Na Noda iTokani e Veigauna

Kemuni na taciqu kei na ganequ lomani, ena koniferedi oqo eda sa vakalougatataki ena kena sovaraki mai na ivakatakila. Era sa vosa na italai ni Turaga ko Jisu Karisito ka ra na tukuna na vosa ni dina, veivakayaloqaqataki, kei na veidusimaki.

E tarai na ivakadinadina e mai wasei ena koniferedi oqo ni na Turaga e vosa veikeda yadududa ena Yalo Tabu. Nida masu ka muria na veivakauqeti ni Yalo, eda ciqoma edua na kilaka kei na veivakalougatataki me dusimaki keda ena vei siga dredre sa tu e matada.

Eda sa rogoca tale mai vei Peresitedi Russell M. Nelson na ivakaro, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”¹

Na ivakaro vakaparofita oqo ena muataki keda meda vakasamataka na cava au na vakavulica vei ira na luvequ, makubudu, kei na makabuqu vakarua ena rawa vakacava mera na dusimaki vakavinaka ena veisiga dredre sa tu vei ira.

Ia oqo edua na ivola vei ira na noqu kawa ena rawa ni vukei ira ena gauna au na sega ni tiko kina kei ira ena veisiga vakasakiti sa tu e liu. Au vinakata mera kila na cava au sa mai kila ena rawa ni vukei ira.

Au sa mai kila vakavinaka sara na cava ena vukei ira mena rawa ni tiko ga kei ira na veidusimaki ni Yalo Tabu ena siga eda bula tiko kina qo. Au vakila niu uqeti meu vosa nikua ena veika au a sotava ena noqu sureta na Yalo Tabu, ena noqu igu taucoko, me noqu itokani e veigauna. Na noqu masu sa ikoya meu na rawa ni vakauqeti ira.

Au na tekivu mera na vakasamataka ka masulaki ratou na luvei Ilamani, Nifai kei Liai, kei ira tale eso na dauniveiqaravi ni Turaga era cakacaka vata. Era sotava na veisaqasaqa kaukauwa. Era veiqaravi tiko ena dua na vanua dau caka ca ka sotava tiko eso na veivakacalai rerevaki sara. Au vakayaloqaqataki, ka ona rawa tale ga, ena dua na tikina oqo mai na ivolatukutuku i Ilamani:

“Ia ena ikavitusagavulu kaciwa ni yabaki, sa tekivu tubu cake sara na veileti. Ia sa yaco ni ko Nifai kei Liai kei na vuqa vei ira na nodrau itokani ka ra kila tu na uto dina ni vakavuvuli, era sa vunautaka vei ira na tamata na veika sa vakatakilai vei ira ena veisiga, ka ra sa tinia kina na nodra veileti ena yabaki tiko ga ko ya.”²

Na veika oqo e vakaueqti au, ka rawa ni vakauqeti kemuni tale ga. E rau vakavulici ka dusimaki na luvei Ilamani tagane mai na vica na ka e rau a sotava kei na Yalo Tabu. Oqo e vakadeitaka vei au ni rawa ni da vakavulici ka vuli mai vua na Yalo laini ena laini, ciqoma na ka eda gadreva, ka ena gauna eda sa tu vakarau kina eda na qai ciqoma e vuqa tale.

Au sa vakayaloqaqataki vakakina ena italanoa kei Nifai ni kerei me lesu tale i Jerusalemi me la‘i kauta mai na peleti i Lepani. O nanuma na digidigi o cakava. Ia e kaya, “Au na lako ka kitaka na ka sa vakarota na Turaga.”³

Na veika a sotava o Nifai vata kei na Yalo Tabu ena ilakolako oya, e solia vei au na yaloqaqa ena vuqa na gauna ni‘u tekivu cakava na itavi ka‘u kila ni ra lesi mai vua na Turaga, ia e vaka me ra dredre cake mai na ka au sa sotava oti ka sivia sara na veika au raica niu rawa ni cakava.

Oni nanuma na ka a tukuna o Nifai me baleta na ka a sotava: “A sa bogi na vanua; au sa kaya me ratou vuni [na taciqu] ena daku ni bai. Ia ni ratou sa vunitaki iratou toka, koi au, ko Nifai, au sa curu lo ki loma ni koro ka lako yani ki na vale i Lepani.”

