Iaļ in Bujen Eo: Iaļ Eo n̄an Mour Indeeo

Juon kiin̄ ekajoor ekar kōņaan bwe ļaddik eo nejin en lale juon iaan aelōn̄ in kiin̄ ko an. Irooj in ekar ekkatak im eddōkļo̧k ilo māletlet n̄an jijet ioon tūroon eo. Juon raan, kiin̄ eo ekar kweilo̧k ippān irooj in im kwaļo̧k karōk eo an. Rekar errā bwe irooj eo en etal n̄an juon iaan bukwōn eo eoktak im ekkatak jān en̄jake ko an. Enaaj jelm̧ae apan̄ ko barāinwōt lan̄lōn̄ kōn elōn̄ men ko ijeņ. Kiin̄ eo ekar jilkinļo̧k e n̄an bukwōn eo, ijo me irooj in kar kōtmāne eo an ej n̄an kam̧ool tiljek eo an n̄an kiin̄ eo im kōmeļeļeiki bwe e eo ejejjet bwe en bōk jeraam̧m̧an kein im eddo ko im kiin̄ eo ekar kakkoņi n̄an e. Irooj eo ekar bōk anemkwoj eo n̄an kāālet n̄an bōk kōjeraam̧m̧an kein im eddo ko ak jaab, pedped wōt ioon an kōņaan im tiljek eo an. Ijeļā bwe kwonej kōņaan ta eo ekar waļo̧k n̄an irooj in. Ekar ke ro̧o̧lļo̧k im jolete aelōn̄ in kiin̄ eo?

Ro jeiū im jatū, kōj kajjojo ej juon irooj ak lerooj. Kar jilkinlaļtak kōj n̄an mour in jān juon Jemedwōj Ilan̄ eo eļap iakwe ippān n̄an ad lan̄lōn̄ kōn kōjeraam̧m̧an in an juon ānbwin eo me enaaj erom jab wabanban kōn Pinmuur eo im Jerkakpeje eo an Jisōs Kraist. Ewōr ad kōtmāne n̄an m̧aanjabpopo n̄an ro̧o̧lļo̧k n̄an im̧aan mejān Anij im kwaļo̧k bwe jenaaj “kōm̧m̧ani aolep men ko jabdewōt Irooj [ad] Anij enaaj jiron̄ [kōj]” (Ebream 3:25).

N̄an jipan̄ kōj, Rilo̧mo̧o̧r eo ekar itok n̄an pinmuuri kōj im kwaļo̧k iaļ eo n̄an ro̧o̧l n̄an Anij. Ajri ro nejin Anij rej ruwainene n̄an itok n̄an Rilo̧mo̧o̧r eo im wāppen ilo E. Ilo jeje ko rekwojarjar, jej loe karuwainene in n̄an ad itok n̄an Irooj ej ālij elōn̄ļo̧k jān 90 kōttan, im eļapļo̧k jān jimettan in men kein rej karuwainene ko an kajjojo make jān Irooj Make. Bōk naan in karuwainene in an Rilo̧mo̧o̧r eo ej meļeļein bōk m̧ōttan kain̄i ko An im kōjparoki bujen ko Ippān. Jisōs Kraist ej “iaļ eo, m̧ool eo, im mour eo” (Jon 14:6), im Ej karuwaineneik kōj “aolep n̄an itok n̄an Ippān im bōk leen em̧m̧an eo An; im E ejjeļo̧k Ej kabbōjrak e jān an itok n̄an E” (2 Nipai 26:33).

Ad ekkatak im katakin gospel eo ej kam̧ūlaļļo̧k oktaktok eo ad n̄an Jemedwōj Ilan̄ im Jisōs Kraist im jipan̄ kōj erom̧ āinwōt Er. Men̄e ejjab aolep men ko aolep kar kwaļo̧ki tok kōn jejjet in iien eo im jekjek in rot kōjeraam̧m̧an ko an mour ijo eutiejtata naaj letok iood, ejjeļo̧k ad jeļā kōn men kein (M. Russell Ballard, “Kōjatdikdik ilo Kraist,” Liaona, Māe 2021, 55).

Alma pris eo eutiej, ej katakin ilo ānen Zaraemala, ej bar leļo̧k juon naan in karuwaineneik ekajoor jān Jisōs Kraist:

“Lo, E ej jilkintok juon karuwainene n̄an aolep armej, bwe pein tūriam̧okake rej erļo̧k n̄an er, im Ej ba: Kom̧in ukeļo̧k, im Inaaj bōk kom̧.

“Aaet, ej ba: Kom̧in itok n̄an Ippa im kom̧ naaj bōk leen wōjke in mour” (Alma 5:33–34).

