Katakin Un̄n̄are Peid Make n̄an Ajri ro im Jodikdik ro

Inaaj kōnono kōn un̄n̄are peid make im wāween katakin ajri ro im jodikdik ro. Un̄n̄are peid make maron̄ kile āinwōt juon unin kōnono eaorōk n̄an rūtto ro. Em̧ōj aō jeļā kiiō bwe rūtto ro remaron̄ emmanļo̧k ilo un̄n̄are peid make n̄e em̧ōj kar katakin kōn gospel eo an Jisōs Kraist im jinoe mour kōn katak im pedped in katak ko jān ke raar ajri im jodikdik ilo m̧ōko.

Kōmeļeļe eo em̧m̧antata ej juon waanjon̄ak eo em̧m̧an kōn lukkuun mour. Wilfried Vanie, ro jiljilimjuon jein im jatūn, kab jinen raar kobatok ilo Kabun̄ in ilo Abidjan, Ivory Coast, ke ekar jiljino an iiō. Ekar peptaij ke ekar ralitōk. Jemān, eo ej kakke aikuj ko an baam̧le eo, eaar mej ke Wilfried ar jon̄oul juon an iiō.

Men̄e ekar būromōj kōn jekjek eo baam̧le eo ekar ioone, Wilfried eaar kāālet n̄an wōnm̧aanļo̧k ilo jikuuļ, itok jān naan in kōkkapilōklōk ko an jinen im barāinwōt jān jipan̄ ko an Kabun̄ in. Ekar kadiwōjļo̧k jān high school im kōm̧m̧ane jerbal in mijen eo an ilo Ghana Cape Coast Mission, ijo ekar katak kajin English. Ālkin mijen eo an, ekar wōnmanļok im jikuuļ ilo university im bōk juon diploma in accounting im finance. Mekarta ekar pen n̄an ellolo jerbal ikkijeen field in, kar ellolo an jerbal ilo industry eo an tourism im hospitality.

Ekar jinoe āinwōt juon riajeej m̧ōn̄ā im dān ilo juon ļalem-star hotel, bōtaab kōņaan eo an n̄an em̧m̧anļo̧k eo ekar un e m̧aanļo̧k n̄an ekkatak eļapļo̧k m̧ae ekar erom̧ juon rijerbal eo ejeļā ruo kajin im ej lale taļboon im lale riwia ro. Ke ekar peļļo̧k juon hotel ekāāl, eaar teru āinwōt juon ribōnbōn in bon̄. Tokālik, ekar bōk kūlaaj ilo BYU-Pathway im ej kiiō katak juon ko̧o̧j bwe en maron̄ bōk juon certificate ilo tourism im hotels. Ikdeleel eo an ej bwe juon raan en erom̧ juon mānija in juon hotel eļap. Wilfried emaron̄ kakke aikuj ko an eo karejeran indeeo im ajri ro ruo nejin, barāinwōt jinen im ro jein kab jatūn. Kiiō ej jerbal ilo Kabun̄ in āinwōt juon membōr in stake high council.

Un̄n̄are peid make kar kōmeļeļeik āinwōt “maron̄, wūjlepļo̧k, im kijejeto n̄an kake menin aikuj ko ilo jetōb im kanniōk an mour n̄an juon make im baam̧le.”¹ Kōtobar eo n̄an un̄n̄are peid make ej mōttan jerbal in bujen ej tōlļok kōj n̄an Jemedwōj Ilan̄ im nejin,Jisōs Kraist. Enaaj kōkajoorļo̧k tōmak eo ad ilo Jisōs Kraist im lan̄lōn̄ likwōj kōj n̄an E kōn bujen ko im kain̄i ko an lo̧mo̧o̧r im aiboojoj eo eutiejtata. Un̄n̄are peid make ej juon katak in gospel eo an Jisōs Kraist , ejjab juon būrokuraam̧. Ej juon jekjek in mour me n̄an jem̧ļo̧kin mour, ejjab juon m̧akūtkūt.

Jej erom̧ ro rej un̄n̄are peier make ilo mour ko ad ilo ad eddōkļo̧k ilo kajoor in jetōb, kōkōm̧anm̧anļo̧k ājmour ilo ānbwin im en̄jake, pukot jeļāļo̧kjeņ im jerbal, im pojak ilo aikuj ko an mour in.² Jerbal in ej ke jem̧ļo̧k ilo mour ko ad? Jaab, ej juon jerbal in ekkatak n̄an jem̧ļo̧kin ad mour, eddōkļo̧k, im jerbal. Ejjāmin jemļok; ej juon jerbal ej wōnm̧aanļo̧k wōt, aolep raan.

