Ndɛ Da Yi
Hɛn nkɔnhyɛnyi tseasefo reyɛ n’afã ma Mormon Nwoma no ahyɛ asaase no do mã. Ne kandzi no otwar dɛ yɛkã no do.
Mo nuambanyin na nkyerɛbaa, Mormon Nwoma mu asɛnsin yi “ndɛ da yi”1 wosi do kã ma yɛyɛ aso wɔ afotu, anohoba, na nkyerɛkyerɛ horow. Ɔhen Benjamin, ne kasaa a odzi ewiei mu no, otuu nkorɔfo no fo dɛ, “Hom ribetsie me nsɛm a merebɛkã akyerɛ hom ndɛ da yi; … hom [m]bue hom aso ama hom aatse, nye hom akoma ama hom aatse ase, nye hom adwen ama woeebue Nyankopɔn n’esumasɛm no akyerɛ hom.”2 Wiadze mfɛndzanan ehyiadzi so tse dɛmara. Yɛba ha betsie afotu ma “ndɛ da yi,” ama [yee]dzi nokwar aber nyina”3 ama Ewuradze na N’asɛmpa. Dza ɔhyɛ mo do “ndɛ da yi” nye hia ohia tsitsir dɛ yebekenyan hɛn enyimpi si ma Mormon Nwoma, a Joseph Smith frɛɛ no “nwoma no dzi mu kyɛn nwoma biara a ɔwɔ asaase do.”4
Mikitsa Mormon Nwoma wɔ me nsamu. Iyi nye me afe 1970 dze no a ɔakyɛr yie, na ɔsombo ma me. No hwɛbew kyerɛ dɛ ɔaberɛ na oesuw, naaso nwoma biara nnyi hɔ a ohia tsitsir wɔ m’abrabɔ mu na me dasegye dɛ iyi. Mekenkanee no, Sunsum no maa minyaa dase dɛ Jesus Christ yɛ Nyame ne Ba,5 dɛ Ɔyɛ m’Agyenkwa,6 dɛ kyerɛwsɛm yinom yɛ Nyame N’asɛm,7 na dɛ asɛmpa no wɔdze asan ananmu aba.8 Dɛm nokwar da mu bun mu. Dɛ mbrɛ nkɔnhyɛnyi Nephi kãe no, “Me kra n’enyi gye Ewuradze ne ndzɛmba ho.”9
Fi bankum dze kɔ enyimfa: Asɛmpasomafo aberantsɛba, Elder Ronald A. Rasband, President Harold Wilkinson, Boka afamu Aman Asɛmpakã ne president, Elder Marion D. Hanks, Wiadze Mfɛndzanan Eduosuon Tumdzifo.
Iyi nye asɛm a ɔtae ekyir. Meyɛ asɛmpasomafo aberantsɛba no, mefaa Elder Marion D. Hanks, a ɔbɛseraa hɛn wɔ Boka Afamu Aman Asɛmpakã Mbew do n’afotu no. Nna nkyɛ ɔyɛ Ngyiresi Asɛmpakã Mbew ne president, na n’asɛmpasomafo no hɔn mu beenu tsena enyim ha ndɛ da yi: m’Enuanom adɔfo Elder Jeffrey R. Holland na Elder Quentin L. Cook.10 Dɛ mbrɛ ɔnye n’asɛmpasomafo a wɔwɔ Ngyiresi Aborɔkyir yɛe no, ɔmaa hɛn taferbanyinmbɔmu dɛ yɛnkenkan Mormon Nwoma a wɔnnyɛɛ ahyɛnsew wɔ mu, annyɛ yie koraa, bɛyɛ mpɛn ebien. Mefaa edwuma no too mo do. Akenkan a odzi kan no nna ɔwɔ dɛ meyɛ biribiara a ɔkyerɛ Jesus Christ anaa ɔgye No ho dase no ho ahyɛnsew anaa mutwa ase. Medze pɛn kɔkɔɔ, na mutwutwaa nyiyimu pii ase. Otsĩa ebien no, Elder Hanks kãa dɛ yɛma asɛmpa fapem na nkyerɛkyerɛ no nda edzi, na aber yi no medze blue yɛɛ kyerɛwsɛm no mu ahyɛnsew no. Mekenkaan Mormon Nwoma no mpɛn ebien, dɛ mbrɛ osusui, na nkyii mpɛn ebien so a medze akokɔangoa na tuntum dze hyɛɛ nyiyimu a okenyan me no nsew.11 Dɛ mbrɛ hom hu no, mekyerɛɛw ndzɛmba pii.
