Nyiano no Nye Jesus

Ɔyɛ me enyidzi dɛ mekasa kyerɛ hom wɔ nhyiamu yi ase. Ndɛ mekasa kyerɛ hom dɛ anyɛnkofo. John n’Asɛmpa mu no, Agyenkwa no kyerɛkyerɛɛ dɛ yɛyɛ N’anyɛnkofo sɛ yɛyɛ dza Ɔse hɛn dɛ yɛnyɛ no a.¹

Ɔyɛ hɛn ankorankor na yɛbɔ mu hɛn dɔ ma Agyenkwa no, na yɛnye No hɛn ahyɛmudzi horow no, na ɔkyekyer hɛn bɔ mu. Dɛ mbrɛ President Henry B. Erying kyerɛkyerɛe no: “Mepɛ dɛ mekã kyerɛɛ hom mbrɛ Ewuradze si dɔ hom dodow na Ɔwɔ awerɛhyɛmu wɔ hom mu. Na, mpo bio no, mepɛ dɛ mekã kyerɛ hom mbrɛ N’enyi si da hom do dodow .’’²

Mber a President Russell M. Nelson frɛɛ me dɛ Wiadze Mfɛndzanan Tumdzifo no, isũ kitsaa me dodow. Ɔtɔɔ mo do. Emi na me yer, Julie dze ayɛmuhyehye tweɔɔn wiadze mfɛndzanan ehyiadzi Memenda ewiaber nhyiamu no. Nna ɔyɛ awɔse dɛ wɔbɛma wo tsipia. Ahwɛyie mu ara mitsiatsiaa akwer no do kɛtsena egua a wɔdze ama me no do amma mammbɔ famu wɔ m’edwuma a odzi kan no.

Dɛm nhyiamu n’ewiei no, biribi sii a onyaa tum nhyɛdo wɔ mo do kɛse noara. Quorum mba no nyina toow santsen na wokyiaa Wiadze Mfɛndzanan Etumdzifo afoforfo no nkorkor. Hɔn mu kor biara kyerɛɛ no dɔ na abamba. Wɔdze enyigye tuu fuae no wɔkãa dɛ, “Mma nnhaw —ikã ho.’’

Yɛnye Agyenkwa nkitahodzi no, Ɔhwɛ akoma mu na ɔnnhwɛ nyimpa enyim.³ Hwɛ mbrɛ Osii frɛɛ N’Asomafo. Wɔannhwɛ hɔn gyinabew anaa hɔn sika. Ɔto nsa afrɛ hɛn dɛ yɛnkã No do, na migyedzi dɛ Ɔma hɛn awerɛhyɛmu dɛ yɛnye No ka ho.

Asɛm yi tsitsir ara fa Asɔr mu mbabun hɔn ho. Muhu dza President Nelson hu wɔ hom mu. Ɔkãa dɛ “biribi tsitsir a ekyingye biara nnyi ho wɔ mbasantsen mbabun yi ho. Nna hom Ɔsor Egya wɔ awerɛhyɛmu kɛse wɔ hom mu ma ɔdze hom baa asaase do dɛm mber yi. Wɔwoo hom maa kɛseyɛ!’’⁴

Dza musũa fi mbabun hɔ no yɛ me enyisɔ. M’enyi sɔ dza me mba kyerɛkyerɛ me, dza hɛn asɛmpasomafo kyerɛkyerɛ me, na dza mo wɔfasefo kyerɛkyerɛ me.

Ɔnnkyɛree, na nna menye m’awɔfase Nash reyɛ edwuma wɔ hɛn haban mu. Oedzi mfe esia na ɔwɔ akoma a mu tsew. Ɔyɛ m’awɔfase a mepɛ n’asɛm a ne dzin dze Nash, na megyedzi dɛ me yɛ ne wɔfa a ɔpɛ n’asɛm a ɔrekasa ndɛ wɔ ehyiadzi ase.

Ber a ɔboaa me ma menyaa hɛn dwumadzi ne nyiano no, mekãa dɛ, “Nash, dɛm no yɛ adwenkyerɛ soronko. Isi dɛn na aben dɛm? Ɔhwɛɛ me a ɔdze n’enyiwa rekã dɛ, “Wɔfa Ryan, ɔyɛ dɛn na nnyim asɛmbisa yi ne nyiano?’’

