Nkuranhyɛ Egyapadze

Mo nuambanyin na nkyerɛbaa adɔfo, ɔyɛ me enyisɔ dɛ menye hom aboa ano wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne wiadze mfɛndzanan ehyiadzi yi ase. Beebi a hom wɔ biara no, yenya hom gyedzi na hom dɔ ho atsenkã. Nkenyan adzekyerɛ, dasegye a ɔyɛ ndam, na ndwontow nwanwa ama yeenya ntowdo.

Mehyɛ hom nkuran dɛ hom nkɔ do mper dɛ hom bɛfata asan akɔ Ɔsor Egya na Jesus Christ nkyɛn. Bea biara a hom wɔ wɔ ahyɛmu anamɔn kwan no do no, hom bohu aperdzi bi a otsia nyimpadua mu ɔnnkyebo nsɔhwɛ horow no, na Satan no nkõtsia no.

Dɛ ma me maame kãa kyerɛɛ me ber a muruhwinhwin dɛ biribi yɛ dzen dodow no, “O, Hal, nyew ɔyɛ dzen. Dɛm na ɔsɛ dɛ ɔyɛ. Abrabɔ yɛ nsɔhwɛ.”

Otum kã dɛm bɔkɔɔ, a ɔayerɛw n’ano mpo, osiandɛ nna onyim ndzɛmba ebien bi. Mbrɛ aperdzi no tse biara no, dza obehia kɛse nye dɛ obodur fie na ɔnye no Ɔsor Egya akɛtsena. Na onyim dɛ obotum edua ne gyedzi wɔ n’Agyenkwa mu ayɛ.

Onyaa atsenkã dɛ Ɔbɛn no. Nda no mu a onyim dɛ ɔka kakra ma oewu no, ɔnye me kãa Agyenkwa no ho asɛm ber a ɔda ne pia mu no. Nna abow a ɔkɔ pia kor so mu bɛn ne mpa no ho. Ɔyerɛɛw n’ano na ɔhwɛɛ abow no ber a ɔkãa no bɔkɔɔ dɛ ɔnnkɛkyer na oehu No. Meda ho kaa morohwɛ abow no na murususu ma pia a ɔwɔ n’ekyir no bɛyɛ.

Sesei ɔwɔ sunsum wiadze. Otumii dze n’enyiwa sii akyɛdze a ɔrohwehwɛ no mfe pii mu a oduaa honandua mu na nankasa no nsɔhwɛ mu mpo no.

Nkuranhyɛ egyapadze a ogyaa maa hɛn no, wɔakã ho asɛm yie wɔ Moroni 7, bea a Mormon hyɛ ne ba Moroni na no nkorɔfo nkuran no. Ɔyɛ nkuranhyɛ egyapadze ma mbasantsen tse dɛ ma me maame dze ma n’ebusua no. Mormon dze dɛm nkuranhyɛ egyapadze no ma hɔn nyina a woenya pɛ kɛse dɛ, wobodua hɔn abrabɔ mu nsɔhwɛ nyina do, afata onnyiewiei nkwa.

Mormon hyɛ ase wɔ Moroni 7 nyiyimu a odzi kan a Jesus Christ ho dasegye, ɔsor abɔfo, na Christ no Sunsum, a ɔma kwan ma yehu papa fi bɔn ho ama yeetum aasan mu eyi papa

Ɔdze Jesus Christ dzi kan, dɛ mbrɛ ma hɔn nyina a wodzi nyim yɛ dze nkuranhyɛ ma hɔn a wɔreper akɔ sor wɔ anamɔn kwan a ogya kɔ hɔn ɔsor fie no:

“Na wonnkotum agye nyimpa nkwa, dɛ mbrɛ Christ ne nsɛm se, gyedɛ wonya gyedzi wɔ ne dzin mu; dɛm ntsi, sɛ dɛm ndzɛmba yi etwa a nna gyedzi so etwa; na nyimpa ne gyinabew ayɛ hu, osiandɛ nna ɔabɛyɛ dɛ gyama wɔannyɛ ɔpon ho nhyehyɛɛ biara ammã hɔn.

“Mbom hwɛ, m’enuanom adɔfo, mususu dza oye ma hom, na mususu ma hom dɛ hom wɔ gyedzi wɔ Christ mu osian hom ɔdwe ntsi; na sɛ hom nnyi gyedzi wɔ no mu a nna ɔnnsɛ dɛ wɔkan hom fora n’asɔr no ne mba ho.”¹

Mormon hun ɔdwe dɛ ɔyɛ hɔn gyedzi ho ahoɔdzen adanse. Ohun dɛ woenya atsenkã dɛ wɔbɛdan Agyenkwa no. Ɔhyɛɛ hɔn nkuran ber a ɔhyɛɛ dɛm gyedzi no nsew. Mormon kɔr do maa hɔn nkuranhyɛ dɛ ɔboaa hɔn ma wohun dɛ hɔn gyedzi na ɔdwe na ɔbɛkyekyer hɔn taduasi na awerɛhyɛmu wɔ hɔn aperdzi mu konyimdzi ho.

