Oktak ej Kōttōbar eo Ad

Ļōmņak kōn ennaan in em̧m̧an jān kadkad eo an Itok, Ļoor Eō:

“Jibadbad in unin aolep ekkatak im katakin ko an gospel eo ej n̄an kōkajoorļo̧k oktak eo ad n̄an Jemedwōj Ilan̄ im Jisōs Kraist. …

“… Kain ekkatak gospel eo me ej kōkajoorļo̧k tōmak eo ad im tōlļo̧k n̄an menin bwilōn̄ kōn oktak tok rejjab bōk jikier ilo juon wōt iien. Eļapļo̧k jān juon kūlaaj ruum̧ ilo būruwōn kajjojo armej im m̧ōko. Ej aikuj jejjet, kijejeto ko aolep raan n̄an meļeļe im mour kōn gospel eo. Ekkatak kōn gospel eo ej tōl n̄an m̧ool in oktak im emenin aikuj im̧we eo an Jetōb Kwojarjar.”¹

En̄ņe ej kabwilōn̄lōn̄ eo jej kappukote—n̄e juon armej ewōr juon an en̄jake ilo jeje ko rekwojarjar² im bwe en̄jake eo ej kōjeraam̧m̧an jān kareel eo an Jetōb Kwojarjar eo. Kain en̄jake rot in rej dōkā in pedped ko raiboojoj n̄an ad oktak n̄an Rilo̧mo̧o̧r eo. Im āinwōt an Būreejtōn Russell M. Nelson kar kakeememej kōj, pedped ko an jetōb rej aikuj aolep iien kōkajoori.³ Oktak eo ejjeļo̧k jem̧ļo̧kin ej juon jerbal ebōk aolepān mour.⁴ Oktak ej kōttōbar eo ad.

Bwe jen maron̄ wājabdik, en̄jake ko am̧ ippān jeje ko rekwojarjar rej aikuj am̧ make.⁵ Riiti ak ron̄jaki kōn bar en̄jake ko an bar juon armej im im̧we ko remaron̄ in jipan̄, ak reban bōktok ejja kajoor in oktak in. Ejjeļo̧k men ej bōk jikin n̄an iien eo am̧ kwoj joļo̧ke ilo jeje ko rekwojarjar, ron̄jake an Jetōb Kwojarjar eo kajju kōnono n̄an eok.

Kajjojo wiik n̄e ij kōppeļļo̧ke bok in Itok, Ļoor Eō eo aō, ij je kajjitōk in ilo tulōn̄ in peij eo: “Ta eo Jetōb Kwojarjar ej katakin eō wiik in ilo aō riiti jebta kein?”

Ilo aō katak jeje ko rekwojarjar, ij kejōkļo̧kjeņ kōn kajjitōk eo alen im bar alen. Im ilo aō jab likjab, im̧we ko an jetōb rej itok, im ij je jidik kein kakeememej ilo bok in katakin eo aō.

Kiiō, ewi wāween aō jeļā n̄e Jetōb ej katakin eō? Ekwe, ej waļo̧k ilo wāween ko reddik im pidodo. Jet iien juon eoon jān jeje ko rekwojarjar enaaj lukkuun in alikkar n̄an mijōke. Ilo iien ko jet, ij en̄jake āinwōt ļōmņak eo aō ej im̧we kōn juon meļeļe eo edebakbakļo̧k kōn juon pedped in gospel eo. Ij barāinwōt en̄jake kareel eo an Jetōb Kwojarjar eo n̄e kōrā eo pāleeō, Ann Marie, im n̄a kom̧ro ej kōnono kōn ta eo kōm̧ij riiti. Jibadbad eo an ej aolep iien karuwaineneik Jetōb eo.

Iiō in jej ekkatak kōn Kallm̧ur M̧okta—jeje ko rekwojarjar me rej kobrak jetōb ko ad im meram Tōre eo kōm̧ij riiti Kallim̧ur M̧okta, ij en̄jake āinwōt ij joļo̧k aō iien ippān unin tōl ko lōki: Adam, Iv, Inōk, Noa, Ebream̧, im ebar lōn̄ ro jet.

Wiik in, ke ij ekkatak Exodus jebta 7–13, kōm̧ij ekkatak wāween an Irooj ņaajdik ajri in Israel ro jān epepen in iien kalbuuj ilo Ijipt. Kōm ar riit kōn ratimjuon nan̄inmej ko—ratimjuon waļo̧ktok ko rekabwilōn̄lōn̄ an kajoor an Anij—ko Pero ekar kam̧ooli ilo an jab pidodoļo̧k būruwōn.

Innām Irooj ekar jiron̄ rikanaan eo An, Moses, kōn kein kajuon̄oul nan̄inmej—im ewi wāween an kajjojo baam̧le in Israel maron̄ m̧aanjabpopo n̄ane. Āinwōt m̧ōttan wōt juon iien eaorōk rekōni ņaetan Kijoone, Riisrael ro rekar aikuj katok kake juon sip edik, juon eo ejjeļo̧k libijinjin ānbwinnin. Innām rekar aikuj kōkkaļļeiki kōjem ko an m̧ōko m̧weer kōn bōtōktōk in sip jidikdik eo. Irooj ekar kallim̧ur bwe aolep em̧ ko me rekar kōkkaļļeiki kōn bōtōktōk naaj maron̄ kōjparoki jān nan̄inmej in enana eo enaaj waļo̧k.

