Erenyɛn na Eregye Wo Dasee

Nsesã mber soronko taa ba hɛn abrabɔ mu a hɛn enyi nnda kwan, mpo ber a eda ho suar. Hom mma menye hom nkyɛ asɛm bi a ɔfa nsɔwdo skuul adzesũanyi, Kevin, ho a wɔsaan mu yii no dɛ ontu kwan mfi mansin no mu nkedzi adzesũanyi baanodzinyi dwuma, dɛ mbrɛ ɔnoara kãe wɔ ne nsɛm mu no.

“Oduur mo do, na ɔpanyin a ɔhwɛ kyerɛwkyerɛw edzin no bisaa me dzin. Ɔhwɛɛ edzin no na ɔkãa dɛ, ‘Ntsi ɔwo nye aberantsɛ no a ofi Utah a.’

“Ikyerɛ dɛ ɔyɛ mo nko a?’ Mibisae.

“Nyew, wo nko.’ Ɔdze me dzin ahyɛnsew maa me a nna oetsimtsim “Utah’’ wɔ me dzin ase. Ber a mobɔe no, metsee dɛ ma wɔatom me.

“Menye nsɔwdo skuul adzesũafo beenum so a wɔwɔ edzin ahyɛnsew tse dɛ medze no bɔɔ mu kɛhyɛɛ ahɔhobea efir atwer no mu. ‘Hɛ, ifi Utah a. Adzesũanyi kor bisaa dɛ, eyɛ Mormonnyi a?’

“Nna minngye nndzi dɛ mekã adzesũafo baanodzifo yinom a wofifi amanaman nyina no hɔn ho. “Nyew,’ motweɔntweɔnee ana meregye ato mu.

“Hom nye nkorɔfo no a wɔgye Joseph Smith, a ɔkãa dɛ ohun sor abɔfo no, dzi no. Nngye ankasa nndzi dɛm, anaa?”

Nna minnyim dza mennkã. Nna adzesũafo a wɔwɔ efir atwer no mu nyina rohwɛ me hann. Seseiara na me bae, na obiara ehu dɛ meyɛ soronko dada. Meyɛɛ dɛ mebɛkyerɛkyerɛ mu mbom mekãa dɛ, “Minyim dɛ Joseph Smith yɛ Nyankopɔn no nkɔnhyɛnyi.’

“Dɛm no fi hen bae?’ Ɔyɛɛ me ahobow. Nna minnyim dɛ ɔhyɛ mo mu.’’ Naaso nna nsɛm no yɛ nokwar.

Ɔkãa dɛ, ‘“Nyew, wɔkãe kyerɛɛ me dɛ hom nyamesom yɛ hu.’

“Dɛm no, obiara gya kasa kakra ber a efir atwer no buei no. Ber a yeyiyii hɛn ndaka no, ɔdze serew siaan famu kɔree.

“Nkyii, ndze bi a ɔwɔ m’ekyir bisaa dɛ, ‘Hɛ, ana Mormonfo nnyi dza ɔyɛ dɛ Bible fofor bi so?’

“Oo. Nnyɛ bio a. Medanee hun adzesũanyi bi so Christopher, a nna ɔnye me wɔ efir atwer no mu.

Mekãa dɛ, “Wɔfrɛ no Mormon Nwoma no, a nna mepɛ dɛ megyaa ho asɛm kã. Miyiyii me ndaka na mehyɛɛ ase dɛ mirisiansian famu.

Obisaa dɛ, “Ɔno nye buukuu no a Joseph Smith kyerɛɛ ase no?

Miyii ano dɛ, “Nyew, ɔno a.’’ Mokɔr do nantsewee, a nna mowɔ enyidado dɛ mobokwetsir enyimguase.

“Oye, ana inyim mbrɛ mebesi benya bi a?’’

“Kyerɛwsɛm bi a musũae no wɔ seminary baa m’adwen mu awerɛfir mu ara. “Na m’enyi nntõ Christ asɛmpa no ho.’’¹ Ber a iyi hɛɛn m’adwen mu no, m’enyi tõe dɛ minyaa enyimguase nkã tse no.

“Dapɛnda nkaa nyina no mo werɛ emmfir dɛm kyerɛwsɛm no da. Miyiyii nsɛmbisa beberee ano wɔ Asɔr no ho dɛ mbrɛ mubotum, na menyaa anyɛnkofo beberee.

“Muhun dɛ nna mutu moho wɔ me nyamesom ho.

“Memaa Christopher Mormon Nwoma no kor. Ekyir no ɔkyerɛɛw me, a ɔkãa kyerɛɛ me dɛ ɔato nsa afrɛ asɛmpasomafo no wɔ ne fie.

