Enyigye na Afebɔɔ

Anyɛnkofo, nuambanyin, na nkyerɛbaa, hom kaa dɛ nna hom gye ewɔ enyigye mu ara daapem dzi, anaa wɔpɛ dɛ wɔbɛgye edzi?

Nkyii yɛhyɛ abrabɔ ase. “Yenyin.’’ Nkitahodzi yɛ huanyaan. Wiadze yi yɛ dede, nyimpadɔm ahyɛ mu mã, ɔtan, a wɔdze ator na ndaadaa akã ho Naaso, wɔ hɛn “akoma ne ɔpɛ dzendzen,’’ mu no¹ yɛgye dzi, anaa yɛpɛ dɛ yɛgye dzi, dɛ beebi, biribi, enyigye na afebɔɔ yɛ nokwar na yebotum enya.

“Enyigye na afebɔɔ’’ nnyɛ kodzi a yɛkenkan. Nokwar, dɛwdzi a ɔmmbɔ adze na mfesantsen a yɛnye hɔn a yɛdɔ hɔn no nye Nyankopɔn n’enyigye nhyehyɛɛ adze tsitsir ankasa. No kwan a ɔdɔ mu ara oesiesie no botum ama hɛn onnyiewiei akwantu ayɛ enyigye na afebɔɔ.

Yɛwɔ dodow a ɔwɔ dɛ hɛn enyi gye ho na hɛn enyi sɔ ho. Naaso, hɛn mu biara nnyi hɔ a odzi mu, anaadɛ ebusua biara so nnyi hɔ dɛm. Ɔdɔ, afɛwdzi, na ankorankor suban na ɔsan so taa yɛ esidzi, ayawdzi, na ɔtɔfabi a yaw papaapa kã hɛn nkitahodzi ho.

“Na dɛ mbrɛ hɔn nyina wu wɔ Adam mu no, dɛmara so na hɔn nyina benya nkwa wɔ Christ mu.’’² Ɔnnkyebo kã yebenya nkwa wɔ Christ mu ho—N’akyɛdze a ɔyɛ hɛn honandua wusoɛr. Sɛ yɛdze gyedzi na setsie tsena ase a, nkwa wɔ Christ mu botum ayɛ yɛnye Nyankopɔn na hɔn a yɛdɔ hɔn no renya onnyiewiei nkwa na dɛwdzi mbordo.

Nwanwa kwan bi mu no, Ewuradze no nkɔnhyɛnyi rotwe hɛn bɛn Agyenkwa no yie, a ɔnam temple ayɛdze na ahyɛmudzi horow do kã ho rebɛn hɛn yie wɔ mbeambea beberee mu. Yeenya kwan na akyɛdze papaapa dɛ yɛbɔhwehwɛ sunsum mu ntseasee, ɔdɔ, nnuhu, na bɔnfakyɛ fofor ama hɛnho nkorkor na hɛn ebusua ebusua, wɔ mber na mfesantsen mu.

Medze akwanserɛ no, mebɛkã sũahu horow krɔnkrɔn ebien a m’anyɛnkofo kãe wɔ Jesus Christ ho a ɔnam mbasantsen ayawdzi ayarsa do mpo reka ebusua ebusua abɔmu ho asɛm.³ “Ɔmmbɔadze da na onnyiewiei,’’⁵ “mu yɛ dzen sen owu ntampee homa,’’⁶ Jesus Christ no Werdambɔ botum aboa hɛn ma yɛdze asomdwee aba hɛn dadaw mu na enyidado aba hɛn ndaamba mu.

Mber a wɔbɔdɔm Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ho no, me nyɛnko na no kun, dɛw mu ara sũaa hia a ohia dɛ ebusua nkitahodzi nnkɛyɛ “kɛpem owu tsetsew hɛn ntamu,’’ ara. Ewuradze ne fie no, ebusua botum abɔmu onnyiewiei mu ara (nsɔwano).

Naaso nna me nyɛnko mmpɛ dɛ wɔbɔsɔw no aka n’egya ho. “Ɔannyɛ kun pa amma me maame. Ɔkãa dɛ, ɔannyɛ egya pa amma ne mba.” “M’egya wɔdɛ ɔtweɔn. Minnyi pɛ biara dɛ mebɛyɛ ne temple edwuma na wɔasɔw hɛn ano ama mfesantsen.’’