Jeje ko rekwojarjar rej ba, “Ajri in Israel ro … kōm̧m̧an āinwōt an Irooj … kakien Moses”Exodus 12:28). Ewōr juon men elukkuun kajoor ilo ennaan in kōn pokake.

Kōnke ajri in Israel ro rekar ļoore ko̧o̧njeļ eo an Moses im kōm̧m̧an ekkar n̄an ilo tōmak, rekar lo̧mo̧o̧r jān nan̄inmej eo im, ilo iien eo, jo̧o̧r jān kōm̧akoko.

Innām, ta eo Jetōb Kwojarjar ej katakin eō ilo jebta kein wiik in?

Erkein jet iaan ļōmņak ko me rekar pād wōt ilo aō ļōmņak.

• Irooj ej jerbal kōn rikanaan ro An n̄an kōjparok im lo̧mo̧o̧ren armej ro An.

• Tōmak ilo ettā bōro n̄an ļoore rikanaan eo m̧okta jān kabwilōn̄lōn̄ in kōjparok im kanekwoj eo.

• Bōtōktōk eo ilo turtur in kōjem eo ekar juon kōkkaļļe itulik in tōmak eo itulowa kōn Jisōs Kraist, Ļaam̧ an Anij.

Ej ļo̧kjenaō kōn wāween in ejjab oktak ikōtaan wāween an Irooj kar kōjeraam̧m̧an armej ro An ilo bwebwenato in Kallim̧ur M̧okta im an barāinwōt kōjeraam̧m̧an armej ro An rainin.

N̄e rikanaan eo emour an Irooj, Būreejtōn Nelson, kar kwaļo̧k kadkad in n̄an kōj Itok, Ļoor Eō āinwōt juon meļeļe n̄an katak jeje ko rekwojarjar, ej karuwaineneik kōj n̄an ukōt m̧weo im̧ōd n̄an m̧ōko im̧ōn tōmak im jikin ko n̄an ekkatak gospel eo.

Innām ekar kallim̧ur kōn emān kōjeraam̧m̧an ko rejenolo̧k.

1. Raan in Jabōt ko ami renaaj em̧ool erom̧ juon men elan̄lōn̄.

2. Ajri ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo,

3. Kareel ko an rikapo ilo mour eo ami im ilo m̧weo imōmi enaaj dikļo̧k, im

4. Oktak kein ilo baam̧le eo ami renaaj em̧m̧an im kajoorļo̧k.⁶

Kiiō, ejjeļo̧k ippād jabdewōt jeje jān ro rekar en̄jake Kijoone eo ippān Moses ilo Ijipt. Ijoke, ewōr ippād elōn̄ naan in kam̧ool ko jān Rikwojarjar ro, ewōr ejja tōmak in, rej ļoore ko̧o̧njeļ eo an Būreejtōn Nelson rainin im bōk kallim̧ur ko kar kallim̧ur kaki.

Erkein rej jet iaan naan in kam̧ool ko:

Juon m̧am̧a edik jān juon baam̧le ekar ba: “Jej kōnono kōn Kraist im lan̄lōn̄ ilo m̧weo im̧ōm. N̄a n̄a en̄in ej kōjeraam̧m̧an eo eļaptata—ajri ro nejū remaron̄ rūttoļo̧k kake ippān kōm̧m̧ao ko an gospel ilo m̧weo me ej kepaaktok er n̄an Rilo̧mo̧o̧r eo”⁷

Juon brother erūtto ekar ņae etan an katak jeje ko rekwojarjar jān Itok, Ļoor Eō “juon baib eobrak kōn meram eo ekwojarjar ej jipan̄ kōm̧ lo katak ko an gospel eo bwe emennin eaorōk n̄an ājmour in jetōb eo ad.”⁸

Juon kōrā ripāļele ekar kōmeļeļeiki kōjeraam̧m̧an ko ilo m̧are eo an: “Ekar maron̄ m̧wilaļļo̧k aō jeļā būruwōn ļeo pāleeō, im ikar maron̄ in kōppeļļo̧k eļapļo̧k būruwō n̄an e ilo am katak ippān doon.”⁹

Juon jinen juon baam̧le kileplep ekar kile wāween an kijejeto ko an n̄an katakin baam̧le eo an oktak. Ekar ba: “Relikļo̧k, ekar āinwōt ikar ikkure piano kōn kūļob in snow ko peiū. Ikar ļoor kiltōn ko, ak kōjan̄jan̄ eo bōtaab ekar āinwōt ejjab jim̧we. Kiiō ke ikar wūtūkļo̧k kuļop in snow ko, im kiiō kōjan̄jan̄ eo aō ejjab lukkuun jejjet, ak ij ron̄ oktak eo. Itok, Ļoor Eō ekar letok n̄an eō visōn, maron̄, jibadbad, im unin eo.”¹⁰

