Erekyekyer Abrabɔ a Abɔnsam Nntum Nndzi Do

Mfe a abasen mu no yɛagye afotu nwanwason, nkenyan, nkyerɛkyerɛ, na nyikyerɛ efi dɛm asɛnkãdaka fɛɛfɛw yi wɔ Ehyiadzi Asoɛe ha. Ɔtɔfabi a, hɔn a wɔkasa no dze mfatoho a ɔfa hɔn nyimdzee na sũahu ho dze kyerɛkyerɛ Jesus Christ asɛmpa nkyerɛkyerɛ no bi mu pefee na wɔ tum mu.

Mfatoho, wɔ kwan yi do, yeesũa afa wimuhɛn na wimu akwantu ho a, mmanee kumabaa fi ahyɛse no botum dze hɛn ekopue beebi ekyirekyir koraa efi bea ankasa a nkyɛ yɛrokɔ no.¹ Bio, wɔ kwan yi do, yeesũa fi hɛn honamu akoma no dwumadzi ho a yɛdze toto tum mu akoma nsakyeree a ohia ma yɛdze agye Ewuradze ne nsato dɛ yendzi N’ekyir.²

Mber yi, mebɛpɛ dɛ ahobrɛadze mu ara medze ntõtõho kor kã ho a ɔfa bea kor wɔ m’edwuma m’awea ho. Mekyerɛ civil engineering nsɛm. Fi m’adzesũa ahyɛse wɔ sũapɔn mu, modween da no ho a mobowie dza ohia nyina a obegya me ma medzi mu dɛ mokɔ adzesũa a ɔbɛkyerɛ me mbrɛ wosi hyehyɛ adan na nsisii binom a wobotum nkyii wɔayɛ dza otum “gyina asaase wosow ano.”

Ekyir yi da no sõe ma mokɔr adzesũa a odzi kan wɔ dɛm asɛm yi ho. Ɔbemfo no ne nsɛm a odzii kan nye yi: “Hom wɔ ahokekã ampaara dɛ hom bɛhyɛ dɛm adzesũa yi ase na hom esũa mbrɛ wosi hyehyɛ adan a wotum gyina asaase wosow ano,” a hɛn mu pii bɔɔ hɛn tsir adze wɔ ho ahomkã mu ara. Nkyii ɔbemfo no kãa dɛ, “Ɔyɛ me yaw dɛ mebɛkã akyerɛ hom dɛ iyi nnkɛyɛ yie, osiandɛ munnkotum akyerɛ hom mbrɛ wosi hyehyɛ dan a otsia anaa osiw, asaasewosow kwan. Ɔkãa dɛ nyansa biara nnyi mu osiandɛ asaase wosow bɔkɔ do esi, sɛ yɛpɛ o anaa yɛmmpɛ.”

Nkyii ɔsɔɔw do dɛ, “Dza mobotum akyerɛ hom nye mbrɛ wosi hyehyɛ nsisii horow a wotum gyina asaase wosow tum ano, ama dan no akɔ do egyina a ɔsɛɛ kɛse biara nnkã no na oetum akɔ do edzi dwuma a ɔnam do ma wosii no.”

Mfir ho nyimdzefo no yɛ nkotaabu horow a ɔkyerɛ nsusui, su, na mbrɛ fapem no, edum, mpuna horow, aboban, na nsisii ndzɛmba horow a wɔrehyehyɛ no bɛyɛ. Dɛm nkontaabu yi wɔdan no kɔ nhyehyɛɛ na nyimdzee nhyehyɛɛ pɔkyee mu a, ɔwɔ dɛ dansinyi no dzi do ketsee ama dwuma no eedzi mu na ɔaahyɛ botae a wɔdze hyehyɛe na wɔdze sii no no mã.

Mfe eduanan na no mboree etwa mu ber a mokɔr dɛm adzesũa a odzi kan wɔ asaase wosow ngyina ano adansidwuma ho dze, naaso mekaa no pefee mu ara ber a mehyɛɛ ase nyaa ntseasee a no mu dɔ, na odzi mu yie wɔ hia kɛse a ohia dɛ dɛm adzesũadze yi bɔwɔ adan a mibesisi mu wɔ me ndaamba edwumayɛ abrabɔ mu. Nnyɛ ɔno nko, mbom ohia kɛse mpo—dɛ ɔbɔkɔ do etsim wɔ m’abrabɔ ne mãhyɛ mu nna wɔ hɔn a mubotum enya nhyɛdo pa wɔ hɔn do so mu.