A tomana o koya ka kaya: “A sa liutaki au tiko na Yalo, ka‘u a sega ni kila rawa tiko yani na ka meu na cakava.”⁴

Au sa vakayaloqaqataki ena noqu kila ni o Nifai e a liutaki mai vua na Yalo ena veiminiti yadua ena bogi oya ena veitalai ni Turaga.

Eda gadreva, ka ona gadreva, na veitokani ni Yalo Tabu. Oqo, eda gadreva, ia eda kila mai na veika eda sotava oti ni sega ni rawarawa na kena rawati. Eda nanuma ka tukuna, ka cakava eso na ka ena noda bula e veisiga ena rawa ni vakacudruya na Yalo Tabu.

Ni yaco oya, ena yaco dina, eda na rawa ni vakila ni sega ni vakadonui mai vua na Turaga. Ka eda na rawa ni temaki me da nanuma nida sa tu taudua. E bibi kina meda qai nanuma na yalayala dei eda ciqoma e veimacawa nida veivutuni ka vakaivotavota ena sakaramede: “Me na tiko ga kina kei ira na Yalona.”⁵

Kevaka o vakila na veivakauqeti ni Yalo Tabu nikua, sa rawa mo taura oya me ivakadinadina kamikamica ni sa cakacaka tiko na Veisorovaki ena nomu bula.

Me vaka sa tukuna oti o Elder Jeffrey R. Holland: “Ni dau yaco mai na noda veigauna ni dredre vakaoqo, me da kakua ni soro ki na noda taqayataka de sa biuti keda na Kalou se o Koya e sega ni dau rogoca na noda masu. E dau rogoci keda o Koya. E dau raici keda o Koya. E dau lomani keda o Koya.”⁶

Na veivakadeitaki oqori sa dau vukei au. Niu vakila niu yawa mai vua na Turaga, ni vaka me dau bera na isau ni noqu masu, au vulica meu muria na ivakasala i Peresitedi Nelson oya meu dikeva na noqu bula ena madigi eso meu veivutuni. E vakananumi keda o koya, ni “Veivutuni e veisiga sa ikoya na sala ki na savasava, ni savasava e kauta mai na kaukauwa.”⁷

Kevaka o raica ni dredre vei iko mo vakila na Yalo Tabu, ena rawa mo vakananuma se tiko beka e dua na ka e gadrevi mo veivutunitaka ka ciqoma na veivosoti.⁸ E rawa nio masu ena vakabauta mo kila na ka mo cakava mo vakasavasavataki ka kilikili cake kina me nomu itokani e veigauna na Yalo Tabu.

Ke o vinakata mo ciqoma na veitokani ni Yalo Tabu, e dodonu mo vinakata me baleta na inaki dodonu. Na nomu inaki e dodonu me inaki ni Turaga. Kevaka e nomu inaki mo vakaliuci iko vakai iko, ena dredre mo ciqoma ka vakaila na veivakauqeti ni Yalo.

Na kena idola vei au ka vaka kina vei iko e gadrevi medaru vinakata na veika e vinakata na iVakabula. Na noda inaki e gadrevi mena tosoi ena loloma savasava i Karisito. Era gadrevi na noda masu me “Na veika kece au vinakata sa ikoya na ka oni vinakata. Me yaco ga na nomuni lewa.”

Au dau tovolea meu dau nanuma na solibula ni iVakabula kei na Nona loloma vei au. Niu, masu vei Tamada Vakalomalagi meu vakavinavinaka, au vakila na loloma kei na veivakadeitaki ni na rogoci na noqu masu au na ciqoma na ka e vinaka duadua. E vaqaqacotaka na noqu ivakadinadina.

Mai veika taucoko e vakadinadina na Yalo Tabu, na ka talei duadua beka vei keda sa ikoya nio Jisu na Karisito, na Luve ni Kalou bula. Na iVakabula e yalataka: “Ia ni sa lako mai na Dauniveivakacegui, ko koya kau na tala vei kemudou mai vei Tamaqu, a Yalo Tabu sa vu ni ka dina, ko koya sa lako mai vei Tamaqu, ena tukuni au ko koya.”⁹

Ena vica na yabaki sa oti au a ciqoma e dua na qiri mai vua e dua na tina nuiqawaqawa. A tukuna vei au ni o luvena yalewa sa toki vakayawa sara mai vale. A vakila ni dua na leqa levu sa tiko ni sa lailai na nona veitaratara kei luvena yalewa. A vakamasuti au meu veivuke.

