Nokwar nye Ebɛnadze?

Mo nuambanyin na nkyerɛbaa adɔfo, meda hom nyina ase wɔ nkenyan nhyiamu yi. Fitsi hɛn ehyiadzi ndaansa Ebɔbira yi, yehu ndzɛmba pii a woesisi wɔ wiadze yi mu, fi dza obubu akoma kesi dza ɔhyɛ enyigye.

Ɔyɛ hɛn enyigye dɛ yenya mbabun ehyiadzi akɛse wɔ wiadze nyina mu ho amandzɛɛbɔ.¹ Ehyiadzi yinom ase no, hɛn mbabun adehye no rusũa dɛ dza obesi wɔ hɔn abrabɔ mu biara no, hɔn ahoɔdzen kɛse no fi Ewuradze hɔ.²

Yedzi ehurusi dɛ worisisi temple pii wɔ wiadze nyina mu. Temple kor biara a wotu hyɛ Nyame nsa no, Nyame tum bi bɛkã ho wɔ wiadze mu dze ahyɛ hɛn dzen na woegyina etsia ɔsɛɛfo no mbɔdzembɔ a ɔreyɛ kɛse no.

Enyimtsiabu kyerɛ ɔsɛɛfo no ne nhyɛdo. Ɔyɛ bɔn kɛse.³ Dɛ meyɛ Asɔr no ne President no, misi Jesus Christ ne nkyerɛkyerɛ a ɔfa ndzeyɛɛ yi ho no pi. Mekã no pefee mu ara: enyimtsiabu biara a otsia mbaa, mbofra, anaa obiara no yɛ ekyiwadze ma Ewuradze. Odzi yaw na midzi yaw ber biara a wɔhaw obi. Odzi awerɛhow na hɛn nyina yedzi awerɛhow ma nyimpa kor biara a ɔatɔ enyimtsiabu biara mu. Hɔn a wɔyɛ emumuyɛdze kɛse yi nnyɛ nyimpa mbrasɛm nko na wobobu ho nkontaa mbom wobehyia Nyankopɔn Tumfo n’ebufuhyew so.

Mfe du mfe du mu no, Asɔr no edua akwan ahorow do dze bambɔ ama—nkankara—mbofra efi enyimtsiabu ho. Mboa pii wɔ Asɔr no no website do. Moto nsa frɛ hom dɛ hom nsũa.⁴ Kwankyerɛ yinom no wɔ hɔ a ɔboa hɔn a wonnyim hwee no. Mehyɛ hɛn mu kor biara nkuran dɛ ɔnyɛ enyidahɔ ma obi a ɔbɔwɔ enyimtsiabu mbusu mu na ntsɛmpanara ɔma hɔn bambɔ. Agyenkwa no nnkɛpen enyimtsiabu, na dɛ yɛyɛ N’esuafo no hɛn so yɛnnkɛpen do.

Ɔsɛɛfo no wɔ akwan horow a ɔdze sɛɛ adze. No mu bi nye no mbɔdzembɔ dɛ ɔbɛma nsonsonee a ɔda dza ɔyɛ nokwar na dza ɔnnyɛ nokwar no ntamu nnda edzi yie. Nsɛm a oriyer a ɔwɔ hɛn nsatseaba ase, ɔno mbom, ma ɔyɛ dzen dɛ yebohu dza ɔyɛ nokwar.

Ɔhaw yi kaa me sũahu bi a emi na Akyerɛbaa Nelson nyae ber a yɛkɛseraa onyimnyamfo bi wɔ ɔman a nkorɔfo kumaabi na wɔatse Jesus Christ ho asɛm. Me nyɛnko dɔfo yi n’enyi efir na ndaansa yi ɔayer papaapa. Ɔkãa kyerɛɛ hɛn dɛ ɔda mpa mu nda pii na ɔhwɛ asɛntsifi na obisa dɛ, “Nokwar nye ebɛnadze?”

Dodowara wɔ asaase do ndɛ a “wɔdze nokwar no ehuntsa hɔn osiandɛ wonnyim bea a wobohu efi.”⁵ Binom bɛma yɛagye edzi dɛ nokwar sesã—dɛ nyimpa kor biara wɔdɛ ɔhwehwɛ dza ɔyɛ nokwar ma nankasa noho. Dɛm gyedzi no yɛ adwenhun ma hɔn a wɔfom wɔ adwen bi dɛ wonnyi nkontaabu biara ma Nyankopɔn.

Nuambanyin na nkyerɛbaa adɔfo, Nyame nye nokwar nyina ne farbaa. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no fua nokwar nyina a Nyame dua dze ma Ne mba, sɛ wosũae fii abɔdze nyansapɛ nhwehwɛmu anaa ofii nyikyerɛ akɔntsen ofi No hɔ.

Fi asɛnkadaka yi do ndɛ na ɔkyena no, hom bɔkɔ do atse nokwar. Meserɛ hom nkyerɛw adwen a ɔba hom tsir mu na ma ɔba hom adwen mu na ɔka hom akoma mu. Mpaabɔ mu ara hom mbisa Ewuradze ma Onsi dza hom atse no nokwar no pi.

Modɔ hom, mo nuambanyin na nkyerɛbaa adɔfo. Mobɔ mpaa dɛ ehyiadzi yi bɛma hom sunsum mu mmee no hom rohwehwɛ no. Jesus Christ ne dzin krɔnkrɔn no mu, amen.