Ewi wāween ad katakin kōn katak im pedped in katak ko an un̄n̄are peid make n̄an ajri ro im jodikdik ro? Juon wāween eaorōk ej n̄an aolep iien kōjerbale būrokuraam̧ in an Ajri im Jodikdik ro. Jinen im jemān ajri ro rej katak kōn gospel eo an Jisōs Kraist, kobaļo̧k ilo jerbal in jipan̄ im m̧akūtkūt ko, im jerbal ippān doon ilo eria ko emān ikkijeen eddōkļo̧k an juon make me rej make wōt im rejeņolo̧k n̄an kajjjojo ajri. Ejako an jon̄an wōt juon būrokuraam̧ eo kar kōmeļeļeiki n̄an aolep.

Bok eo Children’s Guidebook ej ba, “Ke Jisōs eaar iiō kane am̧, Eaar ekkatak im eddōkļo̧k. Komaron̄ bar ekkatak im eddōkļo̧k. Jeje ko rekwojarjar rej ba: ‘Jisōs ej ļapļo̧k ilo An mālōtlōt im rūtto, im ilo jouj ippān armej im Anij’ (Luk 2:52).”³ Jeje ko rekwojarjar ej kwaļo̧k kōn eddōkļo̧k im ekkatak ilo ad lale mour in jetōb, jouj an Anij; peļaak ko peļaakid, ad lo jouj im̧aan mejān armej; piktokid; im barāinwōt bōklekōt ko ad im mālōtlōt. Eria in eddōkļo̧k kein rej n̄an kōj aolep, jekdo̧o̧n jete ad iiō. N̄āāt eo jej katakin er? Ilo Duteronomi 6:6-7 jej riit:

“Im naan kein, ij jiron̄ eok rainin, ren ilo būruōm̧:

“Im kwōn kanooj katakin naan kein ro nejim̧ kaki, im kwōn kōnono kaki n̄e kwōj jijet ilo m̧weo im̧ōm̧, im n̄e kwōj etetal ilo iaļ, im n̄e kwōj babu, im n̄e kwōj jerkak.”

Jej katakin men kein n̄an ajri ro jān waanjon̄ak ko rem̧m̧an, jān jerbal ippāer im jerbal in jipan̄ ippāer, katak jān jeje ko rekwojarjar, im ļoor katak ko an Jisōs Kraist āinwōt an rikanaan ro kar katakin.

Iaar kwaļo̧k bwe ilo būrokuraam̧ eo an Ajri ro im Jodikdik ro, ajri ro rej kāālet kōttōpar ko roktak jān doon ilo kajjojo eria in eddōkļo̧k ko emān. Eļap an aorōk bwe ren kōm̧m̧an aer make kōttōpar ilo eria ko kajjojo. Jinen im jemān ajri ro im ritōl ro remaron̄ katakin, kapilōk, im rejtak.

N̄an waanjon̄ak, leddik eo jibūm̧ro etan Miranda elukkuun kar elewetak n̄an eddōkļo̧k ilo jetōb ilo an kobaļo̧k ilo kūlaaj in jemenere ko aolep jibbon̄ tata. Eaar jino an itok limoin ilo an ron̄ naan ko rem̧m̧an jān ajri ro ilo kūlaaj in jemenere eo ilo ward eo an. Jinen eaar jab aikuj karuj e n̄an kūlaaj. Kōn kōņaan eo an, ej make rūj im koneek jān videoconference ilo ien eo kar karōke ilo 6:20 in jibon̄ kōnke em̧ōj an bōk juon iminene eo em̧m̧an n̄an jipan̄ e. Ro jinō im jema make raar jiron̄ eō bwe Miranda eļapļo̧k an kiiō kōnono ilo iien an loļo̧k er, āinwōt an m̧ōj an eddōkļo̧k ilo an lōke e make. Katak kein rej n̄an eddōkļo̧k ilo mour im tōprak ko jej loi.

