Jikinuwe in Tōmak

Ekōjkan an apan̄ ko an mour jelet ad tōmak ilo Jisōs Kraist? Im ta kijejeto eo tōmak eo ad ioon m̧ōņōņō eo im aenōm̧m̧an eo jej en̄jake ilo mour in?

Iiō eo ekar 1977. Taļboon eo ekar riin̄, im ennaan eo ekar kanooj kabūrom̧ōj kōm. Carolyn im Doug Tebbs rekar pād ilo aer jino em̧m̧akūtļo̧k n̄an m̧weo im̧wer ekāāl ālkin kadedeļo̧k aer kadiwōjļo̧k jān jikuuļ. Doulul eo an elder ro rekar itok n̄an kanne kobban wa eo. Doug, ekar kanooj lale bwe iaļ eo en ejjeļo̧k jabdewōt ie m̧okta jān diwōjļo̧k, ekar bar lale. Ta eo ekar jab loe ej leddik eo nejin edik, Jennie, kar ettōr likin wa eo ilo iien eo ebōd. Ilo jidimkij, jitōnbōro eo nejier Jennie ekar jako.

Ta eo ekar waļo̧k tokālik? Metak eo raar lukkuun en̄jake enaaj ke kōm̧m̧ane juon en̄jake reban anjo̧ ioon ikōtaan Carolyn im Doug, ak enaaj bōlen lukōj būruwier ippān doon im kapen tōmak eo aer ilo karōk eo an Jemedwōj Ilan̄?

En̄jake eo aer ilo jelm̧ae en̄taan ko aer ekar aitok im kōmetak, bōtaab jān juon jikin ekar itok kabōjrak ilo jetōb n̄an jab luuji kōjatdikdik ak n̄an “pād wōt ilo iaļ eo [aer].”¹ Ilo juon jekjek ripālele in ekabwilōn̄lōn̄ em̧ool ekar ļapļo̧k aer āinwōt Kraist. Ļapļo̧k aer kallim̧ur. Ļapļo̧k aer meanwōd. Rekar tōmak bwe, ilo iien eo An, Anij enaaj ukōti en̄taan ko aer n̄an aer kajoor.²

Men̄e metak im jako eo ekar jab im eban lukkuun jako, Carolyn im Doug rekar kaenōm̧m̧an jān kam̧ool eo bwe kōn aer dim wōt ilo iaļ in bujen eo, jitōnbōro eo nejierro Jennie enaaj aer n̄an indeeo.³

Waanjon̄ak eo aer ekar kōkajoorļo̧k tōmak eo aō ilo karōk eo an Irooj. Jejjab loe aolep men. E ej. Irooj ekar ba n̄an Josep Smith ilo kar jikin Kalbuuj Liberty bwe “aolep men kein otemjeļo̧k renaaj lewōj n̄an eok imminene, im naaj n̄an em̧m̧anļo̧k eo am. Eo Nejin Armej eaar wanlaļļo̧k ium̧wier aolep. Kwe kwo ļapļo̧k jān e ke?”⁴

Ilo ad bōk ankilaan Irooj, E ej katakin kōj elmen ad etetal Ippan̄.⁵ Āinwōt juon mijenede eo em̧m̧an dettan ej jerbal in jipan̄ ilo Tahiti, kar kajjitōk ippa n̄an kōjeraam̧m̧an juon nin̄nin̄ enan̄inmej. Kōm kar likūt peim̧ ioon bōran im kōjeraam̧m̧an e bwe en ājmourļo̧k. Ejmour eo an ekar jino em̧m̧anļo̧k, bōtaab innām ekar bar nan̄inmej. Alen kein karuo kōm kar kōjeraam̧m̧an e ak ejja wōt wāween eo. Alen kein kajilu kajjitōk eo ekar bar itok. Kōm kar akweļap ippān Irooj bwe Ankilan en kōm̧m̧an. Ejjab to tok ālik, jetōb in edik ekar jepļaakļok n̄an kapijuknen eo an ilan̄.

