Kotak Būruōm̧ im Lan̄lōn̄

Ekōnono n̄an Thomas B. Marsh, juon rioktak tok eo ekāāl, Irooj ekar kōketak ilo an ba, “kotak būruōm̧ im lan̄lōn̄, bwe awa eo an mijen eo am emoottok” (Katak im Bujen Ko 31:3).

Ij tōmak kūr in n̄an maron̄ jerbal āinwōt juon waanjon̄ok n̄an aolep membōr ro ilo Kabun̄ in. Āliktata, kajjojo iaad em̧ōj ad bōk jān Jemedwōj Ilan̄ mijen eo n̄an aiintok Israel ilo jait ko jim̧ōr in rōn̄ōl eo.

“Aiintok doon in,” Būreejtōn Russell M. Nelson ekar ba, “ej men eo eaorōk ej bōk jikin ilo laļ in rainin. Ejjeļo̧k bar jabdewōt maron̄ keidi kōn jon̄an depakpakin, ejjeļo̧k jabdewōt maron̄ keidi kōn jon̄an aorōk in, ejjeļo̧k jabdewōt maron̄ keidi kōn jon̄an kajoor in.”¹

Em̧ool, elōn̄ jerbal ko rellōn̄ im reaorōk ilo laļ in. Elukkun pen ba etaer aolep. Bōtaab kwōn kar ke jab kōņaan bōk koņaam̧ ilo juon jerbal eļap ilo maron̄ eo am̧ im ijo koņaam̧ ej kōm̧m̧an juon oktak eo eļap unin? Aiintok eo ej kōm̧m̧an oktak indeeo eļap n̄an aolep. Armej ro jān aolep iiō remaron̄ bōk koņaer ilo jerbal in jekdo̧o̧n jekjek ko rej iooni im ia eo rej jokwe ie. Ejjeļo̧k bar juon jerbal ilo laļ in eļapļo̧k an kakkobaik aolep.

Ekōnono n̄an jodikdik ro, Būreejtōn Nelson ekar ba bwe “Jemedwōj Ilan̄ eaar kōpooj elōn̄ iaan jetōb ro Nejin routiej—bōlen … kumi eo An rem̧m̧an tata—n̄an m̧ōttan in āliktata. Jetōb ko routiej—rikkure ro remōkade tata, ro reperan tata—ej kwe!”²

Aaet, em̧ōj kōpooj eok m̧okta jān mour in im ļotak kiiō n̄an bōk koņaam ilo jerbal in eļap in aiintok Israel ilo jait ko jim̧ōr in rōn̄ōl eo ilo raan kein āliktata (lale Katak im Bujen Ko 138:53–56).

Etke jerbal in eļap an aorōk? Kōnke “aorōk in jetōb ko ekanooj ļap ilo mejān Anij” (Katak im Bujen Ko 18:10). Im kōnke “eo ej tōmak ilo [Jisōs Kraist], im ej peptaij, ejja in wōt enaaj mour; im … renaaj jolōt aelōn̄ in Anij” (3 Nipai 11:33). Ejjab menin wōt, “aolep men ko an Jema naaj liļo̧k n̄an” ro rej bōk kain̄i ko An im kōjparok bujen ko An (Katak im Bujen Ko 84:38). N̄an eddeikļo̧k, “re iiet ri m̧adm̧ōd” (Luk 10:2).

Ilo wōt Kabun̄ eo an Jisōs Kraist im Armej ro Rekwojarjar ilo Raan Ko Āliktata jej lo kajoor eo, mālim eo, im iaļ eo n̄an leļo̧k juon kōjeraam̧m̧an eļap n̄an ro jet, men̄e remour ak remej.

Āinwōt an Būreejtōn Nelson kar ba: “Jabdewōt iien kwoj kōm̧m̧ane jabdewōt men me ej jipan̄ jabdewōt armej—ilo jim̧or jait ko an rōn̄ōl eo—bōk juon bun̄tōn m̧aanļo̧k n̄an kōm̧m̧ani bujen ko ippān Anij im aer bōk kain̄i ko an peptaij im tampeļ ko remenin aikuj, kwoj jipan̄ aiintok Israel. Epidodo āinwōt in.”³

Ilo an lōn̄ wāween ko n̄an jipan̄ ilo aiintok in, ikōņaan ekōnono kōn juon: jerbal āinwōt juon mijenede eo ej jerbal aolep raan. N̄an elōn̄ iaami, menin enaaj meļeļe in āinwōt juon mijenede ej katakin. N̄an ro jet, menin enaaj meļeļe in āinwōt juon service mijenede ak rijipan̄ mijenede. Ak laļ in ej kajjieon̄ kamad jodikdik ro jān eddo in ekwojarjar tata ilo an kōjerbal mijak im pere.

