Bwe Kōn An Anij Iakwe Kōj

“Bwe kin an Anij yokwe laļ, ear letok juōn wōt Nejin ear keotak, bwe jabdewōt eo ej leke e en jab jako, ak en mour indeeo” (Jon 3:16). Jinoin aō kar lo eoon in, ikar jab pād ilo m̧ōnjar ak ilo juon nokon in jota an baam̧le. Ikar alooj ikkure ilo tipi. Jekdo̧o̧n jaņōļ rot eo ij alooje, im jekdo̧o̧n ikkure rot eo, ak n̄e armej eo ej kotak jain eo me ej riit “Jon 3:16.”

Em̧m̧an ippa eoon eoon 17: “Bwe Anij ear jab jilkintok Nejin n̄an laļ bwe En ekajet laļ; a bwe laļ en mour kōn E.”

Anij ekar jilkintok Jisōs Kraist, Nejin Emake Wōt ilo kanniōk, n̄an likūt mour eo An kōn kōj kajjojo. E ekar kōm̧m̧ane menin kōnke Ej iakwe kōj im kar ejaake juon karōk n̄an kōj kajjojo n̄an jepļaakļo̧k n̄an Ippān.

Ak ejjab juon būlan̄kōj, un ko reoktak, juon karōk jet iien enij jeram̧m̧an ak jet iien eban. Ej an juon make, kar kwaļo̧k jān Jemedwōj Ilan̄, eo ejeļā būruwōd, etad, im ta eo E ej kōņaan bwe jen kōm̧m̧ane. Etke jej tōmak menin? Kōnke kar katakin kōj jān jeje ko rekwojarjar.

Moses emakijkij an ron̄ an Jemedwōj Ilan̄ kōnono naan kein “Moses, nejū m̧aan” (lale Moses 1:6; bar lale eoon 7, 40). Ebream ekar jeļā bwe e ej nejin Anij, kar kālet n̄an jerbal em̧ool m̧okta jen an kar lo̧tak (lale Ebream 3:12, 23). Jān pein Anij, kar likūt Ester ilo juon jerbal n̄an lo̧mo̧o̧ren armej ro an (lale Ester 4). Anij ekar lōke kōrā in, juon rikarejar, n̄an kam̧ool kōn juon rikanaan eo emour bwe Naaman en maron̄ mour (lale 2 Kiin̄ Ro 5:1–15).

Em̧m̧an ippa em̧m̧aan in, ekadu ilo keen, eo ekar tallōn̄e wōjke eo bwe en lo Jisōs. Rilo̧mo̧o̧r ekar jeļā ke epād ijo, ekar bōjrak, reilōn̄ļo̧k n̄an ra ko, im kōnonoļo̧k naan kein: “Zakkiōs, … to laļ” (Luk 19:5). Im jeban meļo̧kļo̧k eo 14 an iiō eo ekar etal n̄an bwiļōn wōjke ko im kar jeļā kōn lukkuun karōk eo: “[Josep,] En̄in ej Nejū Jitōnbōro. Ron̄jake E!” (Josep Smith—Bwebwenato 1:17).

Ro jeiū im jatū, kōj eo jej unjen karōk eo an Jemedwōj Ilan̄ im jibadbad in mijen eo an ad Rilo̧mo̧o̧r. Kōj kajjojo, kajjojo armej, ej jerbal eo Aer im aibojooj eo Aer.

N̄an eō, ejjeļo̧k juon eoon eļapļo̧k an kōmeļeļeik jān aō ekkatak kōn Kallim̧ur M̧okta. Jebta im bar jebta jej lo waanjon̄ak ko elmen an Jemedwōj Ilan̄ im Irooj pād ilo mour ko ad.

Jej ekkatak kōn Josep, eo nejin Jekab ejitenbōro. Jān tōre ko ej jodikdik, Josep ekar em̧m̧an ippān Irooj, aaet ekar ioon eļap apan̄ ko ilo an pād ilo pein ļōm̧aro jein. Ruo wiik em̧ootļo̧k, elōn̄ iaad jaar m̧weir kōn an Josep joļo̧k an ļōm̧aro jein bōd. Ilo Itok, Ļoor Eō jej riit: “Ilo elōn̄ wāween ko, mour eo an Josep ekar āinwōt Jisōs Kraist. Men̄e jerawiwi ko ad eaar kōm̧m̧an eļapļo̧k An en̄taan, Rilo̧mo̧o̧r eaar jeo̧rļo̧k bōd ko, kōtļo̧k kōj aolep jān juon n̄ūta eo enana. Men̄e jej aikuj bōk jeo̧rļo̧k bōd ak jej kajjitōk jeorļo̧k bōd—ilo jet wāween jej aikuj aolep jim̧or kōm̧m̧ane—waanjon̄ak eo an Josep ejipan̄ kōj mije wōt Rilo̧mo̧o̧r, eo ej unjen kōmour eo em̧ool im merek.”¹

Juon bwebwenato em̧m̧an ippa kōn Juda būratōr eo an Josep, eo eaar ļap ijo koņaan ilo karōk eo an Anij n̄an Josep. Ke ļōm̧aro jein Josep rekar kaarmejete, Juda ekar kipel er n̄an jab bōk mour eo an Josep ak ren wiakake bwe ren rikōm̧akoko (lale Jenesis 37:26–27).

