Katak ko ilo Aibōjlaļ eo
Jemaron̄ kāālet n̄an oktakļo̧k n̄an Rilo̧mo̧o̧r eo kōn kajoor im ājmour eo enaaj kōtļo̧k kōj n̄an kōm̧m̧ane aolep ta ko kar jilkintok n̄an kōm̧m̧ani ijin.
Ej juon m̧ōņōņō n̄an koba ippemi kajjojo ilo m̧wen̄an in an kōrā ro ilo kweilo̧k eo eļap!
Ikar rūttoļo̧k ilo turōtle in New York im pād ilo juon branch edik emaron̄ 20 mail (32 km) jān m̧weo im̧om. Ilo aō kar jijjōt ilo Jabōt Jikuuļ ilo m̧ōnjar eo emōr Kabun̄ in reen e ippān eo m̧ōtta ej make wōt Patti Jo, ikar jab loe ke in kar uwaan millien kōrā ro jeid im jatid ilo aolepen laļin.
Ļalem iiō emootlo̧k ļeo ippa, Bruce, ekar lukkuun lap an nan̄inmej ke kom̧ro ekar jerbal ippān Armej ro Rekwojarjar eļap aer wūjlepļo̧k ilo Europe East Eria. Kom̧ro ekar rool, im ekar mej jejjo wōt wiik tokālik. Mour eo aō ekar oktak bon̄ōn eo. Iaar jan̄ im en̄jake m̧ōjņo̧ im mijak. Ikar akweļap n̄an Irooj n̄an tōl ial eo aō: “Ta eo Kwoj kōņaan bwe in kōm̧m̧ane?”
Jejjo wiik tokālik, ikar lale email ko ke ij loe juon pija ilo juon elaajrak ekar kabōjrak meja. Ilo aō kepaakļo̧k aō kalimjōke, ikar kile bwe ekar juon iaan rijin̄a jin̄a ej bōk jikin kōrā in Samaria eo ippān Jisōs ilo aibōjlaļ eo. Ilo iien eo Jetōb ekar alikkar an kōnono n̄an n̄a: “Bwe ej ta eo kwoj aikuj kōm̧m̧ane.” Jemedwōj Ilan̄ eo ej iakwe ekar karuwainene n̄a n̄an itok n̄an Rilo̧mo̧o̧r eo im ekkatak.
Ikōņaan kwaļo̧k ippem jilu katak ko ij ekkatak ilo aō wōnm̧aanļo̧k n̄an idaak jān aibōjlaļ eo An kōn “dān in mour.”1
Kein Kajuon: Men ko rej Waļo̧k Jem̧aan im Kiiō Rej Jab Kwaļo̧k Ilju im Jeklaj eo Ad.
Sister ro, ijeļā bwe elon̄ iaami ekar en̄jake āinwōt n̄a, jab jeļā elmen n̄an jelm̧ae apan̄ ak jako—jako kōnke mour eo am ejjab walo̧k ilo wāween eo kwaar kōjatdikdik kake, jar kake, im karōk kake.
Jekdoon ta ko rej waļo̧k, mour ko ad rekwojarjar im ewōr meļeļein im aorōkier. Kajjojo iaad ej leddik ro nejin Anij rejitōnbōro, ļotak kōn kwojarjar ilo jetōb ko ad.
Ad Rilo̧mo̧o̧r, Jisōs Kraist, kōn pinmuur in en̄taan eo An, kar kōm̧m̧an n̄an kōj n̄an erreo im mour, kōtļo̧k kōj n̄an kakūrm̧ool jibadbad eo ad ioon laļ in jekdoon kāālet ko an ro uwaan baam̧le, mour in pālele, ājmour ilo anbwin ak kōļmenļo̧kjeņ, ak jabdewōt wāween ko jet.
