Na Kaukauwa i Jisu Karisito ena Noda Bula e Veisiga
Na ivurevure ni noda kaukauwa oya na vakabauti Jisu Karisito nida saga meda lako mai Vua ena veisiga yadua kei na veisiga kece.
Taciqu kei na ganequ, oqo na Lotu i Jisu Karisito ni Yalododonu Edaidai. Sa ka rekitaki dina me da soqoni vata me vaka ni da Nona Lotu! Au vakavinavinaka ni sa vakananuma tiko vei keda o Peresitedi Russell M. Nelson me da dau vakayagataka wasoma na yaca dina ni Lotu ni Turaga me rawa ni da nanuma tiko kina se Lotu nei cei oqo kei na ivakavuvuli nei cei eda muria.
E kaya kina o Peresitedi Nelson: “Ena veisiga ka lako mai, eda na raica na veivakatakila cecere duadua ni kaukauwa ni iVakabula ka se bera ni raica vakadua ko vuravura. Ena vakasobura ko Koya na gauna dokai, na veivakalougatataki, kei na cakamana e sega ni wili rawa vei ira na yalodina.”1
E dua na gauna dokai kei na madigi cecere duadua vei keirau kei na watiqu, o Renee, me keirau sotavi ira na Yalododonu ena veivanua keirau veiqaravi kina. Keirau rogoca na nodra italanoa, keirau vakadinadinataka na veika e sa yali vei ira, keirau wasea vata nodra lolosi, ka reki vata ena nodra rawaka. Keirau vakadinadinataka e vuqa na veivakalougatataki kei na cakamana sa vakasobura tiko na iVakabula vei ira na yalodina. Keirau sotavi ira na tamata era sa lako curuma na veika sa kilai ni sega ni rawa, era sa sotava na veika rarawa e sega ni vakasamataki rawa.
Keirau raica na vakavotui ni nona kaukauwa na iVakabula vua e dua na yada ka sa yali na watina ni rau lako voli ena veitalai ni Turaga e Bolivia.2 Keirau raica vua e dua na goneyalewa e Argentina ka laubili ena ruku ni dua na sitimanivanua ka vakayalia kina na yavana, baleta ga ni via butakoca nona talevoni e dua.3 Vakakina vei tamana dawai, o koya me na saga me vakavinakataka na nona tuvaki ni bula ni sa yaco na leqa ka vakaukauwataka na luvena yalewa ni oti na mataqali ivalavala ni veivakalolomataki sega ni vakamacalataki rawa vakaoya. Keirau raica talega vei ira na veimatavuvale sa vakacacani na nodra vale ena kama mai Chile ni vo e rua na siga kina Siganisucu ni 2022.4 Keirau sa raica vei ira era kunea tu na dredre ni oti na veisere kei ira e mai kedra na isamunidawa ni veivakalolomataki.
Na cava e solia vei ira na kaukauwa mera lakocuruma na veika dredre? Na cava e solia e dua tale na umakaukauwa me ra toso tiko ni sa vaka me yali na ka kecega?
Au sa raica ni ivurevure ni kaukauwa oya na vakabauti Jisu Karisito nida segata meda lako mai Vua ena veisiga yadua e veisiga kece.
E vakavulica na parofita o Jekope, “Ka sa lako mai i vuravura me vakabulai ira na tamata kecega kevaka era na vakarorogo ki na domona; ia raica, sa colata ko koya na nodra mosi na tamata kecega, io, na nodra mosi na veika bula kecega, na tagane, kei na yalewa, kei na gone, ka ra lewe ni vuvale i Atama.”5
Ena so na gauna, e dau vaka me dua na ka ena sega ni rawati, na vakabauti Jisu Karisito. Eda na nanuma beka ni lako mai vei Karisito e gadrevi kina na igu, na kaukauwa, kei na uasivi sara e sega vei keda, ka sega ni kune rawa na kaukauwa me da cakava kece kina. Ia na ka au vulica rawa mai vei ira na tamata oqo oya ni vakabauti Jisu Karisito e solia vei keda na kaukauwa meda tekivuna na ilakolako. So na gauna eda nanuma beka, “Au gadreva meu vakavinakataka rawa noqu bula ni bera niu lako vei Jisu,” ia na dina oya nida lako vei Jisu me vakavinakataki kina noda bula ena Vukuna.
