Wasei ni iVakadinadina i Jisu Karisito ena Vosa kei na Cakacaka

Ena gauna ni papitaiso e dua na iyalayala eda cakava nida lomasoli meda taura na yacai Jisu Karisito. Sa noqu inaki nikua meu vakananumi keda ni rawa meda vakaraitaka vua na Kalou ni da na taura na yaca ni Luvena ena noda wasea na vakadinadina ena vosa kei na noda ivalavala, ka vakavuqa ni da rawata, ni o Jisu na Karisito.1

Ena Nona veiqaravi ki vei ira na tamata e Amerika ni oti na Nona Tucake tale, e vakarota na iVakabula:

“Era sa sega li ni wilika na ivolatabu ni sa tukuna mo dou vakatokai e na yaca i Karisito, sai koya na yacaqu? Ia ko ni na kacivi ena yaca oqo ena siga mai muri;

“Ia ko koya yadua sa taura na yacaqu, ka vosota me yacova na ivakataotioti, ena vakabulai vakaidina ena siga mai muri.”²

O Peresitedi Russell M. Nelson e vakatavulici keda ni “noda taura na yaca ni iVakabula e oka kina noda tukuna ka vakadinadinataka vei ira na tani—ena noda ivalavala kei na noda vosa—ni o Jisu na Karisito.”²

Nida lewe ni Lotu i Jisu Karisito ni Yalododonu Edaidai, sa noda na veivakalougataki kei na dodonu meda tu ka vakadinadinataka na Turaga kei na Yacana e veivanua kece keda tiko kina.³ Ena noda sasaga meda bulataka na bula e duavata kei na kosipeli i Jisu Karisito, na noda ivakarau sa dua na ivakadinadina bula ni Noda iVakabula kei na Yacana. Me kena ikuri, eda vakadinadinataki Karisito ena vosa nida wasea vata kei ira na tani na veika eda vakabauta, vakila, se kila me baleti Karisito.

Ni keda wasea ena yalomalua na noda ivakadinadina ni Turaga ena noda vosa kei na cakacaka, na Yalo Tabu ena vakadeitaka⁴ vei ira era inakinaki dina, yalo rawarawa, kei na vakasama lomasoli ni o Jisu na Karisito vakaidina.⁵

Au na via wasea e rua na ivakaraitaki veivakauqeti ni lewe ni lotu era vakaraitaka vua na Kalou ni ira taura na yacai Jisu Karisito ni ira veivosakitaki Koya ka wasea na ivakadinadina savasava ni Turaga ena soqoni ni Lotu.

iMatai ni ivakaraitaki: Na gauna keirau gole kina kei watiqu o Elaine ki Sipeni ena 2022, keirau a tiko ena soqoni ni Sigatabu ni dua na tabana ni Lotu e kea. Ni au dabe toka mai cake kei na watiqu vei ira na ivavakoso, au raica sara ni rau dabe vata tiko kei dua na marama qase cake. Ni mai cava na soqoni ni sakaramede, au taubale sara vei Elaine ka kerei koya me veikilaitaki au vei nona itokani vou. E cakava vakakina ka vakaraitaka ni na marama oqo, ka sega ni lewe ni Lotu, sa sikova tiko na Lotu ena loma ni rua na yabaki. Noqu rogoca ga oya, au taroga sara na marama dau rerevaka na Kalou oqo na cava na vuna e dau gole lesu mai ki na noda soqoni ena balavu ni gauna oya. A sauma mai na marama ena loloma, “Au dau taleitaka na gole mai eke baleta ni kemuni dau veivosakitaki Jisu Karisito ena nomuni soqoni.”

Me vakamatata, o ira na lewe ni Lotu ena tabana oya mai Sipeni e vosataka, vakatavulica, ka vakadinadinataki Karisito ena nodra soqoni.

iKarua ni ivakaraitaki: Ni oti na neirau veiqaravi ena Wasewase mai Brazil, e dua na ilesilesi vou e lako mai me veiqaravi ena Valenivolavola Liu ni Lotu. Ni keirau toki mai Salt Lake City ena mua ni vula o Jiulai na yabaki oqo, keirau a tiko ena soqoni ni Sigatabu ni neirau tabanalevu vou ka totoka. E dua vei ira na soqoni oqo sa soqoni ni lolo kei na soli ivakadinadina. Ni oti na vakayagataki ni sakaramede, era tucake yadua na lewe ni lotu ka wasea na nodra ivakadinadina mai vu ni yalodra me baleta na iVakabula. Na soqoni sa yavutaki vei Jisu Karisito, ka keirau rawa ni vakila na Yalo. Keirau laveticake, ka vakaukauwataki na neirau vakabauta. Kevaka o ira na itokani ni Lotu, e vakasaqara vakadodonu na dina, a tiko ena soqoni oya, era na vakila ni oqo na Lotu i Jisu Karisito.