“Na bio, m’enuanom adɔfo, mebɛkã dza ɔfa enyidado ho asɛm akyerɛ hom. Obesi dɛn bɛyɛ ma hom enya gyedzi gyedɛ hom enya enyidado?

“Na ɔyɛ ebɛnadze na hom benya enyidado wɔ mu? Hwɛ mese hom dɛ hom benya enyidado efi Christ no werdambɔ nye no wusoɛr tum no mu, dɛ hom bɔsoɛr akɔ onnyiewiei nkwa mu, osian hom gyedzi a ɔwɔ no mu wɔ anohoba a ɔdze abɔ hom no ntsi.

“Dɛm ntsi, sɛ obi wɔ gyedzi a otwar dɛ onya enyidado; na sɛ gyedzi nnyi hɔ a enyidado so nnyi hɔ.

“Na hwɛ bio, mekã kyerɛ hom bio dɛ orunntum nnya gyedzi nye enyidado, gyedɛ ɔdwe na onya botooyɛ akoma.”²

Nkyii Mormon gye dase dɛ wɔnam kwan no do a wɔrebɛgye akyɛdze no a Christ no dɔ mapã no bɛhyɛ hɔn akoma mu mã no dze hyɛ hɔn nkuran. Ɔnwen ndzeyɛɛ dɛ gyedzi wɔ Jesus Christ mu, ɔdwe, ahobrɛadze, Sunsum Krɔnkrɔn, na enyidado dɛ ebenya onnyiewiei nkwa hɔn ndzeyɛɛ bɔ mu ma hɔn. Ɔhyɛ hɔn nkuran wɔ kwan yi do:

“Osiandɛ obiara nndzi mu wɔ Nyankopɔn enyim, gyedɛ hɔn a wɔdwe na wɔwɔ botooyɛ akoma; na sɛ obi ɔdwe na ɔwɔ botooyɛ akoma, na ɔnam Sunsum Krɔnkrɔn no tum do kã dɛ Jesus nye Christ no a, nna ɔwɔ ayamuyie; na sɛ onnyi ayamuyie a nna ɔnnsɛ hwee; dɛm ntsi ohia dɛ onya ayamuyie.”³

Sɛ mohwɛ ekyir a, afei muhu mbrɛ ayamuyie akyɛdze—Christ no dɔ mapã no—hyɛɛ me maame dzen, maa no kwankyerɛ, tsipia, na ɔsesãa no wɔ ne fie nkɔree ho aperdzi no.

“Na ayamuyie wɔ penkyɛr, ne yamu ye, na ɔnnyɛ ahoɔyaw, ɔnnhyehyɛ noho, ɔnnhwehwɛ nonko nedze, no bo nnhaw no, ommbu emumuyɛ ho akontaa, onndzi dɛw wɔ dza ɔnntsen ho, na mbom odzi dɛw wɔ nokwar ho, ɔsoa adze nyina, ɔgye adze nyina dzi, ɔwɔ adze nyina mu enyidado, ɔsɔw adze nyina.

“Dɛm ntsi, m’enuanom adɔfo, sɛ hom nnyi ayamuyie a, hom nnsɛ hwee, osiandɛ ayamuyie nntwa abrɔdɔ. Dɛm ntsi, hom ntetar ayamuyie, ɔno na ɔsõ kyɛn adze nyina , osiandɛ ndzɛmba nyina bɔbɔ adze—

Mbom ayamuyie nye Christ no dɔ mapã no, na otsim hɔ afebɔɔ; na nyia wobohu dɛ ɔwɔ bi wɔ da a odzi ewiei no mu no, obesi no yie.

Dɛm ntsi, m’enuanom adɔfo, hom mfa hom akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ hom mã, dza ɔdze egu hɔn a wɔyɛ ne Ba Jesus Christ n’akãdofo nokwafo do no; ama hom aabɛyɛ Nyankopɔn ne mba ama ber a obopue no, yɛabɛyɛ dɛ ɔno, osiandɛ yebohu no dɛ mbrɛ ɔtse; ama yeenya dɛm enyidado yi; ama ɔaatsew hɛnho dɛ mbrɛ noho tsew no.”⁴

M’enyi sɔ Mormon ne fasusu na adzekyerɛ ho nkuranhyɛ. Me maame n’egyapadze no so ehyira me. Nkɔnhyɛfo fi Adam do besi ndɛ da yi, edua hɔn adzekyerɛ na fasusu do, ahyɛ me dzen.

