Kōm̧m̧ane Men eo Eaorōktata

Jem̧aanļo̧k, juon m̧ōtta eaorōk ippa ekar bōk juon im̧we n̄an loļo̧k juon kōrā ilo ward eo an. Ekar kōjekdo̧o̧n im̧we eo kōnke ekar jab lukkuun jeļā kajjeen kōrā eo—ekar jab meļeļe kake. Ak kōnke ļōmņak eo elakkar itok n̄an e, ekar kālet n̄an ron̄jake im̧we eo. Kōnke ekar abōņōņō kōn an jab loļo̧k, ekar jiktok ippān bwe en bokļo̧k juon men n̄an sister eo enaaj kar jipan̄ kadikļo̧k an ikūm̧kūm̧. Ejjeļo̧k kajjitōk ke eban kar etal kōn ejjeļo̧k m̧aan pein! Kōn menin ekar bōke juon nien ice cream im m̧akūti n̄an jino ta eo ekar inepata ke emaron̄ kar juon iien loļo̧k eo epen.

Ekar kōļaļļaļ ilo kōjem eo an kōrā eo, im ium̧win jidik iien ekar kōpeļļo̧ke. Eo m̧ōtta ekar leļo̧k ice cream eo ilo juon peba bāāk, im rekar jino bwebwenato. Ekar jab bōk iien aitok n̄an an eo m̧ōttan kile bwe iien loļo̧k eo ekar menin aikuj. Ilo aer jijet ippān doon ilo etōņaak eo nam̧ōjen m̧weo, kōrā eo ekar kwaļo̧k elōn̄ apan̄ ko ekar jelm̧aiki. Ālkin juon awa in ekōnono ilo okmeneen in mejatoto, eo m̧ōtta ekar kile bwe ice cream eo ekar ōņļo̧k ilowaan bāāk peba eo.

Ekar m̧ōkaj im ba, “joļo̧k aō bōd bwe ice cream eo kijom̧ eōņļo̧k!”

Kōrā eo ekar uwaak ilo an jouj, “ej em̧m̧an wōt! Ij kadōk milik!”

Ilo juon ettōņak, Irooj ekar ba n̄an rikanaan Liai, “Jeraam̧m̧an n̄an kwe Liai, kōn men ko kwaar kōm̧m̧ani.”¹

Erom̧ āinwōt juon rikaļoor an Jisōs Kraist ekūtbuuj eļapļo̧k jān kōjatdikdik im tōmak. Ej kūr n̄an kijejeto, m̧akūtkūt, im m̧ool. Ej aikuji bwe jen kōm̧m̧ane juon men, erom̧ “ri kōm̧anm̧an naan eo, im jab ri ron̄jake wōt.”²

Ilo jekjek eo an ice cream eo me ekar eōņļo̧k, ta eo ekar eaorōktata? Ice cream eo ke? Ak bwe eo m̧ōtta ekar m̧ōkaj im kōm̧m̧ane juon men?

Ikar ioon juon iien em̧m̧an ippān juon jiron̄ aorōk eo ekar kajjitōk juon kajjitōk eo em̧ool: “Sister Craven, ekōjkan am̧ jeļā bwe aolep men kōn Kabun̄ in rem̧ool? Kōnke ejjeļo̧k men eņ ij en̄jake.”

M̧okta jān m̧ōkaj n̄an juon uwaak, ikar m̧okta kajjitōk ippān jejjo kajjitōk ko. “Ba tok n̄an eō kōn am̧ ekkatak jeje ko rekwojarjar.”

Ekar uwaak, “ijjab riiti jeje ko rekwojarjar.”

Ikar kajjitōk, “Ak ippān baamle eo am̧? Komi ej ke ekkatak jān Itok, Loor Iō ippān doon?”

Ekar ba, “Jaab.”

Ikar kajjitōk kōn jar ko an: “Ta eo kwoj en̄jake n̄e kwoj jar?”

Uwaak eo an, “Ijjab jar.”

Uwaak eo aō n̄an e ekar pidodo, “Eļan̄n̄e kwoj kōņaan jeļā jabdewōt men, kwoj aikuj kōm̧m̧ane juon men.”

Ejjab ke m̧ool menin kōn jabdewōt men jej kōņaan ekkatak im jeļā? Ikar karuwaineneik eo m̧ōtta ekāāl n̄an jino ļoor gospel eo an Jisōs Kraist: jar, ekkatak, jerbal n̄an ro jet, im lōke Irooj. Oktak eban itok ilo ad jab kōm̧m̧an jabdewōt. Ej itok kōn kajoor eo an Jetōb Kwojarjar ilo ad kōm̧m̧ane ilo kōttōpar juon kijejeto n̄an jeļā ilo ad kajjitōk, kappukōt, im kōļļaļļaļ. Ej itok jān kōm̧m̧an.³

Ilo Katak im Bujen Ko, ekkā an Irooj ba, “ejjab aorōk.”⁴ Ekōm̧m̧an menin aō kejōkļo̧kjeņ bwe eļan̄n̄e jet men rejjab aorōk, ak edik aer aorōk, ej aikuj wōr jet men ko raorōktata. Ilo kijejeto eo ad n̄an kōm̧m̧ane juon men ak kōm̧m̧ane jabdewōt, jemaron̄ kajjitōk ippād make, “Ta men eo eaorōktata?”