Ak kōm kar aenōm̧m̧an. Kōm kar kōņaan bwe nin̄nin̄ eo en mour; bōtaab Irooj ekar wōr an karōk ko jet. Bōk Ankilan ijello̧kin eo ad make ej ki eo n̄an lo lan̄lōn̄ jekdo̧o̧n ta jekjek ko ad.

Tōmak eo eļam waan ewōr ippād ilo Jisōs Kraist ilo ad m̧okta jino ekkatak kōn E emaron̄ pād wōt ilo būruwōd ilo ad jelm̧ae apan̄ ko an mour. Tōmak eo ad ilo E emaron̄ im enaaj tōl kōj ilo aolep men ko rōkapokpok an mour. Ilo m̧ool, jenaaj loe bwe ewōr men ko reļem waan ilo iturajet in men ko rōkapokpok an mour⁶ ilo ad pād wōt ilo “[dim] ilo Kraist, kōn juon kōjatdikdik emeram,.”⁷

M̧ōttan jibadbad eo an mour ej n̄an kōm̧m̧an bwe menin ļōkatip kein ren erom kein jipan̄ ilo ad wanlōn̄ļo̧k ta eo ij ņa etan “jikinuwe in tōmak.”—juon jikinuwe kōnke ej rōjan̄ bwe tōmak ejjab oktak. Emaron̄ wanlōn̄ wallaļ ekkar n̄an kāālet ko jej kōm̧m̧ani.

Ilo ad kajjieon̄ kalōk tōmak ilo Rilo̧mo̧o̧r eo, emaron̄ jab dipio ad meļeļe iakwe eo an Anij n̄an kōj, im jemaron̄ pokake kien ko An kōn juon en̄jake in lokjak. Bōd emaron̄ ilo m̧ool erom ikdeelel eo eļap tata ijello̧kin iakwe. Jemaron̄ de jan̄in en̄jake ekkejel eo em̧ool n̄an E.

Ilo ad kapukōt n̄an kōļapļo̧k tōmak eo ad, jemaron̄ pok kōn ta eo Jemes ekar katakin. Ekar kakeememej kōj bwe “tōmak ke ejjeḷọk jerbal ejjeḷọk tokjān.”⁸ Jemaron̄ tipbok n̄e jej lōmņak bwe aolep men rej pedped iood. An lukkuun ļap ad pedped iood make emaron̄ karum̧wijļo̧k maron̄ eo ad n̄an tōpar kajoor ko an lan̄.

Ak ilo ad em̧m̧akūt m̧aanļo̧k tōmak eo em̧ool ilo Jisōs Kraist, ad ļōmņak ej jino oktak. Jej kile bwe pokake im tōmak ilo Rilo̧mo̧o̧r eo ej kōkarbōb kōj n̄an an Jetōb eo An pād ippād aolep iien.⁹ Pokake ejako an kaabūņōņō ak ej erom juon kappukōt aitok.¹⁰ Jej kile bwe pokake kean̄ ko an Anij ekōmaron̄ kōj n̄an lōke E. Kōn lōke eo An ej itok eļapļo̧k meram. Meram in ej tōl kōj ilo iaļ eo ad im kōm̧m̧an bwe jen alikkarļok ad lo iaļ eo jej aikuj bōke.

Bōtaab ewōr eļapļo̧k. Ilo an tōmak eo ad ilo Jisōs Kraist ļapļo̧k, jej etale juon oktak emeram me ekoba juon meļeļe ekwojarjar kōn jemjera eo ad ippān Anij—juon em̧m̧akūtļo̧k eo edim jān “Ta eo ikōņaan?” n̄an “Ta eo Anij ekōņaan?” Āinwōt Rilo̧mo̧o̧r eo, jej aikuj jerbal “a en jab ankil Aō, a ankil Aṃ.”¹¹ Jej kōņaan kōm̧m̧ane jerbal eo an Anij im erom juon kein jerbal ilo Pein.¹²

