Fa Akokodur bɔ Nokwar no Dawur

Afe 1982 mu, nna morobowie m’adzesũa ama meenya abawdobɔ wɔ topography mu wɔ nsaano dwuma sũae skuul mu.

Afe n’ewiei no, esũafo kuw mu kor bi frɛɛ me dɛ yenkedzi nkɔmbɔ. Mekaa dɛ yegyaa esũafo kuw nkaafo no hɔ na yɛkɔr beebi a ɔbɛn agor prama no do. Ber a yedur hɔ no, ɔkãa ne nyamesom gyedzi ho asɛm kyerɛɛ me, na nnyɛ buukuu bi nko na ɔdze kyerɛɛ me, mbom ɔdze buukuu no maa me. Nokwar, mennkaa nsɛm a ɔkãe no nyina, naaso mekaa dɛm mber no papaapa na nkã-tse a menyae ber a ɔkãa dɛ, “mepɛ dɛ megye me dasee kyerɛ wo dɛ nwoma yi yɛ nokwar, na dɛ wɔdze Jesus Christ n’asɛmpa no asan ananmu aba.’’

Yedzii nkɔmbɔ wiei no, mokɔɔr fie, buebuei nwoma no ne nkratafa kakra, na medze too adze bi do. Osiandɛ nna yɛwɔ afe n’ewiei ntsi, na nna ɔyɛ me topography n’afe a odzi ewiei abawdobɔ ntsi no, mannkyɛn m’aso amma nwoma no yie, anaa m’adzesũa kuwba a nna ɔnye me akyɛ no. Hom etum adwen nwoma no ne dzin ho dada. Nyew, nna ɔyɛ Mormon Nwoma no.

Abosoom enum ekyir no, asɛmpasomafo no baa me fie, nna worifi hɔ ber noara a nna mifi edwuma mu reba fie no. Mefrɛɛ hɔn baa mu. Yɛtsena ase wɔ abrandaa kakraba wɔ me fie n’enyim, na wɔkyerɛkyerɛɛ me.

Morohwehwɛ nokwar no, mibisaa hɔn asɔr a ɔyɛ nokwar na mbrɛ mibesi botum ehu. Asɛmpasomafo no kyerɛkyerɛɛ me dɛ mankasa mubotum enya nyiano no. Medze enyidado na ɔpɛ kɛse no, megyee hɔn tafɛrbanyinmbɔmu no too mu dɛ mebɛkenkan etsir beberee efi Mormon Nwoma no mu. Medze nokwar akoma na mepra m’akoma mu bɔɔ mpaa (hwɛ Moroni 10:4–5). Nna m’asɛmbisa ne nyiano yɛ pefee, na nda pii ekyir no—Esusɔw Aketseaba 1,1983—da pɔkyee no, wonumaa me na wosii me pi dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrba.

Ndɛ, sɛ modwendwen dza ɔtoatoa do sisii no ho a, muhu no pefee mbrɛ nna m’adzesũa kuwnyi no n’akokodur ho hia si tse ber a ɔgyee ne dasee wɔ nokwar a wɔdze asan ananmu aba no ho na ɔdze Jesus Christ n’asɛmpa ne Nsanananmu ho nokwar dase, mpo Mormon Nwoma no maa me. Dɛm nyɛe a ɔnnyɛ dzen, naaso ɔyɛ adze tsistir a no mu dɔ ma me no, siesie ɔdze nkitsahodzi bi aba emi na asɛmpasomafo no ntamu mber a mihyiaa hɔn.

Wɔdze nokwar no ama me, na m’enuma ekyir no, mebɛyɛɛ Jesus Christ n’osuanyi. Mfe a nna ɔtoatoa do no, na nyimpa etsitsir ankasa tse dɛ baanodzifo, akyerɛkyerɛfo, anyɛnkofo, hɔn mboa na ɔnam marankasa m’adzesũa so do no, musũae dɛ sɛ meyɛ m’adwen dɛ mebɛyɛ Jesus Christ n’osuanyi a, nna menngye edwuma no nko dɛ mobɔbɔ nokwar ho ban, mbom mebɛpaa mu so akã.

Sɛ yɛpen do gye nokwar no dzi, yedzi do, na sɛ yɛbɔ mbɔdzen dɛ yɛbɛyɛ Jesus Christ n’esũafo nokwafo a, yɛnngye abɔdzin krataa a osi no tadua dɛ yɛnnkɔ fom, dɛ wɔnnkɔsɔ hɛn ahwɛ ma yeefi nokwar no ho, dɛ wɔnnkɛkasa nntsĩa hɛn, anaa mpo yennkenya atseetsee. Mbom nokwar no ho nyimdzee kyerɛkyerɛ hɛn dɛ sɛ yɛhɛn kwan a ɔtsen na heaheaba no mu a ɔdze hɛn bɛsan akɔ hɛn Ɔsor Egya ne n’enyim, aber nyina no yebenya kwan efi nsɛnhia yinom mu (hwɛ 1 Corinthfo 10:13); aber nyina no dɛ yɛbɛgye hɛn ekyingye ho kyim ansaana yɛagye hɛn gyedzi ho kyim no bɔwɔ hɔ (hwɛ Dieter F. Uchtdorf, “Come, Join with Us;’’ Liahona, Ɔberɛfɛw 2013, 21); na no koraa no, yɛwɔ nsiekyir bi dɛ sɛ yedua amandzehu mu a yɛnnkɛyɛ ankonam da osiandɛ Nyankopɔn sera No nkorɔfo wɔ hɔn amandzehu mu (hwɛ Mosiah 24:14,

