Hom Ndzi Mu wɔ No mu

Hɛn Ɔsor Egya na hɛn Agyenkwa, Jesus Christ, wɔ tum dɛ wɔgye hɛn nkwa na wɔsesa hɛn. Wobotum aboa hɛn ma yɛabɛyɛ dɛ ma Wɔtse no.

Mfe kakra a abasen kɔ no, hɛn nananom mbanyin kumabaa no hɔn mu kor, Aaron, hyɛɛ ase dɛ orinya apɔwmudzen mu haw. Ɔtɔɔ bahaw, ɔtaa pirapira, na ihu dɛ ɔnntse apɔw. Ndur nhwehwɛmu ekyir no, nna oenya aplastic anemia a no mu yɛ dzen, yarba a ɔma ne mbiew mu ehuon gyaa dɛ ɔreyɛ bɔgya mu ndzɛmba. Sɛ wɔannyɛ ho edur na ekyir yi woennsiw ano a, no bɔgyaakyi nnkotum etwa anaa ɔakõ etsia nyarba—ntsi mpo famubɔ ketseketse, epira, anaa yarba botum abɛyɛ dza ntsɛmara ɔbɛhaw no nkwa.

Mber kakra ntamu no, Aaron gyee bɔgya mu ndzɛmba fi ber to ber dze bɔɔ no ho ban. Adatserfo no kyerɛɛ mu dɛ yarba no n’ano edur ara nye dɛ obenya mbiew mu ehuon nsesa, na dza ɔbɛma oedzi mu yie nye obenya efi no nua hɔ. Sɛ no nuanom no mu bi ne dze nye no fa yie a, nsesa no bɛyɛ dza obotum ama nkwa. Wɔyɛɛ nhwehwɛmu wɔ no nuanom nkumabaa anan no hɔn mu, na kor, a ɔyɛ Maxwell, na wohun dɛ ɔnye no fa pɛpɛɛpɛ.

Enya nyimpa a ɔnye wo dze no fa pɛpɛɛpɛ mpo no, mbiew mu ehuon nsesa da ho botum dze ɔhaw dzendzen binom aba. Nna nhyehyɛɛ no gye dɛ wɔdze nduryɛ na chemo kandzea dzen sɛɛ no bɔgya mu ndzɛmba a ɔwɔ ne mbiew mu ehuon mu a yarba akã no ana ɔagye ndzɛmba afofor a ofi no nua Maxwell ne mbiew mu ehuon mu. Nkyii ɔnam dɛ dza Aaron dze kõ tsia nyarba no mu agow ntsi, ohia dɛ ɔda asopitsi adapɛn pii na nkyii so abosoom pii wɔ fie a nhyehɛɛ, bambɔ, na nduryɛ soronko kã ho.

Nna dza enyi da kwan wɔ nsesaa no mu nye dɛ Aaron no honandua nnkɔpow mboa ndzɛmba no na dɛ Maxwell ne mboa ndzɛmba no bɛyɛ bɔgya mu ndzɛmba a ohia wɔ Aaron no honandua mu nkakrankakra. Sɛ nsesa yi wie konyimdzi mu a ogya honandua mu nsesa ankasa. Ɔyɛ nwanwa dɛ, datser bi kyerɛɛ mu dɛ sɛ Aaron kedzi bɔn bi na no bɔgyaa ka beebi kor no a, aporisifo botum akyer no nua Maxwell. Osiandɛ Aaron no bɔgyaa fi Maxwell no bɔgya mu ndzɛmba a ɔdze maa no no mu na ɔwɔ Maxwell ne DNA, na dɛm na ɔbɛyɛ no nkwa nda nyina.

Aaron a no nua no bɔgyaa gyee no nkwa no ama madwen pii afa Jesus Christ no bɔgyaa a ɔdze bɔɔ werdam ho na No Werdambɔ no nsunsuando wɔ hɛn do. Ndɛ mebɛpɛ dɛ mitsim wɔ nsesa a ɔma nkwa, a ɔyɛ afebɔɔ a osi ber a yɛma Ewuradze kwan ma ɔyɛ anwanwadze wɔ hɛn mu.¹

