Xpaab’ankil lix tzol’leb’ li Kristo

Sa’ lin k’a’uxl, naru nawil laj Nefi naq ak tiix, chi chunchu chiru li meex helhookeb’ wi’ li perel ch’iich’ oor, ut wan xtz’iib’leb’ sa’ ruq’.

Laj Nefi yoo chaq chixchoyb’al li esil yoo chixtz’iib’ankil. Aʼan kixtzʼiibʼa, “Ut anajwan, ex was wiitzʼin raarookex inbʼaan, ninkʼe xraqik inyehom.”¹ A’ut ka’ch’in chik chirix a’an, li Musiq’ej kireek’asi xch’ool laj Nefi re taasutq’iiq rik’in li esilal ut tixtz’iib’a chik li aatin. Naq kireek’a xwankil li Santil Musiq’ej, li nimla profeet aʼan kixchap wi’chik lix tz’iib’leb’ ut kixtz’iib’a, “Joʼkan ut, tz’aqalin rik’in li k’a’aq re ru ak xintz’iib’a, ka’aj chik junjunq li aatin tento tinye chirix li tzol’leb’ re li Kristo.”²

Maak’a’jo’ naq naqab’antioxi li “junjunq li aatin” a’an,³ ut naq li Musiq’ej kireek’asi xch’ool laj Nefi re tixtz’iib’a. Li raatin laj Nefi chirix lix tzol’leb’ li Kristo a’an jun nimla b’ihomal choq’ reheb’ li ani neke’xtzeka xsahil a’an. Naxye resil jun k’utb’esinb’il matk’ chirix lix kub’ik xha’ li Kolonel,⁴ ut lix yaab’ xkux li K’ajolb’ej li naxye qe naq taqataaqe a’an⁵ ut “taaqab’aanu li k’a’ru xqil a’an chixb’aanunkil.”⁶ Naxye lix ch’olob’ahom laj Nefi, naq eb’ li wankeb’ xpaab’al chirix li Kristo, li neke’xjal xk’a’uxl chirix lix maak, ut neke’xtaaqe li Kolonel toj sa’ xha’il li kub’iha’, “te’xk’ul li Santil Musiq’ej, relik chi yaal, tojaʼ ut naq nachal li kub’iha’ re xam ut re li Santil Musiq’ej.”⁶ Naqab’i ajwi’ lix yaab’ xkux li Yuwa’b’ej li kixye: “Relik chi yaal, li raatin li Raaro inb’aan, yaal ut paab’ajel. Ani nakuyuk toj saʼ rosoʼjik, aʼan li taakoleʼq.”⁸

Li Awa’b’ej Russell M. Nelson x’aatinak chirix xnimal xwankil lix tzol’leb’ li Kristo naq kiraatinaheb’ laj b’eresinel re mision li toja’ xe’b’oqe’: “Li q’axal naqaj laa’o, a’an naq eb’ li misioneer … te’xk’am lix tzol’leb’ li Kristo chi tz’iib’anb’il sa’ xch’ooleb’—chi xxe’enb’il … sa’ xsulutz lix b’aqeb’.”⁹

Sa’ Predicad Mi Evangelio wankeb’ oob’ li roqechal lix tzol’leb’ li Kristo. Naxye, “Naqatenq’aheb’ li qas qiitz’in chixk’ulb’al li evangelio li k’ojob’anb’il wi’chik, rik’in xpaab’ankil li Jesukristo ut lix tojb’al rix li maak, xjalb’aleb’ xk’a’uxl, kub’eek xha’, xk’ulb’al li maatan re li Santil Musiq’ej, ut kuyuk toj sa’ roso’jik.”¹⁰

A’ut lix tzol’leb’ li Kristo ink’a’ ka’ajwi’ nak’anjelak choq’ reheb’ li misioneer! Ut a’an mas nim wi’chik xwankil chiru yal xyeeb’al li oob’ chi na’leb’ wan chi sa’. A’an naxsut rix li chaq’rab’ re li evangelio. A’an li nimla k’uub’anb’il na’leb’ re li junelik yu’am.

