Laa wosob’tesinkil xb’aan li yuwa’b’ejil aj k’anjel—Jun musiq’anb’il b’eresinel naxk’e li qaChoxahil Yuwa’

Kink’iiresiik xb’aaneb’ chaab’il na’b’ej yuwa’b’ej li ke’xra ut ke’xk’ut chi tiik li evangelio chiqu, eb’ li ralal xk’ajol. Ra xyeeb’al, a’b’an lin raarookil na’ inyuwa’ ke’xtaw xch’a’ajkilal sa’ lix sumalileb’ chiru k’iila chihab’. Toj wankin chaq sa’ li Tzoleb’aal reheb’ li Kok’al naq kiyehe’ we naq maare te’xjach rib’ ut naq laa’in ut eb’ li was wiitz’in tento taqasik’ ru ani aj chi-ix tooxik chi wank. Chi jo’kan naq chiru naab’al li chihab’ kinnumsi rahil ch’oolejil; a’b’anan, jun xmaatan lin Choxahil Yuwa’ kixjal lin yu’am—li wosob’tesinkil xb’aan li yuwa’b’ejil aj k’anjel.

Naq wan chaq 11 chihab’ we, chi nim ink’a’uxl chirix lix jachb’aleb’ rib’ lin na’ inyuwa’, kiweek’a naq nawaj li rosob’tesihom li yuwa’b’ejil aj k’anjel. Kinnaw naq lin Choxahil Yuwa’ naxnaw tz’aqal wu ut naxnaw li k’a’ru ninnumsi. Kinnaw ajwi’ naq tink’ul inb’eresinkil rik’in a’an. Naq kinket 12 chihab’, kink’ul li rosob’tesihom li yuwa’b’ejil aj k’anjel. A’an numenaq meero cient chihab’, a’b’an najultiko’ we chi tz’aqal li kik’ulman sa’ li loq’laj hoonal a’an.

Us naq wan li qamusiq’anb’ileb’ na’leb’ chirix li rosob’tesihomeb’ li yuwa’b’ejil aj k’anjel sa’ li Jolomil K’anjenel Hu re li Iglees:

“Li junjunq chi komon li kub’enaq xha’ ut k’ulub’ej naru naxk’ul jun rosob’tesihom li yuwa’b’ejil aj k’anjel, sa’ li k’eeb’il wi’ li na’leb’ li nachal rik’in lix Choxahil Yuwa’.”

Jun komon tento naq “tz’aqalaq xna’leb’ re xtawb’al ru xnimal xwankil ut xloq’al li osob’tesink a’an” ut “tixtaw ru li tzol’leb’ re li evangelio.”

“Us raj, naq li komon toj saajaq re naq toj naab’al chi us li k’a’ru chal re chiru. … Eb’ laj jolominel sa’ li tijonelil tento naq ink’a’ te’xsik’ ruheb’ li komon rik’ineb’ lix chihab’ re naq tixk’ul li rosob’tesihom li yuwa’b’ejil aj k’anjel. …

“Li rosob’tesihom li yuwa’b’ejil aj k’anjel loq’ ut re li junjunq. …

“Jun kristiaan li naxk’ul rosob’tesihom li yuwa’b’ejil aj k’anjel tento naq taaroxloq’i li raatin, tixtz’il rix ut taawanq chi k’ulub’ej re xk’ulb’aleb’ li osob’tesihom yeechi’inb’il re li yu’am a’in ut sa’ li junelik q’e kutan.”¹

Li qaraarookil Awa’b’ej Russell M. Nelson k’iila sut naxk’ut naq aajel ru li rosob’tesihom li yuwa’b’ejil aj k’anjel,² naq naxk’e re li ani nak’uluk re “jun ch’olob’anb’il aatin chirix lix sumwanjik toj rik’in laj Abraham, laj Isaak, ut laj Jakob”³ ut naq chixjunileb’ li osob’tesink “a’an loq’laj aatin choq’ eere laa’ex.”⁴