Eda sega ni lako mai vei Jisu baleta sa vinaka sara na noda bula. Eda lako mai Vua baleta ni tu noda cala ka rawa ni da “vakavinakataki sara” ena Vukuna.
Meda tekivuna vakacava na cakacakataki vakalalai ni vakabauta e veisiga? Vei au e tekivu e veimataka: niu yadra cake, au sega ni raica mada noqu talevoni, au cabora e dua na masu. Dua sara mada ga na masu rawarawa. Oti au qai wilika e dua na ivolanikalou. Oqo e vukei au ena noqu veiyalayalati vakamacawa au cakava ena noqu vakayagataka na sakaramede meu “dau nanumi Koya tikoga.”7 Niu tekivuna noqu siga ena dua na masu kei na dua na ivolanikalou, sa rawa niu “nanumi Koya” ena gauna au raica kina noqu talevoni. Au rawa ni “nanumi Koya” niu vosa vei watiqu kei ira na gone, niu sotava na leqa kei na veisaqasaqa, au tovolea meu sotavi ira me vaka ena kitaka ko Jisu.
Niu “nanumi Koya,” au vakila e dua na gagadre meu veisau, meu veivutuni. Au kunea na ivurevure ni kaukauwa meu maroroya na noqu veiyalayalati, au vakila na veivakayarayarataki ni Yalo Tabu ena noqu bula “ka muria na Nona ivakaro sa solia vei [au]; me tiko ga kina kei [au] na Yalona.”8 E vukei au meu vosota me yacova na ivakataotioti.9 Se me yacova mada ga ni oti na siga! Kei na veisiga au sega ni nanumi Koya kina ena siga taucoko, e tiko ga o Koya, lomani au toka ga ka tukuna mai, “sega ni dua na LEQA: e rawa nio tovolea tale ni mataka.”
E dina sara ni da sega ni vinaka sara ena noda nanumi Koya, sega vakadua ni guilecavi keda na Tamada Vakalomalagi dauloloma.
E dua na cala eda dau kitaka wasoma oya noda nanuma ni maroroi veiyalayalati, se na yalayala eda cakava vua na Kalou, e dua na veidinadinati eda vakayacora vata kei Koya: au talairawarawa, ka na taqomaki au o Koya me kakua ni dua na ka ca e yacovi au. Au sauma noqu ikatini kau na sega ni vakayalia noqu cakacaka se ena sega ni kama noqu vale. Ia ni sega ni vaka eda namaka na veika e yaco, eda tagi vua na Turaga, “Ko sa wele beka ga niu sa mate?”10
Na noda veiyalayalati e sega walega ni dua na veidinadinati; era vakayaco veisau ena bula.11 Ena noqu veiyalayalati, au ciqoma na kaukauwa veivakasavasavataki, ka veivaqaqacotaki i Jisu Karisito, ka rawa kina meu tamata vou, meu vosota na veika e sega ni vosoti rawa, meu uabaleta na veika e nanumi ni sega ni rawa. Nanumi Jisu Karisito tikoga e kaukauwa; e solia vei au na ikuri ni kaukauwa meu “muria na Nona ivakaro sa solia vei [au].”12 E vukei au meu yalo vinaka cake, meu matadredredre ga, meu dautataro,13 meu levea na veisaqasaqa, me yaco ga na loma ni Kalou ena noqu bula.14
Ni sa sivia na noda mosi se nona mosi e dua eda dau lomana ka sega ni rawa ni da vosota rawa, e rawa ni vakamamadataka na icolacola, vakamalumutaka na yalo, ka vakaruruya na mosi na noda nanumi Jisu Karisito ka lako mai Vua. Oqo na kaukauwa ka rawa kina vua e dua na tama me ulabaleta nona kaukauwa vakatamata ka tokona rawa na luvena yalewa ena mosi vakayago kei na yalo ni kena yali na yavana
Ena Jiune sa oti a veisiko i Aregintina o Elder Soares ka tarogi Flavia me baleta nona vakacalaka rerevaki, a sauma ena yalodina, “Au a vakila na yaluma, na yaloca, cudru, kei na veicati ni [yaco na ka oqo]. E dua na ka e vukei au oya meu kua ni taroga, na cava e yaco kina vei au?’ ia =‘baleta na cava?’ Qo e dua na ka e kauti au vakavoleka vei ira na tani kei na Turaga. Meu kua ni vakayawaki au mai Vua, ia meu kukuvi Koya matua.”15
E vakavuvulitaka o Peresitedi Nelson: “Na kaukauwa vakalomalagi e isau ni maroroi veiyalayalati vata kei na Kalou—na kaukauwa me vaqaqacotaki keda meda saqata na veivakatovolei, veitemaki, kei na rarawa ni lomada. Oqori, sa nodra ivotavota kina na dau maroroya na veiyalayalati e dua na mataqali vakacegu.”16 Oqo na mataqali vakacegu kei na sautu au raica e matana na yada, dina ga ni mosi tu na yalo ena nona vakananumi na watina e veisiga.