Ļōmņak kōn Kōrā eo ilo Aibōjlaļ eo. Ta kar wāween mour eo an? Jisōs ekar meļeļe bwe ekar wōr lalem pāleen em̧m̧aan ro im ekar jab m̧are ippān em̧m̧aan eo ej jokwe ippān iien eo. Im aaet, jekdoon men ko repen ilo mour eo an, juon iaan naan in kōmlet ko jinoin an Rilo̧mo̧o̧r eo ekar kwalo̧k bwe E ej Messeia eo n̄an e. Ekar ba, “N̄a E, N̄a Ij kōnono n̄an eok.”2
Ekar erom juon rikam̧ool ekajoor, ba n̄an aolep ro ilo ijo ej pād ie bwe Jisōs ej Kraist eo. “Im elōn̄ iaan ro ri Sameria ilo jikin kweilọk eo rej tōmak E kōn naan an kōrā eo ear kōnnaan.”3
Ta eo ej waļo̧k ilo jem̧aan im kiiō ejjab kwaļo̧k ilju im jekļaj eo an lio. Āinwōt lio, jemaron̄ kāālet n̄an oktakļo̧k n̄an Rilo̧mo̧o̧r eo rainin n̄an kajoor im ājmour eo enaaj kōtļo̧k kōj n̄an kakūrm̧ool aolep ta ko kar jilkintok kōj n̄an kōm̧m̧ani ijin.
Kein Karuo: Bwe Kajoor Eo Epād ilo Kōj
Ilo juon eoon jeļā kake ilo Katak im Bujen ko, Irooj ekar rōjan̄ kōrā im em̧m̧aan ro n̄an “kanooj m̧ōņōņō in poub kōn tokjān, im kōm̧m̧an elōn̄ men ko kōn wōt anemkwōj in kāālet eo aer, im kwaļo̧k eļap em̧m̧an; bwe kajoor eo ej pād ilo er.”4
Sister ro, kajoor eo epād ippād n̄an kwaļo̧k eļap wāppen!
Būreejtōn Russell M. Nelson ekar kam̧ool, “Aolep kōrā ro im aolep em̧m̧aan ro me rej kōm̧m̧ani bujen ko ippān Anij im kōjparok bujen kein, im ro rej bōk kain̄i ko an priesthood eo ilo erreo, ewōr aer maron̄ in deļo̧n̄e kajoor eo an Anij.”5
Ikar itok n̄an jeļā bwe ilo ad niknik n̄an kautiej bujen ko rekwojarjar jekar kōm̧m̧ani ilo iien peptaij im ilo tampeļ ko rekwojarjar, Irooj enaaj kōjeraam̧m̧an kōj “ippān An kōmour, im kajoor in kōkajoorļo̧k” im ippan̄ “loļo̧kjeņ ko ilo jetōb im elewetak ko [jej] jan̄in kar kili m̧okta.”6
Kein Kajilu: “Jān Men ko Reddik Ej Jebarļo̧k Men Eo Eļap”7
Ilo Kwaļo̧k eo ioon Tōl eo, Jisōs ekar katakin rikaloor ro An “ Koṃ jọọḷ in laḷ”8 im “Koṃ meram in laḷ.”9 Tokālik ekar keidi eddōk eo an aelon̄ in lan̄ n̄an iij, “me juon kōrā ear bōke, im ṇooje ilo jilu jon̄an pilawā, n̄an tōr eo ej uwe aolepen.”10
-
Jo̧o̧ļ
-
Iij
-
Meram
Aolep jon̄an ko redik, kajjojo ewōr tokjāer ilo aolep men ipeļaakin. Rilo̧mo̧o̧r eo ej karuwainene kōj n̄an kōjerbale kajoor eo An n̄an āinwōt jo̧o̧ļ, iij, im meram.
Jo̧o̧ļ
Elukkuun kabūlon̄lon̄ jon̄an an jidik jo̧o̧ļ kōm̧m̧an oktak ilo nemen m̧ōn̄ā ko jej m̧o̧n̄āki. Im aaet jo̧o̧ļ ej juon iaan men ko edik wōnāer im juon kein iōk epidodo.
Ilo bok in 2 Kiin̄ Ro, jej riit “juon leddik ri kaṃakoko,”11 eo kar kalibuuj jān RiSyria ro im erōm juon rijerbal n̄an kōrā eo ippān Naaman, kapen eo an ritariņae ro an Syria E eo āinwōt jo̧o̧l; kar dik, ejjab aorōk ilo laļ in, im mour eo an āinwōt juon rijerbal ilo juon jikin oktak ejjab kar ta eo ekar kōjatdikdik kake.
Bōtaab, ekar ekōnono ruo jāntōj ko kōn kajoor an Anij, kam̧ool n̄an kōrā eo ippān Naaman: “Eṃṃan aō irooj en kar pād ippān rikanaan eo ej pād i Sameria! Enaaj kemour e jān an nañinmej in leper.”12
Naan in tōmak ko an rekar leļo̧k n̄an Naaman, eo ekar jerbal n̄an naan ko an, kar kōtļo̧k e bwe ej mour jimōr ilo anbwin im jetōb.