Nna nnyɛ kyerɛwsɛm mu ahyɛnsew no nko na meyɛ wɔ m’akenkan no mu. Mormon Nwoma akenkan, fi ahyɛse kesi ewiei bialra no, Ewuradze ho dɔ kɛse hyɛɛ mo do. Minyaa Ne nkyerɛkyerɛ ho nokwar dasegye a no ndwow dɔ kɔ bun mu ho atsenkã na mbrɛ mebesi dze bɔbɔ bra “ndɛ da yi.” Nwoma yi fata ne tsir no, “Jesus Christ N’Ahyɛmu Kor So.”12 Dɛm adzesũa no na dɛm sunsum mu dasegye a minyae no, mebɛyɛɛ Mormon Nwoma asɛmpasomafo na Jesus Christ n’osũanyi.13
“Ndɛ da yi,” Mormon Nwoma asɛmpasomafo kɛse kor nye President Russell M. Nelson. Ber a wɔfrɛɛ no Ɔsomafo fofor no, ɔkasaa wɔ Nkran, a ɔwɔ Ghana.14 Nna etsitsir wɔ ase a, Ebibiman Ɔhen bi kã ho a, ɔkasaa duaa ne kyɛame mu. Nna ɔhen no a oesũa Bible mu nsɛm ara yie na ɔyɛ obi a ɔdɔ Ewuradze. President Nelson kasaa ekyir no, ɔhen no bɛɛn no, na obisaa no wɔ Ngyiresi Borɔfo kasa a ho tsew ara yie, “Ɔwoara woana nye wo?” President Nelson kyerɛkyerɛɛ mu dɛ “ɔyɛ Jesus Christ Ɔsomafo a wɔahyɛ no sɔfo.”15 Ɔhen no n’asɛmbisa odzi do nye, “Ebɛnadze na ibotum akyerɛkyerɛ me wɔ Jesus Christ ho?”16
President Nelson yii Mormon Nwoma no na obuei kɔr 3 Nephi 11. President Nelson na ɔhen no bɔɔ mu kenkaan Agyenkwa n’asɛm a Ɔkãa kyerɛɛ Nephifo no: “Hom nhwɛ, Emi nye Jesus Christ no a nkɔnhyɛfo gyee dase dɛ ɔbɛba wiadze no. … Emi nye wiadze ne kan na no nkwa no.”17
President Nelson dze dɛm Mormon Nwoma no maa ɔhen no, na ɔhen no buaa dɛ, “Nkyɛ ibotum ama me dɛnkyɛmbo anaa mbota, naaso biribiara nnsom bo mma me nnkyɛn Ewuradze Jesus Christ ho nyimdzee ntoado yi.”18
Ɔno nnyɛ mpɛn kor mfatoho a ɔfa mbrɛ hɛn nkɔnhyɛnyi dɔfo no si kyɛ Mormon Nwoma no. Ɔdze Mormon Nwoma no bi ama nkorɔfo ɔha ɔha, a ber biara ɔgye ne dasee wɔ Jesus Christ ho. Sɛ President Nelson hyia ahɔho, presidentfo, amampanyinfo, edwuma na ekuw akɛse baanodzifo, sɛ wohyia wɔ Asɔr asoɛe anaa wɔ hɔnara hɔn mbea, ɔdze kyerɛwsɛm yi a woeyi akyerɛ yi ma hɔn obu mu ara. Nkyɛ obtum ama hɔn ndzɛmba pii a wɔakyekyer ho fɛɛfɛɛfɛ a wɔdze besi apon bi do anaa wɔdze esi hɔ dze akaa ne nsera no. Mbom, ɔma dza ɔsom bo kɛse ma no, a ɔbor mbota na dɛnkyɛmbo, dɛ ma ɔhen no kãa no.
President Nelson ase dɛ, “Mormon Nwoma no nokwar no wɔ tum dze sã yarba, dze kyekye werɛ, dze san ananmu, dze boa, dze hyɛ dzen, dze ma akoma tɔ yamu, na ɔma hɛn akra enyi gye.’’19 Maahwɛ ber a hɔn a wɔgyee Mormon Nwoma fii hɛn Nyankopɔn no nkɔnhyɛnyi hɔ no, wɔdze hɔn nsa esuo mu dzendzendzen. Akyɛdze kɛse biara nnkɛsen no.
Ndaansa yi ɔnye Gambia ɔmanpanyin ne yer hyiaa wɔ no ofese na ɔmaa ɔbaa no Mormon Nwoma kor ahobrɛadze mu ara. Oenngyina hɔara. Obuebuei ne nkrataafa na ɔnye no kenkanee, dze rekyerɛkyerɛ no na ɔregye dase wɔ Jesus Christ, No Werdambɔ, na No dɔ ma Ne mba nyinara—wɔwɔ beebiara.
Hɛn nkɔnhyɛnyi tseasefo reyɛ n’afã ma Mormon Nwoma no ahyɛ asaase no do mã.20 Mbom nonko onnkotum ebue nsuyirii abobow. Ne kandzi no otwar dɛ yɛkã no do.
Ne fasusu ne nkenyan do no, morobɔ mbɔdzen ahobrɛadze mu ara dɛ mebɛkyɛ Mormon Nwoma no.
