Veitacini Tagane kei na Yalewa vei Karisito

Kemuni na noqu itokani, sa totoka sara na noda soqoni ni koniferedi nikua. Eda sa mai vakila kece na Yalo ni Turaga kei na Nona loloma mai na veitukutuku totoka era wasea na noda iliuliu. Au kalougata meu mai vosa vei kemuni ena yakavi nikua ka meu itini ni vosa ena soqoni oqo. Sa noqu masu ni Yalo ni Turaga ena tomani keda tiko ni da mai rekitaka vata ni da sa veitacini tagane kei na yalewa vei Karisito.

Tukuna na noda paroifita lomani o Peresitedi Nelson: “Au kacivi kemuni kina na noda lewenilotu e veivanua kece mo ni sa biuta laivi na ivakarau ni bula kei na ivalavala ni veivakacacani. Au sa kerea moni guta na nodra dokai na luvena kece na Kalou.”¹ Ni sa tubu tiko e vuravura na Lotu oqo, na muria na veisureti oqo ni noda parofita sa ilavaki bibi kina taraicake na matanitu ni iVakabula ena veimatanitu e vuravura.

Na kosipeli i Jisu Karisito e vakavulica nida sa luvedrau tagane kei na yalewa dina na noda itubutubu vakalomalagi ka rau sa lomani keda² ka da a bula vakavuvale ena Nona serau na Kalou ni bera noda mai sucu ena vuravura oqo. E vakavulica talega na kosipeli ni: “Na tamata kece sara—na tagane kei na yalewa—era sa buli me ra ucuya na Kalou.³ Koya gona, eda sa tautauvata ga e Matana,⁴ ni sa “buli ira era sa dra vata na tagane [kei na yalewa].”⁵ Koya gona, eda sa ituvaki kece vakalou, itaukei, ka gugumatua, ni sa “dua bauga na Kalou na Tamada kecega, o koya sa lewa na ka kecega, a sa curuma na ka kecega, ka tiko ena [lomada] kecega.”⁶

Nida tisaipeli i Karisito, eda sa sureti meda vakatubura na noda vakabauta, ka lomani ira na tacida vakayalo tagane kei na yalewa ena noda semata dina na yaloda ena duavata kei na veilomani, se cava na noda duidui, ka rawa kina meda gutaka cake nodra dokai yani na nodra dodonu na luvena tagane kei na yalewa kece na Kalou.⁷

A sega beka ni kena dina o ya era a sotava na tamata i Nifai ena rua na senitiuri ni qaravi ira oti na Karisito?

“Sa dina sara ni sa sega beka ni dua na matatamata mamarau cake ena kedra maliwa na tamata kecega sa bulia na liga ni Kalou.

“Ka sega na Leimanaiti se dua na mataqali-aiti; ia era sa duavata ga, era sa luvei Karisito, ka sa nodra na matanitu ni Kalou.

“Era sa kalougata dina!”⁸

A kaya tale o Peresitedi Nelson na bibi me vakatetei yani na nodra dokai ka rokovi o ira na wekada ena nona kaya: “Na Dauveibuli vei keda kece sa kacivi keda yadua meda biuta na itovo ni vakacacani ira tiko na ilawalawa cava ga ni luveni Kalou. Ke dua vei keda sa vakacacana tiko e dua tale na kawatamata sa gadrevi me veivutuni ! … Sa dodonu vei keda yadua meda veivakauqeti vagumatua eda rawata rawa meda maroroya nodra dodonu ka rokovi na luvena tagane kei na yalewa yadua na Kalou sa ganita.”⁹ Kena ka dina, na dokai ni tamata sa veimuataki ki na rokovi na noda duidui.¹⁰

Ni raici na veivauci tabu sa vakaduavatataki keda vata kei na Kalou kei ira na Luvena, na veidusimaki vakaparofita oqo mai vei Peresitedi Nelson sa ikalawa bibi sara me tara na isema ni veikilai vinaka ka sega ni caka na ilati ni veivakacacani kei na veitawasei vakai keda.¹¹ Ia, ena nona vakaroti ira na kai Efeso o Paula, meda sa kila sara ni gadrevi meda rawata na inaki oqo, e gadrevi meda sasaga yadua ka vakalewelevu ena ivakarau yalo lokumi, yalomalumalumu, kei na vosota vakadede vakai keda yadua.¹²

E tukuni ni dua na italatala vaka-Jiu a vakacilavi siga tiko vata kei na rua na itokani. A tarogi rau, “Drau na kila vakacava ni sa oti na bogi ka sa cadra mai e dua na siga vou?”

A sauma mai e dua, “Ni ko sa rawa ni rai ki na tokalau ka kila e dua na sipi mai na dua na me.”

A kaya o kena ikarua, “Ni ko sa rawa ni rai ki na vunilagi ka kila e dua na vu ni olive mai na dua na vu ni lolo.”

