Eroboa Ehiafo na hɔn a Wɔretseetsee
Jesus Christ N’Asɔr esi no pi dɛ wɔbɔsom hɔn a wohia, na oesi no pi so dɛ wɔnye binom bɛyɛ bataboa wɔ dɛm mbɔdzembɔ no mu.
Enuanom na nkyerɛbaa, hɛn dɔfo President Russell M. Nelson nye hɛn bɛkasa ekyir yi wɔ nhyiamu yi mu. Ɔase me dɛ me nyɛ nyia obedzi kan akasa.
M’asɛngyinado ndɛ fa dza Jesus Christ N’Asɔr a ɔwɔ hɔ ma Nda a Odzi Ekyir Ahotseweefo na n’asɔrmba dze ma na wɔyɛ ma ehiafo na hɔn a wɔtsetse ho. Mebɛkasa so afa mmae a ɔtse dɛm a nkorɔfo apapafo binom yɛ. Wɔrema hɔn a wɔwɔ hia mu no adze yɛ nkyerɛkyerɛ a ɔwɔ nyamesom ahorow a ofi Abraham asefo mu na wɔ binom so dɛmara.
Abosoom kakra a abɛsen no, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo maa hɛn nyimpa ho mboa edwuma a ɔtsen kɔ wiadze nyina mu ho amandzɛɛbɔ.1 Hɛn sika a yɛhweree wɔ afe 2021 mu maa hɔn a wohia wɔ aman 188 wɔ wiadze nyina mu no yɛɛ $906 ɔpepe, ɔka kakra ma wɔayɛ ɔpepepem kor. Dza ɔkã ho no, hɛn asɔrmba yɛɛ etuhoakyɛ edwuma wɔ botae yi ara ho bɔbor dɔnhwer ɔpepe 6.
Nkanee yinom, nokwar ara, ɔnnyɛ hɛn mmae na mboa ne nyina ho amandzɛɛbɔ. Ankorankor som a hɛn asɔrba mae no nkorkor ber a wɔrosom hɔnho nkorkor anaa wɔ dzibew a wɔafrɛ hɔn mu no na asɔrba ma asɔrba etuhoakyɛ som no nnkã ho. Na hɛn 2021 amandzɛɛbɔ no nnkã dza hɛn asɔrmba yɛ no ankorankor wɔ adɔyɛ ekuwekuw pii a wonntum nnkan hɔn a wɔnnye Asɔr nnyi baguamu nkitahodzi biara no. Medze iyinom hyɛ ase.
Afe 1831 mu, ber a wɔkyekyeer Asɔr no a wɔdze asan ananmu aba no nndzii mfe ebien no, Ewuradze maa nyikyerɛ yi dze maa n’asɔrmba no na, megye dzi dɛ, Ne mba nyina wɔ wiadze nyina mu no kwankyerɛ:
“Hwɛ, ɔnnsɛ dɛ mehyɛ hom wɔ ndzɛmba nyinara mu; osiandɛ nyia wɔhyɛ no wɔ ndzɛmba nyinara mu no yɛ onyihafo na ɔnnyɛ akowaa nyansafo. …
“Nokwar mese dɛ, ɔsɛ dɛ nyimpa dze enyimpi yɛ adzepa, na wɔdze hɔnankasa hɔn pɛ yɛ ndzɛmba pii, ama woeetum aada ndzeyɛtsenenee pii edzi;
“Osiandɛ tum no wɔ hɔn mu ntsi, wɔyɛ dza hɔnankasa wɔpɛ. Na susuampaara dɛ adasa yɛ papa no wɔrennyew hɔn akatua wɔ kwan biara do.”2
Mfe 38 dɛ meyɛ Ɔsomafo, na mfe bɔbor 30 wɔ edwuma a m’awea ho mu no, meehu ekuwekuw na ankorankor hɔn adɔyɛ mbɔdzembɔ a ɔtse dɛ ma nyikyerɛ yi kã ho asɛm dɛ: “adzepa” na “ama [wɔ]aada ndzeyɛtsenenee pii edzi.” Nyimpa ho mboa som yi mfatoho pii wɔ wiadze mu a wɔnnkanee, ɔtra hɛnankasa hɛn nyina hɛn nyimdzee ne hẽ. Morodwen iyi ho no, modween ho dɛ Mormon Nwoma mu nkɔnhyɛnyi-ɔhen Benjamin a, ne nsɛmpa onnyiewiei nokwar yi kã ho: “Ber biara a hom bɔsom hom nuanom no nna hom Nyame ara na hom rosom no no.”3
Yieyɛ na nyimpa ho mboa som ma hɛn mfɛfo adasa no Jesus Christ N’Asɔr a ɔwɔ hɔ ma Nda a Odzi Ekyir Ahotseweefo na hɛn asɔrmba no kyerɛkyerɛ na yɛdze dzi dwuma so. Mfatoho, yɛkyer kɔm bosoom ahyɛase biara na yɛdze annyɛ yie koraa no edziban a yeenndzi no boa hɔn a wohia wɔ hɛn ankasa hɛn mboanofo mu. Asɔr no so ma ntoboa kɛsenara ma nyimpa ho mboa na som binom so wɔ wiadze nyina mu.
