Era sa Vakayacora Tiko na Nodra iTavi

Ena yabaki 1947 a vakananumi kina na ika 100 ni yabaki ni nodra yaco na imatai ni painia ni Yalododonu Edaidai kina Buca e Salt Lake. E vuqa na marautaki ni ivakananumi a vakayacori ena yabaki oya, ka tawawili rawa na levu ni vakavinavinaka e cavuti vei ira na tisaipeli yalodina i Jisu Karisito era carasala, taravale, tei kakana ena vanua dravuisiga, ka tawana na vei itikotiko.

O Peresitedi J. Reuben Clark, na imatai ni daunivakasala ena Mata Veiliutaki Taumada, a tauca e dua na vakavinavinaka guiguilecavi dredre ka veilauti vei ira na painia yalodina ena koniferedi raraba ni Okotova 1947.

Ena nona vosa, e cavuti ira kina vakalekaleka o Peresitedi Clark na iluliu rogo era liutaka na toki kina ra, me vakai Brigham Young, Heber C. Kimball, Wilford Woodruff, Parley P. Pratt, kei na vuqa tale. Ia, na nona inaki bibi sai koya me kua ni taleva lesu na nodra rawaka na veituraga rogo oqo. Ia me vakanamata na nona vosa vei ira na tamata yalodina ka sega ni kilai na yacadra se volai tu vakaivola ena itukutuku makawa ni Lotu. Na ulutaga veivakararamataki ni nona itukutuku oya, “O Ira ena iOtioti ni Qiqidreti.”¹

A vakamacalataka vakamatailalai o Peresitedi Clark na nodra itovo ni bula kei na bolebole era sotava na vodo tiko ena iotioti ni qiqidreti ena vei iyatu balavu yadua ni qiqidreti era takosova na buca. E vakacaucautaki ira na tamata qaqa tawakilai na yacadra era ceguva na kuvu ni soso ka ceburaki mai vei ira na qiqidreti ka liu tiko vei ira, ena veisiga, veimacawa, kei na veivula yadua—era vorata na veivakataotaki sega ni cegu era a sotava ena nodra ilakolako.

A vakaraitaka o Peresitedi Clark, “O ira ena iotioti ni qiqidreti era a toso ki liu, wawale ka oca, momosi na yava, so na gauna era yalolailai sara, ia era vakayaloqaqataki ena nodra vakabauta ni lomani ira na Kalou, ni dina na kosipeli vakalesuimai, kei na Turaga e liutaki ira ka dusimaki ira na Veitacini ka ra tiko mai liu.”²

A tinia na nona vosa ena ivakamacala oqo: “Ki vei ira na tamata yalomalumalumu oqo, cecere ena vakabauta, cecere ena cakacaka, cecere ena bula dodonu, cecere ena tarai cake ni noda ivotavota isau levu, au solia ena yalomalumalumu na noqu loloma, noqu veidokai, noqu qoroqoro ena vakarokoroko.”³

Ena 1990, o Peresitedi Howard W. Hunter, ka a Peresitedi tiko ni Kuoramu ni iApositolo Le Tinikarua, a tauca edua na vosa me baleta na nodra cau, yaga na lewe ni Lotu tawawili rawa era veiqaravi vagumatua kei na yalodina ka ra a sega ni ciqoma edua se sega sara ga na veivakacaucautaki.

A vakamacalataka o Peresitedi Hunter:

“A tukuni me baleti [Kavetani Moronai na cauravou yaloqaqa]:

“Kevaka era sa tautauvata kei Moronai ko ira kece na tamata era sa mate yani, kei ira sa bula tiko edaidai kei ira era na qai bula e muri, raica sa na kuretaki me sega ni mudu na kaukauwa kei eli; io sa na sega tale ga ni rawata na lomadra na luve ni tamata o koya na tevoro.’ (Alama 48:17).

“Sa dua dina na veivakacaucautaki levu vua edua na turaga kilai levu ka qaqa. E tiko ena rua na tikina ki muri na itukutuku baleti Ilamani kei ira na wekana, ka ra a sega soti ni kilai levu me vakai Moroni, e va oqo:

“Raica oqo, ko Ilamani kei ira na wekana, era sa yaga talega vei ira na tamata me vakataki Moronai.’(Alama 48:19).”

A tomana o Peresitedi Hunter, “Ena dua tale na kena ivosavosataki, e dina ga ni a sega ni kilai se rogolevu o Ilamani me vakataki Moronai, ia e tamata; dau veivukei se yaga vakalevu me vakataki Moronai.”⁴

A qai vakasalataki keda kece sara o Peresitedi Hunter meda kakua ni tamata tawayaga. A kaya, “Ke o vakila ni levu na ka o cakava ena yabaki oqo se na veiyabaki se bera mai e sega nio kilai kina, kua ni yalolailai. E levu sara na tamata vinaka era a bula era a sega tale ga ni kilai levu. Veiqaravi lo, ka tubu ena yalodina.”⁵

Au vakavinavinaka vei ira na milioni na lewe ni Lotu era sa lako tiko mai vua na iVakabula⁶ ka toso tiko i liu nikua ena salatu ni veiyalayalati ena iotioti ni qiqidreti ni noda iyatu qiqidreti—era sa vakayacora dina tiko na nodra itavi. Na kaukauwa ni nomuni vakabauta na Tamada Vakalomalagi kei na Turaga o Jisu Karisito kei na bula yalomalumalumu, ka vakatabui e vakauqeti au meu tamata ka tisaipeli vinaka cake.