Nna Aaron nnyi tum wɔ nankasa no mu a ɔdze bedzi yarba no do. Nna no honandua nntum nnyɛ bɔgya mu ndzɛmba a ohia ma no nkwa. Dza ɔnoara bɛyɛ no, onnkotum asa ne mbiew mu ehuon yarba. Dɛ mbrɛ Aaron nnkotum asa noho yarba no, yennkotum agye hɛnara hɛnho so. Ɔmmfa ho dza yetum yɛ, hɛn adzesũa, hɛn ben, anaa hɛnho ne dzen, yennkotum asan hɛnara hɛnho efi hɛn bɔn mu, asesa hɛn honandua akɔ bɛkyebo tsebew mu, anaa yɛama hɛnho nkwagye ntowdo. Iyi ba mu nko ɔnam Agyenkwa Jesus Christ na No Werdambɔ a ɔmmbɔadze da do. “Kwan fofor biara nnyi hɔ anaa dzin biara nnyi wi ase yi mu a wɔnam do bɛgye ɔdasanyi nkwa wɔ Nyankopɔn n’ahenman no mu.”² Ɔyɛ No bɔgyaa a ɔdze bɔɔ werdam no na ɔhohor hɛnho na ɔtsew hɛnho.³

Nna Aaron nntum nsa noho yarba dze, naaso ama nsesa no ayɛ edwuma no, okehiaa dɛ onya pɛ dze yɛ dza adatserfo bese no no—dza ɔyɛ dzen papaapa no, ndzɛmba a ɔhaw no mpo, ɔbɛyɛ. Yennkotum agye hɛnho dze, naaso sɛ yegyaa hɛnho ma Ewuradze ne pɛ na yedzi hɛn ahyɛmu horow do a, kwan no buei ma hɛn mponee.⁴ Tse dɛ nwanwa kwan a Aaron no bɔgyaa mu ndzɛmba ne DNA sesa no, yebotum enya akoma nsesa,⁵ enya No su ada edzi wɔ hɛn enyim,⁶ na yɛabɛyɛ abɔdze afofor wɔ Christ mu.⁷

Alma kaakaa Zarahemlafo faa ebusuasantsen a abasen a wonyaa nsakyeree no ho. Ɔrekasa fa n’egya ho, Alma kyerɛɛ mu dɛ “ɔnam ne gyedzi do ntsi nsakyer kɛse bi baa n’akoma mu.”⁸ Nkyii obisaa dɛ, “Ana hom enya dɛm nsakyer kɛse yi wɔ hom akoma mu?”⁹ Nnyɛ nkorɔfo noara na wɔsesaa hɔnankasa hɔn akoma. Ewuradze na ɔyɛɛ nsesa no ankasa. Alma kyerɛɛ iyi pefee. Ɔkãa dɛ, “Hwɛ, ɔsakyeer hɔn akoma.”¹⁰ “Wɔbrɛɛ hɔnho adze na wɔdze hɔn werɛ tweer nokwar tseasefo Nyankopɔn no mu … [na] wodzii nokwar dze kɛpeem ewiei … [na] wɔgyee hɔn nkwa.”¹¹ Nna nkorɔfo no ayɛ krado dɛ wobobuei hɔn akoma mu na wɔdze gyedzi edzi dwuma, na nkyii Ewuradze sakyeer hɔn akoma. Na nna nsakyeree no ne kɛse! Dwen nsonsonee a ɔda mbanyin beenu a wɔfrɛɛ hɔn Alma no hɔn abrabɔ mu ansaana nna ber a wonyaa akoma nsakyeree ekyir.¹²

Yɛyɛ Nyankopɔn ne mba na yekitsa hyɛber kokroko. Wobotum asesa hɛn ma yɛabɛyɛ dɛ Ɔno na yenya “enyigye ne mãhyɛ.”¹³ Ɔfã kor so no, Satan pɛ dɛ yɛyɛ mbɔbɔr dɛ mbrɛ ɔnoara tse.¹⁴ Yɛwɔ tum dɛ yɛbɛsan mu eyi nyia yebedzi n’ekyir.¹⁵ Sɛ yedzi Satan ekyir a, yɛma no tum.¹⁶ Sɛ yedzi Nyankopɔn ekyir a, Ɔma hɛn tum.