Mbrɛ woesi ehyira hɛn dɛ yɛndan nyimdzee a ɔwɔ nkwagye ho nhyehyɛɛ a hɛn Ɔsor Egya yɛe ho, dɛ yɛwɔ Jesus Christ asɛmpa nsanananmu no, na dɛ yɛtwer nkɔnhyɛfo atseasefo hɔn nkenyan akwankyerɛ! Dza maakã no nyina bɔ mu yɛ ɔsor “nhyehyɛɛ” na “nyimdzee nhyehyɛɛ pɔkyee” a ɔkyerɛ hɛn pefee mu ara mbrɛ yɛbɛkyekyer enyigye abrabɔ—abrabɔ a bɔn nntum nndzi do, nsɔhwɛ nntum nndzi do, ogyina dza Satan tow hyɛ hɛn do no ano, a ɔreper ara rohwehwɛ dɛ ɔbɛsɛɛ hɛn onnyiewiei nkrabea dɛ yɛnye hɛn Ɔsor Egya na hɛn ebusuafo adɔfo atsena.

Agyenkwa Noara, wɔ No somdwuma ahyɛse no, “wogyaa no ma abɔnsam sɔ no hwɛe.”³ Eso Jesus puei konyimdzi mu fi dɛm nsɔhwɛ kɛse no mu. No su dɛ Satan nntum nndzi No do anaa nsɔhwɛ nntum nndzi No do si dɛn boa No? Dza ɔma Jesus dzii konyim wɔ mber dzendzen yinom mu no yɛ No sunsum mu ahoboa, a ɔma kwan dze no si tsebew bi mu a ɔsɛɛfo no no nsɔhwɛ nntum nndzi No do.

Ebɛn ndzɛmba binom na ɔboaa Agyenkwa no ma Ɔyɛɛ krado ma dɛm mber dzendzen no?

Odzi kan, nna Oedzi mbuada adaduanan adzekyee nye adzesaa, mbuada a otwar dɛ mpaabɔ aber nyina kã ho. Ntsi, nna honandua mu dze Ɔayɛ mbrɛw, eso nna No sunsum yɛ dzen papaapa. Wommbisa hɛn dɛ yɛnyɛ akɔnkye mber tsentsen dɛm dze—mbom ndɔnhwer 24 ara da kor wɔ bosoom mu—akɔnkye brɛ hɛn sunsum mu ahoɔdzen na osiesie hɛn ma yegyina abrabɔ yi mu nsɔhwɛ ano.

Ɔtɔ do ebien, nsɔhwɛ a Agyenkwa no kɔr mu nsɛm mu no, yehu dɛ daa Ɔma Satan nyiano a kyerɛwsɛm no wɔ N’adwen mu, a Ɔserɛ kã na Ɔdze dzi dwuma wɔ mber pa mu.

Ber a Satan sɔɔ No hwɛe dɛ Ɔndan abo nyɛ paanoo ama Ɔdze asa No kɔm wɔ N’akɔnkye mber tsentsen ho no, Ewuradze see no dɛ, “Wɔakyerɛw dɛ, Nnyɛ paanoo nko bi na nyimpa nam do bɛtsena ase, na asɛm biara a ofi Nyankopɔn anomu so.”⁴ Nkyii, ber a Ewuradze gyina asɔrfi ne bea-sorɔnsorɔm no do no, abɔnsam bɔɔ mbɔdzen dɛ ɔbɔsɔ No ahwɛ ma Ɔakyerɛ No tum, a Ewuradze maa ho mbuae wɔ tumdzi mu, “Wɔakyerɛw bio dɛ, Mma nnsɔ Ewuradze wo Nyankopɔn nnhwɛ.”⁵ Na Satan no mbɔdzembɔ a otsĩa ebiasa no, Ewuradze buaa dɛ, “Wɔakyerɛw dɛ, Sɔr Ewuradze wo Nyankopɔn, na no nko na som no.”⁶

Asaase wosow a ogya ne nkẽkaa wɔ adan a wɔhyehyɛɛ na wosii no yie mpo ho—nsunsuando bi tse dɛ mpaapaae bi, ndua edwindze anaa dza ɔkata dan sor a wɔabɔhwehwe famu, na ntokura a ebubu, na ma ɔkekã ho. Naaso dɛm dan a wɔahyehyɛ no yie na woesi no yie no bɛhyɛ no botae dɛ ɔbɔ hɔn a wɔwɔ mu no ho ban mã, na wosiesie no kakra ara a, ɔsan gyina n’ananmu.

