Mo Daumuria na Karisito ena Vakarokoroko

Eda bula tiko ena gauna era sotava tiko kina na “dauvakamuria na Karisito ena vakarokoroko”¹ na dredre. O ira era vakabauta, yalomalua ena nona qarava, ka vakadinadinataki Jisu Karisito era sa dau sotava na veivakatovolei, veika dredre, kei na veika ca.² Na watiqu, o Mary, kei au keirau sega ni duidui. Ena vica na yabaki sa oti, keirau sa raica e vuqa na neirau itokani voleka e koronivuli, itokani daukaulotu, kei ira na daucakacaka vata e liu era sa mate se me vaka a kaya o Peresitedi Russell M. Nelson, era sa taurivola kina yasana kadua ni ilati. Keirau raica eso era a susugi ena vakabauta kei na dina era sa biuta na sala ni veiyalayalati.

E ka ni rarawa, a mate e dua na makubui keirau tagane yabaki 23 ena vakacalaka ena coqa ni motoka. Eso na itokani lomani, lewe ni matavuvale, kei na daucakacaka vata sa sotava e vuqa na ibolebole ni bula.

Ni yaco mai na veivakatovolei, eda lolosi ka saga meda veivuketaka na noda dui icolacola.³ Eda tagicaka na veika ena sega ni caka rawa kei na sere ena sega ni lagati rawa.⁴ Na veika ca e dau yaco vei ira na tamata vinaka ena ilakolako ni bula oqo. Na kama veivakarusai mai Maui mai Hawaii, Ceva kei Chile, kei na Tokalau kei Canada era sa ivakaraitaki ni veika rerevaki era sotava na tamata vinaka ena so na gauna.

Eda wilika ena Mataniciva Talei ni a vakaraitaka na Turaga vei Eparama na ituvaki tawamudu ni yalo. A kila kina o Eparama na noda bula taumada, tabaki taumada, na Veibuli, na digitaki ni Dauveivueti, kei na bula oqo, ni sa ikarua ni bula ni tamata.⁵ A kaya na Dauveivueti:

“Me da kauta yani na veika kece ka bulia na vuravura vei ira qo mera tawana;

“Ia meda vakatovolei ira mada kina, me da raica se ra na muria se sega na veika kece sa vakarota vei ira na Turaga na nodra Kalou.”⁶

O keda kece eda sa tu oqo ena ikarua ni bula ni noda ilakolako i liu kina dua na matanitu lagilagi me tiki ni ituvatuva cecere ni veivakabulai ni Kalou kei na bula tawamudu. Eda sa vakalougatataki ena galala ni digidigi ka sotava na veivakatovolei ena bula oqo. Oqo na gauna sa vakarautaki meda vakavakarau meda laki sotava na Kalou.⁷ Eda sa kalougata nida sa kilai Jisu Karisito kei na Nona ilesilesi ena ituvatuva. Sa noda na madigi meda sa lewe ni Nona Lotu sa vakalesuimai—Na Lotu i Jisu Karisito ni Yalododonu Edaidai. Nida sa daumuri Karisito ena vakarokorokoeda, eda saga meda bulataka na Nona ivakaro. A sega ni dau rawarawa vei ira sa daumuri Koya. Ka sega talega ni rawarawa vua na iVakabula me rawata ena yalodina na Nona ilesilesi e vuravura.

E matata na ivolanikalou: ni vuqa ena rawai ena vakasama mera “kana, ka gunu, ka ia na marau, ni da na mate ena mataka.⁸ Eso tale na tawavakabauta era guta nodra itovo butobuto eso era tokona cake “na ka vou e tarava”⁹ kei na ivakavuvuli ni tamata.¹⁰ Era sega ni kila na vanua mera kunea kina na dina.¹¹

O ira na daumuri Karisito ena vakarokoroko era sega ni muria na sala oqo. Eda sa lewe ni vanua vinaka, ka daucakacaka ena noda itikotiko. Eda lomana, veiwasei, ka sureti ira na luvena taucoko na Kalou mera muria na ivakavuvuli i Karisito.¹² Eda sa muria na ivakasala ni noda parofita lomani, o Peresitedi Nelson, ka digitaka na ilesilesi meda “dauveivakacegui, nikua kei na veigauna.”¹³ Na cakacaka veiuqeti oqo e salavata tiko ga kei na ivolanikalou kei na veidusimaki vakaparofita.

