N̄an Kōmour Laļ in
Kinej ko im oktak ko maron̄ ņa mejļaer im em̧ool kōmour n̄e jej kautiej Anij, Jemed wōj aolep, im Jisōs Kraist, Nejin.
Ro jeiū im jatū, ilo iien Ijtō in aiboojoj jekanooj jeraam̧m̧an n̄an koba im bōk kapilōk im tōl jān ro rikarejeran Anij.
Tōl kwojarjar in im katak ko jān Jemedwōj Ilan̄ rej jipan̄ kōj kōm̧m̧ani kāālet ko ilo tōre kein renana. Āinwōt kar kanaan, “kijeek ko im ļan̄ ko,” “tariņae ko, im ennaan in tariņae ko, im m̧akūtkūt in laļ ko im jikin ko an ro rim̧oņ,” “im aolep mennin jōjō otemjeļo̧k,”1 “kaen̄taan,”2 “n̄ūta im ṃakūtkūt laļ”3 rej kakkure baam̧le ko, jukjuk in pād ko, im em̧ool laļ ko.
Ebar wōr juon kakkure ejelet laļ in: ej luko̧rko̧r e anemkwoj in kabun̄ eo am̧ im aō. Kōlmenļo̧kjeņ in ej ļapļo̧k ej kappukōt n̄an kōm̧akūtļo̧k kabun̄ im tōmak ilo Anij jān lo̧bwilej, jikuuļ ko, jon̄ak ko an jukjuk in pād, im katak an armej. Rijum̧ae ro an anemkwoj in kabun̄ rej kappukōt n̄an kipel mo ko an kwaļo̧k kareel ko an m̧ool in bōro. Em̧ool rej kōrraat im kajjirere kōn iminene ko an tōmak.
Kain m̧wil in ej watōk armej ro, kajejtokjān pedped in katak ko an armej, jerbal jim̧we, kautiej, bwinin jetōb, im aenōm̧m̧an an itulowa.
Ta in anemkwoj an kabun̄?
Ej anemkwoj eo an kabun̄jar ilo aolep jekjek ko an: anemkwoj in kuk ippān doon, anemkwoj in kōnono, anemkwoj in m̧akūtkūt kōn tōmak ko an juon, im anemkwoj n̄an ro jet n̄an kōm̧m̧an ejja āinwōt. Anemkwoj in kabun̄ ej kōtļo̧k ad kajjojo kāālet kōn kōj make ta eo jej tōmak, ekōjkan ad mour im m̧akūtkūt ekkar n̄an ad tōmak, im ta eo Anij ej kōtmene jān kōj.
Kijejeto ko n̄an kipel no ko an anemkwoj in kabun̄ rejjab kāāļ. Ilo aolepen bwebwenato, armej ro rej tōmak kar en̄taan eļap ilo kakkure an ro jet. Membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata ejjeļo̧k oktak.
Jān ijjino ko ad, elōn̄ rej kappukōt Anij raar kobatok n̄an Kabun̄ in kōnke kōn an katakin katak eo ekwojarjar, ekoba tōmak ilo Jisōs Kraist, im Pinmuur eo An, ukweļo̧k, karōk in m̧ōņōņō eo, im Itok eo Kein Karuo an ad Irooj.
Jum̧ae, kaen̄taan, im kakkure raar jelet rikanaan eo ad im̧aan tata ilo raan kein āliktata, Josep Smith, im ro raar ļoor e.
Ilukōn aen̄wān̄wā eo ilo 1842 eo, Josep ekar je tōmak ko im̧aan tata 13 an Kabun̄ eo ej eddōk, ekoba menin: “Kōmij kwaļo̧k bwe ewōr am jim̧we in kabun̄-jar n̄an Anij Ekajoor Bōtata ekkar n̄an bōklōkōt ko an koļmānļo̧kijeņ ko am make, im kōtļo̧k aolep armej ejja jim̧we in wōt, er ren kabun̄-jar ilo wāween eo, jikin eo, ak ta eo rej kāālete.”4
Ennaan eo an ej kitbuuj, kaenemkwoj, im kautiej. En̄in ej aorōk eo an anemkwoj in kabun̄.