Ex was wiitz’in, wi naqaj xk’ulub’ankil li raatin li Awa’b’ej Nelson naq taakanaaq lix tzol’leb’ li Kristo chi xe’enb’il sa’ xsulutz li qab’aqel tento taqachamob’resi lix jalajik qach’ool chiru li Qaawa’ rik’in tzolok, tijok, yu’amink chi tiik, ut xjalb’al rajlal qak’a’uxl. Tento taqakanab’ li Santil Musiq’ej chixtz’iib’ankil lix na’leb’ li Kristo “chiru tib’elej, chiru xperam li qach’ool”¹¹ chi kaw ut chi ch’olch’o, jo’ chanru naq kitz’iib’aman chiru li perel ch’iich’ oor.

Sa’ li octubre xnume’, li Awa’b’ej Nelson xpatz’, “K’a’ru naraj naxye numtaak sa’ xb’een li ruchich’och’?” Jo’ xcha’al lix k’utum, a’an xye, “Naraj naxye xpaab’ankil lix tzol’leb’ li Kristo mas wi’chik chiru xna’leb’ li winq.”¹²

Li aatin xpaab’ankil jo’ na’oksiman arin sa’ Ingles, naraj naxye xk’eeb’al qib’ sa’ ruq’ a’an, xnawb’al naq yaal, ut naq tixk’am chaq junaq chaab’ilal chalel.”¹³ A’an li Jesukristo, ut a’an lix tzol’leb’.

Chan ru naq xpaab’ankil lix tzol’leb’ li Kristo tixjal chan ru nokowan sa’ li qayu’am?

Wi naqapaab’ lix tzol’leb’ li Kristo, taqapaab’ ajwi’ li Kristo, ut taqayal qaq’e chixyu’aminkil li raatin.¹⁴ Tootzoloq chiru chixjunil li qayu’am chirix li Jesukristo,¹⁵ lix k’utum, ut lix tojb’al rix li maak xb’aan ut lix waklijik chi yo’yo. Tootzoloq chirix li k’a’ru kixyeechi’i, ut k’a’ru tento taqab’aanu re xk’ulb’al li k’a’ru kixyeechi’i.¹⁶ Naq tootzoloq, toonujaq rik’in nimla rahom choq’ re li Dios.

Wi naqapaab’ lix tzol’leb’ li Kristo, tootijoq chi tuulan qach’ool chiru li qaChoxahil Yuwa’ wulaj wulaj, re tooruuq chixk’utb’al li qab’antioxihom choq’ re li maatan re li Ralal ut chixjunil li qosob’tesinkil.¹⁷ Naru nokotijok re xtz’aamankil naq toorochb’eeni li Santil Musiq’ej¹⁸ re xjayalinkil li rajom qach’ool rik’in li re,¹⁹ re xk’oxlankileb’ li qasumwank ut x’ak’ob’resinkil lix yalb’al qaq’e chixpaab’ankileb’.²⁰ Naru nokotijok re xxaqab’ankil xwankileb’ ut xk’utb’al qarahom choq’ reheb’ li qaprofeet, aj ilol na’leb’, ut aj k’utb’esinel;²¹ re xk’ulb’al li wankil aj saqob’eresinel re li jalb’a-k’a’uxlej;²² ut re xk’ulb’al li metz’ew chixtz’eqtaanankil li aaleek.²³ Nekexinb’oq chixyalb’al eeq’e chi tijok rajlal, chi jo’kan xchaab’ilob’resinkil lee komonil rik’in li Dios wulaj wulaj.

Wi naqapaab’ lix tzol’leb’ li Kristo, taqakanab’ li k’a’aq re ru re li ruchich’och’ a’in, re taqajayali qib’ rik’in laj Kolol re li ruchich’och’.²⁴ Taqak’os ru malaj taqak’e xraqik li hoonal naqanumsi sa’ medios sociales, rik’ineb’ li b’atz’uul digital, ut rik’in li maa’usil numsib’aal hoonal, li jo’maajo’il na’leb’ re li ruchich’och’, ut yalaq k’a’ru taak’amoq qe rik’in lix b’alaq’il na’leb’eb’ li winq. Ka’ajwi’ rik’in li Kristo naqataw li yaal ut nanujak chi tz’aqal li qaam chi junelik.