Ena 1829 na Lotu vakalesuimai a se bera ni tauyavutaki kina, se tabaki kina na iVola i Momani. E dua na ilawalawa tamata lailai,dina nira sotava tiko na dredre, a uqeti na yalodra ena Yalo ni Kalou, ka ra muria na Parofita o Josefa Simici. A vakatakila na Turaga vei Josefa na ivakasala ni gauna dredre: “Ni kakua ni rere, na qele ni sipi lailai; caka vinaka; laivi vuravura kei eli me rau cokovata ka saqati iko, ni kevaka ko sa tarai cake ena noqu uluvatu, ena sega sara ni rawa ni ra qaqa.”¹⁴ E vakasalataki ira talega me:

“Drau vakararavi tiko mai vei au ena vakasama kece; kakua ni vakatitiqa, kakua ni rere.

“… Mo drau yalodina, ka muria sara na noqu ivakaro, ia drau na rawata dina na matanitu vakalomalagi.”¹⁵

Me matata, ni keda icavacava vakalomalagi e sega ni veisau ni da sotava na veika ca. Ena Iperiu eda vakasalataki meda “toro doudou kina itikotiko vakaturaga ni loloma soli wale, meda rawata kina na loloma cecere, ka kune loloma soli wale me veivuke ena gauna ni leqa.”¹⁶ O Jisu Karisito na “vu ni bula tawamudu.”¹⁷

Au taleitaka na vosa i Momani, a cavuta na luvena o Moronai, baleti ira “sa daumuria na Karisito ena vakarokorokoena vuku ni nomudou lako ena vakarokoroko kei ira na luve ni tamata.”¹⁸

Kivei keda ena Lotu eda saga tiko meda “daumuria na Karisito ena vakarokorokosa tu e matada e dua na siga ramase nida raimatua vua na noda Turaga ka iVakabula, o Jisu Karisito. Na vakatovolei sa tiki ni bula oqo ka yaco ki na bula yadua ni tamata e vuravura taucoko. Oqo e oka kina na veisei ni veimatanitu kei na tamata yadua.

Era dau tarogi wasoma na iliuliu ni Lotu vakaoqo, “Na cava e vakatara kina e dua na Kalou dodonu me yaco na veika ca, vakabibi vei ira na tamata vinaka?” kei na “Na cava era sega ni taqomaki kina mai na leqa vakaoqo o ira era ivalavala dodonu ka ra qarava tiko na nona cakacaka na Turaga?”

Eda sega ni kila na isau ni taro kece; ia, eda kila na ivakavuvuli bibi ka rawa meda sotava kina na veivakatovolei, veika dredre, kei na veika ca ena vakabauta kei na yalodei kina veimataka rarama sa waraki keda yadua tu. Na ivakaraitaki vinaka ga sa tiko ena ivolanikalou baleta na basikati ni veika dredre o ya na vosa ni Turaga vei Josefa Simici, na Parofita, ni tiko vakavesu ena Liberty Jail.

A kaya vakatikina na Turaga:

“Kevaka ena dalaga na gusui eli me tilomi iko, mo kila tiko na luvequ, ni veika kece oqori ko na yalomatua kina, ka na yaga vei iko.

“Raica na Luve ni Tamata sa vosota rawa na veika e torosobu sara mai vei ira kecega. Ko sa vinaka cake li mai vua?

