E Kilai Iko ka Lomani Iko na Kalou

E veibolei na bula. E vuqa na tamata era vakila nira uabaleti, galili, tawasei tani, ka oca. Ni yaco na dredre, eda na vakila beka nida sa lako sese se sega ni toso i liu. Noda kila nida luvena kece na Kalou ka eda lewe ni Nona matavuvale tawamudu, ena vakalesuya mai edua na yalo ni veivakataukenitaki kei na inaki.²

O Peresitedi M. Russell Ballard e wasea: “Edua na ivakatakilakila bibi eda wasea vata oqo kei na veigauna tawamudu. Oya nio iko edua na luvena tagane se luvena yalewa na Kalou. Na kilai vakavinaka ni dina oqo—io na kena kilai vakavinaka ka vakamareqeti—e veisautaka na bula.”³

Kakua ni lecava se vakalailaitaka na kemu bibi vua na Tamada mai Lomalagi. O iko o sega ni tubu mai vakacalaka, se o sega ni vakatamani, se o basika mai vakasakasaka. Ni tiko edua na ka buli ena tiko o koya e veibuli.

Na nomu bula e vakaibalebale ka vakainaki. Na vakalesui mai ni kosipeli i Jisu Karisito ka tomani tiko oqo e kauta mai na vuku vakayalo kei na kilaka me baleta na nomu ivakatakilakila vakalou. O iko e dua na luvena daulomani na Tamada Vakalomalagi. Era sa baleti iko na veivosa vakaibalebale kei na veivakavuvuli kece oya. E lomani iko vakalevu na Kalou ka tala mai kina na luvena me vakabulai, sereki, ka vueti iko.⁴

O Jisu Karisito a vakadinadinataka na kedra ituvaki vakalou kei na kedra yaga tawamudu na tamata yadua.⁵ A vakamacalataka na sala erau yavu kina ni ivakaro kece ni Kalou na ivakaro cecere erua mo lomana na Kalou ka lomani ira na wekada.⁶ Edua vei ira na noda itavi vakalou oya meda vukei ira era gadreva tu na veivuke.⁷ Sai koya oqo me vaka nida tisaipeli i Jisu Karisito eda “colata vata na noda icolacola, rarawa vata kei ira sa rarawa, ka vakacegui ira era sa gadreva na veivakacegui.”⁸

Na lotu e sega ni baleta ga na noda veiwekani kei na Kalou; e sa baleta tale ga na noda veiwekani vakai keda. O Elder Jeffrey R. Holland e vakamacalataka ni vosa Vakavalagi na lotu e kau mai na vosa vaka Latina na religare, kena ibalebale “me bukia vata” se me, “bukia vata-tale.” O koya gona, “na lotu vakaidina [sai] koya na i buki ka vauci keda vua na Kalou ka vakakina vei keda vakaikeda.”⁹

Na ivakarau eda dui cakava vei keda vakai keda e bibi vakaidina. O Peresitedi Nelson e vakavulica, “Na nona itukutuku na iVakabula e matata: O ira na Nona tisaipeli dina era veitarai cake, veilaveti, veivakayaloqaqataki, veivakayarayarataki ka veivakauqeti.”¹⁰ Oqo e bibi cake sara nira vakila na noda itokani eda salavata tiko nira yali, galili, guilecavi, se vagalalataki.

E sega ni gadrevi meda rai vakayawa meda kunei ira era sotavi dredre tiko. Eda rawa ni tekivu ena noda vukea edua ena noda matavuvale, ivavakoso, se ena itikotiko raraba ena noda vanua. E rawa tale ga meda vaqara meda vakacegui ira na 700 na milioni na tamata era bula tiko ena dravudravua¹¹ se na 100 na milioni na tamata era tokitaki vakasaurara ena vuku ni veivakacacani, veisaqasaqa kei na tiko yavavala ena vuku ni keda ivakatakilakila.¹² O Jisu Karisito e ivakaraitaki uasivi ni nodra vukei na vakaleqai tu—o ira na viakana, na vulagi, na tauvimate, na dravudravua, na vesuki. Na Nona cakacaka e noda cakacaka.

O Elder Gerrit W. Gong e vakavulica ni “noda ilakolako kivua na Kalou e vakavuqa meda kunei vata.”¹³ Ena vuku ni ka oqo, na noda tabanalevu e dodonu me ivakaruru vei ira kece na luve ni Kalou. Nida lako tiko ki lotu me vaka na kena i vakarau se eda tara cake edua na itikotiko ni yalododonu me kena inaki na sokalou, nanumi Karisito, ka veiqaravi vakaikeda.¹⁴ E rawa nida rogoca na ivakasala nei Peresitedi Nelson meda daulelewa vakalailai, loloma vakalevu, ka vakatetea yani na loloma savasava i Karisito ena noda vosa kei na noda ivalavala.¹⁵

Na Veisorovaki i Jisu Karisito sa ivakaraitaki cecere ni nona loloma na Tamada Vakalomalagi vei ira na luvena.¹⁶ Na vosa na Veisorovaki e vakamacalataka nodrau “vakaduavatataki” erua erau sega ni veiyaloni se sa veitawasei tu.

Na ilesilesi ni noda iVakabula sai koya me vakarautaka edua na sala ni lesutale vua na Tamada Vakalomalagi kei na veivakacegui ena ilakolako. E kila na iVakabula mai na veika a sotava na sala me tokoni keda kina ena ibolebole ni bula.¹⁷ Kua ni vakacala: nio Karisito na noda dauniveivueti ka ivakabula ni yaloda.

