Oi Keda Na Luvena.

O nanuma lesu beka na veika a sotava na parofita o Samuela ena gauna a talai koya na Turaga ki na vale nei Jese me lumuta na tui vou kei Isireli? A raici Iliapi o Samuela, na ulumatua nei Jese. O Iliapi, a tamata balavu ka irairai vaka e dua na iliuliu. Sa raica oqo o Samuela ka sa vakadeitaka sara. Ia a yaco oqo me digidigi cala toka, ia na Turaga sa vakavulici Samuela: “Mo kakua ni raica na matana, se na kena balavu; ni sa raica na ka e sau ko ira na tamata, ia sa raica na yalo ko Jiova.”¹

O nanuma beka na ka a sotava o Ananaiasa na tisaipeli ni a talai koya na Turaga me masulaki Saula? Na irogorogo kei Saula sa kilai tu, sa rogoca o Ananaiasa baleti Saula ni sa tamata ca, ni sa vakacacani ira na Yalododonu. Sa rogoca o Ananaiasa ka sa vakadeitaka me sa kua ga ni laki masulaki Saula. Ia a yaco oqo me digidigi cala toka, ia na Turaga sa vakavulici Ananaiasa: “Ko koya oqo na tamata digitaki vei au, me kauta na yacaqu ki na matadra na veimatanitu tani, kei ira na tui, kei ira na luvei Isireli.”²

Na cala cava beka i Samuela kei Ananaiasa ena rua na ka oqo? Rau a rai e matadrau ka vakarorogo e daligadrau, sa yaco kina, me rau lewa sara vei ira eso e yavutaki ena kedra irairai kei na itukutuku.

Ni ra sa raica na vunivola kei na Farisi na yalewa sa dautagane tiko, a cava era sa raica? E dua na yalewa ca, ivalavala ca e dodonu me mate. Ni sa raici koya o Jisu, a cava a raica o Koya? E dua na yalewa sa rawai tu ki na malumalumu vakayago ia sa rawa me vakavoutaki ena veivutuni kei na Nona Veisorovaki. Ni ra sa raici turaganivalu na tamata, na nona tamata sa paralase tu, a cava era raica? Era raica beka ni viavialevu, tamata tani, ka me sa kau tani. Ni sa raici koya o Jisu, a cava a raica o Koya? Na tagane sa kauwai ki na bula ni dua nona lewenivale, sa gadreva na Turaga ena yalovinaka kei na vakabauta. Ni ra raica na yalewa na tamata sa tunidra balavu, a cava era raica? Na yalewa beka sa tawa savasava, sa kai tani me sa vakatikitiki. Ni sa raici koya o Jisu, a cava a raica o Koya? Na yalewa tautauvimate, galili ka tu duadua ena vuku ni ituvaki sa sega ni lewa, sa nuitaka me vakabulai ka me taukeni tale.

Ena kisi yadua, sa raici ira yadua na Turaga o cei o ira ka sa qaravi ira kina vakayadudua sara. Ni rau sa kaya o Nifai kei tacina o Jekope:

“Sa sureti ira kecega me ra lako mai vua … , na tamata loaloa kei na tamata vulavula, na bobula kei na galala, na tagane kei na yalewa; ka sa nanumi ira na tawa lotu; ka ra sa tautauvata na tamata kecega vua na Kalou.”³

“Ka sa talei vakatautauvata e matana na tamata kecega.”⁴

Me sa kakua kina ni liutaki keda na cala ni matada, daligada, se noda rere, ia me dolavi na yaloda kei na vakasama ka qaravi ira ena galala sa voliti keda tu me vakataki Koya.