Eddōkļok eo ad ej n̄an indeeo. Būreejtōn Russel M. Nelson ekar katakin ekanooj ļōn̄ļo̧k men me Jemedwōj Ilan̄ ekōņaan bwe jen jeļā.¹³ Ilo ad eddōkļo̧k, jej aikuj meļeļe ta eo Irooj ekar katakin Josep Smith: “Bwe eļan̄n̄e kom̧ij kōjparok kien ko Aō kom̧ naaj bōk tarlep eo An, im aiboojoj ilo N̄a; … Ij ba n̄an kom̧, kom̧ naaj bōk jouj kōn jouj.”¹⁴

Ewi jon̄an uteij eo jekōņan tallon̄ ilo jikinuwe in tōmak eo ej ad jokāālet. Elder Neil L. Andersen ekar katakin “tōmak ejjab kōn jide, ak kōn kāālet.”¹⁵ Jemaron̄ kāālet n̄an kōm̧m̧ane kāālet ko aikuji n̄an kōļapļo̧k ad tōmak ilo Rilo̧mo̧o̧r eo.

Ļōmņak kōn ta eo ekar walo̧k kōn kāālet ko kar kōm̧m̧ani ke Leman im Lemuel rekar wōtlak jān jikinuwe in tōmak eo ilo an Nipai kar tallōn̄ lōn̄ wōt. Ewōr ke juon waanjon̄ak eo alikkarļo̧k jān oktak eo ikōtaan uwaak eo an Nipai “Inaaj ilo̧k im kōm̧m̧ani”¹⁶ ņae Leman im Lemuel, kar m̧ōj aer lo juon enjeļ, uwaak kōn “Ekōjkan Irooj Enaaj letok Leban ilo peid?”¹⁷

Jab tōmak ej pinej maron̄ eo ad n̄an lo kabwilōn̄lōn̄ ko, ilo an jekjek in kōļmenļo̧kjeņ eo kōn tōmak ilo Rilo̧mo̧o̧r eo kōppeļļo̧k kajoor ko an lan̄.

Jekdo̧o̧n n̄e tōmak eo ad ej m̧ōjņo, pein Irooj enaaj iien otemjej eļļok.¹⁸ Iiō ko ļok ikar bōke juon kappe n̄an bar ejake juon stake ilo Nigeria. Ilo minit eo āliktata, ekar wōr juon oktak in iien eo. Ekar wōr juon em̧m̧aan ilo stake eo ekar kāālet n̄an jako jān bukwōn eo ilo raan eo kein kajuon in kweiļo̧k eo. Ekar jab kōņaan bwen en kūr āinwōt stake būreejtōn.

Ke ekar jako, ekar pād ilo juon jorrāān enana, bōtaab ekar jab jorrāān. Menin ekar kōm̧m̧an menin an ļōmņak etke kar kōjparok mour eo an. Ekar bar roolļo̧k n̄an jokāālet eo ekar kōm̧m̧ane. Ekar ukweļo̧k im ettā ilo an pād ilo raan eo ekāāl an kweiļo̧k eo. Im aaet, kar kūr e n̄an juon stake būreejtōn eo kāāl.

Elder Neal A. Maxwell ekar katakin: “Ilo wōt ad kajejjet ankilad ippān ankilan Anij ej ijo lo tarlep in m̧ōņōņō eo. Jabdewōt men edikļo̧k ej tōprak in juon m̧ōtta edikļo̧k wōt.”¹⁹

Ālikin kōm̧m̧ane “aolep men ko rej pād ilo kajoor eo ad,” innām e iien n̄an “jutak pen … n̄an lo lo̧mo̧o̧r an Anij,.”²⁰ Ikar loe men in ilo aō kar jerbal āinwōt brother in jerbal in karejar n̄an baam̧le eo an McCormick. Ka m̧are um̧win 21 iiō ko, Mary Kay ekar tiljek ilo an jerbal ilo kūr eo an. Ken ekar jab juon membōr in Kabun̄ in im ejjeļo̧k an kar itok lim̧o ilo erom juon, ak ej iakwe lio pāleen, ekar kāālet n̄an etal n̄an jar ippān.

Juon Jabōt ikar en̄jake im̧we n̄an kwaļo̧k aō naan in kam̧ool ippān Ken. Ikar kajjitōk ippān eļan̄n̄e imaron̄ kar kwaļo̧ke. Uwaak eo an ekar ļam waan im alikkar: “Jaab, kommol.”