Nida cakacakataka na vakabauta, o Koya ena vukei keda meda toso ki liu ena vei dredre kece. E tomana tiko o Koya me vakatetea na Nona veisureti ni loloma kei na veivosoti:

“Dou lako mai vei au, koi kemudou vakayadua ga sa oca, ka colata na icolacola bibi, ia kau na vakacegui kemudou.

“Vakataqara vei kemudou na noqu ivua, ka vuli vei au; ka dou na kunea kina na vakacegu ni yalomudou.”¹⁸

E kaukauwa na vosa vakaibalebale ni ivua. Me vaka a vakamacalataka o Peresitedi Howard W. Hunter: “Na ivua edua na iyaya … ka vakatara na igu ni ikarua ni manumanu me semati se vakuria na igu ni dua ga na manumanu, me wasei me mamada kina na [cakacaka me qaravi]. Edua na icolacola bibi se dredre beka vua edua me colata taudua, e rawa ni mamada, nirau wasea vakatautauvata erua ena nodrau vauci vata ena dua ga na ivua.”¹⁹

E vakavulica o Peresitedi Nelson: “O lako mai vei Karisito mo vakaivua vata kei Koya kei na Nona kaukauwa, me kakua kina ni o dreta duadua na icolacola ni bula. O dreta tiko na icolacola ni bula vata kei na iVakabula ka Dauveivueti kei vuravura.”²⁰

Meda na vakaivuataki se vauci keda beka vakacava vua na iVakabula? E vakatavulica o Elder David A. Bednar:

“Na kena caka ka maroroi na veiyalayalati tabu e vauci keda ka eda cola ivua vata tiko kei na Turaga o Jisu Karisito. Sa kena ibalebale, ni sa kacivi keda tiko na iVakabula meda vakararavi vua ka dre vata kei Koya.

Eda sega ni tu duadua ka sega ni dodonu meda tu duadua ga.”²¹

Vei koya e bikai, yali, veilecayaki: E sega ni dodonu mo sotava taudua na ka oqo.²² Ena vuku ni Veisorovaki i Jisu Karisito kei na Nona cakacaka vakalotu, sa rawa ni o vakaivuataki vata se vauci vei Koya. O Koya ena vakarautaka ena yalo ni loloma na kaukauwa kei na veivakabulai o gadreva mo lako curuma kina na ilakolako sa tu mai liu. O Koya e se noda i vakaruru tikoga mai na cava.²³

Me kilai tiko ni o Jasper e, gone lasa, dauveikauwaitaki, vuku, ka dau be. Ia na tiki bibi ni italanoa oqo oya ni o koya e noqu. O koya e luvequ, kei na noqu lomani koya ena sega beka ni kila vakadua o koya na kena levu. Kevaka edua na tama vakavuravura sega ni taucoko, e vakaoqo na itovo ni yalona baleti luvena, e rawa beka mo vakasamataka na veika e vakila baleti iko na Tamada Vakalomalagi daulololoma e taucoko, ka vakalagilagi?

Kivei kemuni noqu itokani lomani ena itaba ka tubu tiko oqo, iTaba Z kei na iTaba Alifa: Yalovinaka moni kila ni vakabauta e gadreva na cakacaka.²⁴ Eda bula donuya tiko edua na gauna, vei ira e vuqa, mera “raica sara era na qai vakabauta” Na vakabauta e rawa ni veibolei ka gadrevi kina na digidigi. Ia na masu era na saumi mai.²⁵ Ka rawa ni vakilai na kedra saumi mai.²⁶ Eso na veika dina ni bula oqo era sega ni laurai; ia era vakilai, kilai, ka sotavi. Era tiko dina.

O Jisu Karisito e vinakata mo veikilai ka veiwekani kei Tamada Vakalomalagi.²⁷ O Koya e vakavulica, “O cei vei kemudou sa dua na luvena tagane, sa tu e tautuba, ka kaya, Tamaqu, dolava nomu vale meu curu yani ka vakayakavi vata kei iko, ka qai sega ni kaya, Curu mai, na luvequ; ni sa nomu na noqu, ka noqu na nomu?”²⁸ E rawa beka nio vakasamataka edua tale na ivakaraitaki e vinaka cake me baleta na Kalou na Tamada Tawamudu dauveikauwaitaki, ka daulololoma?

O sa Luvena. Ke o vakila nio yali, ke tiko nomu taro se lailai na vuku, ke o sotava tiko na dredre se veivala tiko kei na veisaqasaqa vakayalo, gole vei Koya. Masu vei Koya mo vakacegui, lomani, ciqoma na isaunitaro kei na veidusimaki. Se cava ga na gagadre kei na vanua cava ga o tiko kina, talaucaka na lomamu vua na Tamamu Vakalomalagi. Vei ira eso, ona vinakata beka mo muria na veisureti nei Peresitedi Nelson ka taroga “se tiko dina e keri o Koya—ka kilai iko. Taroga se cava e nanuma o Koya me baleti iko. Ka qai vakarorogo.”²⁹

Kemuni na Taciqu kei na Ganequ:

• Mo kila na Tamamu mai Lomalagi. O Koya e taucoko ka dauloloma.

• Mo kila se o cei o Jisu Karisito.³⁰ O Koya na noda iVakabula ka Dauniveivueti. Vauci iko kei ira o lomana vei Koya.

• Ka kilai iko tiko. Mo kila na kemu ivakatakilakila vakalou. Na ituvatuva ni bula marau ni Kalou e sa baleti iko ga. Ko sa Luvena vakamareqeti ka sa iyautalei sara. O koya e kilai iko ka lomani iko.

Au vakadinadinataka na vei yavu dina rawarawa oqo ena yaca i Jisu Karisito, emeni.