Rikadeelel ro emakijkij aer kōjerbal naan ko āinwōt “Aorōk” ak “Aikuj Wōr” ilo kōjatdikdik ko n̄an kapoik kōj n̄an tōmak bwe m̧weiuk eo rej wia kake emenin aikuj n̄an m̧ōņōņō eo ad ak em̧m̧anļo̧k eo ad. Ak ta eo rej wiakake elukkuun ke aorōk? Aikuj ke lukkuun wōr ippād? Ej ke lukkuun aorōk?

Erkein jejjo ļōmņak ko n̄an ļōmņaki. Ta eo eaorōktata?

• Ewi jon̄an “likes” jej bōk ilo men ko jej post ilo social media? Ak ewi jon̄an an Jemedwōj Ilan̄ iakwe im kaorōk kōj?

• Ekkōņak nuknuk ko rekāāl tata ilo jitaeļ? Ak kwaļo̧k kautiej n̄an ānbwinid ilo ad ekkōņak nukuk ko rekarbōb?

• Kappukōt uwaak ko kōn juon jikin kappukōt ilo intōrnet? Ak bōk uwaak ko jān Anij kōn Jetōb Kwojarjar?

• Kōņaan eļapļo̧k? Ak m̧ōņōņō kōn ta eo em̧ōj letok n̄an kōj?

Būreejtōn Russell M. Nelson eaar katakin:

“Ippān Jetōb Kwojarjar āinwōt juon am̧ kam̧pānien, komaron̄ kalikkar am̧ meļeļe kōn m̧anit eo ebun̄bun̄ me em̧ōj an ko̧kkure wāween ad mour. Komaron̄ māletletļo̧k jān epepen ko kar m̧oktaļo̧k. …

“Kōm̧mane juon jon̄o̧k n̄an aolepān laļ in!”⁵

Ebōk kijejeto n̄an mijōkeļo̧k ta eo elukkuun aorōk n̄an m̧ōņōņō indeeo. Setan ejjeļo̧k juon men eļapļo̧k an iakwe jān ad kabōd jon̄an aorōkid indeeo, tōl kōj n̄an ko̧kkure iien ko ad, taļōn ko, im kajoor eo ilo jetōb ilo men ko rejjab aurōk. Ij karuwaineneik kajjojo iaad n̄an lukkuun jar n̄an ļōmņak kōn men ko me rej bōk mejed jān kōm̧m̧ane ta eo aorōktata.

Rūkaki in kilaaj jilu eo an ļaddik eo nejūm ekar katakin kilaaj eo an n̄an “kōjebwebweik kōmālij eo am̧.” Ekar juon kein kakeememej rijikuuļ ro an reddik bwe er eo rej kōjebwebweik ļōmņak ko aer im kōn menin remaron̄ kōjebwebweik men ko rej kōm̧m̧ani. Ij kakeememej eō make n̄an “kōjebwebweik kōmālij eo aō” n̄e ij loe aō make jeerļo̧k n̄an men ko rejjab aorōk.

Juon rijikuuļ in high school ekar ba n̄an eō ilo juon iien ejjab to emootļo̧k bwe em̧ōj an bun̄bun̄ ilubwilijin jejjo jodikdik in Kabun̄ in n̄an kōjekdoon kien ko kōn juon bebe n̄an ukweļo̧k tok ālik. “Ej āinwōt juon menin nōbar” kar jiron̄ eō. Em̧ool Irooj enaaj wōnm̧aanļo̧k wōt im jeorļo̧k an ro bōd ro rej kōttāik er im ukweļo̧k “kōn lukuun būruōn.”⁶ Bōtaab tūriam̧o in Pinmuur eo an Rilo̧mo̧o̧r ejjāmin jerbal ilo juon wāween kōm̧m̧an kōjak. Jejeļā būrabōļ eo kōn juon iaan jiip ko ekar jebābwe. Aaet, juon seperd enaaj likūt jiip ko 99 im etal im pukōt eo ejebābwe. Ak komaron̄ ke ļōmņak kōn lan̄lōn̄ eo kōn ro rej kālet n̄an erom̧ 99 eo me rej bōktok n̄an Seperd eo Em̧m̧an? Ro rej pād wōt ippān doon im jipan̄ doon mour kōn bujen ko aer? Komaron̄ ke pijaikļo̧k ta eo laļ in ak jikuuļ eo am̧ ak jerbal eo am̧ ak m̧weo im̧ōm enkar āinwōt eļan̄n̄e pokake ekar men eo ebun̄bun̄ n̄an kōm̧m̧ane? Ejjab kōn kōwāppen mour in — ej kōn kappukōt lan̄lōn̄ ilo ad kōm̧m̧ane ijo em̧m̧antata n̄an mour kōn bujen ko em̧ōj ad kōm̧m̧ani ippān Irooj.