“Musũae dɛ onnyi dɛ ɔyɛ me enyimguase dɛ mebɛkyɛ me dasee.”²

Kevin n’akokodur wɔ ne dasegye ne nkyɛe ho no kenyaan me. Ɔyɛ akokodur a Asɔrmba anokwafo si do yɛ no dabiara wɔ wiadze nyina mu. Ber a mekyɛ m’adwen no, moto nsa frɛ hom dɛ hom ndwendwen nsɛmbisa anan yinom ho:

1. Ana minyim adze a dasegye yɛ na metse ase a?

2. Ana minyim mbrɛ mibesi bɛgye me dasee a?

3. Ebɛn akwansiwdze na ɔwɔ me dasee ne ngyee mu?

4. Mebesi dɛn esie me dasee?

Wo dasee yɛ ahonyadze a ɔsom bo dodow, a sunsum mu ahomka atsenkã taa ka ho. Ɔtaa dɛ atsenkã yinom ba bɔkɔɔ na wɔkã ho asɛm dɛ ɔyɛ ndze bɔkɔɔ bi.³ Ɔyɛ wo gyedzi anaa nokwar ho nyimdzee, a odua Sunsum Krɔnkrɔn ne nhyɛdo do ba dɛ sunsum mu adanse. Erenya adanse yi bɛsesã dza ekã na mbrɛ isi yɛ w’adze. Dza ɔkã wo dasee mu ndzɛmba etsitsir, a Sunsum Krɔnkrɔn no si no tadua wɔ w’akoma na n’adwen mu ho nye:

• Nyankopɔn yɛ wo Ɔsor Egya, eyɛ Ne ba. Ɔdɔ wo.

• Jesus Christ tse ase. Ɔno nye tseasefo Nyankopɔn ne Ba no na w’Agyenkwa na Pomfo.

• Joseph Smith nye Nyankopɔn no nkɔnhyɛnyi a wɔfrɛɛ no dɛ ɔmfa Jesus Christ N’Asɔr nsan ananmu mbra.

• Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no nye Nyankopɔn N’Asɔr a wɔdze asan ananmu aba wɔ asaase do.

• Nkɔnhyɛnyi tseasefo na odzi Jesus Christ N’Asɔr a wɔdze asan ananmu aba no baano.

Egye wo dasee ber a enye binom kyɛ sunsum mu atsenkã no. Dɛ eyɛ Asɔrba no, akwanhorow dɛ egye wo dasee no wɔ Asɔr nhyiamu a wɔahyehyɛ mu anaa wɔnnhyehyɛɛ mu, enye ebusua, anyɛnkofo, na binom bɔ beenu nkɔmbɔ.

Kwan kor so a ekyɛ wo dasee nye ɔnam suban tsenenee do. Wo dasee wɔ Jesus Christ mu no nnyɛ dza ebɛkã nko—ɔyɛ wo nyimpa ban a eyɛ.

Ber biara a ebuei w’ano anaa ɔnam wo ndzeyɛɛ do ekyerɛ wo enyim pisi dɛ ebɛkã Jesus Christ do no, eto nsa frɛ binom ma “wɔba Christ hɔ.’’⁴

Asɔrmba gyina dɛ Nyankopɔn N’adasefo aber nyina, wɔ adze nyina mu, na wɔ mbeambea nyina no.⁵ Akwanhorow dɛ yɛbɛyɛ iyi no wɔ internet do a dza ɔwɔ mu no yɛ hɛnara nkenyan nsɛm, anaa yɛbɛkyɛ dza opegya a binom ayɛ ho ahosiesie, a ɔnnsã da. Sɛ yɛdɔ, yɛkyɛ, na yɛto nsa frɛ wɔ internet do mpo a, yɛgye dase. Wo tweet horow, amandzɛɛbɔ pɛɛ, na dza ekyerɛw to do no bɛfa botae a ɔkrɔn na ɔyɛ krɔnkrɔn yie sɛ isan so dze social media dzi dwuma kyerɛ mbrɛ Jesus Christ n’asɛmpa no si sesã w’abrabɔ a.

