Osuanyiyɛ no Nhwɛdo

Anapa yi hɛn mba beenu nye hɛn nanamba baasa a wɔwɔ North America na bɛyɛ wiadze ne fã no hun ewia ne hyerɛn a ɔsoɛree fɛfɛɛfɛw mu wɔ anee. Mba baasa nkaa no na nanamba baasa a wɔwɔ Africa na wiadze ne fã no hun sum a nkakrankakra ɔrehyɛ hɔn do ber a ewia no tɔree wɔ wimu wɔ boka.

Adzekyee na adzesaa hɔn ahyɛase yi wɔ hɔ daa na ɔnnsesa yɛ daa daa nkaadze a ɔyɛ nokwar a wɔhwɛ hɛn abrabɔ do a yennkotum asesa. Sɛ dza yɛdze obu ma dza yɛdze nokwar yinom yɛ na yɛdze bata ho a, yenya asomdwee na koryɛ wɔ hɛn mu. Sɛ yɛannyɛ a, yɛyɛ basaa, na ndzɛmba nnkɔ yie dɛ mbrɛ hɛn enyi da kwan no.

Adzekyee na adzesaa yɛ nhwɛdo ahorow mu kor a Nyankopɔn dze ama obiara a ɔatsena asaase do pɛn, ndzɛmba ho nsɛm dɛ mbrɛ wɔtse pɛpɛɛpɛr. Ɔyɛ nokwar trododoo wɔ adasa hɛn asetsena ho a yennkotum ekwetsir dɛ mbrɛ hɛnara hɛn apɛdze tse a yennkenya no nsunsuando. Menya iyi ho nkae aber biara a mofow wimuhɛn fi Africa dze ba wiadze mfɛndzanan ehyiadzi, a okyim nyimpadua no wɔtse no san ekyir bɛyɛ dɔnhwer 10 wɔ da kor mu.

Aber biara a ohia dɛ yɛbɔhwɛ no, yehu dɛ Ɔsor Egya ama hɛn nokwar ho dase a ɔdɔɔ sõ ma yɛdze ahwɛ hɛn abrabɔ do ama yeehu No na yeenya asomdwee na dɛwdzi ho nhyira.

Ɔnam Nkɔnhyɛnyi Joseph Smith do, Ewuradze no Sunsum si no tadua dɛ: “Na bio, mebɛma hom nhwɛdo wɔ ndzɛmba nyina mu, amma wɔaanndaadaa hom; osiandɛ Satan atahye asaase do, na oefir edzi redaadaa amanaman.’’¹

Korihor, Christ ho etuatsewnyi no, gyee ndaadaa a ɔtse dɛm, a ɔanngye edzi dɛ Nyankopɔn tse ase na Christ ne mbae no. Alma nkɔnhyɛnyi no gyee dase kyerɛɛ no dɛ: “Ndzɛmba nyina so kyerɛ dɛ Nyame wɔ hɔ; nyew, asaase mpo, nye ndzɛmba nyina a ɔwɔ do, nyew, noho a okyin, nyew, sor abɔdze so a wɔwɔ sor a wokyin hɔnho gye dase dɛ Bɔadze Kokroko bi wɔ hɔ.’’²

Mber a Korihor hyɛɛ dɛ wɔmma no sɛnkyerɛdze ansaana oetum agye edzi no, Alma yɛe ma ɔtɔɔ mmum. Ne ɔhaw brɛɛ no adze no, Korihor gyee too mu dɛ abɔnsam na ɔdaadaa no.

Onnhia dɛ yɛma wɔdaadaa hɛn. Nyimdzee abrabɔ ho anwanwandze da hɛn enyim daa daa. Na yɛhwɛ na yɛdwendwen ɔsor awanwadze a wɔdze nworaba na wimu ndzɛmba a wonntum nnkan hɔn mbrɛ wɔahyehyɛ ho tsiabaa a okenyan ɔkra ma ɔdze gyedzi akoma bɔ no dawur dɛ “Me Nyankopɔn, … mbrɛ isi yɛ kɛse!’’³

Nyew, Nyankopɔn hɛn Ɔsor Egya tse ase, na Ɔda noho edzi kyerɛ hɛn nyina wɔ akwanhorow mu.