Iaar tarpok. Ikar en̄jake juon im̧we im ikar kajjieon̄ ļoore. Ekar kapopo n̄an kāālet bwe ikar kōm̧m̧ane ijo kuņaō. Ak ālkin jar im kejōkļo̧kjeņ, imaron̄ kar lo bwe men̄e jibadbad ko aō raar jim̧we; eļap wōt aō kar pedped ioō make im lukkuun dik ilo ioon Irooj.

Tokālik ikar bar roolļo̧k ak ilo juon kōļmenļo̧kjeņ eoktak. Inaaj etal āinwōt juon kein jerbal ilo pein Irooj, kōn ejjeļo̧k bar ikdeelel ijello̧kin ļoor Jetōb eo. Ippān doon ippān eo m̧ōtta etiljek, Gerald Cardon, kōm kar deļo̧n̄ļok ilo m̧weo imōn McCormick.

Ejjab to ālkin, ikar en̄jake n̄an karuwainene Gerald n̄an al “Ij Jela Bwe Aō Dri Pinmuur Ej Mour.”²¹ Ekar erreitok in ke ewōr an kajjitōk, ak kōn an lōn̄ an tōmak ilo tōmak eo aō, ekar al. Juon jetōb aiboojoj ekar koobrak ruum̧ eo. Im̧we ekar itok n̄an karuwaineneiktok Mary Kay im Kristin, leddik eo nejier, n̄an kwaļo̧k naan in kam̧ool ko aer. Ilo aer kar kōm̧m̧ane men in, Jetōb eo ekar ļapļo̧k an kajoor. Ilo m̧ool, ālkin naan in kamool eo an Kristin, dān in kōmejaaļaļ ekar to̧o̧r laļļo̧k ilo jepen Ken.²²

Anij ekar bōk jikin. Bōro ko raar jab wōt m̧weiur ak kar oktak n̄an indeeo. Ronoul-juon iiō in jab tōmak ekar jakoļo̧k kōn kajoor eo an Jetōb Kwojarjar. Juon wiik tokālik, Ken ekar peptaij. Juon iiō tokālik, Ken im Mary Kay kar liāp ilo m̧weo im̧ōn Irooj n̄an aolep iien im n̄an aolep indeeo.

Ippān doon kōm kar en̄jake ta kar meļeļe in n̄an bōk jikin ankilad kōn ankilan Irooj, im am tōmak ilo E ekar ļapļo̧k.

Jouj ļōmņak kōn jejjo kajjitōk kein kar kwalo̧k jān rikanaan ro rekwojarjar an Anij ilo ami kajjieon̄ tallōn̄e jikinuwe in tōmak eo ami:

Ikar ke utūki ke jān n̄a juwa?²³

Ij ke leļo̧k juon jikin ilo būruō n̄an naan an Anij?²⁴

Ij ke kōm̧m̧an bwe en̄taan ko aō ren oktak n̄an ļapļo̧k eo aō?²⁵

Ij ke m̧ōņōņō in kōtļok ankilaō bwe ren oran̄ļo̧k ilo ankilan Jema?²⁶

Eļan̄n̄e ikar en̄jake n̄an al al in iakwe in pinmuur eo, imaron̄ ke en̄jake kiiō?²⁷

Ij ke kōtļo̧k bwe Anij en anjo̧ ilo mour eo aō?²⁸

Eļan̄n̄e kwoj lo iaļ eo am̧ kiiō ej pād ilo jab errā ippān tōmak eo am̧ ilo Rilo̧mo̧o̧r eo, innām jouj im pukōt iaļ eo am̧ ļo̧k n̄an E. Mour ijo eutiej tata eo am̧ im ro ineem̧ ej pedped wōt ioon.

Kōm̧m̧an bwe en m̧wilaļļo̧k ad katōk ko an tōmak ilo būruōd. Kōm̧m̧an bwe jen ņa kōņin ine ko ilo ad lukōj kōj make n̄an Rilo̧mo̧o̧r eo kōn kautiej bujen ko jaar kōm̧m̧an Ippān. Ilo etan Jisōs Kraist, amen.