Lix sumenkil a’an rajlal li Jesukristo

Ex raarookil was wiitz’in, xoonujob’resiik rik’in li Musiq’ej chiruheb’ li wiib’ kutan a’in. Li ch’uut aj b’ichanel jwal ch’ina-us. Li xe’aatinak a’aneb’ aj k’anjel chiru li Qaawa’. Nintz’aama naq teesik’ naq li Musiq’ej texxtenq’a chixtzolb’aleb’ li yaal li xk’utman cheru arin. Relik chi yaal taqlanb’ileb’ chaq sa’ choxa.

Chiru li xamaan chal re a’an li domingo re Paswa. A’an li k’anjel jwal aajel ru choq’ reheb’ lix tzolom li Jesukristo. Xb’aan li Paswa naq naqaninq’ehi li Ralankil. Li na’leb’ wan sa’ Kim, Taaqehin re li xamaan a’in texxtenq’a chixtzolb’al li rokik li Kolonel aran Jerusalen, naq kixyamtesi li santil ochoch, li rahilal kixk’ul sa’ Getsemani, naq ke’xk’e chiru krus, lix waklijik chi yo’yo, ut naq kixk’ut rib’ chiruheb’ lix tzolom.¹

Cheyal xsahileb’ li loq’laj raqal a’in ut tawomaqeb’ li na’leb’ li texruuq chiroksinkil re xb’antioxinkil chiru li qaChoxahil Yuwa’ naq kixtaqla chaq li Ralal jun chirib’il.² Sa’ xk’ab’a’ li Jesukristo, naru naqajal qak’a’uxl ut neke’kuye’ li qamaak. Sa’ xk’ab’a’ a’an, chiqajunilo toowakliiq chi yo’yo.

Nekexinb’oq ajwi’ chixtzolb’al wi’chik li seraq’ chirix lix k’ulunik li Kolonel rik’ineb’ laj Nefita sa’ li ch’och’ America, jo’ tz’ii’banb’il resil sa’ 3 Nefi. Rub’elaj lix k’ulunik, ki’ab’iman jun xyaab’ kuxej sa’ xyanqeb’ li tenamit, jo’kan ajwi’ eb’ li aatin a’in re tz’aamank:

“Ma ink’a’ anajwan texsutq’iiq wik’in, ut teejal eek’a’uxl chirix lee maak, ut taajale’q’ eech’ool re taaruuq texink’irtesi?

“… Kehomaq reetal, ye’b’il li wuq’ aj uxtaan eere, ut ani taa’ajoq re chalk, a’an tink’ul.”³

Ex was wiitz’in, li Jesukristo naxk’e ajwi’ li b’oqom a’an choq’ eere anajwan. Nintz’aama cheru naq texchalq rik’in a’an re naq a’an taaruuq texxk’irtesi laa’ex! A’an tixk’irtesi lee maak rajlal naq teejal eek’a’uxl. A’an texxk’irtesi chiru li rahil ch’oolejil ut li xiw. A’an tixk’irtesi lee rahilal k’eeb’il xb’aan li ruchich’och’ a’in.

A’ yaal k’a’ru lee patz’om malaj lee ch’a’ajkilal, lix sumenkil rajlal wan sa’ xyu’am ut xk’utum li Jesukristo. Tzolomaq eena’leb’ chirix lix tojb’al rix li maak, lix rahom, li ruxtaan, lix tzol’leb’, ut lix evangelio re k’irtesink ut chaab’ilo’k. Cheesik’ a’an! Chetaaqe a’an!

Li Jesukristo a’an xyaalal naq neke’kab’laman li santil ochoch. Li junjunq chi santil ochoch re a’an. Li ok sa’ sumwank ut xk’ulb’aleb’ li k’ojob’anb’il k’anjel aajel ru sa’ li santil ochoch, jo’ ajwi’ li nach’ok rik’in li Jesukristo aran, taarosob’tesi lee yu’am chi numtajenaq wi’chik chiru junaq chik na’leb’. Xb’aan a’an naq yooko chixyalb’al qaq’e re naq chixjunileb’ li komon sa’ li ruchich’och’ te’xk’ul rosob’tesihom li santil ochoch. Anajwan nasaho’ inch’ool chixyeeb’al resileb’ li santil ochoch li te’kab’lamanq sa’eb’ li na’jej a’in:

• Retalhuleu, Guatemala

• Iquitos, Peru

• Teresina, Brasil

• Natal, Brasil

• Ciudad de Tuguegarao, Filipinas

• Iloilo, Filipinas

• Yakarta, Indonesia

• Hamburgo, Alemania

• Lethbridge, Alberta, Canada

• San Jose, California

• Bakersfield, California

• Springfield, Misuri

• Charlotte, North Carolina

• Winchester, Virginia

• Harrisburg, Pennsylvania

Ex was wiitz’in, ninch’olob’ xyaalal naq a’ li Jesukristo najolomin re chixjunileb’ li k’anjel wan sa’ lix Iglees. Ninch’olob’ xyaalal naq li b’e re xtawb’al li sahil ch’oolejil inka’a’ na’oso’, ka’ajwi’ natawman rik’in xtaaqenkil a’an. Ninnaw naq lix wankilal yoo chi kub’eek sa’ xb’een lix tenamit li neke’xyu’ami lix sumwankeb’, “chi kawresinb’ileb’ rik’in tiikilal, ut rik’in lix wankil li Dios sa’ nimla loq’alil.”⁴ Jo’kan ninch’olob’, rik’in inrahom choq’ eere, sa’ lix loq’laj k’ab’a’ li Jesukristo, amen.