Dim ilo Ļan̄ ko
N̄e ļan̄ ko an mour in enaaj itok, jemaron̄ dim kōnke jej jutak ioon ejm̧aan in tōmak eo ad ilo Jisōs Kraist.
Ro jeiū im jatū rejitōbōro, jejeraam̧m̧an rainin n̄an ron̄jake rijerbal ro an Anij rej letok ko̧o̧njeļ im kapilōk. Kajjojo iaad, jabdewōt jikin jej pād ie, jej jeļā bwe jej mour ilo an ļapļo̧k kauwōtata ilo raan kein āliktata. Aō jar bwe in maron̄ jipan̄ kwe jutak dim ilo ļan̄ ko jej jelm̧ae, kōn juon bōro in aeno̧m̧m̧an.1
Jikin eo n̄an jinoe ej n̄an keememej bwe kajjojo iaad ej nejin Anij ejitōn bōro im bwe ekar im̧we rijerbal ro An. Rijerbal rein an Anij rekar lo tōre kein me jej mour ie. Rijilōk Paul ekar jeje n̄an Timote, “Men in, bwe ilo raan ko āliktata iien ko re nana renaaj waļo̧ktok.”2
Jabdewōt mej ko n̄an loe kōkaļļe ko an iien im lo̧jiln̄i n̄an ron̄ naan ko an rikanaan ro rejeļā bwe em̧ool men in. Jorrāān ko reļļap rej itok n̄an kōj jān kajoor ko an jerawiwi. Kajoor kein rej ļapļo̧k. Im enaaj jino penļo̧k, eban pidodo, n̄an kōjparok bujen ko jej aikuj kōm̧mani im kōjparoki n̄an mour kake ilo gospel in an Jisōs Kraist.
N̄an ro rej inepata kōn kōj make im kōn ro jej iakwe, ewōr kōjatdikdik ilo kallim̧ur eo Anij emōj an kōm̧m̧ane kōn juon jikin kōjparok ilo ļan̄ ko im̧aan.
En̄in ej juon pija in jeje kōn ijōņ. Emōj kōmeļeļeik elōn̄ kōttan jān rikanaan ro remour. N̄an waanjon̄ak, āinwōt an rekoot ilo Bok in Mormon, juon baba eo ekideelel im ewōr iakwe ippān ekar ba n̄an ļaddik ro nejin elmen n̄an kōkajoor er make n̄an jutak pen ilo lan̄ ko im̧aani er: “Im kiiō, ro nejū m̧aan, keememej, keememej bwe ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami; bwe n̄e devil enaaj jilkintok kōto ko an rekajoor, aaet, m̧ade ko an ilo aire, aaet, n̄e aolep wōt dekā im lan̄ rekajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, … pedped eo eļan̄n̄e armej rej ekkal ioon rej jamin bun̄.”3
Būromōj im wo ejjeļo̧k jemļo̧kin eo ekar kōnono kake rej men ko renana itok jān jerawiwi eo jej jab ukweļo̧k jāne. Eddōkļo̧k eo an ļan̄ ko rej kapo ko im nitbwil ko rej ļapļo̧k an Setan. Ejjan̄in kar ļapļo̧k an aorōk jān kiiō n̄an meļeļe ewi wāween n̄an kalōk ioon pedped eo em̧ool. N̄an n̄a, ejjeļo̧k jikin em̧m̧anļo̧k n̄an lale jān kwaļo̧k eo āliktata an Kiin̄ Benjamin, kar barāinwōt rekoote ilo Bok in Mormon.
Naan in kanaan ko an Kiin̄ Benjamin rej jerbal n̄an kōj ilo raan kein ad. Eaar jeļā kōn en̄jake eo an make ekaamijak kōn tariņae. Ekar kōjparok armej ro an ilo iien tariņae, pedped ioon kajoor eo an Anij. Ekar alikkar an loe kajoor ko renana an Lucifer n̄an kapo, n̄an kajjieon̄ n̄an anjo̧, im n̄an kabweer ajri ro nejin Anij.
Ekar karuwaineneik armej ro an im kōj n̄an kalōk ioon ejm̧aan eo em̧ool ilo kōjparok, eo ej Rilo̧mo̧o̧r eo. Ekar alikkar an ba bwe kōj jej anemkwoj n̄an kāālet ikōtaan jim̧we im bōd im bwe jeban eļļā jān ta ko renij waļo̧k n̄an kāālet ko ad. Ekar kajju im peran an kōnono kōnke ejeļā ta eo būromōj enaaj boktok n̄an ro reban maron̄ ron̄ im lukkuun lale kōkaļļe ko.