Rau a qai vuki vei talatala vuku ka tarogi koya ena taro vata ga. A dede na nona vakasama, ka qai sauma, “Ni ko rai yani ki na tokalau ka raica e dua na mata ni yalewa se mata ni tagane ka rawa ni kaya, ‘O koya na taciqu yalewa; o koya na taciqu tagane.’”¹³

Kemuni noqu itokani, au vakadeitaka ni rarama ni dua na siga vou e ramase cake ena noda bula ni da raica ka maliwai ira na wekada ena rokovi kei na veidokai vaka-tacida tagane tacida yalewa vei Karisito.

Ena gauna ni Nona veiqaravi, a vakaraitaka vakavinaka o Jisu na ivakavuvuli oqo ni sa “lako voli ka daucaka vinaka”¹⁴ ki na tamata kecega, ka sureti ira mera lako mai Vua ka votai ena Nona vinaka, se vanua cava ga era vu mai kina, itutu vakatamata, se itovo vakavanua. A veiqaravi, veivakabulai, ka sa dau vakarogoca na nodra gagadre yadua, vakabibi vei ira ena gauna o ya era okati mera duatani, beci, se tawa okati. A sega ni cakitaka e dua ia a qaravi ira vakatautauvata kei na loloma, ni sa raici ira mera tacina ka ganena luvena tagane kei na yalewa na Kalou vata ga.¹⁵

Dua na gauna talei sara a yaco oqo ena gauna a gole kina na iVakabula ki Kalili, me taura kina na sala me curumi Samaria.¹⁶ Sa lewa kina o Jisu me dabe ena ikeli wai nei Jekope me cegu. E kea, a lako mai e dua na yalewa ni Samaria me mai taki wai. Ena Nona sa kila tu, sa vosa vua ko Jisu, ka kaya, “Solia mai vei au meu gunu.”¹⁷

Sa kurabui sara na yalewa oqo ni dua na Jiu sa kerea e dua na yalewa ni Samaria me vukei ka kurabui sara ka kaya, “Ni ko sa kai Jutia, ko sa kerea vakacava vei au meu gunu, niu sa yalewa ni Samaria? ni ra sa sega ni veiriti rawa na kai Jutia kei ira na kai Samaria.”¹⁸

Ia ko Jisu, ni sa biuta na ivakarau makawa ni nodrau tawa veiriti o Samaria kei ira na Jiu, a qarava na yalewa oqo ena loloma, me vukea me kila o yalewa o cei o Koya dina—ni o koya na Mesaia, ena tukuna na veika kecega ka sa waraka tiko na nona lako mai.¹⁹ Na mana ni veiqaravi vinaka o ya a vakavuna vua na yalewa me cici ki na koro me laki tukuna vei ira na tamata na veika sa yaco, ka kaya, “Sai koya qo na Karisito se segai?”²⁰

Au sa yalololoma vakabibi sara vei ira era sa vakatanitaki, beci, se vakacacani maivei ira na tamata sa yalo butobuto ka veicavilaki, baleta, ena noqu bula, au sa raica dina sara ga na nodra rarawa na tamata vinaka era mavoa ena vakalelewa se vakacalai baleta ni ra vosa, ituvaki, se bula duatani. Sa rarawa tale ga vakaidina na yaloqu vei ira sa butobuto tu ga na nodra vakasama, sa lekaleka nodra rai, kei na yalodra sa kaukauwa tu ga ni ra sa vakabauta nodra tawayaga o ira sa duatani maivei ira. Na nodra rai lekaleka eso sa vakataotaka na nodra rawa ni raica nira sa luvena na Kalou.

Me vaka era sa kaya oti na parofita, eda sa bula tiko ena gauna rerevaki ka na muria mai na iKarua ni Lako Mai ni iVakabula.²¹ O vuravura raraba sa kavida tu ena veitawasei kaukauwa, ka veisaqasaqa na matatamata, politiki, kei na tabakisobu ni bula vakailavo. Na veitawasei vaka oqo sa dau moica na ivakarau ni nodra rai kei na itovo na tamata baleti ira na wekana. Ena vuku ni ka oqo, e sega ni ka vou meda raica vei ira na tamata na ivakarau eso ni vakasama, cakacaka, tukuni ira na tamata eso, kawatamata, kei na mataqali eso ni ra sa lolovira, vakayagataka na veivakasama taumada, cala, ka vakavuqa me veidabui, ka vakavure vakanananu ni veileti, veivakaduiduitaki, veibeci, kei na nodra vakacacani yani. Na itovo vaka oqo sa vakawakana tu ena dokadoka, veileti, yaloca, kei na vuvu, na ivakarau ni itovo sa vakayago,²² ka ra sa veisaqasaqa kei na itovo sa Vakarisito. Na itovo vakaoqo sa tawadodonu vei ira sa saga tiko mera sa Nona tisaipeli dina.²³ Na ka dina, kemuni na taiciqu kei na ganequ, sa sega na tikina e nona na vakasama se ivakarau veivakacacani vakaoqo ena itikotiko ni Yalododonu.