Li jalb’a-k’a’uxlej chi anchal ch’oolej²⁵ taak’ehoq sahil ch’oolejil²⁶ sa’ li qayu’am—re xk’ulb’al xkuyb’al li qamaak, ut re xk’ulb’al lix jalam-uuch li Kristo sa’ li qilob’aal.²⁷ Li jalb’a-k’a’uxlej rik’in paab’aal chirix li Kristo nokoxtenq’a chixk’ulb’al lix tojb’al rix li maak li Kristo. Li Awa’b’ej Dallin H. Oaks xye naq li Kolonel, naq naxkuy li qamaak, “ink’a’ ka’ajwi’ naxsaqob’resi qu. Jo’kan ajwi’ naxk’e chik qametz’ew.”²⁸ Chiqajunilo naqaj ru li metz’ew a’in re xpaab’ankileb’ lix taqlahom li Dios ut re xtz’aqob’resinkil ru lix junelikil ajom li qayu’am.

Rik’in li Jesus ut lix tzol’leb’, naqataw kawilal. A’an kixye, “Chi yaal, chi yaal, ninye eere, naq a’in lin tzol’leb’ ut ani nakab’lak sa’ xb’een a’in nakab’lak sa’ xb’een insaqoonaq, ut li rokeb’aal xb’alb’a ink’a’ taanumtaaq sa’ xb’eeneb’ a’an.”²⁹

Naqak’e reetal naq natz’aqlok ru li yeechi’ihom a’in sa’ xyu’ameb’ li tiikeb’ chi paab’ank. Jun chihab’ chaq, laa’in xinnaw ru laj Travis ut li xKacie. Eb’ a’an xe’sumla sa’ 2007. Sa’ li kutan a’an, laj Travis toj maji’ na’ok choq’ komon sa’ li Iglees. Li xKacie, us ta xyo’la sa’ jun ochoch reheb’ laj Santil Paab’anel sa’ Roso’jikeb’ li Kutan, naq yoo chi nimank xkanab’ lix paab’aal, ut moko wan ta chik sa’ li Iglees.

Sa’ 2018, laj Travis xnaweb’ ru li misioneer, ut xkub’e xha’ sa’ 2019. Laj Travis x’ok choq’ misioneer choq’ re li xKacie, ut a’an ajwi’ xjale’ xch’ool ut xjal lix yu’am. Eb’ a’an xe’tz’ape’ sa’ junajil sa’ li santil ochoch sa’ septiembre re 2020. Maare wiib’ chihab’ chirix naq xkub’e xha’, laj Travis xb’oqe’ chi k’anjelak sa’ jun obispil.

Laj Travis wan jun xyajel li rajlal naxk’e chi moqk naab’al li kok’ tumor sa’ xsa’. K’iila sut xcho’e’ re risinkileb’ li kok’ tumor, a’ut ink’a’ naru xk’irtesinkil li yajel. Wiib’ oxib’ chihab’ chaq, xe’xye re laj Travis naq taakamq naq maji’ nanume’ lajeeb’ chihab’ chik.

Li xKacie wan jun xyajel lix sa’ li ru retinitis pigmentosa xk’ab’a’, li timil timil nak’osok re li k’a’ru na’ilman, toj reetal naq mutz’ nakana.

Li xKacie x’aatinak wik’in chirix li k’a’ru chalel. Naxnaw naq moko najt ta chik li kutan naq taakanaaq choq’ xmalka’an, chi mutz’, chi maak’a’ xtumin, ut xjunes rib’ yooq chixk’iresinkileb’ li ralal xk’ajol, kaahib’eb’. Laa’in xinpatz’ re lix Kacie k’a’ru naxk’oxla chirix li ch’a’ajkilal a’an. A’an sa sa’ rilob’aal naq xye, “Laa’in maajun wa wanjenaq xsahil inch’ool ut xnimal inyo’onihom jo’ anajwan. Laa’o naqachap qib’ chiruheb’ li yeechi’ink xqak’ul sa’ li santil ochoch.”