Rikanaan eo Josep Smith ekar barāinwōt ba:
“Ij dim n̄an kwaļo̧k im̧aan Lan̄ bwe ij pojak in mej ilo bōbrae jim̧we ko an juon Presbyterian, juon Baptist, ak juon em̧m̧aan em̧m̧an jān jabdewōt bar kabun̄; kōn ejja pedped in katak in wōt me enaaj kar kajejtokjān jim̧we ko an … Armej ro Rekwojarjar enaaj kar kajejtokjān jim̧we ko an Roman Catholic ro, ak an jabdewōt kabun̄ me emaron̄ in jab bun̄bun̄ im kanooj m̧ōjņo̧ n̄an bōbrae er make.
“Ej juon iakwe in anemkwoj [me] ej im̧we aō—anemkwoj an armej im kabun̄ n̄an dipio in an armej otemjej.”5
Ekab wōt, membōr ro an Kabun̄ in jinoin kar luko̧rko̧r im kadiwōjļo̧k er taujin m̧ail ko, jān New York n̄an Ohio n̄an Missouri, ijo govenor eo ekar je juon kean̄ bwe membōr ro an Kabun̄ in rej “aikuj kōm̧m̧an n̄an er āinwōt rikōjdāt ro im aikuj in kanooj kakkure ak kadiwōjļo̧k er jān state eo.”6 Rekar ko n̄an Illinois, bōtaab en̄taan eo ekar wōnm̧aanļo̧k wōt. Juon jarlepju in rinana rekar m̧an Rikanaan Josep, ļōmņak bwe m̧an e enaaj kar kakkure Kabun̄ in im kōjjepelōklōk ritōmak ro. Bōtaab ro raar tiljek raar dim wōt. Eo ekar bōk jikin Josep, Brigham Young, ekar tōl elōn̄ taujin ko ilo aer kar poje kariwojlok eo ilo 1,300 mail (2,100 km) rōtle n̄an ijo kiiō etan state of Utah.7 Ro jibū im jim̧m̧aō make raar ibwilijin bainier ro im̧aan tata.
Jān tōre ko an kakkure eļļap ko, Kabun̄ eo an Irooj em̧ōj an m̧ōkaj an eddōk n̄an iturinļo̧k 17 milien membōr ro, kōn elōn̄ļo̧k jān jimettan rej jokwe itulikin United States.8
Ilo Eprōl 2020 Kabun̄ in ad ekar kememe 200 iiō in Jeplaaktok eo an gospel eo kōn juon kean̄ n̄an laļ, kar kōpooje jān Būreejtōnji eo Kein Kajuon im Doulul eo an Jon̄oulruo Rijilōk ro ad. Ej jino, “Jej kean̄ bwe Anij ej iakwe ajri ro Nejin ilo aolepān laļ in.”9
Ad jitōn bōro rikanaan, Būreejtōn Russell M. Nelson, ekar wōnm̧aanļo̧k n̄an kwaļo̧k:
“Jej tōmak ilo anemkwoj, jouj, juon wōt n̄an aolep ajri ro nejin Anij.
“Kōj aolep rej brother im sister, kajjojo juon ajri nejin Jemed Ilan̄ eo ej iakwe. Eo nejin, Irooj Jisōs Kraist, ej karuwainene aolep n̄an itok n̄an E, ‘kilmej im mouj, kalibuuj im anemkwoj, em̧m̧aan im kōrā.’ (2 Nipai 26:33).”10
Ļōmņak ippa kōn emān wāween ko me jukjuk in pād eo im kajjojo rej jeraam̧man jān anenkwoj in kabun̄.
Kajuon. Anemkwoj in kabun̄ ej kautiej kein ko reļļap tata juon im ruo, likūt Anij ilo ioļap in mour ko ad. Jej riit ilo Matu:
“Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.”11
“Im eo kein ka ruo āinwōt in, Kwōn yokwe ri turum̧ im āinwōt kwe.”12
Men̄e ilo juon im̧ōn jar, iṃōn kweilọk eo, jikin kabun̄jar an Muslim, ak em tiin, rikaļoor ro an Kraist, im aolep ro rej juon wōt ilo tōmak ilo e, remaron̄ kwaļo̧k aer nebar n̄an Anij ilo aer kabun̄jar n̄an E im kōņaan n̄an jerbal n̄an ajri ro Nejin.