Agyenkwa no kyerɛkyerɛɛ dɛ ɔwɔ “dɛ [ye]dzi mu.”¹⁷ Iyi botum ayɛ adze kɛse. Mutum hu mankasa m’esintɔ pefee na minyin kwan ara ɔda emi na emudziyɛ ntamu. Obotum ayɛ hɛn ntɔyɛɛ dɛ yɛdwen dɛ ɔwɔ dɛ hɛnara yedzi mu, naaso ɔno nnkotum aba mu. Iridzi nsusui biara a ɔwɔ ahoboa bukuu biara mu do wɔ wiadze yi mu no remmfa mmba. Kwan kortsee na dzin kortsee do na emudzi nam do ba. “[Yɛ]nam Jesus a ɔyɛ ahyɛmu fofor mu ntamugyinafo no do edzi mu, ɔno nankasa no bɔgyaa a okyii dze bɔɔ werdam a odzi mu no.”¹⁸ Hɛn emudzi ba mu ɔnam Nyankopɔn n’adom nko do.

Ibotum esusu mbrɛ obesi abor no do sɛ nna hɛn nanabanyin Aaron dwen dɛ ɔwɔ dɛ ɔnoara tse ase na ɔyɛ nduryɛ nhyehyɛɛ nyina a ɔfa ne nsesa no ho ma ɔnoara noho? Onnyi dɛ yɛdwen ho dɛ ohia dɛ yɛbɛyɛ dza Agyenkwa No nko botum ayɛ wɔ hɛn emudziyɛ nyɛbea kwan no do.

Moroni dze ne nkyerɛwee reba ewiei no, ɔkyerɛkyerɛɛ dɛ, “Nyew, hom mbra Christ hɔ, na hom ndzi mu wɔ no mu, … na sɛ hom pow dza ɔnnyɛ Nyame su nyina na hom dze hom ahom nye hom adwen nye hom ahoɔdzen nyina dɔ Nyankopɔn a, nna n’adom bɔdɔɔ sõ wɔ hom do, na ɔnam n’adom no do hom edzi mu wɔ Christ mu.”¹⁹ Ebɛn awerɛkyekyer na tum mu nkowar nye yi! N’adom sõ ma me. N’adom sõ ma ɔwo. N’adom sõ ma obiara a “[ɔ]reyɛ edwuma berɛ na wɔasoa [no] dza ɔyɛ dur.”²⁰

Eduryɛ tse dɛ Aaron ne dze no, yennyim nsunsuando no ma ɔbɛyɛ pɔkyee. Nokwar nye dɛ, Aaron kehiaa nsesa a otsĩa ebien ber a dza odzi kan no ɔhaw baa ho no. Ndaase mu ara, sunsum mu akoma nsesa no, onnhia dɛ yɛdwendwen sɛ obesi yie a. Sɛ yɛtsena wɔ Ne pɛ mu, “dze [hɛn]ho nyinara twer nyia otum gye nkwa no n’emudzi no,”²¹ mbrɛ ɔbɛdan biara no Agyenkwa no bɔgyaa no bɛtsew hɛnho na ekyir yi yedzi mu wɔ No mu. Ɔyɛ “Nyame nokwafo, na onntum nndzi ator.”²²

Ekyingye biara innyi ho dɛ dɛm nsesa nhyehyɛɛ yi gye mber na onnkowie kɛpem ɔbra yi n’ekyir, naaso anohoba no yɛ nokwar. Sɛ Nyankopɔn n’anohoba ne mãhyɛ yɛ dɛ ɔwɔ ekyirekyir a, yɛda ho fua dɛm anohoba no a, yenyim dɛ wɔbɛhyɛ mã.²³

Anwanwadze nsesa wɔ Aaron n’apɔwmudzen mu dze enyigye kɛse abrɛ hɛn ebusua. Susu enyigye kɛse a ɔwɔ ɔsor sɛ nsakyeree akɛse sisi wɔ hɛn akra mu a.

Hɛn Ɔsor Egya na hɛn Agyenkwa, Jesus Christ, dɔ hɛn na adom mu ara wɔayɛ krado dɛ wɔbɛsesa hɛn na wɔama yedzi mu. Wɔpɛ dɛ wɔyɛ iyi. Ɔyɛ Hɔn edwuma nye enyimnyam ne fapem.²⁴ Megye dase dɛ Wɔwɔ tum dɛ wɔyɛ iyi ber a yɛdze gyedzi ba Hɔn hɔ. Jesus Christ ne dzin mu, amen.