Dza Asɔr no yɛ tɔɔtsen nyina ekyir no, nyimpa ho mboa som ne kɛsenara ma Nyame ne mba a wɔwɔ wiadze nyina mu no, nkorɔfo na ekuwekuw a wonnye hɛn nnyi nkitahodzi wɔ bagua mu na wɔyɛ. Tse dɛ ma hɛn Asomafo hɔn mu ɔbaako hyɛɛ no nsew no: “Nyankopɔn dze nyimpa kuw pii reyɛ n’edwuma kɛse a ɔyɛ nwanwa. … Ɔdɔɔ sõ dodow, ɔyɛ dzen dodow, ma nyimpa kuw kor biara.”4 Dɛ yɛyɛ Asɔr no a wɔdze asan ananmu aba asɔrmba no ohia dɛ yehu no yie na binom hɔn som no ayɛ hɛn enyisɔ yie.
Jesus Christ N’Asɔr esi no pi dɛ wɔbɔsom hɔn a wohia, na oesi no pi so dɛ wɔnye binom bɛyɛ bataboa wɔ dɛm mbɔdzembɔ no mu. Ndaansa yi yɛmaa United Nations World Food Program [Amansan Nkabɔmu Kuw Wiadze Edziban ho Nhyehyɛɛ] akyɛdze kɛsenara. Mfe du mfe du pii mu hɛn nyimpa ho mboa edwuma mu no ekuw ebien bi da edzi a yɛnye hɔn dzi dwuma kɛse: dwuma horow a yɛnye Red Cross na Red Cresent edwuma ekuw a wɔwɔ aman pii mu ayɛ ama Nyame ne mba mboa a ohia kɛse wɔ ɔdomankoma esian na akõkoekõ mber mu. Dɛmara so, yɛayɛ mboa ama Catholic Relief Services mber tsentsen. Ekuwekuw yinom akyerɛkyerɛ hɛn dodow afa mboa ne mmae wɔ wiadze nyina mu.
Yɛnye ekuwekuw binom so abɔmu edzi dwuma pii a Muslim Aid, Water for People, na IsraAID kã ho, sɛ yɛrobɔ edzin kumabaa a. Nyimpa ho mboa kuw biara wɔ bea a nankasa ɔawea ho dze, naaso hɛn nyina yɛkyɛ botae kor dɛ yebɛyɛ mboa dze ehuan Nyame ne mba hɔn amandzehu do. Iyinom nyina kã Nyankopɔn n’edwuma ma Ne mba ho.
Ndɛ mber nyikyerɛ kyerɛkyerɛ dɛ hɛn Agyenkwa, Jesus Christ, nye nokwar kan no a ɔma ɔdasanyi biara a ɔba wiadze yi mu kan no” 5 Ɔnam iyi ntsi, Nyame ne mba nyina wɔama hɔn kan dɛ wɔnsom No na hɔnho nkorkor dɛ mbrɛ hɔn nyimdzee na mbɔdzembɔ botum ayɛ.