Li wosob’tesinkil xb’aan li yuwa’b’ejil aj k’anjel jwal aajel chaq ru choq’ we naq toj saajin chaq xb’aan naab’al li na’leb’. Xb’een, rik’in lix wankil li Santil Musiq’ej, kinixtenq’a chaq chixtawb’al ru b’ar nin’el chaq—anihin tz’aqal ut ani naru ninwulak wi’ chi wank. Kinixtenq’a chixnawb’al, jo’ kixk’ut li Awa’b’ej Nelson, naq laa’in “jun ralal li Dios,” jun “[alalb’ej] sa’ li sumwank,” ut jun “moos choq’ re li Jesukristo.”⁵ Kinnaw naq lin Choxahil Yuwa’ ut li Jesukristo neke’xnaw wu ut naq nikine’xra ut naq eb’ a’an neke’tz’aqon tz’aqal sa’ lin yu’am. A’in kinixtenq’a chirajb’al nach’ok rik’ineb’ a’an ut xnimob’resinkil lin paab’aal ut lix kawil inch’ool chirixeb’.

Jun chaab’il wamiiw li ki’ok choq’ komon sa’ li Iglees naq toj ch’ajom chaq kixwotz: “Naq li yuwa’b’ejil aj k’anjel kixk’e li ruq’ sa’ xb’een injolom ut kixye lin k’ab’a’, chixjunil kijala, … moko ka’ajwi’ ta sa’ li hoonal a’an, chiru ajwi’ chixjunil lin yu’am. Sa’ junpaat kink’e reetal naq—sa’ xk’ab’a’ li wankilal li yoo wi’ chi aatinak—naxnaw wu chi tz’aqal re ru. Li aatin kixye ki’ok tz’aqal sa’ chixjunil lin cha’al. Kinnaw naq lin Choxahil Yuwa’ naxnaw wu chi ixb’ej ut chi sa’.”

Li xnawb’al anihin tz’aqal kinixtenq’a chixtawb’al ru ut chirajb’al li k’a’ru naroyb’eni li Dios wik’in.⁶

A’an kinixk’am chi tzolok chirix li sumwank li kin’ok wi’ ut eb’ li osob’tesihom yeechi’inb’ileb’ sa’ lix sumwank li Dios rik’in laj Abraham.⁷ Kixk’e jun wilob’aal sa’ li junelikil q’e kutan li kinixmusiq’a chiroxloq’inkileb’ lin sumwank chi tz’aqal.

Kintzol li wosob’tesinkil kixk’e li yuwa’b’ejil aj k’anjel chi kok’ aj xsa’, ut naq toj saajin, rajlal kutan, li kinixtenq’a chireek’ankil lix k’ojob’ahom ut lix b’eresihom li Santil Musiq’ej, li kinixtenq’a ajwi’ chirisinkil xrahil lin ch’ool naq nintaaqe a’an. A’an kixnimob’resi li wajom chixb’oqb’al li saqen, li yaal, ut li Santil Musiq’ej rik’in xtzolb’aleb’ li loq’laj hu ut rik’in tijok rajlal kutan; ut xyalb’al xtzolb’aleb’ ut xtaaqenkileb’ lix k’utum li profeet ut eb’ lix apostol li Dios. Li wosob’tesinkil kixk’e li yuwa’b’ejil aj k’anjel kinixtenq’a ajwi’ chirajb’al wank chi tuulan wi’chik chiru lin Choxahil Yuwa’, ut a’an kinixtenq’a chireek’ankil xnimal xsahil inch’ool, us ta li wankin wi’.⁸

Kink’ul inkawilal sa’ musiq’ej rajlal naq kintzol li wosob’tesinkil kixk’e li yuwa’b’ejil aj k’anjel. Naq eb’ lin na’ inyuwa’ ke’xjach rib’, li wosob’tesinkil, jo’ kixk’ut li Awa’b’ej Thomas S. Monson, kiwulak choq’ jun “nimla terto xtz’aq maatan,” jo’ tz’aqal “jun Liahona.”⁹

B’aanu usilal, maataw ru a’in chi jalan. Moko tz’aqal ta chaq we wu. Naab’al li sachk kink’ul. Li wixaq’il tixye raj naq toj ninb’aanu. A’b’an li wosob’tesinkil kinixtenq’a ut toj nikinixtenq’a chirajb’al chaab’ilo’k ut chi wank chi chaab’il.¹⁰ Li xtzolb’al li wosob’tesinkil chi kok’ aj xsa’ kixnimob’resi li wajom chixkuyb’al li aaleek. Kinixtenq’a chirajb’al ut chixkawob’resinkil inch’ool chixjalb’al ink’a’uxl, ut li jalb’a-k’a’uxlej kiwulak jo’ jun sahil ch’oolejil.

