Ma W’Ahoɔdzen Do Hyɛ, O Zion

“Na Jesus … kasaa kyerɛɛ hɔn mbɛbu mu bio dɛ,

“Ɔsor Ahenman tse dɛ ɔhen bi a ohyiaa ayefor maa ne babanyin,

“Na ɔsomaa no nkowaa dɛ wɔnkɛfrɛ hɔn a wohyiaa hɔn ayefor ase no, na wɔammpɛ dɛ wɔba.

“Bio, ɔsomaa nkowaa afofor dɛ wɔnkɛkã nkyerɛ hɔn a woehyia hɔn no dɛ, Hwɛ, mesiesie m’edziban, meku m’anantwi nye m’anyɛmbowa, na woewie adze nyinara yɛ: hom mbra ayefor ase.

“Na wɔammfa annyɛ hwee, na wɔkɔr hɔn beebi, obi kɔr no kwã mu, obi so kɔr n’eguadzi ho.”⁷

Tsetse ber no, dza osi a ɔyɛ enyigye kɛse wɔ Jewfo hɔn abrabɔ mu nye ayeforhyia aponto—adze a ɔkɔ do dapɛn anaa dapɛn ebien mpo. Dɛm aponto yi hia ahoboaboa ara yie, ahɔho no wɔto hɔn nkra ansaana ber no aso koraa, na wɔkaa hɔn da no a aponto no rehyɛ ase no. Nsato a ofi ɔhen hɔ kɔ ne mamfo hɔ dɛ ayeforhyia dɛ iyi no , tsitsir ara wosusu no dɛ ɔyɛ nhyɛ. Naaso, hɔn a wɔtoo hɔn nkra no wɔ abɛbu yi mu no dodowara ammba.⁸

“Eropow dɛ ibɛba ɔhen n’aponto no yɛ enyidahɔ etuatsew tsia … ɔdehye no tumdzi na enyansɔ a otsia ɔhen a odzi adze no na ne babanyin. … Na banyin bi ɔkɔr no kwã mu, obi so ɔkɔr [n’eguadzi ho]”⁹ kyerɛ dɛ wonnyim dza ohia kɛse na ɔhen ne pɛ a wɔmmfa nnyɛ hwee.¹⁰

Abɛbu no kɔ do:

“Nna ɔsee no nkowa no dɛ, Woewie ayefor pon no siesie dze, na hɔn a wokehyiaa hɔn no annsɛ hɔn.

“Dɛm ntsi hom nkɔ atsempon nkwanta do na dodowara a hom bohu no, hom mfrɛ hɔn mbra ayefor ase.

“Na nkowaa no fiir edzi kɔɔr atsempɔn do, na wɔkɔboaboaa dodowara a wohun hɔn no ano, papa nye bɔn nyina, ma edzidzifo hyɛɛ ayefor no ase mã.”¹¹

Nda yinom mu amambra no nyia ɔreyɛ ayeforhyia aponto no—abɛbu yi mu, ɔhen no—ɔma ahɔho a wɔaba ayeforhyia no ntar. Ayeforhyia ntar a ɔtse dɛm no da famu, egudo atar a ɔnnyɛ nwanwa na hɔn a wɔba no nyina hyɛ. Kwan yi do no, dzibew na bea ifi nnda edzi, na obiara ɔwɔ aponto no ase tum dzi afora dɛ etsipɛn.¹²

Nkorɔfo a wɔtoo nsa frɛɛ hɔn wɔ atsempɔn kwan do dɛ wɔmbra ayefor no rennya mber anaa ahonya a wɔdze benya atar a ɔfata dze ayɛ ahosiesie ama dwumadzi no. Dɛm ntsi, bɛyɛ dɛ ɔhen no maa ahohɔ no ntar fi noara ne ntar dan mu. Wɔmaa biara kwan dɛ wɔmfa efuradze a ɔfata adehye.¹³

Ber a ɔhen no baa ayeforhyia bea no, ɔtoow n’enyiwa hwɛɛ dɔm no na ntsɛmara ohun ɔhɔhɔ kor a ɔda edzi yie dɛ ɔnnhyɛ ayeforhyia atar. Wɔdze banyin no ba kan, na ɔhen no bisaa dɛ, “Nyɛnko, eyɛɛ dɛn baa mu ha, na nnhyɛ ayeforhyia atar yi? Na ɔtɔɔ mmum.”¹⁴ Korakora no, ɔhen no bisaa dɛ, “Dɛn ntsi na nnhyɛ ayeforhyia atar yi, wɔama wo bi mpo nye yi?”¹⁵

Nna banyin no nnhyɛ atar a ɔfata mber soronko no, na asɛnsin no, “Na ɔtɔɔ mmum,” kyerɛ dɛ nna banyin no nnyi siantsir pa biara.¹⁶

