Yɛnam No mu Botum Ayɛ Ndzɛmba a Ɔyɛ Dzen

Agyenkwa no n’asaase somdwuma mu no, Ohun ɔbarimba bi a nna ɔyɛ onyifuranyi. Jesus n’esuafo bisaa dɛ, “Kyerɛkyerɛnyi, woana na ɔyɛɛ bɔn, nyimpa yi n’awofo a, dɛ wɔwoo no onyifurafo?”

Agyenkwa no nokwar, ɔdɔ, nyiano a osi pi no ma hɛn awerɛhyɛmu dɛ Ɔdwen hɛn aperdzi ho: “Nnyɛ nyimpa yi na ɔyɛɛ bɔn, eso nnyɛ n’awofo a: na mbrɛ Nyankopɔn ndwuma bɛda edzi wɔ no mu ntsi a.”¹

Ber a nsɔhwɛ bi bɛba osian hɛn asoadzen a yɛgye enyim yɛyɛ no ntsi, yenyim dɛ abrabɔ no nsɔhwɛ beberee so ba osian siantsir ahorow bi so ntsi. Fibea biara a hɛn nsɔhwɛ fi ba no, wobotum ayɛ kwan tsitsir bi a yɛdze benyin.

Wonngyaa hɛn ebusua mmfi abrabɔ n’abɛbrɛsɛ horow mu. Mirinyin no, nna menyiwa gye ebusua akɛse ho. Nna ebusua ebusua a wɔtsetse dɛm no yɛ akɔndɔ ma me, tsitsir ara ber a ɔnam me maame ne nuabanyin, Sarfo, na ne yer do wɔ Takoradze, Ghana muhun Asɔr no wɔ me mbasirber mu.

Mber a emi na Hannah yɛwaree no, nna hɛn pɛ nye dɛ yɛbɛhyɛ hɛn patriarch nhyira no mã, a ɔkyerɛɛ dɛ wɔdze mba pii behyira hɛn. Naaso, ansaana hɛn babanyin a otsĩa ebiasa n’awoe no, ɔdaa edzi pefee dɛ Hannah nnkotum awo bio. Ndaase mu ara, kaansa Kenneth n’awoe ho yɛɛ dzen ma ɔnoara na ne maame dze, ɔbaa dwudwoodwo, na ne maame tsee apɔw. Otumii dze noho hyɛɛ hɛn ebusua abrabɔ mu— a nna Asɔr nkɔree, daa daa ebusua mpaabɔ, ebusua ewimbir fie nhyiamu, na enyika dwumadzi horow a odzi mu kã ho.

Nna ɔwɔ dɛ yɛyɛ nsesa hɛn enyidoadze wɔ ebusua kɛse ho dze, naaso nna ɔyɛ enyigye dɛ yɛdze nkyerɛkyerɛ no a ofi “Ebusua No: Dawurbɔ ma Wiadze’’ no robɔ bra. Yeridzi nkyerɛkyerɛ no do yɛɛ mfaso kɛse ma me gyedzi a orinyin.

Dɛ mbrɛ dawurbɔ no kã no: “Banyin na ɔbaa ntamu awar hia tsitsir ma Ne onnyiewiei nhyehyɛɛ. Mba fata dɛ wɔwo hɔn wɔ awar nhyehyɛɛ mu, na egya nye nã a wɔdze nokwardzi dzi awar nsew no do no, tsetse hɔn.’’² Ber a yɛdze fapem yinom bɔɔ bra no, wohyiraa hɛn.

Naaso, dapɛnda bi n’ewiei mo som ber mu dɛ stake president no, yenyaa ebia nsɔhwɛ a omuo koraa a awofo botum ehyia. Hɛn ebusua fii Asɔr dwumadzi baa fie na yɛboaa ano dzii ewiaber edziban. Nkyii hɛn mbanyimba baasa no kɔɔr hɛn paado wɔ fie hɔ kedzii agor.

Me yer nyaa nkenyan ntaataado dɛ biribi bɔn bi rokɔ do. Ɔserɛɛ me dɛ monkɔhwɛ mbofraba no ber a nna yɛrohohor nkyɛnse no mu. Nna minyim dɛ hwee rinnsi osiandɛ nna mutum tse hɔn enyigye ndze no fi hɔn agordzi mu.