Rilo̧mo̧o̧r eo Make ej karuwaineneik kōj n̄an itok n̄an E im bōk An ine iood bwe jen maron̄ kakkije ilo laļ in epoktak (lale Matu 11:28–29). Jej itok n̄an Kraist jān ad “kōjerbal tōmak ilo [E], ukweļo̧k aolep iien, kōm̧m̧an bujen ko ippān Anij ilo ad būki kain̄i ko an lo̧mo̧o̧r im mour ijo eutiejtata, im niknik n̄an jem̧ļo̧kin ilo ad kōjparoki bujen kein” (General Handbook: Serving in The Church of Jesus Christ of Latter-day Saints, 1.2.1, ChurchofJesusChrist.org). Iaļ in n̄an wāppen ej iaļ in bujen eo, im Jisōs Kraist ej dilepān aolep kain̄i im bujen kein.

Kiin̄ Benjamin ekar katakin kōnke bujen eo jej kōm̧m̧ane, jej erom̧ ļaddik im leddik ro nejin Kraist, eo ej ilo jetōb kōļotak kōj, im ium̧win jeban eo An jej maron̄ anemkwoj, kōn “ejjeļo̧k bar juon āt letok eo lo̧mo̧o̧r ej itok” (lale Mosaia 5:7-8). Jej bōk lo̧mo̧o̧r ilo ad niknik n̄an jem̧ļo̧kin jān “ļoor waanjon̄ak eo an Nejin Anij emour” (2 Nipai 31:16). Nipai ekar kapilōk bwe aolep men ko rejjab dedeļo̧k jān deļo̧n̄e iaļ in eradin̄ im eaidik, jej aikuj “bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k” (lale 2 Nipai 31:19–20).

Katak ko an Kraist rej jipan̄ kōj loe im pād wōt ilo iaļ in bujen eo, gospel eo elukkuun ellaajrak bwe kallim̧ur in kōjeraam̧m̧an ko an Irooj maron̄ būki jān kain̄i ko rekwojarjar im bujen ko. Rikanaan ro an Anij, Būreejtōn Russell M. Nelson ekar rōjan̄ kōj ilo juon an kadiwōjļo̧k imejatoto ilo Jānwōde 16, 2018 kadiwōjļo̧k imejatoto n̄an “pād wōt ilo iaļ in bujen eo. Ami kallim̧ur n̄an ļoor Rilo̧mo̧o̧r eo im kōm̧m̧ani bujen ko Ippān innām kōjparoki bujen ko renaaj kōpeļļo̧k kōjām n̄an kajjojo jetōb in kōjeraam̧m̧an im iien ko rem̧m̧an renaaj waļo̧k n̄an em̧m̧aan ro, kōrā ro, im ajri ro kajjojo jikin. Ilo jemļo̧kin eo me kōj kajjojo jej kajieon̄ ej n̄an bōk menin letok eo ekwojarjar an tampeļ ekajoor ilo juon im̧ōn Irooj, liāp āinwōt baam̧le ko, tiljek n̄an bujen ko kar kōm̧m̧ani ilo juon tampeļ me ekarbab kōj n̄an menin letok eo eļaptata an Anij—me an mour indeeo” (“Ilo Ad Etal im Wōnm̧aanļo̧k Ippān Doon,” Liaona, Epr. 2018, 7).

Anij ej jāmin naaj kōjekdo̧o̧n jem̧jerā eo An ippān, ak dāpij kōjeraam̧m̧an ko Ekar kallim̧ur kaki kōn mour indeeo jān, jabdewōt rikōjparok bujen ro retiljek. Im ilo ad kautieje bujen ko rekwojarjar, jej kepaakļo̧k kōj n̄an Rilo̧mo̧o̧r eo. Elder David A. Bednar ekar katakin kōj inne bwe bujen ko an gospel eo im kain̄i ko rej jerbal ilo mour ko ad āinwōt juon kam̧bōj n̄an letok n̄an kōj juon wōt iaļ n̄an itok n̄an Kraist im erom āinwōt E.

Bujen ko rej kōkkaļļeiki iaļ eo ļo̧k n̄an Anij. Kain̄i in peptaij ko im bōk menin letok eo an Jetōb Kwojarjar, ekkapit n̄an priesthood, im kwojkwoj eo, rej tōlļo̧k kōj n̄an tampeļ eo an Irooj n̄an bōk kain̄i ko An mour ijo eutiejtata.

Inaaj kōņaan kwaļo̧k ruo men ko Rilo̧mo̧o̧r eo ekar kōmejajaiki n̄an jipan̄ kōj tiljek kōjparok bujen ko ad.

1. Jetōb Kwojarjar eo emaron̄ katakin kōj, kakeememej kōj kōn katak ko an Rilo̧mo̧o̧r eo, im pād wōt ippād n̄an indeeo (lale Jon 14:16, 26). Emaron̄ erom̧ ad kōm̧pānien iien otemjej n̄an tōl kōj ilo iaļ in bujen eo. Rikanaan eo ad, Russell M. Nelson, ekar katakin kōj bwe “ilo raan ko rej itok, enaaj maron̄ pen jo̧o̧r ilo jetōb ilo an ejjeļo̧k tōl, jineet, kaenōm̧m̧an, im bōk kareel ko jān Jetōb Kwojarjar eo” (“Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 96).