Na yɛbɛgye ato mu, yɛbɛgye edzi, na yɛakɔ do wɔ Nyankopɔn mu no, ohia dɛ hɛn akoma bɛgye nokwar Sunsum no. Alma kyerɛkyerɛɛ dɛ ahobrɛadze dzi gyedzi kan.⁴ Mormon dze kãa ho dɛ ɔbɛyɛ dzen ama obiara a “ɔnnyɛ botoo na ahobrɛadze wɔ akoma mu’’ dɛ obenya gyedzi na enyidado na ɔbɛgye Nyankopɔn no Sunsum no.⁵ Ɔhen Benjamin paa mu kãa dɛ obiara a ɔma wiadze enyimnyam hia no no yɛ tamfo ma Nyankopɔn.’’⁶

Oregyaa noho ama enuma dze ahyɛ tsenenee nyina mã mpo dɛ nna Ɔyɛ tsenenee na krɔnkrɔn no, Jesus Christ kyerɛɛ dɛ ahobrɛadze wɔ Nyankopɔn enyim no yɛ N’esuafo hɔn fapem suban.⁷

Esuafo afofor nyina hia dɛ wodua enuma ayɛdze do kyerɛ ahobrɛadze wɔ Nyankopɔn n’enyim. Dɛm ntsi “hɔn a wɔbrɛ hɔnho adze wɔ Nyankopɔn enyim, na wonya pɛ ma wonuma hɔn, na wɔdze akoma a ebubu na abotow … wɔnam enuma do bɛgye hɔn wɔ n’asɔr mu.’’⁸

Ahobrɛadze ma osuanyi n’akoma dan kɔ nnuhu na setsie ho. Na nkyii na Nyankopɔn no Sunsum no tum no dze nokwar brɛ dɛm akoma no, na obenya kwan akɔ mu.⁹

Ahobrɛadze a onnyi hɔ no ma Ɔsomafo Paul no nkɔnhyɛ dodow hyɛ mã wɔ nda a odzi ekyir yinom mu:

“Na nyimpa bɛyɛ ahopɛfo, sikapɛfo, ahohyehyɛfo, ahoramfo, ndzebɔfo, awofo do asoɔdzenfo, bɔnyiayɛfo, hɔn a hɔn ho nntsew,

“Hɔn a wonnyi dɔ, asɛnkadofo, nsekubɔfo, hɔn a wonnyi ahohyɛdo, abɔyafo, hɔn a wɔmmpɛ papa.’’¹⁰

Agyenkwa no no ɔfrɛ dɛ yensũa No no yɛ ɔfrɛ dɛ yɛnntwe hɛnho mmfi wiadze ndaadaa ho na yɛmbɛyɛ dɛ mbrɛ Ɔno tse—botoo na ahobrɛadze wɔ akoma mu, ahobrɛadze. Nkyii na yetum fa No kɔndua na yehu dɛ ɔyɛ mberɛw—na osuanyiyɛ nnyɛ adzesõa mbom dɛwdzi, dɛ mbrɛ President Russell M. Nelson akasa ho yie na woesisi do akyerɛkyerɛɛ hɛn no.

Yerusũa Christ na N’akwan ahorow ho asɛm no gya hɛn ma yehu na yɛdɔ No.

Ɔdze fasusu kyerɛɛ dɛ yɛdze ahobrɛadze suban no ɔbɛyɛ yie ama hɛn nokwar dɛ yɛdze hɛn nyipadua nyina bohu na yɛadɔ Nyankopɔn Egya no na yɛadɔ binom so dɛ mbrɛ yɛdɔ hɛnankasa hɛnho, a yɛnnkɛfa hwee esie. No somdwuma wɔ asaase do, ber a ɔdze Ne pɛ na Ne nyimpadua nyina too afɔrmbukyia no do no, yɛɛ fapem yinom hɔn nyɛe nhwɛdo, a N’asɛmpa gyina do. Fapem ebien no yɛ dza yehu na wɔfa mbrɛ yesi nye binom nya nkitahodzi ho, nnyɛ yɛrehwehwɛ hɛnankasa hɛn pɛsɛanakonyadze na enyimnyam.

No ho ahobow esũsũa nye dɛ sɛ yetsim wɔ hɛn mbɔdzembɔ papa no dɛ yɛbɔdɔ Nyankopɔ na binom a, wɔma hɛn tum ma yehu hɛnara ankasa hɛn krɔnkrɔn bo a yɛsom yie, dɛ Nyankopɔn ne mbambanyin ma mbabaa, a asomdwee na dɛwdzi mu a dɛm sũahu yi dze ba kã ho.