“… Kakua ni rerevaka na veika e rawa ni vakayacora na tamata, ni na tiko vata kei iko na Kalou me sega ni mudu ka sega ni mudu. ”¹⁹

Me matata, ni dua tiko na Tamada mai Lomalagi sa kilai keda ka lomani keda yadua ka kila vakavinaka tu na veika rarawa eda sotava tiko. Na Luvena, o Jisu Karisito, sa noda iVakabula ka Dauveivueti.

O Peresitedi Russell M. Nelson kei Peresitedi M Russell Ballard e vakabibitaka vakaukauwa na bibi ni ikarua ni tabaki vou ni Vunautaka na Noqu Kosipeli.²⁰ Au wasea na nodrau saga vakaukauwa. Na ilavelave vou oqo, e vakaukauwataka na ivolanikalou tabu, e kaya ena qaqa:

“Ena Nona isoro ni veisorovaki, a taura o Jisu Karisito ki Vua na noda mosi, rarawa, kei na malumalumu. Ena vuku ni ka oqo, sa kila o Koya ena ‘vuku ni yagona na sala me vukea kina na nona tamata ena nodra malumalumu.’’ (Alama 7:12; raica tale ga tikina 11). E veisureti, ‘Dou lako mai vei au,’ nida cakava vakakina, ena solia vei keda o Koya na vakacegu, inuinui, kaukauwa, inaki, kei na veivakabulai. (Maciu 11:28; sraica tale ga tikina 29–30).

“Nida vakararavi vei Jisu Karisito kei na Nona Veisorovaki, ena rawa ni vukei keda o Koya me da vosota na noda vakatovolei, tauvimate, kei na mosi. E rawa nida vakasinaiti ena reki, sautu, kei na veivakacegui. Na veitabakisobu kece sara baleta na bula e rawa me vakadodonutaki ena Veisorovaki i Jisu Karisito.”²¹

Sa rawa meda marautaka na noda daumuria na Karisito ena vakarokoroko

Na nona yavu ni marau na Tamada me baleti ira na Luvena e sega ni okati walega kina e dua na bula taumada kei na bula oqo ia e dua talega na bula tawamudu, ka okati vakakina e dua na veivakaduavatataki cecere ka lagilagi vata kei ira era sa yali yani. Ena vakadodonutaki na veika kece a cala, ka da na raica vakamatata sara ka sega ni cala na matada kei na noda kila ka.

Era vakatauvatana na iliuliu ni Lotu na rai oqo vua e dua na tamata e curu yani kina lomadonu ni drama wase tolu.²² O ira era sega ni kila na nona yavu na Tamada era na sega ni kila na veika a yaco ena imatai ni iwasewase (se na bula taumada) kei na inaki a tauyavutaki mai kina; era sega tale ga ni kila na kena qai vakamatatataki kei na kena iwali ena qai yaco mai ena ikatolu ni wasewase, oya na kena vakataucokotaki na nona tuvatuva na Tamada.

E vuqa era sega tu ni marautaka ni ena ruku ni Nona yavu ni loloma ka rabailevu, o ira ka tauvi ira na isamu ni dawa, ni sega na nodra cala, era na sega ni totogitaki.²³

E matata vinaka tu ena ivolanikalou; o ira sa daumuria na Karisito ka yalo savasava, muria na iVakabula, ka talairawarawa kina Nona ivunau era na vakalougatataki. Dua na ivolanikalou bibi sara vei ira sa ivalavala dodonu, se cava na kedra ituvaki ni bula, sa wili ena vosa nei Tui Penijamini vei ira na nona tamata. E yalataka o Koya nio ira era yalodina ena maroroya na ivakaro era sa kalougata ena ka kecega ena bula oqo ka “era na curu ki lomalagi [ka] mera tiko marau kina vata kei na Kalou.”²⁵