Ɔmaa n’abatsir do bɔkɔɔ, yerɛɛw n’ano, na ɔkãa no awerɛhyɛmu ara mu dɛ, “Jesus.’’

Dɛm da no, Nash kaa me nkyerɛkyerɛ a ɔda famu koraa naaso no mu dɔ ara yie. Nsɛmbisa a ɔyɛ mberɛw koraa na nsɛnhia a ɔyɛ huhuhu dodow no hɔn nyiano yɛ dɛmara aber nyina. Nyiano no nye Jesus. Wonya nyiano biara wɔ No mu.

John n’Asɛmpa mu no, Agyenkwa no kãa kyerɛɛ N’Asomafo no dɛ Obesiesie beebi ama hɔn. Thomas yɛɛ basaa na ɔsee Agyenkwa dɛ:

“Ewuradze, yennyim mbrɛ erokɔ; na yɛbɛyɛ dɛn ehu kwan no?

“Jesus see no dɛ, Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do.”⁵

Agyenkwa no kyerɛkyerɛɛ n’esuafo no dɛ Ɔno nye ɔkwan no, nye nokwar no, nye nkwa no. Ɔno nye mbrɛ yebesi bɛba Ɔsor Egya hɔ asɛmbisa no Ne nyiano no. Yɛrenya N’asodzi krɔnkrɔn ho dase wɔ hɛn abrabɔ mu no yɛ adze a musũae ber a meyɛ aberantsɛba no.

Mber a nna morosom dɛ asɛmpasomafo wɔ Argentina no, President Howard W. Hunter too nsa frɛɛ hɛn dɛ yɛnyɛ biribi a onyaa tum nhyɛdo nsunsuando wɔ m’abrabɔ do. Ɔkãa dɛ: “Otwar dɛ yehu Christ yie sen ma yenyim No; otwar dɛ yɛtaa kaa No yie sen ma yɛkaa No; otwar dɛ yɛsom no enyimpi mu yie sen ma yɛsom No.’’⁶

Dɛm aber no, nna m’ehiadze ayɛ mbrɛ mibesi bɛyɛ asɛmpasomafo papa. Nna iyi nye nyiano no: nye dɛ mubohu Christ, mebɛkaa No, na maasom No. Asɛmpasomafo a wɔwɔ wiadze mfɛndzanan nyina yɛ kor wɔ botae yi mu: “dɛ wɔto nsa frɛ binom ma wɔba Christ hɔ ber a wɔroboa hɔn ma woedua gyedzi wɔ No mu na No Werdambɔ no mu’’ na woedua “nnuhu, enuma, na wɔregye Sunsum Krɔnkrɔn n’akyɛdze na wɔrosɔw akɔ ewiei do, agye asɛmpa a wɔdze asanananmu no.”⁷ Hɛn anyɛnkofo a woritsie asɛmpasomafo no, medze me nsato kã ho dɛ wɔmbra Christ hɔ. Yɛbɔ mu a yɛbɛper dɛ yɛbohu No, yɛbɛkaa No, na yɛasom No.

Morosom asɛmpakã yɛɛ m’abrabɔ mu mber krɔnkrɔn. Me kokoa mu mpɛnsapɛnsamu a odzi ewiei a ɔnye me yɛɛ dɛ meyɛ etuhoakyɛ asɛmpasomafo no, President Blair Pincock kãa nsesa a nna ɔreba wɔ asɛmpasomafo baanodzifo no hɔn do ho asɛm, ber a nna ɔnye ne yer so rebɛn hɔn ɔsom n’ewiei. Nna ɔyɛ hɛn beenu no yaw dɛ yerebegya biribi a yɛapɛ no dodoodow. Otumii hun dɛ nna ho adwendwen haw me dɛ mennkɛyɛ etuhoakyɛ asɛmpasomafo. Nna ɔyɛ ɔbarimba a ne gyedzi sõ na ɔdɔ mu ara ɔkyerɛkyerɛɛ me dɛ mbrɛ ɔyɛɛ no dada mfe ebien no. Ɔkyerɛɛ Jesus Christ no mfonyin a nna osi no pon ne tsir no na ɔkãa dɛ, “Elder Olsen, ne nyinara bɛyɛ yie osiandɛ ɔyɛ N’edwuma.’’ Mesanee nyaa awerɛhyɛmu a minyim dɛ Agyenkwa no bɔboa hɛn, nnyɛ dɛ ber a nna yɛrosom mbom aber nyina, sɛ yɛma No kwan a.