Ewiei no ber a hɛn beenu no kɔhwɛɛ hɛn mbambanyin no, hɛn ahobow mu no, yehun hɛn abosoom 18 Kenneth dɛ ɔda bokitsi a nsu wɔ mu kegyaa, a no nuambanyin ennhu no. Yɛdze ahoɔhar nye no kɔɔr asopitsi, naaso hɛn mbɔdzembɔ biara dɛ ɔbɛba nkwa mu no ennkesi hwee.

Yaw kɛsenara kãa hɛn dɛ yennkotum enya kwan atsetse hɛn abofra a ɔsom bo wɔ ɔnnkyebo abrabɔ ber yi mu. Nna yenyim dɛ Kenneth bɛkã hɛn ebusua ho onnyiewiei mu dze, naaso muhun moho dɛ me ribisa Nyankopɔn siantisir a Ɔbɛma esian yi ato me ber a nna mereyɛ biribiara dɛ mubotum ama me ɔfrɛ ahyɛ mã. Nna mebaa fie ɔnnkyɛree a mokɔ soom Ahotseweefo no dze hyɛɛ me dwumadzi horow no kor mã. Ebɛnadze ntsi na Nyankopɔn enntum annhwɛ mo som na Ɔanngye hɛn babanyin na hɛn ebusua emmfi esian yi mu? Mber dodow a modwendween ho no, ayawdzi kɛse kãa me.

Me yer ammfa mfom annto modo dɛ menntsie ne nkenyan no, mbom musũaa adzesũadze bi a ɔsesaa m’abrabɔ na meyɛɛ mbra ebien, a munnkobu do dabiarada:

Mbra 1: Tsie na kyɛn asõ ma wo yer ne nkenyan.

Mbra 2: Sɛ siantsir biara adwen mu yɛ konsee a, san kɔhwɛ mbra nkanee 1.

Kaansa sũahu no maa yɛyɛɛ basaa, na yɛkɔɔr do dzii awerɛhow dze, naaso ewiei no hɛn adzesoadze a ɔhyɛɛ hɛn do yɛɛ har.³ Menye me yer sũaa adzesũadze etsitsir fi hɛn ahwerdze no mu. Yɛbɔɔ mu bɛyɛ kor na hɛn temple ahyɛmudzi akyekyer hɛn no; yenyim dɛ yebotum enya Kenneth ma ɔayɛ hɛndze wɔ wiadze a ɔreba no mu osiandɛ wɔwoo no wɔ temple ahyɛmudzi mu. Yɛsanee so nyaa sũahu a ohia ma yɛdze asom binom na yɛatse hɔn yaw. Megye dase dɛ hɛn ayawdzi ahwetse fi dɛm ber no, ber a yeesie gyedzi wɔ Ewuradze mu. Hɛn sũahu kɔ do yɛ dzen, mbom yɛnye Ɔsomafo Paul esũa dɛ “yebotum ayɛ adze nyina wɔ Christ mu a [ɔhyɛ hɛn dzen]’’ sɛ yetsim wɔ No do a.⁴

President Russell M. Nelson kyerɛkyerɛɛ dɛ, “Sɛ yɛdze hɛn abrabɔ tsim Nyankopɔn no nkwagye ho nhyehyɛɛ … na Jesus Christ N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho.’’ Ɔkãa bio dɛ, “No mu na osian Ɔno ntsi na enyigye ba.’’⁵

Hɛn enyi botum agye, na asomdwee ahyɛ hɛn mã wɔ hɛn mber a ɔyɛ dzen mu. Ɔdɔ nkã a yɛtse osian Agyenkwa no na No Werdambɔ no ntsi ɔbɛyɛ tum mboa ma hɛn wɔ hɛn ɔhaw ber mu. “Dza ɔyɛ nsisi [na ɔyɛ dzen] nyina wɔ abrabɔ mu no ɔnam Jesus Christ no Werdambɔ no do obotum atsen.’’⁶ Ɔhyɛɛ dɛ, “Wiadze mu dze, hom wɔ ahohia: naaso hom nhyɛ dzen; medzi wiadze do konyim.’’⁷ Obotum aboa hɛn ma yɛasɔw yaw, yarba, na nsɔhwɛ biara a yehyia wɔ ɔnnkyebo mu no.

