewaj n̄an Eok būruō; ejjeļo̧k men eļapļo̧k ij lewaj n̄an Eok.”

Ejja āinwōt riin̄ eo kar loe jān wa eo ejorrāān ilojet, n̄e jej leļo̧k būruōd n̄an Anij, jej lo̧mo̧o̧r jān lojet ko renana an mour in, im ilo jekjek eo jej kōkāāl im karreo kōn Pinmuur eo an Kraist im erom “ajri ro nejin Kraist,” ilo jetōb “ļotak ilo E.”²³ Jān menin ij kam̧ool ilo etan Jisōs Kraist, amen.