Dɛm ara so, ɔsɛɛfo no n’ekutukubɔ botum ama “mpaapaae,” anaa ɔsɛɛ kakra aba hɛn abrabɔ mu, mpo wɔ hɛn mbɔdzembɔ dɛ yɛrekyekyer hɛn abrabɔ wɔ ɔsor nhyehyɛɛ a odzi mu do. “Mpaapaae” horow no botum ada hɔnho edzi ber a yenya awerɛhow anaa mfehoekyir atsenkã wɔ mfom bi a yɛayɛ ho nna dɛ yɛannyɛ biribiara emudzi mu, anaa yenya atsenkã dɛ yɛnnyɛ papa dɛ nkyɛ yɛpɛ dɛ yɛyɛ no.

Mbom dza ohia nokwar mu ara nye dɛ yeedzi nhyehyɛɛ krɔnkrɔn no do, a ɔyɛ Jesus Christ asɛmpa no do, yɛda ho gyina tsentsen. Dza hɛn abrabɔ gyinaa do no mmbubui ɔnam ɔsɛɛfo no mbɔdzembɔ do anaa ɔnam tsebew dzendzen binom a yeeyhia; mbom, yɛayɛ krado dɛ yɛbɔkɔ kan.

Enyigye anohoba a wɔdze abɔ hɛn wɔ kyerɛwsɛm no mu dɛ ɔyɛ hɛn asetsena ne siantsir⁷ no nnkyerɛ dɛ yennkenya ɔhaw anaa awerɛhow, dɛ yennkenya “mpaapaae” biara ɔnam nsɔhwɛ, abɛbrɛsɛ, anaa ɔnam hɛn ɔbra sar yi do akotorka ankasa.

Dɛm enyigye yi fa Nephi no nhumu wɔ abrabɔ ho ber a ɔkãa dɛ: “Muhun amandze pii wɔ mo nkwa nda mu, naaso minyaa enyimnyam kɛse wɔ Ewuradze enyim wɔ me nda nyinara mu.”⁸ Ne nda nyinara mu! Mpo wɔ nda a Nephi hun amandze ber a ɔnoara no nuanom ennya ntseasee na wɔpoow no, mpo ber a wɔkyekyeer no wɔ nsu-hɛn no mu, mpo da no a n’egya, Lehi, fii mu, mpo ber a Laman na Lemuel bɛyɛɛ atamfo yerɛyerɛw tsiaa no nkorɔfo no. Dɛm nkõdzen nda no mu mpo, Nephi tsee nkã dɛ oenya enyimnyam kɛse wɔ Ewuradze enyim.

Yebotum enya asomdwee ber a yenyim dɛ Ewuradze remma kwan ma yennya nsɔhwɛ a ɔbor dza yebotum egyina no. Alma to nsa frɛ hɛn dɛ “[yɛ]nweɔn na [yɛ]mbɔ mpaa aber nyina, amma [hɛn] nsɔhwɛ ammbor dza [hɛn] ahom botum asɔw, ama Sunsum Krɔnkrɔn no agye [hɛn] ma [yɛ]ayɛ ahobrɛadze, ɔdwe, setsie, abotar, ɔdɔ na penkyɛr ahyɛ [hɛn] mã.”⁹

Yebotum dze dɛm ara atoto abrabɔ mu nsɔhwɛ ho. Ammon kaakaa hɛn Ewuradze ne nsɛm: “Hom nkɔ … na hom mfa abotar nsɔw hom amandzehu, na mebɛma hom konyimdzi.”¹⁰

Aber biara a Ewuradze ma hɛn mboa ber a yehyia abɛbrɛsɛ, nsɔhwɛ, ntseasee nnyi hɔ, yarba, na owu mpo. Ɔaka dɛ, “Na afei, nokwar, mese hom dɛ, dza mekã kyerɛ kor no, mekã kyerɛ hom nyinara, mo mbofra nkakraba, hom mma hom enyi ngye; osiandɛ mowɔ hom finimfin, na mommpoow hom.”¹¹ Orinngyaa hɛn ekyir dzi da!

Mobɔ mpaa dɛ yɛbɔkɔ do akyekyer hɛn abrabɔ ber a yeridzi nhyehyɛɛ na nyimdzee ahyɛdze pɔkyee a ɔyɛ nhyehyɛɛ krɔnkrɔn a hɛn Egya yɛe do na ɔba mu ɔnam hɛn Agyenkwa, Jesus Christ do. Ntsi, ɔnam adom a yenya a odua hɛn Agyenkwa no Werdambɔ do no, yebedzi konyim dɛ yɛrekyekyer abrabɔ a bɔn nntum nndzi do, nsɔhwɛ nntum nndzi do, na yenya dzenhyɛ dze asɔw awerɛhow, ɔhaw mber wɔ hɛn abrabɔ mu. Na bio, yebegyina gyinabew a yebenya nhyira horow a wɔabɔ ho anohoba a ɔnam hɛn Egya na hɛn Agyenkwa hɔn dɔ do. Jesus Christ ne dzin mu, amen.