Elōn̄ iiō tokālik, Juda im ļōm̧aro jein rekar aikuj in bōkļo̧k ļaddik eo jatier, Benjamin, n̄an Ijipt. Jemāer ekar m̧akoko. Ak Juda ekar kōm̧m̧ane juon kallim̧ur n̄an Jekab—enaaj kōrooltok Benjamin.

Ilo Ijipt, kallim̧ur ko an Juda rekar pād ilo malijjon̄. Benjamin eo edik kar bōd n̄an ņa ruwōn. Juda, ekar dāpij wōt kallim̧ur eo an, ekar ajelo̧k bwe en kalbuuj ilo etan Benjamin. “Bwe,” ekar ba, “ekōjkan aō maroñ wanlōñḷọk ñan ippān jema, eḷaññe ḷadik eo e jab pād ippa?” (lale Jenesis 44:33–34). Juda ekar dāpij wōt kallim̧ur eo an n̄an kōjepļaakļo̧k Benjamin ilo jokne. Kwoj ke en̄jake wāween in kōn ro jet āinwōt an kar Juda en̄jake kōn Benjamin?

Ejjab ke wāween an ro jinen im jemān en̄jake kōn ro nejier? Wāween an mijenede ro en̄jake kōn armej ro rej jerbal n̄an er? Wāween an ritōl ro an Būraimere im jodikdik en̄jake kōn ro rej katak im iakwe?

Jekdo̧o̧n wōn kwe ak jekjek rot ko am̧ kiiō, ro jet rej en̄jake wāween in kōn kwe. Jet rekōņaan jepļaakļo̧k ippam̧ n̄an Jemedwōj Ilan̄.

Ij kam̧m̧oolol kōn ro rejjab ebbweer ippād, ro rej kōmaatļo̧k aer jetōb ilo jar kōn kōj, im ro rej katakin wōt im jipan̄ kōj karbab n̄an jepļaak n̄an ad kapijuknen ippān Jemedwōj Ilan̄.

Jet iien remootļo̧k juon m̧ōtta eo ejitenbōro ekar joļo̧k 233 raan ko ilo aujpitōl kōn nan̄inmej in COVID-19. Ilo iien eo, kar maron̄ loļo̧k e jen jemān eo emej, eo ekar kajjitōk bwe naan eo en ilo̧k n̄an ajri ro jibūn. Men̄e jen ilōn̄inļo̧k ran̄oļ nuknuk eo, jim̧m̧a in em̧m̧an ekar kōņaan jipan̄ ro jibūn jepļaakļo̧k n̄an kapijuknen eo aer.

Aaet, rijilōk ro an Kraist rej keememej “Benjamin” ilo mour ko aer. Peļaakin laļin raar ron̄ naan eo ealikkar jān rikanaan eo an Anij emour, Būreejtōn Russell M. Nelson. Likao ro im jiron̄ ro rej bōk koņaer ilo jerbal in an Irooj. Armej ro kajjojo im baam̧le ko rej diwōjlok ilo juon jetōb in jerbal in karejar—iakwe, kea, im karuwaineneiktok ro m̧ōttaer im ro rituruier n̄an itok n̄an Kraist. Jodikdik ro im ro rūm̧m̧an ded rej kajjieon̄ in kōjparok bujen ko aer—kobrak tampeļ ko an Anij, pukoti etan ro nukuier remej, im bōki kain̄i ko ilo etaer.

Etke Jemedwōj Ilan̄ ekar peek karōk eo n̄an kōj ekoba jipan̄ ro jet jepļaakļo̧k n̄an Ippān. Kōnke en̄in ej wāween eo n̄an ad erom̧ āinwōt Jisōs Kraist. Aaet, bwebwenatoon Juda im Benjamin rej katakin kōj kōn en̄taan eo an Rilo̧mo̧o̧r n̄an kōj. Kōn Pinmuur eo An, E eaar letok mour eo An n̄an kōro̧o̧lļo̧k kōj. Naan ko an Juda ej kwaļo̧k iakwe eo an Rilo̧mo̧o̧r: “Ekōjkan aō maroñ wanlōñḷọk ñan ippān jema, im [kwojjab] pād ippa?” Āinwōt ro rej aiintok Israel, emaron̄ barāinwōt naan ko ad.

Ilo Kallim̧ur M̧okta epād ie bwebwenatoon kabwilōn̄lōn̄ ko me rej ekkeijeļo̧k ilo karōk eo an Jemedwōj Ilan̄. Ilo 2 Kiin̄ Ro 4, naan eo “ilo juon raan” ej waļo̧k jilu alen n̄an kobaiktok n̄an eō ta m̧akūtkūt ko raorōk rekar waļo̧k ekkar n̄an karōk eo an Anij, im ejjeļo̧k elaajrak edik n̄an E.