Jet iaan kamad kein remaron̄ itok ilo aer ioone nan̄inmej in eajeeded ilo laļ in, etal jān juon jerbal em̧m̧an, kabojrak m̧okta jikuuļ, ak kōņaan eo ad ippān juon jej iakwe. Aolep ewōr kain mellijon̄ ko rej iooni. Kain kamad ko remaron̄ waļo̧ktok ilo jejjōt in iien bōk koņaad ilo jerbal eo an Irooj, im kāālet ko me rekar alikkar tokālik rejjab aolep iien pidodo ilo iien eo.

Ijeļā jān en̄jake kōn kōļmenļo̧kijeņ eo einepata an juon armej em̧m̧an dettan. Ke ikar kōpopo n̄an etal n̄an mijen, mellijon̄ ko me ijjan̄in kar iooni rekar kajjieon̄ kabbweer eō. Juon iaer ekar taktō in n̄i eo aō. Ke ekar jeļā kōn unin appoinmen eo aō bwe in erom̧ juon mijenede, ekar kajjieon̄ kabbweer eō jān aō etal im mijen. Ekar ejjeļo̧k aō tōmak ke taktō in n̄i eo aō ekar jum̧ae Kabun̄ in.

Aō kar bōjrak jān jikuuļ ekar barāinwōt pen. Ke ikar kajjitōk n̄an bōk ruo iiō in jako jān jikuuļ, kar kōjjeļāik eō bwe eban tōprak. Inaaj luuji ijo jikū ilo jikuuļ eo eļan̄n̄e ijab ro̧o̧lļo̧k ālkin juon iiō. Ilo Brazil, menin ekar ejjeļo̧k kalijōkļo̧k kake kōnke wāween eo wōt n̄an deļo̧n̄e juon būrokuraam̧ in university ej juon teej eo eļap an pen im ļap irere kake.

Ālkin aō akweļap elōn̄ kōttan, kar makoko in kōjjeļāik eō bwe ālkin aō jako juon iiō, imaron̄ kanne n̄an juon mālim in kōm̧m̧an oktak eo epen. Emaron̄ tōprak ak jaab. Ikar leln̄o̧n̄ kōn ļōmņak eo n̄an bar bōke teej in deļo̧n̄ eo epen ālkin ruo iiō in aō ettoļo̧k jān katak ko aō.

Eļaptata ekar barāinwōt wōr aō kōņaan ippān juon jiron̄. Jet iaan ro m̧ōtta ekar wōr aer ejja kōņaan in wōt. Ikar ļōmņak ippa make, “N̄e ital n̄an mijen, ij kōm̧m̧ane juon men ekakkūm̧kūm̧ .”

Bōtaab Irooj Jisōs Kraist ekar juon aō waanjon̄o̧k n̄an jab mijak kōn ilju im jakļaj eo ilo aō kijejeto n̄an jerbal n̄an E kōn aolepān būruo.

E ekar barāinwōt wōr juon an mijen n̄an kakūrm̧ool. Ilo naan ko An make, E ekar kōmeļeļeik, “Bwe Iar itok jān lan̄, jab bwe In kōm̧anm̧an ankil Aō, a ankilaan Eo ear jilkintok Eō” (Jon 6:38). Im mijen eo An ekar ke pidodo? Em̧ool jaab. En̄taan eo An, eo ekar juon m̧ōttan eo aorōk in mijen eo An, ekar kōm̧m̧an bwe E “em̧ool Anij, eo Eļaptata jān aolep, n̄an wūdiddid kōnke metak eo, im n̄an bōtōktōk ilo aolepān Ānbwinin, im n̄an en̄taan jim̧or ilo ānbwin im jetōb—im ikar kōņaan bwe [E] en maron̄ kar jab idaak kap eo emeo̧, im jenlik—

“Mekarta, aiboojoj n̄an Jema, im Iaar bōke im kadedeļo̧k m̧aanjāppopo ko Aō n̄an ro nejin armej raņ” (Katak im Bujen Ko 19:18–19).

Jerbale juon likio in juon mijen emaron̄ pen n̄an kōj. Bōlen ej aikuj bwe jen bōjrak jān men ko reaorōk ippād iūm̧win jidik iien. Irooj ekanooj in jeļā menin, im E enaaj iien otemjej pād itūrid.

Em̧ool, ilo ennaan eo aer n̄an mijenede ro Preach My Gospel, Būreejtōnji eo Kein Kajuon, “Irooj enaaj nōbar im ļap an kōjeraam̧m̧an eok ilo am̧ kōttāik eok im tiljek ilo jerbal n̄an E.”⁴ Em̧ool bwe aolep ajri ro nejin Anij rejeraam̧m̧an ilo juon wāween ak eo juon, ak ewōr juon oktak kōtaan jeraam̧m̧an im ļap ad jeraam̧m̧an ilo jerbal eo An.

Keememej apan̄ ko me ikar ļōmņak ikar iooni m̧okta jān mijen eo aō? Taktō in n̄i eo aō? Ikar bar loe juon. Jikuuļ eo aō? Rekar kōm̧m̧an juon mālim in kōm̧m̧an oktak. Keememej jiron̄ eo? Ekar m̧arreik juon iaan ro m̧ōtta rem̧m̧an.