Au sasaga au mani kila rawa se o cei e dauniveituberi ni vuvale nei luvena yalewa. O rawa ni tukuna ena yaca ni oqori edua na gauna balavu sara. Au a qiriti koya. E a se cauravou gone. Ia tukuna vei au ni o koya kei na nona itokani e rau a vakayadrati ruarua ena bogi me sega walega ni baleta na nodrau kauwai me baleti goneyalewa, ia mai na veivakauqeti talega ni a vakarau me cakava o koya eso na digidigi ka na kauta mai na rarawa kei na mosi. Ena veivakauqeti oya ni Yalo, e rau a gole me rau lai raici koya.

Taumada, e sega ni via tukuna vei rau me baleta na nona ituvaki. Ena veivakauqeti, rau vakamasuti koya me veivutuni ka digitaka na sala e vakarautaka tu na Turaga vua. A qai kila o koya ena gauna oya, kau vakabauta mai vua na Yalo, ni sala duadua ga e rawa ni rau a kila kina na veika me baleta na nona bula sa mai vua na Kalou. E dua na tina a vakarogotaka na nona kauwai ni loloma vua na Tamada Vakalomalagi kei na iVakabula. A talai na Yalo Tabu vei rau na dauniveituberi ni vuvale baleta ni rau a lomasoli me rau qarava na Turaga. E rau muria na ivakasala kei na yalayala ka tiko ena Vunau kei na Veiyalayalati:

“Ia me vakasinaiti na lomamuni ena loloma uasivi vei ira na tamata kecega, kei ira era sa veitokani ena vakabauta, me vakaiukuukutaki tiko ga na nomudou vakanananu ena ivalavala savasava; ia ena vakaukauwataki kina na nomu vakabauta ena mata ni Kalou; ka na drodro sobu mai i yalomu na ivunau vakabete, me vaka na tegu sa lutu mai lomalagi.

“Ena sala vata voli ga kei iko na Yalo Tabu, ia na nomu ititoko sa ititoko ni yalododonu kei na dina sa tudei sara; ia na nomu lewa sa lewa e tawavakaiyalayala, ia ena yalo galala ena drodrovi iko, me sega ni mudu ka sega ni mudu.”¹⁰

Au vakadinadinataka ni sa vakayacora na Turaga na Nona yalayala. Ni Yalo Tabu e talai vei ira na lewenilotu ni veiyalayalati yalodina ni Lotu i Jisu Karisito. Oqo, ena veika oni duisotava ena duidui, ka na veituberi na Yalo ena sala e veirauti vinaka kei na nomu vakabauta kei na lololo me ciqomi na ivakatakila baleti iko kei ira o lomana ka veiqaravi vei ira. Au masuta ena yaloqutaucoko me na tubu na nomuni lomadei.

Au wasea na noqu ivakadinadina ni bula tiko na Kalou na Tamada. E lomani iko o Koya. E dau rogoca na nomu masu taucoko o Koya. O Jisu Karisito a masu dina vua na Tamada me tala mai na Yalo Tabu me veituberi, veivakacegui ka vakadinadinataka na dina vei keda. Na Tamana kei na Luvena Lomani e rau a rairai vei Josefa Simici ena loma ni dua na veikau. Na Parofita ko Josefa Simici a vakadewataka na iVola i Momani ena isolisoli kei na kaukauwa ni Kalou.

O ira na italai vakalomalagi era a vakalesuya tale mai na idola ni matabete. O Peresitedi Russell M. Nelson e parofita ni Kalou i vuravura taucoko.

Niu dua na ivakadinadina i Jisu Karisito, Au kila ni bula tiko o Koya ka liutaka tiko na Nona Lotu. E noda na madigi me tiko vei keda na Yalo Tabu me noda itokani e veigauna ka vakadeitaki na veidina oqori ni da nanuma ka lomana na iVakabula, veivutuni ka kerea me tiko e lomada na Nona loloma. Au masuta me na tiko vei keda na vakalougatataki kei na veitokani ni Yalo Tabu ena siga edai kei na vesiga ni noda bula. Au lomani kemuni. Ena yaca tabu i Jisu Karisito, emeni.