Mormon Nwoma no kyerɛkyerɛ dɛ “adze biara a [ɔ]twetwe nyimpa ma wɔkɔ do yɛ papa, na dɛ … wobotum adɔ Nyankopɔn na wɔasom no no, Nyankopɔn na okenyan.”6
Ɔrosɔw do:
“Na hwɛ, wɔdze Christ no Sunsum ama ɔdasanyi biara, ama oeehu papa fi bɔn ho; dɛm ntsi, merekyerɛ hom kwan a wɔfa do bu atsɛn; adze biara a ɔtwetwe hom ma hom yɛ papa, na ɔkã hom ma hom gye Christ dzi no odua Christ no tum nye n’akyɛdze do. …
“Na afei, mo nuanom, … hom ehu kan a hom bodua do dze ebu atsɛn yi, dɛm kan no a ɔyɛ Christ ne kan no.”7
Nyame ne mba binom a wɔroboa Nyame ne mba binom wɔ hɔn ehyiadze tsitsir wɔ edziban, ayarhwɛ, na adzekyerɛ ndzɛmba ho mfatoho na odzi do yi:
Mfe du a abasen kɔ no, Kandharis ebusua, Sikhsomfo okun na yer a wɔwɔ United Arab Emirates, hɔn ankasa hyɛɛ mbɔdzembɔ soronko bi ase dɛ wɔbɛma hɔn a ɔkɔm dze hɔn no edziban. Sesei wɔfa Guru Nanak Darbar ne Sikhsom temple do dze rekyekyɛ ebunebun edziban bɔbor 30,000 dapɛn ewiei biara ma obiara a ɔhɛn hɔn mbobow no mu a, wo nyamesom anaa ebusuakuw mmfa ho. Datser Kandhari kyerɛkyerɛ mu dɛ, “Yɛgye dzi dɛ hɛn nyina yɛyɛ kor, yɛyɛ Nyame kor ne mba, na yɛwɔ ha dɛ yɛbɔsom adasa.”8
Wɔrema yarba ho edur na dza wɔdze hwɛ sẽ do ma hɔn a wɔwɔ ahohia mu no yɛ mfatoho kor so. Chicago mu no, mehyiaa Syrianyi-Americanyi datser a ɔhwɛ hɔn a wɔnnda yie koraa do, Datser Zaher Sahloul. Ɔkã hɔn a wɔtseew MedGlobal a, wɔhyehyɛ adatserfo a wɔawea ma wotu hɔn mber, nsaano ndwuma, nyimdzee, na baanodzi dze boa nkaafo a wɔwɔ mbusu kɛse mu, tse dɛ Syria ɔkõ no, bea a Datser Sahloul ɔannhwehwɛ no nkwa nko na ɔmaa amamfo no ayarhwɛ. MedGlobal na ekuwekuw a wɔtse dɛm (a Latter-day Saintfo edwumayɛfo a wɔawea kã ho) ma ɔda edzi dɛ Nyankopɔn rekenyan nyamesomfo edwumayɛfo a wɔawea ma wɔdze mboa abrɛ ehiafo wɔ wiadze nyina mu.9
Nyame ne mba a wɔnnyɛ pɛsɛankonya kã adzekyerɛ mbɔdzembɔ ho wɔ wiadze nyina mu so. Mfatoho kor a oye, a yenyim osian hɛn nyimpa ho mbɔdzembɔ horow, no nye banyin bi a wɔfrɛ no Owura Gabriel, a ɔayɛ tukɔrnyi mpɛn pii a ɔnam akõkoeko ahorow do, no dwumadzi. Ɔhyɛɛ no nsew ndaansa yi dɛ tukɔrfo mbofra a wɔwɔ Africa Anee mpem ɔha mpem ɔha no hia dɛ wɔma hɔn enyidado na hɔn adwen nkenyanee. Ɔhyehyɛɛ akyerɛkyerɛfo binom a wɔwɔ tukɔrfo dɔm no mu yɛɛ hɔn dza wɔfrɛ no “ndua skuul,” bea a mbofra no boa ano wɔ dua bi no nwin ase. Ɔanntweɔn binom mma wɔannhyehyɛ anaa wɔamma kwankyerɛ mbom ɔno ankasa na odzii mbɔdzembɔ no kan a ɔmaa primary skuul mbofra mpempem nyaa adzesua ho kwan wɔ dɛm atseetsee mber no a woefi hɔn tsenabew horow mu no.