Elder James E. Talmage ma nkyerɛkyerɛ nkasaho wɔ banyin no ne ndzeyɛɛ ne siantsir: “Hɔho no a ɔnnhyɛ egudo atar no afom enyibugu do, ɔgye enyim ara mmbu adze, anaa mfom akɛse binom so, a ɔda edzi fi asɛm no mu. Ahyɛse no nna adom mu ara ɔhen no rohwehwɛ siantsir ara banyin no sii baa mu a ɔnnhyɛ ayeforhyia atar. Nkyɛ ɔhɔho no tumii kyerɛkyerɛ siantsir a n’ahosiesie ɔnntɔ kã, anaa sɛ ɔwɔ anoyi papa bi a, nkyɛ mbrɛ ɔbɛdan biara ɔbɛkasa, mbom wɔkã kyerɛ hɛn dɛ ɔtɔɔ mmum. Ɔhen ne frɛ no wɔdze ama hɔn nyina a no nkowaa kehyiaa hɔn no; mbom hɔn mu kor biara bodua ahenfie abobow no mu ahɛn mu; na ansaana obodu bea a wɔroto pon no, kor biara bɛhyɛ atar papa; mbom nyia ɔnnhyɛ bi no, ɔfaa kwan bi do duaa mu bae; na ɔammfa aweɔmfo no nkyɛn wɔ abowano no, ɔkyerɛ dɛ ɔyɛ owifo.”¹⁷

Christiannyi ɔkyerɛwfo, John O. Reid, hyɛɛ no nsew dɛ banyin no a ɔpoow dɛ ɔbɛhyɛ ayeforhyia atar no kyerɛɛ ntsɛn mu ara, “obu a onnyi koraa ma ɔhen no na ne babanyin no.” Nnyɛ dɛ onnyi ayeforhyia atar; mbom, ɔbɔɔ adwenpɔw dɛ ɔnnkɛhyɛ bi. Etuatsew mu ara ɔpoow dɛ ɔbɛhyɛ atar a ɔfata aponto no. Ɔhen no buae ntsɛmara na no kwan do: “Hom nkyekyer ne nsa nye n’anan na hom mfa no nkɔ nkɔtow no nkyen ekyirkyir sum no mu; hɔ na osũ nye asetwɛr bɔwɔ.”¹⁸

Ɔhen n’atsɛmbu wɔ banyin no do nngyina ayeforhyia atar a onnyi do—mbom dɛ, nokwar, “ɔagye enyim dɛ ɔnnkɛhyɛ bi. Nna banyin no … pɛ enyimnyamhyɛ dɛ ɔakɔ ayeforhyia aponto no ase mbom … nna ɔmmpɛ dɛ odzi ɔhen no n’amambra no do. Ɔpɛ dɛ ɔyɛ adze wɔ ɔnoara no kwan do. Ɔnnhyɛ atar a ɔfata no da no mu etuatsew a ɔdze tsia ɔhen no na ne nkyerɛkyerɛ no edzi.”¹⁹

Nkyii abɛbu no dze kyerɛwsɛm a ɔgye ndwendwen ho no wie: “Na wɔafrɛ pii, na kakraabi na wɔapa hɔn.”²⁰

Enyigye mu ara, Joseph Smith yɛɛ nsesã kakra wɔ nyiyimu yi a ofi Matthew wɔ ne nkenyan Bible nkyerɛasee no mu: “Wɔafrɛ dodowara, mbom kumaabi na wɔapa hɔn; dɛm ntsi hɔn nyina nnhyɛɛ hɔn ayeforhyia atar no,”²¹

Nsato ba ayeforhyia na pɛ dɛ ibɔkɔ aponto no ase no nnyɛ adze kor mbom wɔbɛn. Wɔto nsa frɛ mbanyin na mbaa nyina. Obi botum ɔagye nsato no ato mu na ɔakɛtsena aponto no ase—naaso wɔnnkɛsan mu eyi no osiandɛ onnyi ayeforhyia atar a ɔfata a ɔyɛ nsakyeree gyedzi wɔ Jesus Christ na Na adom mu a wɔdze kɔ. Dɛm ntsi, yɛwɔ Nyame ne frɛ na hɛn ankorankor mbuae ma dɛm ɔfrɛ no nyina, na dodowara na wɔfrɛ hɔn mbom kumaabi na wɔsan mu yi hɔn.²²

Wɔbɛsan mu eyi wo anaa wonnkeyi wo nnyɛ hɛn nko ndzinoa a wɔadze ahyɛ hɛn do. Mbom, emi na ɔwo no ewiei no ɔnam hɛn pɛ a yɛdze yɛ tsenenee ndwuma no na ɔkyerɛ dɛ wɔbɛsan mu eyi hɛn no.

Meserɛ hom nhyɛ nsɛmfua wɔasan mu eyi a ɔwɔ Nkyerɛkyerɛ na Ahyɛmudzi nyiyimu a yenyim yi:

Hwɛ, wɔbɛfrɛ dodowara, na mbom kumaabi na wɔbɛsan mu eyi hɔn. Na ebɛnadze ntsi na wɔrennsan mu nnyi hɔn?