Au lomani kemuni. Au qoroi kemuni. Au vakavinavinakataki kemuni. Au vakacaucautaki kemuni.

Edua na itukutuku ena iVola i Momani mai vei Samuela na Lemanaiti e vakaraitaka vakavinaka na itovo ni yaloqu baleti kemuni.

“Ia au gadreva mo ni kila ni lewevuqa cake vei ira era sa vakayacora tiko na nodra itavi, era sa lako vakadodonu tiko ena mata ni Kalou ka ra sa raica me ra muria na nona ivunau, kei na nona ilesilesi kei na nona lewa me vaka i Mosese. …

“Io, au sa kaya vei kemuni, ni ra lewevuqa cake vei ira era sa kitaka tiko na ka oqo, era sa sasagataka sara tiko vagumatua ena yalodina me ra vakatavulici ira na wekadra mera kila na dina.”⁷

Au vakabauta ni malanivosa “era sa cakava tiko na nodra itavi” e vakamacalataki ira tiko na veitacini kei na veiganeni yalomatua era vaqara me dabe vata kei ira na tamata era tu duadua ena veisoqoni ni lotu kei na vei ituvaki tale eso. Era saga e veigauna me vakacegui ira era gadreva na veivakacegui,⁸ era sega ni namaka mera kilai se vakacaucautaki.

Na malanivosa na “era vakayacora tiko na nodra itavi” e vakamacalataki ira na veiwatini kei na gone ka ra tokona edua na itokani, itubutubu, se gone ka veiqaravi vakaveiliutaki tiko ena Lotu vakalesui mai ni Turaga. Na nodra veivakauqeti lo ka dei, ka sega ni dau kilai, e rawa kina mera vakalougatataki e vuqa na tamata kei na matavuvale ena sala eso ena qai kilai vakataucoko walega ena veigauna tawamudu.

Na malanivosa na “era vakayacora tiko na nodra itavi” e vakamacalataki ira na tamata, era vukitani mai vua na Kalou, ka ra sa lesu-tale mai vei Koya ena yalomalumalumu,⁹ veivutunitaka na nodra ivalavala ca, ka vaqara na kaukauwa ni veisavai kei na veivakabulai ni Veisorovaki ni iVakabula. Na lako mai vei Karisito¹⁰ ena lesu tale kina salatu ni veiyalayalati mai na lutu ki na ivalavala ca kina “veisala vakatabui”¹¹ e bibi ka dodonu vakayalo. Nira toso i liu ka sega ni oca ena caka vinaka, era sa tura tiko na yavu ni dua na cakacaka cecere ena nodra bula vakayadua,¹² “ena veitabatamata kecega kei na gauna tawamudu.”¹³

Na malanivosa na “era sa vakayacora tiko na nodra itavi” e vakamacalataki ira na tamata bula dodonu yadua era gadreva mera vauci vua na iVakabula ena veiyalayalati vakadonui kei na cakacaka vakalotu ni Nona kosipeli—ia a rawa nira tarovi mera cakava ena veika era sega ni lewa rawa. Au yalataka ni nomuni lomararawa vakayadua ena vakacegui kei na nomuni talairawarawa kei na yalodina me cabora ena vosota na lomamuni vua na Kalou ena saumi mai ena “gauna ga ni Turaga.”¹⁴ “Sa ia na tagi e na bogi, ia sa yaco ena mataka na marau.”¹⁵

Na malanivosa na “era sa vakayacora tiko na nodra itavi” e vakamacalataki ira na dauvakadewa kei na daulave vosa veivakauqeti e vuravura raraba ka ra qarava na Turaga ena nodra vukei ira na itokani kei na lewenilotu mera “rogoca na taucoko ni kosipeli ena [nodra] vosa, kei na [nodra] ivosavosa.”¹⁶ Na domodra, vosa ni galu, kei na ivola vakadewataki era tukuna na dina tawamudu, ia e lewe lailai vei keda eda kila na yacadra se bau vakaraitaka vei ira na vakavinavinaka. Ena isolisoli ni vosataka na vosa tani eso era sa vakalougatataki kina, era veiqaravi na dauvakadewa kei na daulave vosa ena gugumatua, sega ni nanumi ira, ka vakavuqa me tawakilai na yacadra me vukei ira na tamata mera ciqoma na isolisoli vakayalo ni vakabauta, ena wiliki kei na rogoci ni vosa ni Kalou.¹⁷

Na malanivosa na “era sa vakayacora tiko na nodra itavi” e vakamacalataki ira na turaga kei na marama vakawati era rokova na nodra veiyalayalati mera vakaluveni ka vakatawai vuravura, era vakalougatataki ena kaukauwa kei na igu mera qarauni ira na luvedra ena soqoni ni sakaramede. Ena dua na vuravura veilecayaki ka sinai ena veika rarawa kei na vakanuinui cala, o ira na tamata yaloqaqa oqo era sega ni vakarorogo ki na domo vakavuravura ka laveti kina na nanumi koya vakai koya; ia era rokova na savasava kei na bibi ni bula ena ituvatuva ni marau nei Tamada Vakalomalagi vei ira na luvena.