En̄in ej wāween an kōmeļeļeik ta ko renaaj waļo̧k eļan̄n̄e kāālet ko ad renaaj n̄an ļoore im̧we eo an Jetōb ak ļoore ennaan ko reriab rej itok jān Setan, eo kōttōpar eo an ej n̄an kapo im kakkure kōj:
“Bwe lo, ewōr wo em̧ōj ba kake ioon eo ej kāālet n̄an pokake jetōb [nana] in; bwe eļan̄n̄e ej kāālet n̄an pokake e, im ej pād wōt im mej ilo jero̧wiwi ko an, ejja in wōt ej ilim mej n̄an jetōb eo an make; bwe e ej bōk n̄an wōņāān kaje ejjeļo̧k jem̧ļo̧kin, kōnke kar rupe kien Anij eo āinjuon jān an jeļā make. …
“Kōn menin eļan̄n̄e armej en ej jab ukeļo̧k, im ej pād wōt im mej juon rikōjdat n̄an Anij, kajjitōk ko an jim̧we in lan̄ ej karuj jetōb eo an e jabwabanban n̄an juon kile ewāmourur kōn bōd eo an make, eo ej kōm̧m̧an bwe en kuņōk jān im̧aan mejān Irooj, im kobrak būruōn kōn āliklik, im metak, im en̄taan, eo ej āinwōt kijeek eo ejamin kun, eo urur ko an rej wanlōn̄ļo̧k indeeo im indeeo.”
Kiin̄ Benjamin ej wōnm̧aanļo̧k wōt n̄an ba, “O, aolep kom̧ em̧m̧aan ro rerūtto, im barāinwōt em̧m̧aan ro em̧m̧an dettaer, im kom̧ ajri ro reddik ro remaron̄ meļeļe naan kein aō, bwe iaar kōnono n̄an kom̧ ilo alikkar bwe kom̧in maron̄ meļeļe, ij jar bwe kom̧in maron̄ rujļo̧k n̄an juon ememļo̧kjeņ kōn jekjek eo enana an ro raar wōtlo̧k ilo jero̧wiwi.”4
N̄an n̄a, kajoor eo an kakkōl eo n̄an ukweļo̧k ej ļōm̧ļōm̧ ilo kōlmenļo̧kjen e aō juon pija in iien eo em̧ool n̄e kwe im n̄a renaaj jutak im̧aan Rilo̧mo̧o̧r eo ālikin mour in. Jekōņaan kōn aolepān būruer n̄an jab tumlaļļo̧k ak n̄an reilōn̄ļo̧k n̄a E, loe An etton̄dikdik, im ron̄ An ba, “‘Eṃṃan aṃ kōṃṃan kwō karijera eṃṃan im tiljek: … deḷọñ [tok].”5
Kiin̄ Benjamin ekar kalikkare elmen n̄an bōke kōjatdikdik n̄an ron̄ naan kein n̄e jej kapukōt ial eo ilo mour in n̄an ukōt m̧wilid ilo Pinmuur eo an Jisōs Kraist. En̄in ej ial eo wōt n̄an kalōk pedped eo em̧ool im n̄an jutak pen ilo iien ļan̄ in kapo ko im melijon̄ ko im̧aan. Kiin̄ Benjamin ej kōmeļeļeik oktak in m̧wilid kōn juon men eaiboojoj eo ekar aolep iien un̄ur būruō. Kar kōjerbale jān rikanaan ro etto im jān Irooj Make. Ej en̄in: jej aikuj erom juon ajri—juon ajri edik.
N̄an jet, eban pidodo n̄an bōke. Elōn̄ iaad rekōņaan kajoor. Jemaron̄ barāinwōt loe bwe āinwōt juon ajri ej āinwōt m̧ojno̧. Elōn̄ mama im baba rej reim̧aanlo̧k n̄an raan eo n̄e ajri ro nejier enaaj dikļo̧k aer kilen ajri. Ak Kiin̄ Benjamin, eo meļeļe āinwōt jabdewōt eo ej mour ta eo meļeļein n̄an erom em̧m̧aan in kajoor im peran, ekalikkar bwe n̄an āinwōt juon ajri ejjab n̄an jab kilen ajri. Ej n̄an āinwōt Rilo̧mo̧o̧r eo, eo ekar jar n̄an Jemen kōn kajoor n̄an maron̄ kōm̧m̧ane Ankilaan Jemen im pinmuur kōn jerawiwi an aolep ajri ro Nejin Jemen innām kar kōm̧m̧ane. Mwilid ej aikuj oktak n̄an erōm āinwōt ajri n̄an bōk kajoor eo jej aikuji n̄an jutak dim im ilo aenōm̧m̧an ilo raan kein āliktata.