Eo m̧ōttan Paul ekar kam̧ool kōn m̧ool in. Paul ekar rūttoļo̧k ilo juon kapijuknen me jet iien rej kakkure doon im rejjab tōmak ilo kabun̄. Ke ij pād ilo jikuuļ in tariņe ilo Germany, iaar ioon ruo sister ro raar ebbōļ kōn meram in jetōb. Kar kajjitōk etke eoktak aer uwaak ke rej pād ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Paul ekar jino ioon mijenede im rekar karuwaineneiki n̄an m̧ōn jar. Jabōt eo juon, ekar to jen baj eo, ekar ioon ruo em̧m̧aan rej jōōt mouj im tae. Ekar kajjitōk ippāer n̄e raar elder ro an Kabun̄ in. Rekar uwaak, aaet, Paul ekar ļoor lo̧k er.

Ilo iien kabun̄jar eo, rikwaļo̧k eo ekar jitōn̄ļo̧k armej ro ilo jarlepju eo im kar kajjitōk ippāer n̄an kam̧ool. Ilo jem̧ļo̧kin kajjojo naan in kam̧ool, ritturam̧ eo ej no turam̧ eo im jarlepju eo rej lam̧ōj, “amen.”

Ke rikwaļo̧k eo jitōn̄ļo̧k Paul, ekar jutak im ba, “Ijeļā Josep Smith ekar juon rikanaan im bwe Bok in Mormon ej m̧ool.” Ejjeļo̧k turam̧ ak amen. Paul ekar kile ke ebōd kabun̄ eo epād ie. Tokālik, Paul ekar jeļā jikin eo im kar peptaij.

Ilo raan in peptaij eo an Paul, juon membōr ekar jab jeļā kajjien ekar ba n̄an e, “Kwaar lo̧mo̧o̧ren eō.” Jejjo̧ wiik m̧oktaļo̧k, em̧m̧aan in ekar pepe n̄an pukot bar juon kabun̄ im kobaļo̧k ilo iien kabun̄jar ko ijo me elōn̄ turam̧ im amen ko ie. Ke em̧m̧aan eo ekar ron̄ naan in kam̧ool eo an Paul kōn Josep Smith im kōn Bok in Mormon, ekar kile bwe Anij ejeļā kajjien, kar kile apan̄ ko an, im kar wōr juon karōk n̄an e. Jim̧or Paul im em̧m̧aan eo, em̧ool “ekar juon raan em̧m̧an,”!

Jej bar jeļā bwe Jemedwōj Ilan̄ ewōr an karōk in m̧ōņōņō n̄an kōj kajjojo. Kōnke Anij ekar jilkintok Nejin Emake Wōt n̄an kōj, kabwilōn̄lōn̄ ko jej aikuji naaj “[wōtļo̧ktok] ilo raan [eo wōt]” ekkar n̄an karōk eo An n̄an kakūrm̧oole.

Ij kam̧ool bwe iiō in jemaron̄ jeļā eļapļo̧k kōn karōk eo an Anij n̄an kōj ilo Kallim̧ur M̧okta. Aorōk in ekwojarjar ej kwaļo̧k kōn jerbal eo an rikanaan ro ilo iien ko jab jeļā kaki im pein Anij ilo juon laļ eo etarpok im ekkā an lōn̄ jum̧ae ko ie. Ej bar kōn ro ritōmak retiljek ro rej reim̧aanļo̧k n̄an itok eo an ad Rilo̧mo̧o̧r, āinwōt ilo ad reim̧aanļo̧k im kōppopo n̄an itok eo An Kein Karuo me kar kanaan eo—An etto, jepļaaktok eo eaibojooj.

M̧ae raan en, jemaron̄ jab loe kōn mej ko mejed, kōn jerbal eo an Anij ilo aolep m̧ōttan mour ko ad (lale Katak im Bujen Ko 58:3). Ak jemaron̄ keememej uwaak eo an Nipai ke ekar ioon men ko ekar jab maron̄ meļeļe: ke ekar jab jeļā meļeļein aolep men otemjeļo̧k ekar jeļā bwe Anij ej iakwe ro Nejin (lale 1 Nipai 11:17).

En̄in kam̧ool eo aō ilo jibbon̄in Jabōt aibojooj in. Kōm̧m̧an bwe jen je ilo būruwōd im kōtļo̧k bwe en kobrak jetōb ko ad kōn aenōm̧m̧an, kōjatdikdik, im lan̄lōn̄ indeeo: Anij eaar lukkuun iakwe kōj bwe E ekar jilkintok Nejin Emake Wōt—jaab n̄an ekajete kōj ak n̄an lo̧mo̧o̧ren kōj. Ilo etan Jisōs Kraist, amen.