Afe kor mu no, ɔkyeen kɔm, bɔɔ mpaa, nye Ewuradze kãa n’egya no ho asɛm beberee. Ewiei no, ɔyɛɛ krado. Wɔyɛɛ n’egya ne temple edwuma wiei. Ekyir no, ɔkãa dɛ, “me nda mu no m’egya puei modo wɔ adaaso mu, a nna ɔhyɛ atar fitaa. Nna ɔasesa. Ɔkãa dɛ ,‘Hwɛ me. Moho nyina atsew. Medaase dɛ eyɛ edwuma maa me wɔ temple.’’’ N’egya dze kãa ho dɛ, “Soɛr na san kɔ temple, wo nuabanyin rotweɔn dɛ wobonuma no.’’

Me nyɛnko se dɛ, “M’ewuakɔr na hɔn a woewuwu no rotweɔn enyiber do dɛ wɔbɛyɛ hɔn edwuma.’’

Ɔsee dɛ “Emi dze,’’ “temple no yɛ ayarsa, adzesũa bea, na bea a yɛgye Jesus Christ No Werdambɔ no to mu.

Sũahu a otsĩa ebien. Nyɛnko kor bi so dze enyimia hwehwɛɛ n’ebusua abakɔsɛm. Nna ɔpɛ dɛ ohu ne nana nkansowa banyin.

Anapa tutu bi, me nyɛnko no kãa dɛ ɔtsee ɔbarimba bi no sunsum nkã wɔ ne dan mu. Nna ɔbarimba no pɛ dɛ n’ebusuafo hwehwɛ no na wohu no. Ɔbarimba no dzii awerɛhow wɔ mfomdo bi a afei oenu noho wɔ ho. Ɔbarimba no boaa me nyɛnko no ma ohun dɛ ɔnnye nyimpa a nna ɔdwen dɛ ɔyɛ ne nana banyin nkansowa no nnyi DNA nkitahodzi biara. Me nyɛnko no kãa dɛ, “Sɛ yɛrekã a, meehu me nanabanyin nkansowa na muhun dɛ nna ɔnnyɛ nyimpa no a hɛn ebusua nkyerɛwee kãa dɛ nna ɔyɛ hɛn nanabanyin nkansowa no.

Me nyɛnko kãa dɛ, n’ebusua nkitahodzi ada edzi pefee, “m’enya ahotɔ, mowɔ asomdwee. Ohia papaapa dɛ mobohu dɛ woananom nye m’ebusuafo.’’ Me nyɛnko dzi fɛw dɛ, “nkorbata a akyea no nnkyerɛ dua bɔn. Mbrɛ yesi ba wiadze yi mu no ho hia nnsen hɛn nyimpa ban a yɛyɛ sɛ yefi mu a.

Kyerɛwsɛm krɔnkrɔn na ankorankor ayarsa na asomdwee sũahu horow, nye hɔn a wobenya nkwa wɔ sunsum wiadze ka ho no, da nkyerɛkyerɛ fapem horow enum edzi.

Odzi kan: Ma ohia tsitsir wɔ Nyankopɔn no ɔpon na enyigye nhyehyɛɛ mu, Jesus Christ, ɔnam No Werdambɔ do, bɔ anohoba dɛ ɔbɛka hɛn sunsum na nyimpadua no abɔmu, a “hɔn mu nnkɛtsetsew bio, ama woeetum eenya enyigye ne mãhyɛ.’’⁶

Otsĩa ebien: Werdambɔ—nye-Christ-bɛyɛ-kor—ba ber a yesie gyedzi na yɛsow nnuho aba.⁷ Dɛ mbrɛ ɔtse wɔ ɔnnkyebo mu no, dɛmara so na ɔtse wɔ bɛkyebo mu. Temple ayɛdze horow hɔnankasa nsesa hɛn anaa hɔn a wɔwɔ sunsum wiadze no. Mbom ayɛdze horow krɔnkrɔn yinom ma ahotsew ahyɛmudzi a yɛnye Ewuradze dzi ho kwan, a otum dze yɛnye No koryɛ na hɛnho nkorkor ba.