Akyerɛbaa Pincock dze Spainfo kasa nsɛnsin a ɔyɛ mberɛw fi n’akoma bun mu kyerɛkyerɛɛ hɛn. Mber a ɔkã dɛ, “Jesucisto vive,’’ a nna minyim dɛ ɔyɛ nokwar na Ɔtsenaa ase. Mber a ɔkã dɛ, “Elderes y hermanas, les amo,’’ a nna minyim dɛ ɔdɔ hɛn na ɔpɛ dɛ yɛkã Agyenkwa no do aber nyina.

Ɔnnkyɛree na ɔyɛɛ nhyira maa emi na me yer ma yɛsom dɛ asɛmpakã baanodzifo a yɛnye asɛmpasomafo nwanwafo yɛɛ edwuma wɔ Uruguay. Mebɛkã dɛ nna iyinom yɛ asɛmpasomafo apapa dodoodow wɔ wiadze mu na mowɔ awerɛhyɛmu dɛ asɛmpakã baanodzinyi biara tse dɛm nkã no. Esuafo yinom kyerɛkyerɛɛ hɛn da biara fa yɛbɛka Agyenkwa no do ho asɛm.

Kokoa mu mpɛnsapɛnsamu a yɛtaa yɛ mber mu no, hɛn nkyerɛbaa asɛmpasomafo anwanwafo no kor baa hɛn ɔfese. Nna ɔyɛ asɛmpasomafo a ne biribiara rokɔ do yie, kyerɛkyerɛnyi mapã, na banodzinyi a ɔsom yie. Nna n’anyɛnkofo hwɛ no na nkorɔfo pɛ n’asɛm. Nna ɔyɛ setsie, ahobrɛadze, na ɔwɔ awerɛhyɛmu. Hɛn nkɔmbɔdzi dada no tsimii wɔ n’apaamu na nkorɔfo a nna ɔrekyerɛkyerɛ hɔn adze no do. Nna nkɔmbɔdzi yi yɛ soronko. Ber a mibisaa no ma ndzɛmba tse no, muhunii dɛ nna ɔtseetsee. Ɔkãa dɛ, “President Olsen, minnyim sɛ mubotum ayɛ iyi a. Minnyim sɛ mebɛyɛ biribi papa da. Minnyim sɛ mubotum ayɛ asɛmpasomafo no a Ewuradze hia me dɛ mebɛyɛ no a.’’

Nna ɔyɛ asɛmpasomafo nwanwanyi. Mbordo koraa wɔ kwan biara mu. Asɛmpakã president n’adaaso. Nna minnya haw wɔ n’ahom ho dɛ asɛmpasomafo da.

Ber a metsiei no no, midzii aper wɔ dza mennkã ho. Mobɔɔ mpaa kommyɛ mu dɛ: “Ɔsor Egya, iyi yɛ asɛmpasomafo soronko. Ɔyɛ Wo dze. Ɔreyɛ biribiara a ɔtsen. Memmpɛ dɛ mekã dza ɔnnyɛ. Meserɛ boa me ma munhu dza menkã

Nsɛm no baa mo hɔ. Mekãa dɛ, “Hermana, Ɔyɛ me awerɛhow dɛ ewɔ tsebea yi mu. Ma me mbisa wo asɛm bi. Sɛ ewɔ nyɛnko bi a erekyerɛkyerɛ no na ɔwɔ tsebea yi mu a, ebɛn asɛm na ebɛkã?’’