Vica na yabaki sa oti, a taura na watiqu o Isabelle e dua na ilesilesi ni veiqaravi duatani. A kerei me sikova e dua na yada qase ena neimami tabanalevu, e dua na marama e tauvimate tu kei na nona galili sa laki bikai tu kina na nona bula. E sogo tu ga na nona ilatilati, ka boi osooso na nona vale, ka sega ni vinakata me sikovi ka vakamatatataka sara “e sega na ka meu cakava vua e dua.” A sega ni yavalati o Isabelle, ka kaya, “Io, e tiko! O rawa ni cakava e dua na ka o ya me keimami sikovi iko yani.” Sa qai lako o Isabelle, ena yalodina.

Dua na gauna e muri, na marama vinaka oqo a sele na yavana, ka gadrevi me na veisau na nona vadreti e veisiga, ka sega ni rawa me cakava ga o koya. Ena siga eso, a gole o Isabelle ki na nona vale, savata na yavana, ka veisau na vadreti. A sega ni raica na veika ca, ka sega ni boica. A raica ga e dua na luvena yalewa totoka na Kalou e gadreva me lomani ka karoni.

Toso na yabaki, au sa vakalougatataki kei na vuqa eso ena isolisoli nei Isabelle me rai me vakataka na Turaga. Se ko peresitedi ni iteki se dauveikidavaki ni tabanalevu, se ko tui kei Igiladi se ko tiko ena valelaca, se ko vosataka na nona vosa se dua tani tale, se ko muria kece na ivunau se luluqa tiko ena vica, ena vakani iko o koya ena nona kakana talei sara mai na nona veleti vinaka duadua. Na bula vakailavo, roka ni yago, itovo vakatamata, matanitu cava ga, itagede ni ivalavala dodonu, itutu raraba, se dua tale na vakatakilakila se itoqa sa sega ni dua na ka vua. Sa rai ena yalona; sa raica na luve ni Kalou ena tamata yadua.

E vakatavulica o Peresitedi Russell M. Nelson:

“O vunimeca e marautaka na keda irogorogo baleta ni na tawasei keda ka latia na sala eda vakasamataki keda kina kei na tamata yadua. Sa ka rarawa sara ni da doka vakalevu tiko na keda irogorogo ka sega ni da veidokai.

“Na irogorogo e rawa ni mua kina vakalelewa kei na yaloca. Na veivakacacani se na vakalelewa vakai keda baleta noda vanua, kawa, veisau ni yago tabu, yagonisucu, itagede ni vuli, itovo tudei, se so tale na ivakatakilakila sa cala vua na noda Dauveibuli!”⁵

O Varanise e sega ni oi au; oqo na vanua au a sucu ga kina. Na vulavula e sega ni oi au; sa roka ga ni yagoqu, se sega ni yacova. Na parofesa e sega ni oi au; e ka au cakava meu vukea noqu vuvale. Vitusagavulu ni Vakaitutu Raraba e sega ni oi au; sa vanua au veiqaravi tiko kina ena matanitu nikua.

“Taumada ka bibi duadua,” ni a vakananumi keda kina o Peresitedi Nelson, Au sa “luve ni Kalou.”⁶ Sa vakakina o iko; ka sa vakakina o ira era tiko voliti keda. Sa noqu masu meda sa vakavinavinaka vakalevu ki na dina totoka oqo. E veisautaka na ka kecega!

Eda susugi ena duidui itovo vakavanua; ka da lako mai ena bula vakailavo duidui; noda taukeni vakayago, oka kina na noda vanua, roka ni yagoda, kakana eda digitaka, bula vakapolitiki, kei na so tale ena duidui sara. Ia eda sa Luvena, oi keda kece ka sega e vakavo. Sa tautauvata noda itekitekivu vakalou ka vakakina na gugumatua tawayalani ena loloma soliwale i Jisu Karisito.