Anajwan, laj Travis a’an obiisp. Wiib’ po chaq xcho’e’ wi’chik. A’ut sa ut tuqtu lix ch’ool. Li xKacie xniman xyajel lix sa’ ru. Anajwan natenq’aak xb’aan jun li tz’i’, ut ink’a’ chik naru chi b’eresink ch’iich’. A’ut k’ojk’o xch’ool, yoo chixk’iresinkileb’ lix kok’al, ut nak’anjelak jo’ aj tenq’ sa’ li awa’b’ejil reheb’ li Saaj Ixq.

Laj Travis ut li xKacie yookeb’ chixkab’lankil li rochocheb’ sa’ xb’een li saqoonaq. Laj Travis ut li xKacie neke’xpaab’ lix tzol’leb’ li Kristo, ut li yeechi’ihom naq li Dios “taarosob’tesiheb’ lix ch’a’ajkilaleb’ choq’ re xchaab’ilaleb’.”³⁰ Sa’ lix k’uub’anb’il na’leb’ li Dios li tz’aqal re ru, li rahob’tesiik chi toj wan qapaab’aal chirix li Jesukristo k’amb’il tz’aqal rib’ rik’in li tz’aqlok e-u rik’in li Kristo.³¹ Jo’ li winq chaab’il xna’leb’ li kikab’lan sa’ xb’een li saqoonaq,³² naq natikla li hab’, naq nachal b’uut’iha’, naq na’apun li iq’ ut naxpik’a rib’ chiru li ochoch li yookeb’ chixkab’lankil laj Travis ut li xKacie, a’an ink’a’ taat’ane’q, xb’aan naq kab’lanb’ilaq sa’ xb’een jun saqoonaq.³³

Li Jesus moko kixye ta naq maare taachalq li hab’ ut li iq’ sa’ li qayu’am, kixye naq ch’olch’o ru naq te’wakliiq li kaq-sut-iq’. Li jaljookil ru aatin a’in moko naxpatz’ ta ma te’chalq li kaq-sut-iq’; naxpatz’ b’an ma yooko chixtaaqenkil lix b’oqom li Kristo re rab’inkil ut xb’aanunkil li kixk’ut.³⁴ Maak’a’ chik junaq b’e re kuyuk.

Wi kab’lanb’il li qochoch sa’ xb’een li saqoonaq re li sumwank rik’in li Kristo, yooko chixpaab’ankil lix tzol’leb’ li Kristo, ut naq nokochal rik’in a’an, ut yeechi’inb’ilaq qe li junelik yu’am. Eb’ li neke’paab’ank re lix tzol’leb’ li Kristo neke’xtiikisi rib’ chi uubʼej chi xaqxookebʼ junelik rikʼin li Kristo ut neke’kuyuk toj sa’ roso’jik. Maajun chik b’e wan li naru tookole’q wi’ sa’ li rawa’b’ejihom li choxa.³⁵

Ninch’olob’ xyaalal li Qaawa’ Jesukristo, naq xwakli chi yo’yo. Ninch’olob’ naq li Dios li qaYuwa’ kixra li ruchich’och’, ut kixtaqla li Ralal re qakolb’al chiru li maak³⁶ ut re xk’irtesinkil lix rahil qach’ool.³⁷ Ninch’olob’ naq a’an xb’oq jun xprofeet li Dios sa’ li kutan wanko wi’, a’an li Awa’b’ej Russell M. Nelson, ut nokoraatina ut naxk’am qab’e rik’in a’an.

Chi anchal inch’ool, nintz’aama cheru laa’ex naq teepaab’ lix tzol’leb’ li Kristo ut teekab’la lee yu’am sa’ xb’een li saqoonaq re laj Tojol qix. Maajun wa texxkanab’. Sa’ xk’ab’a’ li Jesukristo, amen.