Eda kila ni voleka nio keda kece eda sa sotava oti na cagilaba vakayago ka vakayalo ni noda bula, ka so e veivakacacani. Na Tamada mai Lomalagi dauloloma kei na Luvena, o Jisu Karisito, o koya e liutaka tiko na Nona Lotu vakalesuimai, sa vakarautaka vei keda na ivolanikalou kei na parofita me vakarautaki keda, vakaroti keda mai na veika rerevaki, ka solia vei keda na veidusimaki meda vakarau ka taqomaki keda. Eso na veidusimaki e gadreva na cakacaka totolo, ka so e vakarautaka na veitaqomaki ni vuqa na yabaki e tarava. Na ulunivosa ni Turaga kina Vunau kei na Veiyalayalati, wase 1e kerei keda meda “muria na nodra vosa na parofita.”²⁵

Na wase 1 e vakaroti keda talega, “Dou vakarau, dou vakarau kina veika ena lako mai.”²⁶ Na Turaga ena vakarautaka vei ira na Nona tamata e dua na madigi mera vakavakarau kina veika ena lako mai,

A solia na Turaga e dua na ivakatakila kaukauwa vei Peresitedi Brigham Young enai ka 14 ni Janueri, 1847, e Winter Quarters.²⁷ Na ivakatakila oqo sa ivakaraitaki cecere ni Turaga sa vakarautaki ira tiko na tamata kina veika ena lako mai. Era sa tekivu lako yani na Yalododonu yalodina ki na ulunivanua tabu ena Buca o Salt Lake. Era qai tara rawa na Valetabu e Nauvoo ka ciqoma na cakacaka tabu vakalotu. Era cemuri taumada mai Missouri, ka vakatalai tani mai vei ira na dauvakacaca mai Nauvoo ena gauna ni draki ca batabata. Na ivakatakila kivei Brigham a solia na ivakasala rawarawa baleta na vakavakarau kina lako yani. Sa vakamatatataka kina na Turaga mera qarauni na dravudravua, na yada, na luveniyali, kei na nodra vuvale o ira era lewena tiko na Mormon Battalion nira sa tekivuna na Yalododonu lewelevu na nodra ilakolako dredre.

Me ikuri ni ivakasala ni bula yalodina, e vakamatatataka na Turaga e rua tale na ivakavuvuli sa tomani tiko me bulataki nikua.

iMatai, a vakayaloqaqataki ira mera “vakacaucautaka na Turaga ena sere, ena ivakatagi, ena meke, ka vakakina ena masu ni vakacaucau kei na vakavinavinaka.”²⁸

iKarua, vakasalataka na Turaga kevaka era sa “yalorarawa, masuta na Turaga na nomu Kalou ena vakatakekere, me reki kina na yalomu.”²⁹

E rua na kerekere oqo rau sa vakasala cecere kina noda siga nikua. Na bula sa sinai ena vakacaucau, ivakatagi, kei na vakavinavinaka sa na vakalougatataki cecere. Na reki kei na vakararavi kina veivuke vakalomalagi ena masumasu sa sala kaukauwa meda daumuria na Karisito ena vakarokoroko Na noda dau saga tikoga meda marau ena vukea na noda sega ni vakayalolailaitaki.

Na iotioti ni qaqani dua na serenilotu vakasakiti e tukuna na isaunitaro cecere ena sala e totoka: “E sega ni dua na rarawa e vuravura me sega ni rawata o lomalagi na veivakabulai.”³⁰

Niu sa iApositolo ni Turaga o Jisu Karisito, au vakadinadinataka ni “daumuria na Karisito ena vakarokoroko” eda na kunea na vakacegu ni tamata yadua ena bula oqo kei na duavata vakalomalagi lagilagi. Au sa vakadeitaka noqu ivakadinadina ni sa vakalou na iVakabula kei na dina ni Nona Veisorovaki. O Koya na noda iVakabula ka Dauveivueti. Ena yacai Jisu Karisito, emeni.