Bōtaab Irooj ekar ļapļo̧k an kōjeraam̧m̧an eō. Im ikar ekkatak bwe kōjeraam̧m̧an ko an Irooj rej itok ilo jekjek ko reoktak jān ad kōtmeni. Āliktata, ļōmņak ko An rejjab ļōmņak ko ad (lale Aiseia 55:8–9).

Ilubwilijin kōjeraam̧m̧an ko an reļlap rellōn̄ E ekar letok n̄an eō kōn aō kar jerbal n̄an E āinwōt juon mijenede eo ej jerbal aolep raan ej juon tōmak eo eļapļo̧k ilo Jisōs Kraist im Pinmuur eo An im juon jeļāļo̧kjeņ ekajoorļo̧k im naan in kam̧ool kōn katak ko An, bwe en jab pidodo aō em̧m̧akūt kōn “jabdewōt kōto in katak” (Epesōs 4:14). Ekar jako aō mijak in katakin. Maron̄ eo aō n̄an jelm̧ae apan̄ ko kōn peran ekar ļapļo̧k. Jān aō katak kōn kajjojo armej im baam̧le ko ikar iooni ak katakin āinwōt juon mijenede, ikar ekkatak bwe katak ko an Anij rej m̧ool ke E ekar ba bwe jerawiwi ejjab boktok m̧ōņōņō im bwe pokake kien ko an Anij ej jipan̄ kōj eddōkļo̧k jim̧ōr ilo kanniōk im jetōb (lale Mosaia 2:41; Alma 41:10). Im ikar ekkatak kōn make bwe Anij ej juon Anij in kabwilōn̄lōn̄ ko (lale Mormon 9).

Aolepen men kein rekar kein jipan̄ ko ilo aō kōppopo n̄an mour in juon rūtto, ekoba maron̄ eo n̄an m̧are im kōkaajriri, jerbal ilo Kabun̄ in, im mour in juon rijerbal im ilo jukjuk in pād eo.

Ālkin mijen eo aō, ikar jeraam̧m̧an kōn ļapļo̧k in peran eo ilo n̄a n̄an kwaļo̧k eō make āinwōt juon rikaļoor etiljek an Jisōs Kraist im Kabun̄ in ilo wāween otemjej im n̄an aolep armej, em̧ool barāinwōt kwaļo̧k gospel eo ippān juon kōrā edeo eo ekar maron̄ juon rejtakū erreo, emāletlet, elimo, im ejitōnbōro, meram eo n̄an mour e aō.

Aaet, Anij ekar ļap an kōjeraam̧m̧an eō, ilōn̄inļo̧k ta eo ikar kōtmene, āinwōt An naaj kōm̧m̧ane n̄an aolep ro rej “kōttāik [er] im tiljek ilo jerbal n̄an E.” Ij kam̧m̧oolol indeeo n̄an Anij kōn jouj eo An.

Mijen eo aō ekar dedeļo̧k an ļōme mour e aō. Ikar ekkatak bwe eļap tokjen kijejeto eo n̄an lōke Anij, n̄an lōke ilo māletlet eo An im tūriam̧o im ilo kallim̧ur ko An. Āliktata, E ej Jemed, im ilo ejjeļo̧k pere, E ekōņaan men eo em̧m̧antata n̄an kōj.

Jodikdik ro rejitōnboro ipeļaakin laļin, ij lewaj ejja kūr in wōt me rikanaan eo ad, Būreejtōn Nelson, ekar kōm̧m̧ane n̄an aolepemi “n̄an kobaļo̧k ilo jarin tariņae eo an jodikdik ro an Irooj n̄an jipan̄ aiintok Israel.” Būreejtōn Nelson ekar ba:

“Ejjeļo̧k jabdewōt jekjek eļapļo̧k. Aaet ejjeļo̧k.

“Aiintok in meļeļein men otemej n̄an kwe. En̄in ej mijen eo kar jilkin laļtak eok n̄ane ilo laļ in.”⁵

Jekar ļotak tok ilo iien in kōn juon un ekwojarjar, aiintok eo an Israel. N̄e jej jerbal āinwōt jet mijenede ro rej jerbal aolep raan, ewōr iien naaj māllijon̄ e kōj, bōtaab Irooj Make ej juon ad waanjon̄ak eo eļap im iaļ eo n̄an ļoore ilo iien rōt kein. E emeļeļe kōn juon mijen epen. Kōn jipan̄ eo An, jemaron̄ kōm̧m̧ane men ko reppen. Enaaj ped itūrid (lale Katak im Bujen Ko 84:88), im E enaaj ļap an kōjeram̧m̧an kōj ilo ad kōttāik kōj im jerbal n̄an E.

Kōn aolepen un kein, ijjab bwilōn̄ bwe Irooj ekar ba n̄an Thomas B. Marsh im n̄an aoleped, “kotak būruōm̧ im lan̄lōn̄, bwe awa eo an mijen eo am emoottok” Ilo etan Jisōs Kraist, amen.