Ndaansa yi nna mowɔ edwumayɛ nsera wɔ Mozambique. Ɔman fɛɛfɛw yi mu mba no nye ohia, yarba, edwumayɛ ho nã, ehum na amambusɛm ho basabasayɛ ridzi aper. Menyaa adom ho kwan ma menye ɔman no ne president, Filipe Nyusi hyiae. Ɔnam n’ebisadze do ntsi, mobɔɔ mpaa maa ɔno na ne man; na mekãa kyerɛɛ no dɛ yerisi Jesus Christ ne Temple22 wɔ ne man mu. Hɛn nsera n’ewiei no, medze Portuguese kasa, no kurow mu kasa, Mormon Nwoma maa no. Ber a ɔgyee nwoma no ndaase mu ara no, megyee dase wɔ enyidado na anohoba ma no nkorɔfo, a wohu no wɔ Ewuradze ne nsɛm mu wɔ ne krataafa horow no.22
Ber bi so no, emi na mo hokãfo, Melanie, hyiaa Lesotho Ɔhen Letsie III na Ɔhɛnbaa no wɔ hɔn fie.23 Hɛn no, hɛn nsera n’adze tsitsir nye dɛ yɛdze Mormon Nwoma no kor rema hɔn na nkyii merekyɛ me dasee. Sɛ mohwɛ ekyir wɔ dɛm sũahu na binom so a, nda a odzi ekyir kyerɛwsɛm mu nyiyimu bi ba m’adwen mu: “Hɔn a wɔyɛ mberɛw nye ɔkwahweaban aabɔ m’asɛmpa no ne mahyɛ ho dawur akyerɛ wiadze n’ano nyina, wɔ ahemfo nye ahwɛdofo enyim.”25
Menye India Aban Ananmusinyi Indra Mani Pandey25 wɔ Amansan Nkabɔmu Kuw wɔ Geneva na His Holiness Patriarch Bartholomew26 a ɔwɔ Boka Afamu Orthodox Asɔr no na binom pii akyɛ Mormon Nwoma no. Menya Ewuradze no Sunsum ho atsenkã ber a mankasa medze “hɛn Asɔr no botantsim” no ama hɔn 27 na magye me daseee wɔ Jesus Christ, hɛn gyedzi no kotowdo-bo no akyerɛ.28
Afei, enuanom na nkyerɛbaa, onnhia dɛ ibɔkɔ Mozambique anaa India anaa enye ahemfo na ahwɛfo hyia ana ama obi nwoma a nkyerɛkyerɛ na anohoba krɔnkrɔn wɔ mu yi. Moto nsa frɛ wo ndɛ da yi, dɛ fa Mormon Nwoma no ma w’anyɛnkofo na ebusuafo, w’edwuma mu fo, wo foot bɔɔl coach, anaa wo guadzinyi wɔ guamu. Wohia Ewuradze ne nsɛm a wohun no wɔ nwoma yi mu. Wohia daa daa nsɛmbisa ho mbuae na onnyiewiei nkwa a ɔbɛba no. Wohia dɛ wohu ahyɛmu anamɔn kwan no a wɔdze ato hɔn enyim no na Ewuradze No a dɔ otsim ma hɔn no. Ne nyina wɔ Mormon Nwoma no mu.
Sɛ edze Mormon Nwoma no, kor ma hɔn a nna irubue hɔn akoma na adwen mu ma Nyame n’asɛm. Onnhia dɛ ibɔsoa nwoma no dza woetsimtsim no. Ibotum akyɛ efi wo abaefo foon do efi kyerɛwsɛm bea wɔ Asɛmpa Nwoma Korabea do a, ne yɛ nnyɛ dzen.29
Dwen hɔn nyina a asɛmpa no botum ehyira hɔn abrabɔ, na nkyii ma hɔn Mormon Nwoma no bi fi wo foon do. Kaa dɛ edze wo dasegye na mbrɛ nwoma yi esi ehyira w’abrabɔ no bɛka ho.
M’anyɛnkofo adɔfo, dɛ meyɛ Ewuradze no Somafo no, moto nsato frɛ hom dɛ hom nkã hɛn nkɔnhyɛnyi dɔfo, President Nelson do, ma Mormon Nwoma no ntwuw mfa asaase no do mã. Ohia kɛse; ohia dɛ yedzi ho dwuma sesei. Mobɔ hom anohoba dɛ hom rebɛkã “edwuma kɛse a ɔwɔ asaase do no,” Israel mboano no,30 ber a inya nkenyan hwehwɛ hɔn a “wɔdze nokwar no ehuntsa hɔn osiandɛ wonnyim bea a wobohu efi.”31 Wohia wo dasegye na adanse wɔ mbrɛ nwoma yi esi asesã w’abrabɔ na ɔatwe wo abɛn Nyankopɔn ara yie, N’asomdwee,32 na Ne “nsɛmpa a ɔyɛ dɛw kɛse.”33
Megye dase dɛ ɔnam ɔsor nhyehyɛɛ do na wosiesiee Mormon Nwoma no dɛ omfi tsetse America mpue dɛ ɔbɛpaa mu akã Nyame n’asɛm, dɛ “da yi” ɔdze akra bɛba Ewuradze Jesus Christ na N’asɛmpa nsanananmu. Jesus Christ ne dzin mu, amen.