Juon likao ripālele ekar ba: “Kāālet ko raorōk im im̧aantata ilo m̧weo rekar erom̧ ļapļo̧k aer alikkar jān tōre eo ikar kōm̧m̧ane bwe Itok, Ļoor Eō ej m̧ōttan iien ko ilo jibbon̄ aolep iien. Katak ej kōm̧m̧an aō ļōmņak kōn men ko rej wōr tokjāer n̄an n̄a, āinwōt tampeļ eo, jem̧jerā eo ippān kōrā eo pāleeō, im kūr eo aō. Ij kam̧m̧oolol bwe m̧weo im̧ō ej juon jikin ijo Anij ej itok m̧oktata.”¹¹

Juon sister ekar kwaļo̧k: “En̄jake ko aō aolep iien kōn Itok, Ļoor Eō rej wōr tokjāer, ak iien n̄an iien ij loe wāween aō maron̄ oktak jān katak jeje ko rekwojarjar aolep iien im mijōk wōt aō ekkatak. Kain katak rot in ej kōttā būruwō, katakin eō, im ukōt eō jidik ilo juon iien.”¹²

Juon kar mijenede ekar riboot: “Itok Ļoor Eō būrookraam̧ eo ekar kepaakļo̧k eō n̄an jon̄an ekkatak jeje ko rekwojarjar me ikar kōm̧m̧ane ilo mijen eo aō, im ikar maron̄ joļo̧k juon checklist in eoon ko n̄an katak n̄an lukkuun m̧wen̄an ko rekobwe n̄an jeļā wōn Anij.”¹³

Juon brother ekar ba: “Ij en̄jake Jetōb Kwojarjar eo ej ruwainene tok n̄an mour eo aō eļapļo̧k im en̄jake tōl in revelesōn eo an Anij ilo aō kōm̧m̧ani kāālet ko. Elōn̄ļo̧k aō kōm̧mao ko rejej uwaer kōn aeboojoj in katak ko reļam waan an Kraist im Pinmuur eo An.”¹⁴

Juon ajri jimjuon an iiō ekar kwaļo̧k: “Inej peptaij ejjab etto jān kiiō, im Itok, Ļoor Eō ej kōpooje eō. Baam̧le eo aō im n̄a kar kōnono kōn peptaij, im ijjab en̄jake aō ikūm̧kūm̧ kōn aō nej peptaij kiiō. Itok, Ļoor Eō ej jipan̄ Jetōb Kwojarjar eo itok n̄an būruwō, im ij en̄jake aenōm̧m̧an n̄e ij riiti jeje ko rekwojarjar.”¹⁵

Innām āliktata, juon m̧am̧a ewōr jejjo nejin ajri ro: “Ilo aō katak naan ko an Anij, Ekar jipan̄ baam̧le eo aō etal jān inepata n̄an kajoor; jān mālijjon̄ n̄an kajjieon̄ kōm̧m̧ane; jān akweel im kōnanaik armej n̄an iakwe im aenōm̧m̧an; im jān kareel an rikapo eo n̄an kareel ko an Anij.”¹⁶

Rein im elōn̄ ro jet, rikaļoor ro an Kraist retiljek rekar ilo juon wāween kar likūt bōtōktōk in Ļaam̧ an Anij ilo jikin deļo̧n̄ ko an m̧ōko m̧weer. Rej kōmeļeļeik kallim̧ur eo ibūruweer n̄an ļoore Rilo̧mo̧o̧r eo. Aer tōmak ej kwaļo̧k kabwilōn̄lōn̄. En̄ņe ej kabwilōn̄lōn̄ eo n̄e juon armej ewōr juon an en̄jake ilo jeje ko rekwojarjar im bwe en̄jake eo ej kōjeraam̧m̧an jān kareel eo an Jetōb Kwojarjar eo.

N̄e jej katak jeje ko rekwojarjar, ejjeļo̧k n̄ūta ilo jetōb ilo āne eo. Āinwōt an Nipai ba, “Eo enaaj kar eo̧ron̄ naan in Anij, im naaj jirok likatōttōt ilo e, renaaj jamin jako; barāinwōt kapo ko im m̧ade kijeek ko an ri kapo rejamin anjo̧ iooer im kapiloik er, n̄an tōļļo̧k er n̄an jako” (1 Nipai 15:24).

Ilo tōre ko etto, āinwōt ajri ro nejin Riisrael rekar ļoor tōl eo an Irooj leļo̧k jān rikanaan Moses, rekar jeraam̧m̧an kōn kōjparok im anemkwoj. Rainin, ilo ad ļoore tōl eo an Irooj letok jān rikanaan eo ad emour, Būreejtōn Nelson, jej jokin wōt juon jeraam̧m̧an kōn oktak ilo būruwōd im kōjparok eo ilo mōko m̧ōd.

Ij kam̧ool bwe Jisōs Kraist emour. En̄in ej Kabun̄ eo An, kar kōjepļaaktok n̄an laļ in jān Rikanaan Josep Smith. Būreejtōn Russell M. Nelson ej rikanaan eo emour an Irooj rainin. Ij iakwe im rejtake e. Ilo etan Jisōs Kraist, amen.