Jisōs Kraist ej waanjon̄ak eo ewāppen kōn iakwe in im jerbal in. Ilo tōreen kwaļok eo An, E ekar kea kōn rijarmōl,13 kōmour rinan̄inmej14 im eo epilo.15 E kar najidik ro rej kwole,16 kōpeļļo̧k Pein n̄an ajri jidik ro,17 im joļo̧k ruen ro rekar bōd ņae E, jekdo̧o̧n ro rekar debweel E.18
Jeje ko rekwojarjar ej kōmeļeļe bwe Jisōs eaar “etetal im kōm̧anm̧an em̧m̧an.”19 Kōn menin jej aikuj bar.
Karuo. Anemkwoj in kabun̄ ej rōjan̄ en̄jake ko ilo tōmak, kōjatdikdik, im aenōm̧m̧an.
Āinwōt juon kabun̄, jej koba ippān kabun̄ ko jet ilo bōbrae armej ro an aolep tōmak im kareel ko im jim̧we eo aer n̄an kōnono kōn lōke ko aer Ejjab meļeļein bwe jej bōke tōmak ko aer, ak rej bōk tōmak ko ad, bōtaab eļapļo̧k ijo jej bōro kuk ie jān eo ewōr ippād ippān ro me rej ikdeelel n̄an kabōjrak kōj.
Ejjab to ikar etal ilo etan Kabun̄ in ilo G20 Interfaith Forum eo ilo Italy eo ej kōm̧m̧an aolep iiō. Ikar ketak, em̧ool en̄jake kajoor, ke ikar kweilo̧k ippān ritōl ro an kien im kabun̄ jān aolepān laļ in. Ikar kile bwe kinej ko im oktak ko maron̄ ņa mejļaer im em̧ool kōmour n̄e jej kautiej Anij , Jemed wōj aolep, im Jisōs Kraist, Nejin. Rikōmour eo Eļap tata an aolep ej ad Irooj im Rilo̧mo̧o̧r, Jisōs Kraist.
Ekar wōr juon aō iien ekaitoktok limo ilo aō kar kiil kōnono eo aō. Rikōnono ro jiljilimjuon m̧oktaļo̧k raar jab kiil kōnono ko aer ilo iminene an kabun̄ ko aer ak ilo etan Anij. Ke ikar kōnono, ikar lōmņak, “Naij ke ba kom̧ emool im jijōt, ak ij ke kilōke ‘ilo etan Jisōs Kraist’?” Ikar keememej wōn kar n̄a, im ikar jeļā Irooj enaaj kar kōm̧m̧an bwe in ba Etan n̄an kōjem̧ļo̧ke ennaan eo aō. Kōn menin ikar ba. Reilikļo̧k, ekar juon iien em̧m̧an n̄an kwaļo̧k tōmak eo aō; im ekar wōr ippa anemkwoj in kabun̄ n̄an kwaļo̧k aō naan in kam̧ool kōn Etan ekwojarjar.
Kajilu. Kabun̄ in ej im̧we armej n̄an jipan̄ ro jet.
N̄e leļo̧k kōtaan eo im anemkwoj eo n̄an kabun̄ n̄an jebar, ro rej tōmak rej kōm̧m̧ani jerbal in jipan̄ ko reļem waan im jet iien kabwilōn̄lōn̄. Ennaan eo an Riju ro jemaan “tikkun olam,” meļeļein “n̄an kōkāāl ak kōmour laļ in,” ej waļo̧k rainin ilo kijejeto ko an elōn̄. Em̧ōj ad m̧ōttā ippān Catholic Charities, jeļā kake āinwōt Caritas International, Islamic Relief, im elōn̄ bōnbōn in Riju, Hindu, Buddhist, Sikh, im doulul ko an Rikūrijin āinwōt Salvation Army im National Christian Foundation. Ippān doon jej jipan̄ milien ro rej pād ilo aikuj, kiiō epaak kōn jipan̄ riatajinemjen ro an tariņae kōn em̧ nuknuk ko, pāāk in kiki ko, im m̧ōn̄ā ko,20 im jipan̄ kōn wā ko, ekoba polio21 im COVID.22 Laajrak in ta ko rededeļo̧k eaitok, ak barāinwōt aikuj ko.
Ejjeļo̧k kajjitōk, armej in tōmak, jerbal ippān doon, emaron̄ kōm̧m̧an jerbal ko raorōk. Ilo ejja iien wōt, juon illo̧k juon jerbal in jipan̄ eo emakijkij jab kōjjeļā kake bōtaab ebwe an ukōt mour ko.