Nyew, mfatoho ebiasa no nnkyerɛ dɛ dza ekuwekuw yinom kãe anaa wɔyɛe anaa ankorankor a wɔse wɔyɛ nyimpa pa anaa Nyame nyimpafo no tse dɛm nokwar ara. Mfatoho yinom kyerɛ hɛn dɛ Nyankopɔn kenyan ekuwekuw na ankorankor ma wɔyɛ papa pii. Ɔkyerɛ dɛ hɛn mu dodow na ɔsɛ dɛ yehu papa a binom ayɛ na yɛama botae no abamba ber a yɛwɔ mber na ahonya a yɛdze bɛyɛ.
Som binom a Asɔr no ma ho abamba na hɛn asɔrmba na nyimpa papafo binom na ekuwekuw so ma ho abamba a wɔdze ankorankor ntoboa a ɔyɛ mber na sika ho mfatoho na odzi do yi:
Medze nyamesom ho ahotɔ hyɛ ase. Yɛrema ɔno ho abamba no yɛboa hɛnankasa hɛn yiedzi na nyamesom nkaa no hɔn yiedzi. Tse dɛ mbrɛ hɛn President a odzi kan, Joseph Smith kyerɛkyerɛɛ no, “Yɛgye ndzinoa no to mu dɛ ɔwɔ dɛ yɛsom Otumfo Nyame wɔ kwan a hɛn tsibowa kã kyerɛ hɛn, na yɛma nyimpa nyinara ndzinoa kor noara bi dɛ wɔnsom dɛ mbrɛ wɔpɛ, bea a wɔpɛ, anaa dza wɔpɛ.”10
Asɔr no a wɔdze asan ananmu aba no nyimpa ho mboa na mboa binom so a hɛn asɔrmba ma ho abamba etuhoakyɛ mu ho mfatoho binom so nye hɛn skuul, college, na esũapon a wɔayɛ atsenkã na hɛn ntoboa akɛse ma mboa dze ma hɔn a wɔretseetsee a ɔnam ɔsɛɛ horow a ofi ɔdomakoma mbusu mu, tse dɛ ehum akɛse na asaase-wosow a, nkyɛ dodow nnyim ho hwee a mbom sesei wotsimtsim dze pue guado.
Adɔyɛ dwumadzi horow a hɛn asɔrmba dze hɔn etuhoakyɛ ntoboa na mbɔdzembɔ ma ho abamba no dɔɔ sõ dodow dɛ yɛbɛkã no nkorkor, naaso makã kakra yi ara no bɛkyerɛ hɔn ahorow na ehiadze: yɛnye ebusuakuw enyimtsiabu na nyiyimu binom no ridzi esi, eduryɛ na yarba nsiwdze ho nhwehwɛmu, mboa ma hɔn a woedzi dzɛm, ndwom ekuwekuw abamba, na ɔbra pa na sɔn mu mpontu ma obiara.
Jesus Christ N’Asɔr a ɔwɔ hɔ ma Nda a Odzi Ekyir Ahotseweefo nyimpa ho mboa mbɔdzembɔ nyina hwehwɛ dɛ obedzi atseneneefo a wɔakã hɔn ho asɛm wɔ Mormon Nwoma mu no hɔn fasusu do: “Na hɔn prɔmprɔmyɛ mber yi mu no, woennyi hɔn a wɔda adagyaw, anaa ɔkɔm dze hɔn, anaa nsukɔm dze hɔn, anaa wɔyaryar, … edzi na wɔyɛɛ ayamuyie maa obiara, mpanyimfo na mbofra, nkowaa na adehye, mbanyin nye mbaa, dɛ wonnyi asɔr no mu anaa wɔwɔ asɔr no mu.”11
Megye dase wɔ Jesus Christ ho, Ɔno a ne kan na Sunsum ma Nyame ne mba nyina kwankyerɛ ma wɔboa hɔn a wohia na wɔretseetsee wɔ wiadze nyina mu. Jesus Christ ne dzin mu, amen.