Ɔnam obu a medze ma hɔn a minyim hɔn na hɔn ebusua ebusua ankasa no, masan mu eyi dɛ moronnhwehwɛ nnkã hɔn aperdzi mu nsɛm anaa makã hɔn akyɛdze akɛse no wɔ bagua mu. Naaso dza meehu no ahyɛ me nkuran na wɔasesã me ayɛ me yie.

Na mowɔ esian mu dɛ mebɛhɛn no kokoa mu nsɛm mu no, medze me yer no nkuranhyɛ ho amandzɛɛbɔ bɛkã ho. Meyɛ dɛm ahwɛyie mu ara. Ɔyɛ nyimpa dzinn a ɔnnhwehwɛ anaa ɔmmpɛ ayɛyi.

Yɛawar mfe 60. Osian dɛm sũahu no ntsi na afei menya kyerɛwsɛm mu nsɛmfua yinom ho ntseasee: gyedzi, enyidado, ɔdwe, iritsim, yɛrennhwehwɛ hɛn nko dze, ridzi dɛw wɔ nokwar mu, eronndwen bɔn, na dza ɔkrɔn kɛse no, ayamuyie.⁵ Ɔnam dɛm sũahu no do, mutum gye dase dɛ nyimpa dasanyi biara botum afa dɛm su pa nwanwa yinom ahyɛ hɔn daa daa abrabɔ mu na woedua hɔn abrabɔ mu ekutukubɔ no mu akɔ sor.

Ɔpepe a hom ritsie me nyim dɛm nkorɔfo no. Hom mu dodow yɛ dɛm nkorɔfo no. Hɛn nyina yehia dɛm nkuranhyɛ fasusu na adɔyɛ no.

Sɛ hom nye binom tsena ase dɛ hɔn akyɛrɛbaa anaa onuabanyin a ɔrosom a, eyɛ Ewuradze ananmugyinanyi. Dwen dza nkyɛ Ɔbɛyɛ anaa Ɔbɛkã. Nkyɛ Ɔbɔto nsa afrɛ hɔn ma wɔaba No hɔ. Ɔbɛhyɛ hɔn nkuran. Obohu na Ɔakamfo nsesã a ɔsɛ dɛ wɔyɛ ne nhyɛase. Na Ɔbɛyɛ fasusu mapã dɛ wɔbɔhwɛ do ayɛ.

Obiara nnkotum ayɛ dɛm emudzi mu sesei dze, naaso iritsie ehyiadzi yi no, ibotum ehu dɛ inam kwan no do. Agyenkwa no nyim w’aperdzi mu nsɛm nyina. Onyim wo hyɛber kɛse dɛ ibotum enyin wɔ gyedzi, enyidado, na ayamuyie mu.

Mbrasɛm na ahyɛmu horow a Ɔdze ma wo no nnyɛ nsɔhwɛ a ɔrebɛhyɛ wo do. Wɔyɛ akyɛdze a wobepegya wo akɔ akɛgye Nyankopɔn akyɛdze nyina na asan akɔ wo Ɔsor Egya na Ewuradze a, wɔdɔ wo No fie.

Jesus Christ tua hɛn bɔn ho kaw. Yebotum agye onnyiewiei nkwa ho ndzinoa sɛ yebenya gyedzi a ɔsõ dɛ yebonu hɛnho na yɛabɛyɛ tse dɛ abofra, ho atsew na yɛayɛ krado dɛ yɛbɛgye Nyankopɔn akyɛdze mu dza ɔsõ kɛse no.

Mobɔ mpaa dɛ ibɛgye Ne nsato no ato mu na dɛ edze bɛma hɛn Ɔsor Egya ne mba binom.

Mobɔ mpaa ma hɛn asɛmpasomafo a wɔwɔ wiadze nyina mu no. Wonnya nkenyan nhyɛ nyimpa kor biara nkuran ma ɔnpɛ na ɔngye ndzi dɛ nsato no fi Jesus Christ hɔ a odua N’asomfo a wɔafa Ne dzin ato hɔn do no .

Megye dase dɛ Ɔtse ase na odzi N’Asɔr no kan. Meyɛ Ne dasefo. President Russell M. Nelson yɛ nkɔnhyɛnyi tseasefo ma asaase no nyina. Minyim dɛ ɔyɛ nokwar. Jesus Christ ne dzin krɔnkrɔn no mu, amen.