Jinen im jemān ajri ro, bubu im jim̧m̧a, ritōl ro, im ro m̧ōttāer rej jipan̄ ilo eddōkļo̧k eo an ajri ro. Aolep brother im sister ro rej lukkuun bōk koņaer, rej koba ippān ritōl ro an priesthood im doulul ko an ward eo rej lukkuun jipan̄. “Baam̧le eo: Juon Naan in Kean̄ n̄an Aolepān Laļ in” ej ba: “Jān jōkjōk eo ekwojarjar, ro jemān rej tōl ioon baam̧le ko aer ilo io̧kwe im jim̧we im ej aer eddo n̄an kōpooj menin aikuj ko an mour im kōjparok baam̧le ko aer. M̧am̧a ro eddo eo aer eaorōk ej n̄an kōkkaajririik ajri ro nejier. Ilo eddo kein rekwojarjar, baba im m̧am̧a ro rej kallim̧ūr n̄an jipan̄ doon āinwōt m̧ōttā ro rej juōn wōt. … Ro nukid ilo baam̧le ko rej aikuj leļok jipan̄ n̄e emenin aikuj.”⁴ Ļain eo āliktata ej n̄an jibūd im jim̧m̧ad, ilubwiljin ro jet.

Ke kōm eaar jerbal ilo West Africa, kōrā eo ippa, Nuria, eaar kōm̧m̧ane juon jerbal eļap an em̧m̧an ilo jerbal in karejar n̄an im kar pād wōt im ennaan wōt ippān baam̧le kab ajri ro jibūn jān ettoļo̧k. Ekar kōm̧m̧ane menin ilo an kōjerbal technology. Ej riiti bok ko n̄an ajri jiddik ro jibūn. Ej katakin leddik ro rerūtto jibūn kōjerbal unin kōnono ko āinwōt bwebwenato in baam̧le eo am̧ro, science, bwebwenato in Puerto Rico, Laajrak in Tōmak, im gospel eo an Jisōs Kraist. Kōtaan ko rettoļo̧k raan kein rejjab kōm̧m̧an jon̄an, ekkeijel, jerbal in karejar im katakin kōn diktak in epepen ko an baam̧le ko ad. Iaar kobaļo̧k ippān Nuria ilo iien aō katakin ajri ro jibūm̧ro, n̄an iakwe er, im n̄an kaorōk er im kōm̧m̧an bwe ren ettōn̄.

Kwoj aikuj kile men ko rej āinwōt juon ikōtaan ajri ro im jodikdik ro ilo aerkōļapļo̧k wāween ad un̄n̄are peid make. Eddōkļok ilo eria ko emān reiten āinwōt. Kajoor in jetōb ilo un̄n̄are peid make ej iookļo̧k m̧ōttan ko an jetōb ippān Ajri ro im Jodikdik ro. Kanniōk im en̄jake ājmour ilo un̄n̄are peid make ej ekkeijelļo̧k ippān m̧akūtkūt ko ilo ānbwin im ilo iiaio ippān Ajri ro im Jodikdik ro. Jeļāļo̧kjeņ, jerbal, im menin kōppopo ko n̄an un̄n̄are peid make rej tōļļo̧k n̄an būrokuraam̧ eo an Ajiri ro im Jodikdik ro.

N̄an kōjem̧ļo̧ke, jān ļoore Rilo̧mo̧o̧r, Jisōs Kraist, im gospel eo An ilo ad un̄n̄are peid make ilo mour ko adim katakin menin n̄an ajri ro im jodikdik ro nejid. Emaron̄ em̧m̧anļo̧k ad kōm̧m̧ane menin ilo ad

1. erom̧ riwaanjon̄ak ro rem̧m̧an ilo ad jerbal in jipan̄ n̄an ro jet,

2. mour im katakin katak im pedped in katak an un̄n̄are peid make, im

3. pokake kien ko enaaj kalōk un̄n̄are peid make āinwōt m̧ōttan gospel eo an Jisōs Kraist.

Katak im Bujen Ko 104:15–16 ej ba:

“Im ej Aō kōttōpar n̄an ņa an ro rekwōjarjar, bwe aolep men ko otemjeļo̧k rej Aō.

“A eaikuj in kōm̧m̧an ilo wāween eo Aō make; im lo en̄in ej wāween eo bwe N̄a, Irooj, Iaar kean̄ n̄an ņa an ro rekwōjarjar Aō, bwe ro rijeram̧ōl naaj kautiej er, ilo jekjek eo im ro rim̧weiie naaj kōttāik er.”

En̄in ej Kabun̄ eo an Jisōs Kraist. Gospel eo An ej kōjeram̧m̧an baam̧le ko ilo laļ in im ilo aolepān n̄an jemļo̧kin indeeo. Ej tōl kōj ilo mour ko ad ilo ad kate kōj n̄an erom̧ baam̧le n̄an indeeo. Ijeļā menin em̧ool. Ilo etan Jisōs Kraist, amen.