Akwansiwdze wɔ wo dasee ne ngyee ho bɛyɛ nnyim dza ebɛkã pɔkyee ho asɛm. Matthew Cowley, ahyɛse Asomafo no bi, kãa sũahu yi ber a nna ɔrokɔ mfe enum asɛmpakã wɔ New Zealand a nna oedzi mfe 17 dɛ:

“Mowerɛ nnkefir m’egya ne mpaabɔ wɔ da no a mokɔree no da. Menntsee nhyira fɛfɛw dɛm wɔ m’abrabɔ mu da. Nkyii ne nsɛm a odzi ewiei a ɔdze maa me keteke gyinabea nye dɛ, “Me banyinba, ebɔkɔ dɛm asɛmpakã no ibosũa adze, ebɔbɔ mbɔdzen ayɛ wo nsɛnkã ho ahosiesie; na ɔtɔfabi na wɔfrɛ wo a, ebɔdwen dɛ esiesie woho ahomka mu ara, naaso esoɛr gyina a, biribiara nnkɛba w’adwen mu.’ Meenya ho sũahu, bɔbor mpɛn kor.

“Mekãa dɛ, “Ebɛnadze na ebɛyɛ sɛ w’adwen mu tɔ pan a?’’

“Ɔkãa dɛ, “Egyina hɔ na edze wo kra n’ahoɔdzen nyina no, egye dase dɛ Joseph Smith yɛ Nyankopɔn tseasefo no nkɔnhyɛnyi a, adwendwen bɛhyɛ w’akoma mu mã na nsɛm ahyɛ w’anomu … dze akɔ obiara a oritsie wo no n’akoma mu. Na ntsi no m’adwen, a ɔtaa dɛ nna biribiara nnyi mu wɔ … m’asɛmpakã … , ber no maa mo kwan ma megyee me dasee kesii dza osii kɛsenara wɔ wiadze n’abakɔsɛm mu ofitsi Kyerɛkyerɛnyi no ne mbeamuduabɔ no. Me mfɛfo na nkataasia, ɔtɔfabi a hom nsɔ nhwɛ. Sɛ nnyi biribiara bio a ebɛkã a, gye dase dɛ Joseph Smith yɛ Nyankopɔn no nkɔnhyɛnyi, na Asɔr no n’Abakɔsɛm nyinara no bɛhyɛ w’adwen mu mã.’’⁶

Dɛmara no, President Dallin H. Oaks kãa dɛ, “Dasegye bi wɔ hɔ a wonya no ber a igyina w’anan do regye sen ewɔ w’anankroma do robɔ ho mpaa.’’⁷ Sunsum no gye dase kyerɛ nyia a ɔrekasa na nyia a oritsie no dɛmara.

Akwasiwdze bi so, dɛ mbrɛ Kevin n’asɛm tsĩi mu no, nye suro. Dɛ mbrɛ Paul kyerɛɛw kɛmaa Timothy no:

“Na Nyankopɔn amma hɛn suro sunsum, na mbom ahoɔdzen, nye dɔ na adwenmutsew dze a. …

“Dɛm ntsi mma w’enyi nntõ hɛn Ewuradze dasedzi no ho.’’⁸

Suro ho nkã tse mmfir Ewuradze hɔ mbom mpɛn dodow no ofi ɔsɛɛfo no hɔ. Erenya gyedzi, dɛ mbrɛ Kevin nyae no, bɛma wo kwan ma edzi nkã tse yinom do na ahotɔ mu ara akyɛ dza ɔwɔ w’akoma mu.

Megye dzi dɛ dasedzi kã hɛn nyimpadua ho, naaso, ama yeesie na yeetu no mpon yie mu no, Alma kyerɛkyerɛɛ dɛ otwar dɛ yɛdze ahwɛyie dodow “nyɛn hɛn dsaee.’’⁹ Mber a yɛyɛ no, “obenya ndwow, na oenyin akɔ sor, na ɔasow eduaba.”¹⁰ Sɛ yɛannyɛ a “ɔkyenkyen.’’¹¹

President a Odzi Kan na n’Apamfo adɔfo hɔn mu kor biara ama hɛn akwankyerɛ wɔ mbrɛ yebesi besie hɛn dasee.

Ɔdɔ mu ara President Henry B. Eyring akyerɛkyerɛ hɛn dɛ otwar dɛ yɛdze “yɛremee wɔ Nyame n’asɛm mu, mpaabɔ a ofi akoma mu, na setsie ma Ewuradze ne mbrasɛm no dzi dwuma pɛpɛɛpɛr na ɔkɔ do ara ma hɛn dasee enyin na ɔayɛ prɔmprɔm.’’¹²

President Dallin H. Oaks bɔɔ hɛn nkaa dɛ ama hɛn dasee eetsim no, “yehia dɛ yedzi sacrament no dapɛn biara (hwɛ N&A 59:9) ma yɛafata anohoba a ɔsom bo no dɛ “aber nyina yebenya no Sunsum ma ɔnye [hɛn] atsena’’ (N&A 20:77).’’¹³

Na ɔnnkyɛree na ayamuyie mu ara President Russell M. Nelson tuu fo dɛ:

“Fa nokwar nyɛn [wo dasee]. …

“… Fa tsetse na ndɛ mber yi nkɔnhyɛfo hɔn nsɛm no nyɛn woho. Serɛ Ewuradze ma ɔnkyerɛkyerɛ wo mbrɛ ibesi betsie No yie. Dzi mber ara yie wɔ temple na ebusua abakɔsɛm edwuma mu.