Hɛn dɛw hyɛ mã ber a yɛtse Jesus Christ n’adom na bɔnfakyɛ ma hɛn no nkã. Na, sɛ yɛdze N’adom na bɔnfakyɛ anwanwandze ma hɛnho nkorkor a, ehumbɔbɔr a yenya na ehumbɔbɔr a yɛdze ma no botum aboa nsisi wɔ abrabɔ mu no atsen.⁸

Otsĩa ebiasa: Nyankopɔn nyim na ɔdɔ hɛn pɛpɛɛpɛr. “Wonnsi Nyankopɔn atwetwe,’’⁹ anaadɛ wɔnndaadaa No. Ɔdze ehumbɔbɔr na pɛrpɛrdzi no, Ɔdze n’ahotɔ abasa no twa ahobrɛadzenyi na nyia woenu noho hɔnho hyia.

Kirtland Temple mu no, Nkɔnhyɛnyi Joseph Smith no hun no nuabanyin Alvin a wɔagye no nkwa wɔ celestial ahenman no mu wɔ enyido-adzehu mu. Ahobow kaa Nkɔnhyɛnyi Joseph, osiandɛ Alvin wui ansaana ɔregye enuma nkwagye ayɛdze no.¹⁰ Awerɛkyekyer mu ara, Ewuradze kyerɛkyerɛɛ siantsir no mu dɛ: Ewuradze “bobubu [hɛn] atsɛn dɛ mbrɛ [hɛn] ndwuma tse, dɛ mbrɛ [hɛn] akoma n’apɛdze tse.’’¹¹ Hɛn akra gye dase wɔ hɛn ndwuma na apɛdze ahorow ho.

Ndaase mu ara, yenyim dɛ atseasefo na “ewufo a wonu hɔnho no, wɔnam Nyankopɔn ne fie mu ayɛdze ho setsie’’¹² na Christ no Werdambɔ do wɔbɔpon hɔn. Sunsum wiadze no, mpo hɔn a wɔwɔ bɔn na mbrato mu wɔ kwan dɛ wonu hɔn ho.¹³

Dza ɔnye no nnsɛ no, hɔn a wɔhyɛ daa fa emumuyɛdze, a wɔgye enyim tu hɔn nnuhu hyɛ da, anaa wodzi kan dwen ho anaa kwan biara a wonyim no wobu mbrasɛm do no na wɔhyehyɛ nnuhu a ɔyɛ mberɛw no Nyankopɔn bobu hɔn atsɛn na “na wɔbɛkaa [hɔn] afɔdzi nyinara pefee.’’¹⁴ Yennkotum agye enyim ayɛ bɔn Memenda, na afei hɛn enyi ada bɔnfakyɛ a wɔnndwen ho kwan ber a yedzi sacrament no Kwesida. Asɛmpasomafo anaa binom a wɔkã dɛ iridzi Sunsum n’ekyir no kyerɛ dɛ nnkedzi asɛmpakã gyinapɛn anaa mbrasɛm no do no, meserɛ hom nkaa dɛ iridzi asɛmpakã gyinapɛn na mbrasɛm do no ma Sunsum no ba. Onnyi dɛ hɛn mu biara tweɔntweɔn nnuhu. Nnuhu nhyira no hyɛ ase ber a yɛhyɛ ase nu hɛn ho.

Otsĩa anan: Ewuradze ma hɛn akwan krɔnkrɔn ma yɛbɛyɛ tse dɛ Ɔno ara yie ber a yegyina yɛ temple nkwagye ayɛdze ma binom a wohia naaso wonnkotum ayɛ ama hɔnho. Yɛhyɛ mã na yedzi mu¹⁵ ber a yɛyɛ “agyefo … wɔ Bepɔw Zion do.’’¹⁶ Sɛ yɛsom binom a, Anohoba Sunsum Krɔnkrɔn no botum esi ayɛdze horow no pi na wɔatsew nyia a ɔdze rema na nyia ɔregye beenu no hɔnho Nyia a ɔdze rema na nyia ɔregye beenu no botum ayɛ nsesa ahyɛmu na wɔahyɛ no dzen, a mber resen no woenya nhyira horow a wɔdze bɔɔ Abraham, Isaac na Jacob anohoba no.

Ewiei: Dɛ mbrɛ Mbra Mapã¹⁷ kyerɛkyerɛ no, dɛ mbrɛ yɛpɛ dɛ yenu hɛnho na wɔdze hɛn bɔn kyɛ hɛn no dɛmara na ɔwɔ dɛ yɛyɛ dze ma binom so.