Ilo an laļ in kwaļo̧k eļapļo̧k pere kōn Anij im ļōkapokpok im an ļapļo̧k nana, iien eo in jej aikuj pād epaaktata n̄an rikanaan. Āinwōt e ej juon rikōnono n̄an Irooj, jemaron̄ lōke bwe ta eo ej kipel, rojan̄, im akweļap ippād n̄an kōm̧m̧ane rej men ko me reaorōktata.

Men̄e emaron̄ jab pidodo, enaaj baj wōt wōr juon wāween n̄an kōm̧m̧ane men eo aorōktata. Lukwon ekōnono ippān juon kurup in m̧ōttā ro ilo jikin jikuuļ, juon jiron̄ ekar en̄jake an leln̄o̧n̄ ke bwebwenato eo ekar oktak n̄an kōnanaik jon̄ak ko an Kabun̄ in. Im ekar kile bwe ejjab aikuj kar ikōn̄ wōt—ekar aikuj kōm̧m̧ane juon men. Ilo kautiej, ekar ekōnono kōn iakwe eo an Jemedwōj Ilan̄ im wāween an kien ko An kōjeraam̧m̧an im kōjparok ajri ro Nejin. Enkar pidodoļo̧k n̄an e n̄an jab kōm̧m̧an jabdewōt. Bōtaab ta eo eaorōktata? Kobaļo̧k ippān jarlepju eo? Ak jutak āinwōt juon rikam̧ool an Anij ilo “aolep iien im aolep men, im ilo aolep jikin”?⁷

Eļan̄n̄e Kabun̄ eo an Jisōs Kraist em̧ōj an jepļaaktok ej waļo̧k tok jān ittiņo, jej aikuj bar waļo̧k tok jān ittiņo. Āinwōt kōrā in kōjparok bujen, jej aikuj romaake meram in gospel eo ilo kōj n̄an aolepān laļ in ilo ad jutaklōn̄tak im jenolo̧k. Jej kōm̧mane menin ippān doon āinwōt leddik ro nejin Anij—juon kajoor in 8.2 milien kōrā ro ilo iiō ko 11 im lōn̄ļo̧k, ro jerbal ko aer rej juon wōt. Jej aiintok Israel ilo ad bōk koņaad ilo jerbal in lo̧mo̧o̧r im mour eo eutiejtata: kajjeon̄ n̄an mour kōn gospel eo an Jisōs Kraist, kea kōn aikuj ko an ro jet, karuwaineneik aolep n̄an bōk gospel eo, im kakobaik baam̧le ko n̄an indeeo.⁸ Gospel eo an Jisōs Kraist ej juon gospel in jerbal im juon gospel in lan̄lōn̄! Jen jab kajejtokjen maron̄ eo ad n̄an kōm̧m̧ane men ko me reaorōktata. Jem̧ļo̧k eo ad ekwojarjar ej letok n̄an kōj kajoor im peran n̄an kōm̧m̧ane im erom̧ aolepān ta eo Jemedwōj Ilan̄ ekōņaan bwe jen erom̧.

Unin kōnono eo an jodikdik n̄an iiō in ej jān Jabōn Kōnnaan Ko 3:5–6:

“Kwōn lōke Irooj kōn aolepān būruom̧; im kwōn jab atartar ioon jeļāļo̧kjeņ eo am̧.

“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”

Pedped in ijjinoe eo eaorōk n̄an lōke Irooj ej wōnm̧aanļo̧k wōt, tōmak ke E enaaj tōl kōj men̄e ejjeļo̧k ippād aolep uwaak ko.

Sister ro, ejjab kōn ice cream eo. Im ejjab kōn kōm̧m̧an eļapļo̧k. Ej kōn kōm̧m̧ane ta eo eaorōktata. Ej mour kōn pedped in katak ko an Kraist ilo mour ko ad ilo ad kate kōj n̄an erom̧ eļapļo̧k āinwōt E.

Jon̄an ļapļo̧k eo in ad kōm̧m̧an n̄an dim ilo iaļan bujen eo, tōmak eo ad ilo Jisōs Kraist enaaj ļapļo̧k an eddōk. Tōmak eo ad enaaj ļapļo̧k an eddōk, ikdeelel eo ad n̄an ukweļo̧k enaaj ļapļo̧k. Im enaaj ļapļo̧k ad ukweļo̧k, enaaj ļapļo̧k ad kōkajoorļok bujen jemjerā eo ad ippān Anij. Bujen jemjerā eo enaaj kepaakļo̧k kōj n̄an tampeļ kōnke kōjparok bujen ko an tampeļ ej wāween ad niknik n̄an jem̧ļo̧kin.

Ilo ad likūt mour ko ad ilo Jisōs Kraist, enaaj tōl kōj n̄an kōm̧m̧ane men ko raorōktata. Im jenaaj jeraam̧m̧an kōn kajoor ilo jetōb, aenōm̧m̧an, im kōn lan̄lōn̄! Ilo etan Jisōs Kraist, amen.