E kaya vakaoqo o C.S. Lewis: “E ka bibi sara meda bula voli ena itikotiko ni kalou kei na kalou yalewa, me nanumi ni tamata malumalumu ka tawa taleitaki sara mo na vosa kina ena rawa me laki tamata ena dua na siga, ke mo na raica nikua, ko na temaki vakaukauwa mo sokalou vua. Sa sega sara na tamata walega . O se bera mada vakadua ni vosa vua na tamata wale. Na vanua, itovo, ivakarau, veika vakatamata—era sa ka vakayago. kei na nodra bula kivei keda sa bula ni ka midi. Ia o ira na tawamate rawa eda sa veiwali kaya, cakacaka vata, vakamautaka, vosa beca, ka vakatanitaka.”⁷

E kalougata na noqu vuvale na laki bula tu ena matanitu duidui, itovo; ka kalougata na luvei keirau mera vakamau ena duidui kawa tamata eso. Au sa mai raica ni kosipeli vakalesuimai i Jisu Karisito sa iwali cecere sara. Ni da sa ciqoma vakaidina, “a Yalo oqo sa tukuna mai ki na yaloda, ni da sa luve ni Kalou.”⁸ Na dina cecere oqo sa sereki keda, kei na keda irogorogo kei na itutu e dau vaka me rawai keda kei na noda veimaliwai vakai keda meda sa “marau ga ena vuku i Karisito.”⁹ Sa matata sara mai ni o keda, kei na so tale, “sa qai sega tiko ni vulagi kina se kai tani, dou sa koro vata ga kei ira era sa lotu, ka dou sa lewe ni vale ni Kalou.”¹⁰

Au a rogoci koya na peresitedi ni tabana ni dua na neimami tabanilotu ni veimataqali vosa a kaya baleta oqo, ni o Elder Gerrit W. Gong a cakava, me taukeni ena veiyalayalati.¹¹ Sa dua na vakanananu totoka! Eda sa taukeni ki na dua na ilawalawa tamata era sa saga kece mera biuta na iVakabula kei na nodra veiyalayalati me usutu ni nodra bula ka bulataka na kosipeli ena reki. Oya, meda kakua ni raici keda ena iloilo buwawa ni bula vakayago, na kosipeli me makaretaka na noda rai ka rawa meda veiraici vakaikeda ena iloilo tudei tawacala ni noda veiyalayalati tabu. Nida cakava oqo, eda sa tekivu tagutuva kina na noda veitotaki vakayago kei na lewa cala vakai keda, sa yaco kina me na vakalailaitaka na nodra veitotaki vakayago kei na lewa cala kivei keda,¹² ena dua na wirini ni dodonu totoka. E dina, eda sa vakaio ki na veisureti ni noda parofita lomani: “Kemuni na taciqu kei na ganequ, na noda veimaliwai vakaikeda sa ka bibi! Na ivakarau ni noda vosa vei ira e vale, e valenilotu, ena cakacaka, se ena onolaini sa ka bibi dina Nikua, au vakamasuti keda meda sa veimaliwai kei ira na tamata ena sala cecere, ka vakalou sara. ”¹³

Ena yakavi nikua, ena yalo ni veisureti o ya, au via kuria ena noqu veivakadeitaki kivei ira na gone lalai totoka ni Lalai.

Au vakadinadinataka ni o Koya eda sa tukuna tiko ni sa Tamada mai Lomalagi sa Tamada dina sara, ni sa lomani keda, ka sa kila yadudua vakaidina na Luvena, ka sa kauwaitaki keda yadua vakatitobu, ka da sa tautauvata vakaidina kivei Koya. Au vakadinadinataka ni sala eda veimaliwai kina vakaikeda sa rarama ni noda kila kei na vakavinavinaka ki na solibula cecere kei na Veisorovaki ni Luvena, noda iVakabula, o Jisu Karisito. Sa noqu masu, me vakataki Koya, meda sa lomani ira eso baleta ni sa ka dodonu oqo meda cakava, sega ni baleta ni ra sa caka dodonu tiko se usumaka tiko na ituvaki “dodonu.” Ena yacai Jisu Karisito, emeni.