“… Ma wo dasee nyɛ w’ehiadze kɛse.¹⁴

Mo nuambanyin na nkyerɛbaa, mobɔ hom anohoba dɛ sɛ hom tse dza dasegye yɛ ase yie ara, na sɛ hom kyɛ a, hom bedzi suro na ator akwansiwdze do nkonyim, a ɔbɛma hom etum atsetse na woesie hom dasee, ahonyadze a ɔsom bo dodow yi.

Woehyira hɛn dɛ yɛwɔ tsetse na ndɛ da yi nkɔnhyɛfo a wonntum nnkan, hɔn fasusu a wɔdze akokodur agye hɔn dasee.

Christ no wu ekyir no, Peter gyinae na ɔgyee dase dɛ:

“Hom nyina nhu … dɛ Nazarethnyi Jesus Christ, a hom bɔɔ no mbeamuduamu, a Nyankopɔn nyaan fii ewufo mu no, … asan gyina hom enyim ha yi. …

“… Eso dzin fofor biara nnyi wi yi ase a wɔdze ama wɔ nyimpa mu a, otwar dɛ wɔgye hɛn nkwa wɔ mu.’’¹⁵

Amulek, Alma ne gyedzi ho nkyerɛkyerɛ ekyir no, kãa no tum mu ara dɛ: “Na hwɛ afei mankasa merebɛgye me dasee akyerɛ hom ma hom eehu dɛ dɛm ndzɛmba yinom yɛ nokwar. Hwɛ, mese hom dɛ minyim dɛ Christ bɛba adasamba mu, … na ɔdze noho abɔ werdam dze etua wiadze bɔn kaw; na Ewuradze Nyankopɔn na ɔakã.’’¹⁶

Joseph Smith na Sidney Rigdon, wohun Agyenkwa no no wusoɛr enyimnyam enyido-adzehu no, gyee dase dɛ:

“Na afei, dasegye pii a wɔdze ama wɔ no ho no, iyi nye dasegye a odzi ekyir koraa, yɛgye dase wɔ no ho dɛ: Ɔtse ase!

“Osiandɛ yehun no, dɛ ɔwɔ Nyame n’abanyimfa; na yɛtsee ndze a ɔregye dase dɛ ɔno nye Egya ne Ba a Wɔwoo no Kortoo no.’’¹⁷

Nuambanyin na nkyerɛbaa, moto nsa frɛ hom dɛ hom nhwehwɛ akwanhorow ngye hom dasee wɔ kasa na nyɛɛ mu. Ɔnnkyɛree na kwan bi a ɔtse dɛm baa mo hɔ, wɔ nhyiamu bi a menye kurowpɔn n’ahenkurow ne ɔdzekurow yɛe wɔ no ɔfese a n’edwmayɛfo dodow kã ho wɔ South America n’ewiei. Ber a yɛdze akoma pa ankasa wie no, modwendwen ho ntsɛmara dɛ ɔwɔ dɛ megye me dasee. Midzii nkenyan do no, midzii dase dɛ Jesus Christ nye Nyankopɔn tseasefo ne Ba no, na wiadze Agyenkwa no. Biribiara sesãa wɔ hɔara. Na Sunsum a ɔbɛhyɛɛ dan mu hɔ no obiara tsee. Ɔkãa obiara a nna ɔwɔ dan no mu n’akoma. “Ɔwerɛkyekyefo no … gye Egya na Ɔba no Hɔn ho dase.’’¹⁸ Ɔyɛ me enyisɔ dɛ menyaa akokodur gyee me dasee.

Sɛ mber a ɔtse dɛm ba a, takyer no na na fua no. Ibɛtse Ɔwerɛkyekyefo no ne hyew wɔ wo mu sɛ eyɛ a.

Medze me dasee na dasedzi ma hom dɛ—Nyankopɔn yɛ hɛn Ɔsor Egya, Jesus Christ tse ase, na Jesus Christ N’asɔr a ɔwɔ hɔ ma Nda a Odzi Ekyir Ahotseweefo nye Nyankopɔn N’Asɔr wɔ asaase do ndɛ a hɛn nkɔnhyɛnyi dɔfo, President Russell M. Nelson, na odzi baano. Jesus Christ ne dzin mu, amen.