E vuqa na veiwatini era vakararavi tale ga vua na Kalou ena gauna e sega ni saumi kina na gagadre dodonu ni lomadra ena gauna kei na sala era a nuitaka se tadra. Era “waraka na Turaga”¹⁸ ka sega ni tukuna vua na Turaga me sotava na nodra gauna yalataki. “Ia mai na ivakatekivu kei vuravura era sa sega ni rogoca se ciqoma e daligadra na tamata, ka sega talega na mata e kunea, ka vakavo ga koi kemuni na Kalou, na veika cecere oni sa vakarautaka vei [ira] era sa waraki kemuni.”¹⁹

Na malanivosa na “era sa vakayacora tiko na nodra itavi” e vakamacalataki ira na udolu vaka udolu na veiliutaki ena isususu kei na qasenivuli ni lalai era lomani ira ka vakavulici ira na gonelalai ena Lotu ena vei Siga ni Vakacecegu yadua.

Vakasamataka mada na revurevu tawamudu ni nodra veiqaravi na tisaipeli yalodina oqo—kei na veivakalougatataki veivakurabuitaki e yalataki vei ira era veiqaravi vei ira na gonelalai.

“A sa kauta ko [Jisu] e dua na gone lailai, ka vakatura ena kedra maliwa: ia ni sa keveta, sa kaya vei ira,

“O koya yadua ena vinakata e dua na gonelailai vakaoqo ena vuku ni yacaqu, sa vinakati au: ia ko koya yadua sa vinakati au, sa sega ni vinakati au ga, sa vinakati koya talega sa talai au mai.”²⁰

Na malaivosa na “era sa vakayacora tiko na nodra itavi” e vakamacalataki ira na gone yalodina era veiqaravi vei ira na itubutubu qase ena yaloloma, edua na tina sega ni moce vinaka ka vakaceguya tiko edua na gone taqaya ni yadrava tiko na nona vale me vaka edua na “tina ni laione”,²¹ ira na lewe ni Lotu ka yaco taudonu ka suka bera me tuvana ka vakasuka na idabedabe, kei ira na tamata veivakauqeti yadua era sureta na matavuvale, itokani kei na ilawalawa mera lako mai ka raica, lako mai ka veivuke, ka lako mai ka mai tiko.²²

Au vakamacalataka e vica wale ga na ivakaraitaki digitaki ni tisaipeli dau maroroi veiyalayalati yalodina i Jisu Karisito era toso tiko i liu vakataki kemuni “ena vakayacori tiko ni [nodra] itavi.” E milioni tale na ikuri ni nodra ivakaraitaki na yalododonu edaidai era solia na “yalodra taucoko”²³ vua na Kalou, era kunei ena veivale yavutaki vei Karisito kei na veitaba ni lotu e veiyasa i vuravura.

Oni veiqaravi ena loloma, vakarorogo ka vuli, veikauwaitaki ka veivakacegui, veivakavulici ka soli ivakadinadina ena kaukauwa ni Yalo Tabu. Ia era sa daulolo ka masu vakawasoma, ka sa tubu ka kaukauwa cake tiko ga na nodra yalomalumalumu, ka sa dei ka tudei tiko ga na nodra vakabauta na Karisito, ka “vakasinaiti kina na [yalomuni] ena marau kei na vakacegu, io, ka sa vakasavasavataki ka vakatabui na [yalomuni], na veivakatabui sa yaco ena vuku ni … [nomuni] solia na yalomuni vua na Kalou.”²⁴

O ira ena iotioti ni qiqidreti, o ira kece era sa yaga tale ga, kei kemuni oni sa toso tiko ki liu nikua ni koni vakayacora tiko na nomuni itavi, oni sa duruvesi ni Lotu vakalesuimai ni iVakabula. Ka vaka e yalataka na Turaga, “raica ena vakatakilai mai vei ira sa gumatua ni muria na kosipeli i Jisu Karisito na itikotiko vakaturaga, na veimatanitu, na matanitu vakatui, kei na kaukauwa.”²⁵

Au sa vakadinadinataka ena reki ni Rau bula tiko na Tamada Vakalomalagi kei na Luvena lomani, sa dei na Nodrau vosa ni yalayala, ena yaca tabu ni Turaga o Jisu Karisito, emeni.