Ij lōmņak kōn waanjon̄ak eo ilo Luk ke Jisōs Kraist ekar jibadōkļok wintō eo an Nain. Jisōs, kar etal ippān ļok jān juon kumi in rikaļoor ro, kar ioon kumi in kallib eo an ļaddik eo nejin lio emej pāleen. Ilo an jako, liin ekar ioon jorrāān an en̄jake, jetōb, im em̧ool kōn jāān. Jisōs, ej lo turin mejān kōn an tutu, ekar ba, “Kwōn jab jan̄.”23 Im E ekar jibwe men eo ej kotak anbwin eo, im armej ro rekar pojrak.
“Likao eņ,” E kar ba, “N̄aij ba n̄an eok, Jerkak.
“Im eo ear mej eaar jerkak, im jino kōnono. Im [Jisōs] eaar bokļo̧k n̄an ippān jinen.”24
Kōjerkak remej ej juon kabūlon̄lon̄, ak aolep jerbal in jouj im n̄ūrbōktak kōn juon eo ej apan̄ ej iaļ in bujen eo kajjojo iaad emaron̄ barāinwōt “[etal] im kōm̧anm̧an em̧m̧an,” ilo jeļā bwe “Anij [ej] pād [ipped].”25
Im Kāmen. Anemkwoj in kabun̄ juon kajoor ebōro kuk im pedped ioon n̄an ļōm aorōk ko im jim̧we.
Ilo Kalimuur Ekāāl jej riit kōn elōn̄ ro rej elļo̧k jān Jisōs Kraist, alin̄ūrn̄ūri katak eo An, “Naan in naan e pen; wōn e maron̄ in roñjake?”26
Jekpen ņae in maron̄ ron̄ wōt rainin jān ro me rej kappukōt n̄an joļo̧k anemkwoj jān katak im kareel. Bōtaab eļan̄n̄e kabun̄ ejjab pād n̄an jipan̄ kōn ļam m̧wil eo im kwaļo̧k uwaak ko ilo iien ko reppan, wōn enaaj? Wōn enaaj katakin ilo m̧ool, kamm̧oolol, jeorļo̧k bōd, im kijenmej? Wōn eo enaaj kwaļo̧k iakwe eo erreo, meanwōd, im jouj n̄an armej ro kar meļo̧kļo̧k er im jiped er? Wōn eo enaaj kautiej ro me rooktak aaet raorōk, āinwōt aolep ajri ro nejin Anij? Wōn eo enaaj kōpeļļo̧k pein n̄an ro rej aikuj im jab watōk bōk wōņaer? Wōn eo enaaj kautiej aenōm̧m̧an im pokake n̄an kien ko reļļapļo̧k jān tōl ko an raan eo? Wōn eo enaaj uwaake kajjitōk eo an Rilo̧mo̧o̧r eo “Kwōn ilọk im kōṃanṃan āinwōt”?27
Jenaaj! Aaet, ro jeiū im jatū, jenaaj.
Ij karwainene kom̧ n̄an wiin kōn un ko an anemkwoj in kabun̄. Ej juon kakōļļe kōn pedped in katak an anemkwoj kar elletok in Anij.
Anemkwoj in kabun̄ ej bōktok jepaan wōt juon n̄an tōmak ko rej jiāeik doon. Em̧m̧an eo an kabun̄, ej tōpar, im jerbal in iakwe eo aolep raan me kabun̄ ej im̧we n̄an wōt eddōkļo̧k ke jej kōjparok anemkwoj eo n̄an kwaļo̧k, im jerbali tōmak ko raorōk.
Ij kam̧ool bwe Russell M. Nelson ej rikanaan eo emour an Anij. Ij kam̧ool bwe Jisōs Kraist ej tōl im kajeikik Kabun̄ in. Ekar pinmuur kōn jerawiwi ko ad, kar debwāāle ioon debwāāl eo, im kar jerkakpeje ilo raan eo kein kajilu.28 Kōnke kōn E, jemaron̄ bar mour n̄an aolep indeeo; im ro rej kōņaan maron̄ pād ippān Jemed ilo Ilan̄. M̧ool in ij kean̄ kake n̄an aolepān laļ in. Ij kam̧m̧oolol kōn anemkwoj eo n̄an kōm̧m̧an jabdewōt. Ilo etan Jisōs Kraist, amen.