Yeedzi kan esũa nokwar no, Ewuradze ma hɛn kwan dɛ yɛbɛyɛ dza Ɔno bɛyɛ sɛ nkyɛ Ɔwɔ ha ndɛ a. Nokwar, Ɔdze Ne nkyerɛkyerɛ kyerɛɛ hɛn dza otwar dɛ yɛyɛ: “Na hom nkɔ wɔ mo Sunsum no tum mu, nkɛkã m’asɛmpa no, beenu beenu, wɔ me dzin mu, hom mma hom ndze do tse dɛ totorobɛnto, mbɔ m’asɛm no dawur tse dɛ Nyankopɔn n’abɔfoe’’ (Nkyerɛkyerɛ na Ahyɛmudzi 42:6). Asɛmpasomafo som a hɛn mbabun nya ho kwan som no yɛ soronko!

Meserɛ, young men, mma hom nntu hom ahoboaboa a wɔdze bɔsom Ewuradze dɛ asɛmpasomafo no nnhyɛ da. Sɛ hom hyia gyinabew horow a ɔma adwenpɔwbɔ dɛ wɔbɔsom asɛmpakã no yɛ dzen a—tse dɛ obotwa hom adzesũa do mber kakra, enye wo nyɛnko basia bedzi nkra a taduasi biara nnka ho dɛ wɔbɔkɔ do ayɛ anyɛnkofo bio a, anaa mpo ibegyaa edwuma bi yɛ a—kaa Agyenkwa ne fasusu. No somdwuma ber mu no, Ɔno so hyiaa nkõdzen dɛmara, a kasatsĩa, ɔhaw, na ewiei no No werdam afɔrbɔ kuraba wenwen no. Naaso gyinabew horow nyina mu no, Ɔhwehwɛɛ dɛ ɔbɛyɛ N’Egya ne pɛ na Ɔdze enyimnyam ama No. (Hwɛ John 5:30; 6:38–39; 3 Nephi 11:11; Nkyerɛkyerɛ na Ahyɛmudzi 19:18–19.)

Young women, ɔyɛ ahomka papaapa, sɛ hom pɛ a, dɛ wɔbɛyɛ edwuma wɔ Ewuradze no wenyin ture no mu, na sɛ hom yɛ ahoboaboa a wɔbɔsom dɛ etuhoakyɛ asɛmpasomafo a, wonnkeyi hom efi ɔhaw kor noara mu.

Hom nyina a wɔyɛ adwen dɛ wɔbɔsom No no, mobɔ hom anohoba dɛ abosoom 24 anaa 18 som no botwa mu wɔ asɛmpakã mbew do dɛmara dɛ sɛ wɔtsena fie a wobotwa mu no, naaso akwanhorow a ɔwɔ hɔ rotweɔn Asɔr yi ne mberantsɛ na nkataasia a wodzi mu wɔ asɛmpakã mbew do no yɛ soronko. Ndzinoa dɛ Agyenkwa Jesus Christ, na N’Asɔr hɔn ananmusifo no, wonnkotum ebu enyiwa egu do. Edze woho rehyɛ mpaabɔ dodow mu, erenya na eregye wo dase mpɛn beberee wɔ da no mu, erusũa kyerɛwsɛm no dɔnhwer pii, na irihyia nkorɔfo a sɛ etsenaa fie a nkyɛ nnkohu hɔn da, yɛ sũahu a wonnkotum akã ho asɛm. Wɔdze sũahu ne pɛndo dɛmara esie ama mbabun a Ewuradze frɛ hɔn dɛ wɔnkɔsom wɔ ɔsom asɛmpakã dwuma. Ɔyɛ ahomka papaapa na ohia. Meserɛ, mma hom nntoto ɔsom asɛmpakã dwuma ase, osiandɛ ɔsom asɛmpakã dwuma no so ma sũahu horow a wonnkotum ato ne dzin. “Akra som bo kɛse wɔ Nyame enyim’’ (Nkyerɛkyerɛ na Ahyɛmudzi 18:10), a wo kra a ɔsom bo kã ho.