“Osiandɛ hɔn akoma dzi wiadze ndzɛmba ekyir, na wɔper hwehwɛ nyimpa hɔ enyinyam ntsi.”²³

Megye dzi dɛ nyiyimu yinom n’asekyerɛ da edzi yie. Nyankopɔn nnyi hɔn a wɔwɔ N’enyim pa a wɔakyerɛw hɔn edzin nkorkor a, otwar dɛ yenya enyidado dɛ dabi wɔdze hɛn edzin bɛkã ho. Onnsiw “hɔn a wɔasan mu eyi hɔn” dɛ wɔnyɛ kumaabi. Mbom ɔyɛ, hɛn akoma, hɛn apɛdze, hɛn bu a yɛdze ma asɛmpa ahyɛmudzi na ayɛdze horow, hɛn setsie ma mbrasɛm no, na, dza ohia tsitsir no, Agyenkwa n’adom na ehumbɔbɔr ɔpon no na ɔkyerɛ dɛ yɛkã hɔn a Nyame asan mu eyi no.²⁴

“Na yesi nketse kyerɛw dze adandan hɛn mba, na hɛn enuanom so, ma wɔaagye Christ edzi, na wɔaakã hɔn nye Nyame abɔmu; osiandɛ yenyim dɛ dza yebotum ayɛ nyinara ekyir no wɔnam adom do na wɔbɛgye hɛn nkwa.”²⁵

Hɛn daa daa abrabɔ mu ahokyer na begyabegyayɛ a ɔwɔ wiadze a yɛtse yi mu no, obotum aba dɛ hɛn enyi bɛdan efi onnyiewiei ndzɛmba a ohia tsitsir ho ber a yɛma hɛn ehiadze kɛse yɛ ahoɔdɛw, ahonya, ehurahura, na abawdobɔ. Mber tsiabaa a yɛdze dzi “wiadze ndzɛmba ekyir” na “nyimpa hɔ enyimnyam” no begya hɛn ma yɛahwer hɛn sunsum mu awoo mu panyin ma dza onndu boodoo na noae mpo.²⁶

Misi Ewuradze no kɔkɔbɔ a odzi dua Ahyɛmu Dadaw nkɔnhyɛnyi Haggai no do: “Dɛm ntsi mbrɛ dɔm Ewuradze se nye; Hom ndwendwen hom akwan ho.”²⁷

Hɛn mu kor biara wɔdɛ oker hɛn honandua mu na sunsum mu dza ohia kɛse nokwar mu na mpaabɔ mu ara dze hu hɛn abrabɔ mu ndzɛmba horow a osiw nhyira prɔmprɔm a Ɔsor Egya na Agyenkwa no pɛ dɛ wɔdze hyira hɛn. Sunsum Krɔnkrɔn no bɔboa hɛn ma yehu hɛnho dɛ mbrɛ yɛtse ankasa.²⁸

Ber a yehwehwɛ wɔ no kwan do, sunsum mu akyɛdze a ɔyɛ enyiwa a wɔdze hu na asowa a wɔdze tse no,²⁹ mobɔ anohoba dɛ wɔdze tum na adwen pa behyira hɛn a yɛdze bɛhyɛ hɛn ahyɛmu nkitahodzi a yɛnye Ewuradze tseasefo wɔ no dzen. Yebenya nyamesu mu tum wɔ hɛn abrabɔ mu³⁰na ewiei no wɔafrɛ hɛn na wɔasan mu eyi hɛn aba Ewuradze n’aponto no ase.

“Soɛr, soɛr ma w’ahoɔdzen do hyɛ, O Zion.”³¹

Osiandɛ ɔwɔ dɛ Zion n’ahoɔfɛw nye no krɔnkrɔnyɛ nya mpontu; ɔwɔ dɛ wɔtserɛw n’ahẽ do; wɔmma ne stake horow no mu nyɛ dzen; nyew, nokwar, mese hom dɛ, ɔwɔ dɛ Zion soɛr na ɔfa n’atar fɛɛfɛw hyɛ.”³²

Mepaa mu kã me dase enyigye mu ara dɛ Nyankopɔn, hɛn Onnyiewiei Egya yɛ krɔnkrɔn tseasefo ampaara no na No Dɔba Jesus Christ. Megye dase dɛ Jesus Christ nye hɛn Agyenkwa na Pomfo, na Ɔtse ase. Na megye dase so dɛ Egya no na Ɔba no puei banyimba Joseph Smith do, dɛm ntsi wɔhyɛɛ Agyenkwa n’asɛmpa wɔ Nda a odzi ekyir yi mu ne Nsanananmu no ase. Hɛn nyina nhwehwɛ na wɔmfa enyiwa a ohu na asowa ɔtse nhyira hɛn, mobɔ ho mpaa wɔ Ewuradze Jesus Christ ne dzin krɔnkrɔn no mu, amen.