Yehu baanodzifo akɛse na enyimdzifo tse dɛ Jeremiah, Job, Joseph Smith, na Nephi, hɔnho nsɛm wɔ kyerɛwsɛm nsɛm pii mu, a ɔnnkyebo aperdzi na nsɔhwɛ enngyaa hɔn. Nna wɔyɛ nyimpa a woesũa dɛ wobetsie Ewuradze mpo wɔ gyinabew a ɔnngow mu.⁸

Liberty Jail da mber huhuuhu mu no, Joseph Smith kaa mu sũii dɛ: “O Nyankopɔn, ewɔ hen? Hen na wo ntamadan a ɔkata wo sumabew do no wɔ?’’⁹ Ewuradze kyerɛkyerɛɛ Joseph dɛ “ɔnsɔw no yie’’¹⁰ na ɔbɔɔ anohoba dɛ sɛ ɔyɛ a, ndzɛmba no nyina bɛma no sũahu na ɔbɛyɛ no mfaso.¹¹

Morodwendwen mara mo sũahu horow ho no, meehu dɛ meesũa m’adzesũadze apapa no wɔ mber a ɔyɛ dzen papaapa wɔ m’abrabɔ mu, mber a woyii me fii m’ahotɔ bea. Nkõdzen a mihyiae mber a nna meyɛ ɔbabun, ber a nna menam seminary, meyɛ nsakyereenyi a ɔnnkyɛree, na dɛ etuhoakyɛ asɛmpasomafo do rusũa Asɔr no ho asɛm na ɔhaw a mihyiae wɔ m’adzesũa mu, wɔ mereper ahyɛ me ɔfrɛ mã mu, na wɔ meretsetse ebusua mu no aboa me ama ndaamba. Mpɛn dodow a enyigye mu ara medze gyedzi wɔ Ewuradze mu dzi nkõdzen gyinabew do no, mpɛn dodow a minyin wɔ me osuanyiyɛ mu a.

Onnyi dɛ ndzɛmba a ɔyɛ dzen wɔ hɛn abrabɔ mu no yɛ hɛn ahobow prɛko pɛr a yɛakɛhɛn kwan tseaba a no mu yɛ nkenkãnkekã mu no.¹² Jesus Christ “sũaa amandze a ohunii no mu setsie.’’¹³ Sɛ yɛka No do, tsitsirara wɔ hɛn nkõdzen mber mu a, yebotum yeenyin yɛabɛyɛ tse dɛ Ɔno yie.

Ahyɛmudzi horow kor a yɛnye Ewuradze yɛ no wɔ temple nye dɛ yɛdze afɔrbɔ ho mbra no bɔbɔ bra. Aber nyina afɔrbɔ akã Jesus Christ asɛmpa no ho. Ɔyɛ Jesus Christ n’afɔrbɔ kɛse ne nkaadze ma hɔn a wɔatsena ase anaa wɔbɛtsena ase nyina.

Mfonyin

Elder Morrison n’asɛmpasomafo.

Minyim dɛ aber nyina Ewuradze pata hɛn tsenenee apɛdze. Hom kaa mba pii a wɔdze bɔɔ me anohoba wɔ me patriarch nhyira mu? Nhyira no rehyɛ mã. Emi na me yer nye asɛmpasomafo bebere somee, fi amanaman bɔbor 25, wɔ Ghana Cape Coast Asɛmpakã mbew do. Nna wɔsom hɛn bo ma hɛn tse dɛ hɛnankasa hɛn mba.

Megye dase dɛ yenyin wɔ osuanyiyɛ mu sɛ yesie gyedzi wɔ Ewuradze mu wɔ nkõdzen mber mu a. Sɛ yɛyɛ dɛm ara a, ehumbɔbɔr mu ara Ɔbɛhyɛ hɛn dzen na Ɔaboa hɛn ma yɛasoa hɛn adzesõadze. Jesus Christ ne dzin mu, amen.