Yɛnam ɔdɔ na som do nye Nyankopɔn na hɛn ho nkorkor bɛyɛ kor. Afei na yebotum enya Sunsum Krɔnkrɔn ne dasee wɔ dɛm ɔdɔ mapã no ho, eduaba no a Lehi kã ho asɛm dɛ “ɔyɛ dɛw papaapanara, sen nduaba a [ɔasɔ] ahwɛ nyinara.’’¹¹

Ahenkyɛw no a Christ nyae ber a Ɔdze dza Obotum nyina mae na Ɔyɛe dɛ ɔbɔdɔ hɛn no nye dɛ obenya tum nyinara, mpo dza Egya no wɔ nyinara, a ɔyɛ nkwagye ntowdo.¹²

Hɛn kwan dɛ yebenya dze atsetse daapem ɔdɔ wɔ hɛn akra mu wɔ Nyankopɔn ho dɔ na hɛn ofisamenyi ho dɔ no hyɛ ase wɔ fie a yɛdze suban krɔnkrɔn dɛ yɛnye Egya no benya nkitahodzi daa daa wɔ ankorankor na ebusua mpaabɔ mu wɔ No Dɔba Kortonoo ne dzin mu, a yɛbɔ mu dua ankorankor na ebusua kyerɛwsɛm nsũae do sũa Hɔnho nsɛm, yɛbɔ mu sie Ahomgyeda do, na ankorankor kitsa temple recommend a ɔmmpa ho, yɛrobɔ mu dze edzi dwuma mpɛn dodow biara a yebotum no.

Sɛ hɛn mu kor biara nyin wɔ hɛn nyimdzee na ɔdɔ wɔ Jesus Christ na Ɔba no hɔn ho a, yenyin wɔ enyisɔ na ɔdɔ ma hɛnho nkorkor mu. Hɛn ahom dɛ yetum dze dɔ na yɛsom binom a wɔnntse hɛn fie no tserɛw kɛsenara.

Dza yɛyɛ no wɔ fie no nye yɛrosɔw akɔ ewiei na osuanyi dɛwdzi mu ara ho nokwar nsɔhwɛ. Asɛmpa a wɔdze asanananmu no ho nhyira dɛw mu papanara a me yer, Gladys, na emi yeenya ho enyigye wɔ hɛn fidua mu no fi yerusũa ehu na yeedzi Nyankopɔn nyi wɔ fie na yɛnye hɛn asefo akyɛ No dɔ mu aba.

Nyankopɔn ho dɔ na ɔsom ma hɛnho nkorkor a wonya no wɔ fie na ɔsom ma binom a wɔnntse hɛn fie no mber mu no nyin yɛ ayamuyie su.

Iyi nye etuho akyɛ ɔsom wɔ Nyankopɔn n’ahenman mu no nhwɛdo nam a Ewuradze no nkɔnhyɛfo na asomafo atseasefo dze esi hɛn enyim. Enye hɔn yɛ kor.

Afei yetum dua hɔn mu, hwɛ Ewuradze wɔ “adwendwen biara mu,’’ amma “yɛanngye kyim’’ na “yennsuro.’’¹³

Tse dɛ Ewuradze n’akɔnhyɛfo na asomafo atseasefo no, yebotum akɔ kan a “ayamuyie … ahyɛ hɛn abadaa mu mã amma nyimpa nyina, nye … gyedzi fifo, [nye] ɔbrapa resiesie [hɛn] adwen a onngyaa da; … [na hɛn] awerɛhyɛmu [rehyɛ] dzen wɔ Nyame enyim; na asɔfodzi ho nkyerɛkyerɛ no … [bɔ] sosɔ [hɛn] [a] kra do tse dɛ bɔw a ofi sor.’’

Yɛnye Ewuradze no nkɔnhyɛfo na asomafo atseasefo no, hɛn so yebotum abɛka gyedzi ho ɔbrapa kɔntɔnkrɔn no ho a etuho akyɛ ɔsom ahyɛ no dzen a “Sunsum Krɔnkrɔn no [nye hɛn] n’anyɛnkoyɛ aber nyina, [hɛn] ahempoma [bɛyɛ] ahempoma a ɔnnsakyer da wɔ tsenenee na nokwar mu’ na [hɛn] ahendzi [bɛyɛ] ahendzi a ɔwɔ hɔ daapem, na [ɔbɛpem] egu [hɛn] do afebɔɔ kesi afebɔɔ a ɔnnam nhyɛ kwan biara do.’’¹⁴ Na iyi nye Egya ne nhyehyɛɛ ho anohoba. Jesus Christ ne dzin mu, amen.