En̄in ej kōmeļeļe eo ekam̧ōņōņō an Kiin̄ Benjamin kōn elmen an oktak eo itok: “Bwe armej ilo lukkuun biktokin ej rikōjdat n̄an Anij, im eaar jān wōtlo̧k eo an Adam, im enaaj, indeeo im indeeo, m̧ae an naaj kōtļo̧k e n̄an karreelel ko an Jetōb Kwōjarjar, im utūkļo̧k armej eo ilo lukkuun biktokin im erom juon rikwōjarjar kōn pinmuur eo an Kraist Irooj, im erom āinwōt juon ajri, ettā, ineem̧m̧an, ettā bōro, kem̧m̧aanwa, obrak kōn iakwe, m̧ōņōņō in ajeļo̧k e n̄an aolep men ko Irooj ej lo ekkar n̄an kaddoik ņa ioon, em̧ool āinwōt juon ajri ej ajeļo̧k e n̄an jemān.”6
Jej bōk oktak eo ilo ad kōm̧m̧an im kōkāāl bujen ko ippān Anij. Eo ej boktok kajoor an Pinmuur eo an Kraist n̄an kotļo̧k juon oktak lo būruwōd. Jej en̄jake aolep iien jej bōk mōttan kwojkwoj eo, kōm̧m̧an juon kain̄i an tampeļ n̄an juon nukid emootļo̧k, kam̧ool āinwōt rikam̧ool an Rilo̧mo̧o̧r eo, ak kea kōn juon armej ej aikuj āinwōt rikaļoor ro an Kraist.
Ilo en̄jake kein, jej erom ilo iien āinwōt juon ajri ilo maron̄ eo ad n̄an iakwe im pokake. Jej itok n̄an jutak ioon pedped eo em̧ool. Ad tōmak ilo Jisōs Kraist ej boktok kōj n̄an ukweļo̧k im n̄an kōjparok kien ko An. Jej pokake, im jej bōke juon kajoor n̄an eļļā ioon kapo, im jej bōk kallim̧ur eo kōn unoojdikdik eo an Jetōb Kwojarjar.
Mwilid ej oktak n̄an erom āinwōt juon ajri edik, n̄an pokake Anij im kōļapļo̧k iakwe. Oktak in enaaj kōkarbab kōj n̄an m̧ōņōņō kōn menin letok eo ej itok ilo Jetōb Kwojarjar. Bōk jem̧jerā eo an Jetōb enaaj kaenōm̧m̧an, tōl, im kōkajoor kōj.
Emōj aō itok n̄an jeļā jet iaan ta ko Kiin̄ Benjamin ej ba iien eo ej ba bwe jemaron̄ erom āinwōt ajri jidik im̧aan Anij. Emōj aō katak jān elōn̄ en̄jake bwe Jetōb Kwojarjar ekkā an kōnono ilo anikien edik, ron̄ eļaptata n̄e juon bōro ej kijenmej im aenōm̧m̧an, āinwōt juon ajri. Ilo m̧ool, jar eo ejerbal ej “Ikonaan wōt ta eo Kwoj kōņaan. Kaju ba n̄an n̄a ta eo. Inaaj kōm̧m̧an.”
N̄e ļan̄ ko an mour in enaaj itok, jemaron̄ dim kōnke jej jutak ioon ejm̧aan in tōmak eo ad ilo Jisōs Kraist. Tōmak in enaaj tōl eok n̄an ukweļo̧k raan otemjej im jim̧we ilo kōjparok bujen. Innem kwonaaj aolep iien keememej E. Im ilo ļan̄ in matōrtōr im jerawiwi, kwonaaj en̄jake dim im kōjatdikdik.
Eļapļo̧k jān menin, kwonaaj loe kwe make etal ilo am kotak ro jet n̄an jokne ioon ejm̧aan eo ippam̧. Tōmak ilo Jisōs Kraist enaaj tōlļo̧k n̄an eļap kōjatdikdik im n̄an en̄jake ko n̄an iakwe ro jet, eo ej lukkuun m̧ool in iakwe eo an Kraist.
Ij kwaļo̧k aō kamool ekajoor bwe Irooj Jisōs Kraist emōj an lewaj karuwainene eo n̄an kwe n̄an “Itok n̄an ippa.”7 Ej karuwainene kwe, jān iakwe n̄an kwe im ro kwoj iakwe er, n̄an itok n̄an E n̄an aenōm̧m̧an ilo mour in im mour in indeeo ilo mour eo ej itok. E elukkuun jeļā ļan̄ ko kwonaaj jeļm̧ae ilo teej eo am āinwōt m̧ōttan karōk in m̧ōņōņō eo.
Ij akweļap ippemi n̄an bōke karuwainene in an Rilo̧mo̧o̧r. Āinwōt juon ajri ekijenmej im iakwe, bōke jipan̄ in An. Kōm̧m̧an im kōjparok bujen ko Ej letok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Renaaj kōkajoor kwe. Rilo̧mo̧o̧r eo ejeļā ļan̄ ko im jikin kōjparok ko ilo ial eo n̄an m̧weo Ippān im n̄an ippān Jemedwōj Ilan̄. E ejeļā iaļ eo. E ej Iaļ eo. Ij kwaļo̧k aō kam̧ool ilo et eo ekwojarjar etan Jisōs Kraist, amen.