Ekkā ad pedped ioon rijerbal eo ekar ba n̄an Naaman n̄an tutu ilo reba Jordan, āinwōt an kar rikanaan Ilaija ba, ak Naaman eban kar pād ilo kōjem eo an Ilaija n̄e en ekar jab “juon leddik ri kaṃakoko.”
Komaron̄ dik ak jab en̄jake ke ejeļo̧k am aorōk, ak komaron̄ āinwōt jo̧o̧ļ ilo baam̧le eo am̧, ilo jikuuļ im ilo jukjuk in pād eo am̧.
Iij
Emōj ke am̧ m̧ōn̄ā pilawe ejeļo̧k iij? Ekōjkan am̧ kōmeļeļeik? Emijel? Eddo? Epen? Kōn jidik wōt iij, pilawe eo emaron̄ uwe, eddōkļo̧k ilo an meraļo̧k im meeo̧eo̧.
N̄e jej karuwainene kajoor eo an Anij n̄an mour ko ad, jemaron̄ joļo̧k “jetōb in parōk”13 ippān kadeel ko jej loi n̄an kotak ro jet im kōm̧m̧an ruum̧ n̄an būro ko n̄an mour.
Ejjab to juon m̧ōtta ekar babu ilo beet ilo jibbon̄ in Kūrijimōj eo, obrak kōn būrom̧ōj. Ajri ro nejin rekar akweļap bwe en jerkak; bōtaab, ekar obrak kōn metak kōn jepel eo an. Jan̄ ioon peet eo an, ekar lutōk aolep būruwōn kōn jar n̄an Jemedwōj Ilan̄, kwaļo̧k n̄an E kōn būrom̧ōj eo an.
Ilo an kōjemļo̧k jar eo an, Jetōb eo ekar unoojdikdik n̄an e Anij ejeļā kōn metak eo an. Liin ekar obrak kōn tūriamo eo An n̄an e. En̄jake in ekwojarjar ekar kam̧oole en̄jake kein an im leļo̧k n̄ane e kōjatdikdik bwe ekar jab būrom̧ōj make iaan. Ekar jerkak, etal n̄an namōj, im kōm̧m̧ane juon snowman ippān ajri ro nejin, joļo̧k eddo in jibbon̄ eo kōn ettōn̄ im m̧ōņōņō.
Meram
Ewi jon̄an meram aikuji n̄an joļo̧k juon marok ilo juon ruum̧? Jidik. Im jidik in meram eo ilo juon jikin emarok emaron̄ tilmaake jān kajoor an Anij ilo kwe.
Men̄e komaron̄ en̄jake am̧ make iaam ilo kōto in mour in rekajoor, komaron̄ kabbōl juon meram ilo marok in jab meļeļe, pok, im jab tōmak. Meram in tōmak eo am̧ ilo Kraist emaron̄ kajoor im m̧ool, tōl ro ipeļaakim n̄an kōjpārok im aenōm̧m̧an.
Sister ro, bōro ko remaron̄ oktak im kōjeraam̧m̧an mour ilo ad leļo̧k jidik jo̧o̧ļ, juon jipoon in iij, im jidik meram.
Ij kam̧ool bwe Rilo̧mo̧o̧r eo ej jo̧o̧ļ eo n̄an mour ko ad, karuwainene kōj n̄an edjon̄ aenōm̧m̧an im iakwe eo An.14 Ej E eo ej iij ilo mour ko ad n̄e epen, bōktok n̄an kōj kōjatdikdik15 im kotak eddo ko ad16 ilo kajoor im pinmuur in iakwe eo An ejeja.17 E ej ad meram,18 kalikkar ad ial n̄an ro̧o̧l n̄an m̧weo.
Ij jar bwe jej maron̄ itok n̄an Rilo̧mo̧o̧r eo, āinwōt kōrā eo ilo aibōjlaļ eo, im idaak jān dān in mour eo An. Ippān armej ro an Samaria, innām jemaron̄ ba, “Kiiō kōm tōmak, … bwe kōm ar make roñjake, im jeḷā bwe e ṃool E in Ri Lọmọọren laḷ.”19 Ilo etan Jisōs Kraist, amen.