Tz’aqal aajel ru choq’ we naq kink’ul li wosob’tesinkil naq toj saajin chaq ut naq toj yoo chaq chi k’iik lix nawom inch’ool. Junelik tinb’antioxi naq eb’ lin na’ inyuwa’ ut lin obiisp ke’xtaw ru naq li wajom kixye naq ak kawresinb’ilin chik.

Naq wan chaq we 12 chihab’, li ruchich’och’ moko jwal sachso ta chaq jo’ sa’ li kutan a’in. Li Awa’b’ej Nelson naxye naq li kutankil a’in a’an chanchan “jun kutan naq jwal ch’a’aj jo’ maajun wa chalen chaq xtiklajik li ruchich’och’,” jun ruchich’och’ li “nujenaq rik’in li maak” ut “q’etq’etil.”¹¹ Us tana naq eb’ li qasaaj sa’eb’ li kutan a’in jwal chaab’ileb’ wi’chik xna’leb’ chiwu laa’in naq wan chaq we 12 chihab’, ut wan ajwi’ li k’a’ru tento te’xsik’ ru naq toj saajeb’! Aajel ajwi’ ru naq te’xnaw aniheb’ tz’aqal ut naq raab’ileb’ xb’aan li Dios ut naq neke’nawe’ tz’aqal ruheb’!

Maare ink’a’ chixjunileb’ te’raj xk’ulb’al li rosob’tesihom li yuwa’b’ejil aj k’anjel jo’ naq kinb’aanu laa’in. A’b’an nintz’aama chiruheb’ li komon li maji’ neke’xk’ul li rosob’tesinkil naq te’xyal xq’e rik’in tijok, chixnawb’al ma ak kawresinb’ileb’. Ninyeechi’i eere naq wi nekekawresi eerib’ sa’ musiq’ej, lee numsihom, jo’ li we laa’in, k’a’jo’aq xloq’al choq’ eere. Nintz’aama ajwi’ chiruheb’ li ani ak xe’xk’ul li rosob’tesinkil naq te’xtzol ut te’xk’uula sa’ xch’ooleb’. Lix k’uulankil li wosob’tesinkil sa’ inch’ool naq saajin chaq kinrosob’tesi rik’in kawilal naq kiweek’a xlub’ik inch’ool, rik’in k’ojob’ank naq kiwan inxiw, rik’in tuqtuukilal naq kintawa, rik’in oyb’enihom naq maak’a’ woyb’enihom ut rik’in sahil ch’oolejil naq kiwaj ru. Li wosob’tesinkil kinixtenq’a chixnimob’resinkil lin paab’aal chirix lin Choxahil Yuwa’ ut lin Kolonel. Kixnimob’resi ajwi lin rahom choq’ reheb’ a’an—ut toj naxnimob’resi anajwan.¹²

Ninch’olob’ xyaalal naq li rosob’tesihom li yuwa’b’ejil aj k’anjel naxk’e qe lix musiq’ejil b’eresihom li qaChoxahil Yuwa’. Ninwotz xnawom inch’ool naq yo’yo li qaYuwa’ sa’ Choxa ut li Ralal—li qaKolonel, Jesukristo—li neke’xnaw qu, nokohe’xra, ut neke’raj qosob’tesinkil. Ninnaw ajwi’ chi yaal naq li Awa’b’ej Russell M. Nelson a’an lix profeet li Dios sa’ xb’een li ruchich’och’ sa’eb’ li kutankil a’in. Sa’ xk’ab’a’ li Jesukristo, amen.