Sa dua na veivakalougatataki dina meda raica na noda soqoni ni Lotu sa madigi cecere meda vakadinadinataki Karisito ka sikinala vua na Kalou ni keda rekitaka na taura na yaca ni Luvena.

Meu na tukuna mada e dua na ivakaraitaki kaukauwa ni taura na yacai Jisu Karisito ena wasei ni ivakadinadina baleti Koya ena cakacaka.

Ena Okosita sa oti, au a tomani Elder Johnathan S. Schmitt ena dola ni vale ni Valetabu mai Feather River California e Yuba City. E kea au kalougata meu veituberi vei ira na ilawalawa era mai sarava na valetabu. E dua vei ira na ilawalawa oqo e oka kina e dua na lewe ni Lotu, Virgil Atkinson, kei vitu na itokani mai na veivakabauta tale eso Ni voleka ni cava na sarasara, ena rumu ni veivauci ni valetabu, sa luluvu o Braca Atkinson ni vakaraitaka na nona loloma vei iratou na nona itokani ka gole mai ena Valetabu na siga oya. Voleka ni oti ga nona cakava, e dua na marama ena ilawalawa a tucake ka kaya, “Keitou lomani iko Virgil. E sega ni dau vakasaurarataki keitou okoya ena nona vakabauta. Ia okoya e sega ni maduataka talega. E dau bulataka ga na veika e vakabauta.”

Ena vei yabaki sa oti, na nona bula vaKarisito o Braca Atkinson e ivakadinadina kaukauwa ki vei iratou na nona itokani. Na nona ivakaraitaki sa ivakadinadina kaukauwa ni sa taura na yaca i Karisito.

Me kena itinitini, meu wasea na lesoni au vulica me taura vakacava na yacai Karisito ka vakadinadinataki Koya ena kena vakayagataki vakadodonu na yaca ni Lotu.

O Peresitedi Nelson, na parofita bula ni Kalou, ena dua na vosa ni koniferedi raraba ni 2018 na kena ulutaga “Na Yaca Donu ni Lotu,” e kaya: “Oqo e dua na veivakadodonutaki. Sai koya na ivakaro ni Turaga. A sega ni vakayacana o Josefa Simici na Lotu a vakalesui mai vua; sega vakakina o Momani. Na iVakabula Vakataki Koya e kaya, ‘Ni sai koya oqo na yaca ena kacivi kina na noqu lotu ena veisiga mai muri, io Na Lotu i Jisu Karisito ni Yalododonu Edaidai’ [Vunau kei na Veiyalayalati 115:4].”⁶

Eda biubiu na koniferedi raraba na siga oya ena yalodina ka vakadeitaka meda muria na parofita ka vakayagataka na yaca vakatakilai ni Lotu mai na gauna oya. Au qarauna sara meu vakadeitaki au ni au vakayagataka na yaca donu ni Lotu. Ena imatai ni gauna, au vakaraici au meu kua ni lesu kina vei sala makawa. Ni oti toka e vica na ivakatovotovo, au lvakila niu daumaka sara ni vakayagataki na yaca vakatakilai ni Lotu. Au vakatusa ni vuqa na gauna, au dau tukuna vakatotolo na yaca ni Lotu. Au lomaleqataka nira na sega ni vakarogoca na tamata na yaca taucoko ni Lotu kei ira na nanuma beka ni sa rui balavu.

Ia, au qai kila e muri ni tukuni na yaca taucoko ni Lotu ena yalodina e solia vei au na madigi meu tukuna na yacai Jisu Karisito ka wasea na ivakadinadina ni Vakabula ni kacivaki na Yacana ena yaca ni Nona Lotu. Au vakila talega ni gauna au tukuna kina na yaca donu ni Lotu vei ira na tani, au dau nanumi Jisu Karisito vakavuqa ka vakila na Nona veivakayarayarataki ena noqu bula.

Ni vakamuri na parofita, keda rawa ni vulica kece meda vakadinadinataki Jisu Karisito vakalevu ena noda vakayagataka na yaca donu ni Lotu, ka keda taura vakavinaka cake na yaca ni Turaga.

Na mataka ni siga ni Vakacecegu oqo, au vakadinadinataka ena marau nio Peresitedi Nelson e parofita bula ni Kalou kei Na Lotu i Jisu Karisito ni Yalododonu Edaidai e Lotu vakalesui mai ni Karisito. Au vakadinadinataka ena yalomalumalumu na Luve ni Kalou kei na Nona vakalou. Okoya na Ulumatua ni Kalou ka Luvena Duabau ga, noda iVakabula kei na Dauveivueti, na Imanueli.⁷ Ena yacai Jisu Karisito, emeni.