Ɔhwɛɛ me na ɔyerɛɛw n’ano. Ɔdze dɛm asɛmpasomafo sunsum na enyimia a mfom nnyi ho no, kãa dɛ, “President ɔnnyɛ dzen. Mebɛkã akyerɛ no dɛ Agyenkwa no nyim no yie papaapa. Mebɛkã akyerɛ no dɛ Ɔtse ase. Ɔdɔ no. Nntɔ sin wɔ biribiara mu, na ewɔ iyi!’’

Ɔserew kakra no ɔkãa dɛ, “Mususu dɛ sɛ iyi fa hɛn nyɛnko no ho a, nna ɔfa emi so mo ho.’’

Sɛ yɛwɔ nsɛmbisa anaa ekyingye a, ebia yɛbɛtse dɛ hɔn nyiano no yɛ huhuuhu dodow anaa yɛrohwehwɛ nyiano no yɛ huanyan. Hom ma yɛnkaa dɛ ɔsɛɛfo no, mpo ator nyina egya no, nye huanyan no ɔwenfo.⁸

Agyenkwa no nye dza ɔnnyɛ kyinkyinɛnn Owura.

President Nelson akã dɛ:

“Ɔsɛɛfo no aben papa. Mfe mpempem mu no ɔma papa yɛ dɛ bɔn na bɔn yɛ dɛ papa. Ne nsɛm taa yɛ dede, abran mu, na ahopɔw mu.

Mbom, ɔson nsɛm a ofi hɛn Ɔsor Egya hɔ ba no koraa. Odzi nkitaho kommyɛ na pefee mu a ɔnnyɛ kyinkyenɛnn ama yeetum aatse No ase.’’⁹

Mbrɛ hɛn enyi si sɔ dɛ Nyankopɔn dɔɔ hɛn ma Ɔsomaa Ne Ba No. Ɔno nye nyiano no.

Ɔnnkyɛree na President Nelson kãa dɛ:

“Jesus Christ asɛmpa ekehia ndɛ kyɛn mber biara. …

“… Iyi kyerɛ Ewuradze ahyɛdze a Ɔdze maa N’esuafo no ho hia ohia dɛ yedzi do “Hom nkɔ … wiadze nyina mu nkɛkã asɛmpa no nkyerɛ abɔdze nyina.’’¹⁰

Hɔn a wɔbɛsan mu eyi dɛ wɔbɔsom no, mutum gye nhyira a ɔbɛba ber a hom gye nkɔnhyɛnyi no ɔfrɛ do ho dase. Erosom mmfa ɔwo wo ho, ɔfa Agyenkwa no ho. Wɔbɛfrɛ hom akɔ bea bi, mbom ma ohia dodow no wɔbɛfrɛ hom ama nkorɔfo bi. Hom benya asodzi a ɔsõ na nhyira dɛ wɔroboa anyɛnkofo afofor ma wɔatse ase dɛ nyiano no nye Jesus.

Iyi nye Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo, na ha nye bea a yɛka ho. Biribiara a President Nelson hyɛ hɛn ho nkuran ɔdɔ mu ara dɛ yɛnyɛ no, begya hɛn akɔ Agyenkwa ne nkyɛ ara yie.

Hɛn mbabun afɛɛfɛw—a m’awɔfaase Nash kã ho—hom abrabɔ nyina mu no, ɔmmfa ho mbrɛ nsɔhwɛ ne dzen anaa basabasayɛ a ɔbɛyɛ no, hom botum akaa dɛ nyiano no yɛ mberɛw: ɔno nye Jesus aber nyina.

Ber a maatse dza hɔn a yɛma hɔn tsipia dɛ nkɔnhyɛfo, adzehufo, na nyikyerɛfo kã no mber pii no, me so mekã dɛ yɛdɔ hom, yɛda hom ase, na yehia hom. Ha nye bea a hom kã ho.

Modɔ Agyenkwa no. Megye Ne dzin Jesus Christ, mpo ho dase. Midzi dase dɛ Ɔno nye “hɛn gyedzi ne dzikamfo nye no wiefo,’’¹¹ na Ɔno nye dza ɔnnyɛ kyinkyinɛnn Owura. Nyiano no nye Jesus. Jesus Christ ne dzin mu, amen.