Na Veiyalayalati Vou e tukuna na gauna e tiko kina o Jisu kei Nona tisaipeli ena waqa.
“A sa tubu e dua na cagi levu sara, a sa seva na waqa na biau. …
“A sa … moce ko Koya ena dua na ilokoloko: a ra sa vakayadrata ka kaya Vua, Vakavuvuli ko sa wele beka ga ni da sa mate?
“A sa tucake ko koya ka vunauca na cagi, a sa kaya ki na wasawasa, Mo cegu, mo maravu mai.
E kaya kina: “Dou sa rere ena vuku ni cava? e vakaevei sa sega na nomudou vakabauta?”17
E dau vakauqeti au na italanoa oqo. E namaka beka vei ira na Turaga me ra vakayagataka na nodra vakabauta me ra vakaruruya kina na cava? Me ra vunauca na cagi? Na vakabauti Jisu Karisito sai koya na yalo ni vakacegu me vorati kina na cava, era kila ni ra na sega ni rusa ni tiko vata kei ira ko Koya ena waqa.
Oqo na mataqali vakabauta keirau a raica ni keirau sikovi ira na matavuvale mai Chile ni oti na kama. Sa kama vakadua ki na dela ni qele na nodra vale, sa yali na nodra ka kecega. Ia ni keimami taubale ena vanua a tu kina na nodra vale ka ra tukuna tiko mai na veika era a sotava, keirau vakila ni keirau tucake tu ena vanua tabu. A kaya e dua na marama vei watiqu, “Niu raica ni ra sa kama na veivale voleka, au vakila ni sa kama talega na neitou vale ena yali na neitou veika kecega. E sega na nuiqawaqawa, au vakila e dua na yalo vakacegu sega ni vakamacalataki rawa. Au vakila ni na sega ni dua na leqa.” Na vakabauta na Kalou kei na rokovi ni noda veiyalayalati vata kei Koya e kauta mai na kaukauwa kina noda malumalumu kei na vakacegu kina noda rarawa.
Au vakavinavinakataka na madigi ni keirau sotavi ira eso na Yalododonu vakasakiti oqo kei Renee, ena nodra ivakaraitaki e vuqa ni vakabauta kei na, igu, kei na sega ni guce. Na italanoa ni mosiniyalo kei na rarawa ena sega beka ni yacova yani na draunipepa taumada ni dua na niusipepa se sega ni kuruseta na ivolamata. Me baleta na itaba era sega ni tabaki ni wainimata a turu kei na masu a cabo na ka e vakayali se dua na veisere mosimosi, kei na posi ka sega ni biu cake ni rere kei na yaluma kei na mosi a rawa me vosoti, vinaka vakalevu na nodra vakabauti Jisu Karisito kei na Nona Veisorovaki O ira na tamata oqo era vaqaqacotaka na noqu vakabauta, au vakavinavinaka kina vakalevu.
Au kila ni oqo na Lotu i Jisu Karisito. Au kila ni sa tuvakarau tu o Koya me vakalougatataki keda ena Nona kaukauwa, kevaka eda lako Vua e veisiga yadua ena veisiga kece. Ena yacai Jisu Karisito, emeni.