2. Rilo̧mo̧o̧r eo ekar ejaake kain̄i in kwojkwoj eo eo me jej maron̄ keememej E iien otemjej im bōk Jetōb eo An bwe en pād ippād. Peptaij ej kōppeļļo̧k kōjem̧ eo n̄an mour indeeo, im kwojkwoj eo ej jipan̄ kōj n̄an dim wōt bun̄ m̧aanļo̧k ilo iaļ in bujen eo. Ilo ad bōk kwojkwoj eo, enaaj erom̧ juon ad naan in kam̧ool n̄an Jemed bwe iien otemjej jej keememej Nejin. Im ilo ad keememej E iien otemjej im kōjparok kien ko An, jenaaj bōk Jetōb eo An ippād. Kar kobaiktok n̄an kallim̧ur in, Irooj ej kōkāāle kallim̧ur in jeorļo̧k jerawiwi eo ilo ad ettā im ukweļo̧k jān jerawiwi ko ad.

Ilo ad tiljek wōt n̄an bujen ko ad, jej aikuj kajjieon̄ aolep iien bōk Jetōb eo ippād n̄an kōpooje kōj n̄an bōk m̧ōttan kwojkwoj eo ilo erreo, im āindein, jej aolep iien bōk m̧ōttan kwojkwoj eo n̄an aolep iien bōk Jetōb eo ippād.

Ke leddik eo nejim ekar ļalem an iiō rūtto, ekar wōr juon nejin wa kein ikkure jidikdik ej kōjerbal pātōre im ekar iakwe im kattōre ipeļaakin m̧weo. Juon joteen, ekar itok n̄an ippa im ba, “Baba, wa e waō ejjab maron̄ bar ettōr. Jemaron̄ ke teen̄i kōn kiaaj jān waa eo waam̧ im teen̄i bwe en maron̄ bar ettōr? Bōlen ej aikuj kiaaj āinwōt wa eo waam̧ bwe en ettōr.”

Tokālik ikar etale bwe pāāttōre eo ekar m̧ōjņo̧, im ikar ba jenaaj kōm̧m̧an bwe en bar ettōr juon awa tokālik. Kōn eļap m̧ōņōņō, ekar ba, “Aaet! Jenaaj bōke n̄an m̧ōn etteen̄ kiaaj eo.” Ikar konneeke pāāttōre eo n̄an juon kein charge pāātōre, im ālkin juon awa ekar maron̄ bar kattōre wa eo waan, bōk an kajoor jān pāāttōre eo ekajoor. Tokālik ekar ekkatak bwe elukkuun aorōk bwe aolep iien pāāttōre eo ej charge ilo an konneek n̄an juon kein charge.

Ke leddik eo nejim̧ ekar ekkatak jem̧jerā eo ikōtaan pāāttōre eo im kajoor eo n̄an kattōre wa eo nejin, barāinwōt kōm̧ ar ekkatak kōn Jisōs Kraist, kwojkwoj eo, im Jetōb eo. Jej aikuji Jetōb eo n̄an jipan̄ kōj ito itak ilo mour in ilo ad tiljek kōjparok bujen ko, im jej aikuji kwojkwoj eo ej kōkajoorļo̧k ājmour in jetōb eo ad. Kōkāāle bujen peptaij eo ad im bōk m̧ōttan kwojkwoj eo ej kōkajoorļo̧k tiljek n̄an aolep bujen ko jet. Juon jem̧ļo̧k eo em̧ōņōņō ej kwaļo̧k ilo ad tiljek katak im kautiej kūr eo an Rilo̧mo̧o̧r eo im lan̄lōn̄ kōn kōjeraam̧m̧an ko Ekar kallim̧ur kaki. Ekar ba, “Im bwe kwōn maron̄ kanooj kōjparok eok jān libbijinjin jān laļ, kwōn ilo̧k n̄an im̧ōn jar eo im ajiļo̧k aolep kwojkwoj ko am ilo raan eo ekwōjarjar Aō (Katak im Bujen Ko 59:9).

Ij kam̧ool bwe rikōjparok bujen ro rej bōk kallim̧ur in “aenōm̧m̧an ilo laļ in, mour indeeo ilo laļ eo ej itok” (Katak im Bujen Ko 59:23). Ij kwaļo̧k aō kam̧ool bwe ilo am̧ aolep iien bōk m̧ōttan kwojkwoj eo an kōkkaļļe eo an Rilo̧mo̧o̧r eo jān kwojkwoj eo, kwonaaj bōk Jetōb eo An n̄an tōl eok ilo iaļ in bujen eo im tiljek wōt n̄an bujen ko am̧. Ilo etan Jisōs Kraist, amen.