Hom fi hom ɔsom mu asan aba no, ebia na wo nyɛnko basia anaa nyɛnko banyin no anntweɔn wo, naaso nna esũa mbrɛ wosi kɛsera nkorɔfo yie ankasa. W’adzesũa bɔkɔ yie ara wɔ adzehwɛ a enya wɔ ahosiesie papa wɔ edwumayɛ mu, na koraa no, ebenya awerɛhyɛmu mapã dɛ akokodur mu ara ebɔɔ asomdwee asɛmpa no dawur, a egye nokwar a wɔdze asan ananmu no ho dase.

Hɔn a wɔawar na wɔwɔ hom abrabɔ ne gyinabew ahorow mu no, hom ho hia papaapa wɔ Ewuradze n’edwuma mu. Hom nyɛ ahoboa. Hom mbɔ apɔwmudzen bra, hom nhwehwɛ honandua mu na sunsum mu ahodan, osiandɛ akwanhorow a wɔdze bɛyɛ dza Ewuradze bɛyɛ ama Ne mba no nnyɛ mfe kuw bi nko dze. Sũahu horow a ɔyɛ enyigye dodow a emi na me yer nyae wɔ mfe a ɔnnkyɛree mu no, fi ber a yɛnye awarfo soronko rosom, wɔ mbeambea soronko, na yɛrosom nkorɔfo etsitsir soronko papaapa mu.

Sũahu a menyae wɔ me topography abawdobɔ n’ewiei no kyerɛkyerɛɛ me dɛ aber nyina sɛ yɛbɔ nokwar no dawur a yɛbɔ ho ban na dɛ yɛrobɔ nokwar ho ban no yɛ adze a wɔnnse wo ana ayɛ. Onnyi dɛ wɔdze aperper kwan bɔ nokwar no ho ban mbom wɔdze nokwar enyi ka ma ɔdɔ, kyɛ, na yɛto nsa frɛ nkorɔfo a yɛregye nokwar ho dase akyerɛ hɔn, a yɛrodwendwen Ɔsor Egya dɔfo ne mba hɔn honandua mu na sunsum mu yieyɛ nko ho (hwɛ Mosiah 2:41).

Ɔbɛsɛ 2021 wiadze mfɛndzanan ehyiadzi mu no, President Russell M. Nelson, hɛn nkɔnhyɛnyi dɔfo, kyerɛkyerɛɛ dɛ dza binom dwen no a ɔbɔ ebira no, dza yɛfrɛ no papa na bɔn ankasa wɔ hɔ. Nokwar tɔɔtsen ampaara wɔ hɔ—onnyiewiei nokwar. (Hwɛ “Pure Truth, Pure Doctrine, and Pure Revelation,’’ Liahona, Ɔberɛfɛw 2021, 6).

Kyerɛwsɛm krɔnkrɔn no kyerɛkyerɛ hɛn dɛ, “Nokwar nye ndzɛmba a nkyɛ ɔwɔ hɔ, nye dza ɔwɔ hɔ seseiara, nye dza ɔbɛba no ho nyimdzee’’ (Nyerɛkyerɛ na Ahyɛmudzi 93:24).

Yɛwɔ nokwar no ho nyimdzee no mma yɛnnyɛ yie nnkyɛn nkaafo no, mbom ɔkyerɛkyerɛ hɛn dza otwar dɛ yɛyɛ ama yɛasan akɔ Nyankopɔn n’enyim.

Ber a ekɔ do enyimpi mu ara wɔ Christ mu na edze akokodur nnyɛ dɛ edze bɔbɔ nokwar no ho dawur nko mbom edze bɔbɔ bra no, ibenya awerɛkyekyer na asomdwee wɔ begyabegya ber a ebehyia wɔ nda yinom mu no.

Abrabɔ no nsɔhwɛ botum ahwe hɛn koraa, naaso hu dɛ sɛ yesie gyedzi wɔ Jesus Christ mu a, “[hɛn] amandzehu nnkɛkyɛr’’ (Nkyerɛkyerɛ na Ahyɛmudzi121:7) sɛ yɛhwɛ no mfesantsen ne ber mu a. Meserɛ, mma hom nhyɛ mber mma hom nkõdzen na nsɔhwɛ horow no bɔbɔ adze. Nya awerɛhyɛmu wɔ Ɔsor Egya mu na mma mmpa abaw, osiandɛ sɛ yɛpa abaw a, yennkohu mbrɛ hɛn akwantu n’ewiei besi bɛyɛ wɔ Nyankopɔn n’ahenman no mu da.

Suo nokwar no mu, a irusũa fi nokwar ne fibea horow.

• Kyerɛwsɛm no (hwɛ 2 Nephi 32:3).

• Nkɔnhyɛfo hɔn nsɛm (hwɛ Amos 3:7).

• Sunsum Krɔnkrɔn no (hwɛ John 16:13).

Megye dasegye wɔ Jesus Christ ho na dɛ iyi nye N’Asɔr. Yɛwɔ nkɔnhyɛnyi tseasefo, na aber nyina sɛ yɛdze akokodur bɔ asɛmpa no dawur a yebenya ahotɔ. Jesus Christ ne dzin mu, amen.