Ɔtɔfabi a hɛn pɛ dɛ yɛdze obi no bɔn bɛkyɛ no tum ma hɔn beenu no na hɛn gyedzi dɛ yebotum enu hɛnho na yeenya bɔnfakyɛ. Ɔtɔfabi a ɔpɛ dɛ yebonu hɛnho na ahom dɛ yɛdze bɛkyɛ no mmba wɔ mber kor mu. Hɛn Agyenkwa no nye hɛn Ntamugyinafo, naaso Ɔsan so boa hɛn ma yehu hɛn onnyiewiei su na Ɔboa ma yɛnye hɛnho nkitahodzi yɛ dzen ber a yɛba No hɔ. Tsitsir ara sɛ ayawdze na yaw yɛ dzen a, yerisiesie hɛn nkitahodzi na yɛresa hɛn akoma yarba yɛ dzen, ebia hɛnara yɛyɛ a ɔnnkɛyɛ yie ama hɛn. Mbom ɔsor botum ama hɛn ahoɔdzen na nyansa a ɔtra hɛnara dze ma yeehu ber a ɔwɔ dɛ yɛsɔw, na mbrɛ yebesi begyae mu.

Yɛnntse ankonamyɛ nkã sɛ yehu dɛ nnyɛ hɛn nko a. Hɛn Agyenkwa tsease aber nyina.¹⁸ Yɛdze hɛn Agyenkwa no mboa no, yebotum egyaa hɛn ahantan, hɛn ayawdzi, na hɛn bɔn mu ama Nyankopɔn. Mbom ebia sɛ yɛhyɛ ase a yɛbɛtse nkã, yebedzi mu yie ber a yenya awerɛhyɛmu wɔ No mu dɛ Ɔbɛma hɛn nkitahodzi edzi mu.

Ewuradze, a Ohu na Ɔtse ase yie no, dze hɔn a Ɔpɛ hɔn bɔn kyɛ hɔn; hɛn a (yenndzi mu) wɔdɛ yɛdze obiara no bɔn kyɛ no. Sɛ yɛba hɛn Agyenkwa hɔ a, yɛnndwen hɛnankasa hɛnho mbordo. Yɛnntaa mbua atsɛn na yɛdze bɔn kyɛ yie. Yɛwɔ awerɛhyɛmu wɔ No ndwuma pa, n’ehumbɔbɔr, na n’adom do no¹⁹ botum agye hɛn efi wentwiwentwi, ebufuw, ɔpow, nsisi, na honandua na adwen mu nsɔhwɛ a ɔtɔfabi a ɔkã ɔnnkyebo wiadze mu no ho. Enyigye na afebɔɔ nnkyerɛ dɛ nkitahodzi biara bɛyɛ enyigye na afebɔɔ. Mbom mfe apem a wɔbɛkyekyer Satan no²⁰ ebia ɔbɛma hɛn mber a yehia na ahobow akwan ma yɛadɔ, yɛatsease, na yesiesie, ber a yɛyɛ mfesantsen ho ahosiesie.

Dɛ mbrɛ nkitahodzi tse wɔ sor no dɛmara so na yebotum ayɛ no wɔ ha.²¹ Ɔdze enyigye na afebɔɔ bɔbɔ adze kã Nyankopɔn n’edwuma na n’enyimnyam ho.²² Onnyiewiei nkwa na nkwagye ntowdo nye ibohu Nyankopɔn na Jesus Christ, ntsi no, ɔnam nyamesu tum do, beebi a Wɔwɔ no nye beebi a yɛbɔwɔ.²³

Nuambanyin nkyerɛbaa adɔfo, Nyankopɔn hɛn Ɔsor Egya, na No Dɔba tse ase. Wɔdze asomdwee, dɛwdzi, na ayarsa ma ebusuakuw, na kasa biara, ma hɛn mu kor biara. Ewuradze no nkɔnhyɛnyi rekyerɛ kwan no. Nda a odzi ekyir nyikyerɛ kɔdo. Hom mma yɛntwe mbɛn Agyenkwa no yie wɔ Ewuradze ne fie krɔnkrɔn mu, na Ɔntwe hɛn nkɔ Nyankopɔn na hɛnho nkorkor ho yie, ber a yɛdze Christsu ayamuhyehye, nokwar, na ehumbɔbɔr ka hɛn akoma bɔmu wɔ hɛn mbasantsen nyinara mu—wɔ mber na mfesantsen, enyigye na afebɔɔ mu. Jesus Christ mu no, ɔbɛyɛ yie, Jesus Christ mu no, ɔyɛ nokwar. Megye ho dase, wɔ Jesus Christ, Ne dzin krɔnkrɔn no mu, amen.