Ni da sa luvena tagane kei na yalewa ni veiyalayalati, sa rawa meda vukea na kena tagutuvi na mataqali itovo vakaoqo ena noda raica na duidui matalia ena keda maliwa kei na matana na iVakabula²⁴ ka yavutaki ena ka cecere sa tu vei keda—na keda ivakatakilakila vakalou kei na vuvale. Vakabibi, eda na saga meda ilovi keda ena nodra tatadra, inuinui, rarawa, kei na nodra vutugu na kai noda. Eda sa lako tu vakaveiwekani oi keda na luve ni Kalou, tautauvata tu noda luluqa ka rawa meda na tubu. Eda sureti meda lako vata tu, ena vakacegu, ni yaloda sa sinai tu ena lomana na Kalou kei ira na tamata kecega—se, ni a kaya o Abraham Lincoln, “ni sa sega na veicacati vakaikeda ni da sa lomana na tamata kecega.”²⁵

O sa tugana beka vakabibi na sala mo vakaraitaka kina na ivakavuvuli me dokai kina nodra dodonu na tamata ena ivakarau rawarawa ni noda vakaisulutaki keda ena vale ni Turaga? Eda sa lako duavata kece mai ki na valetabu ena kena inaki ka sinai tu ena gagadre meda na savasava ka vakalou ena Nona iserau vakalou. Eda vakaisulu vulavula, oi keda kece eda sa ciqomi mai vua na Turaga Vakai Koya ni da sa Luvena lomani, tagane kei na yalewa na Kalou, na kawa i Karisito.²⁶ Eda sa kalougata meda cakava na cakacaka vakalotu vata ga, na veiyalayalati vata ga, yalataki keda meda bula cecere ka vakalou cake, ka ciqoma na yalayala vata ga. Eda duavata ena inaki, eda veiraici vakai keda ena matada vou, ena noda duabau, ka marautaka na noda duidui vaka luvena vakalou na Kalou.

Walega qo au a vukea nodra vakasarasarataki na vulagi dokai kei na vakailesilesi vakamatanitu ena kena dola raraba na Valetabu e Brasilia Brazil. Au a tu vakadua ena vanua ni veisau vata kei ivukevuke ni peresitedi kei Brazil, ka veivosakitaka na isulu vulavula era dara tiko na tamata kece ena loma ni valetabu. Au kaya vua ni kena vakayagataki raraba na isulu vulavula e tukuna tiko ni da sa tautauvata kece vua na Kalou ni ena valetabu, na noda ivakatakilakila e sega ni ivukevuke ni peresitedi ni dua na matanitu se iliuliu ni lotu ia sa noda ivakatakilakila tawamudu ni da sa luvena tagane na Tamada Vakalomalagi dauloloma.

iVakatakilakila

Iguaçú Falls.

Na Uciwai na Iguaçú e drodrova yani na ceva kei Brazil ka laki tini ena dua na babavatu me laki lutu ki na dua savu e kilai e vuravura na Iguaçú Falls—dua vei ira na ibulibuli totoka ka veivakurabuitaki ni Kalou e vuravura, ni sa dua vei ira na vitu na veivakurabuitaki kei vuravura. Sa dua na ikumuni wai levu e drodro yani me dua na uciwai ka laki tawase, ka cokoti kina e drau na savu duatani sara. Vakaibalebale, na ituvatuva levu oqo ni savu sa vakatakarakarataka tiko na vuvale ni Kalou e vuravura, ni da sa wase vakatautauvata na keda yavu vakayalo kei na kena gacagaca, e vu mai na keda taukeni kei na vuvale sa vakalou. Ia, oi keda yadua eda sa drodro yani ena duidui itovo, kawatamata, lewe ni vanua, ena duidui nanuma, veika e sotavi, kei na yaloda. Se cava ga, eda sa toso ki liu na luve ni Kalou ni da sa veitacini tagane kei na yalewa vei Karisito, sega ni yali kina na keda isema vakalou, ka yaco meda sa tamata duatani ka lewenivanua lomani.²⁷

Kemuni na taciqu kei na ganequ, meda semata na yaloda kei na vakasama ena kila kei na ivakadinadina ni da sa tautauvata ga vua na Kalou, ni da sa vakaedaumeni vakataucoko ena gugumatua ka itaukei tawamudu. Meda sa qai rekitaka vakalevu na vuvale vakayalo eda sa tiko kina ka doka na duidui itovo kei na veimataqali isolisoli sa tu vei keda kece. Kevaka meda cakava, au yalataka veiiko ni na drodrova yani ena noda dui sala, me vaka na wai ena Iguaçú Falls, sega ni yali kina na keda isema vakalou e vakatakilakilataka ni da sa tamata duatani, “sa luvei Karisito ka sa nodra na matanitu ni Kalou.”²⁸

Au vakadinadinataka ni noda tomana tiko meda drodro mai ena sala oqo ena noda bula tiko oqo, ena cadra mai e dua na siga vou ena rarama vou ka na vakararamataka na noda bula ka caudreva na veigauna totoka meda doka vakalevu, ka vakalougatataki vakataucoko sara, ena veika duidui sa bulia na Kalou ena kedra maliwa Na luvena.²⁹ Eda na yaco dina meda iyaya ni cakacaka ena Ligana me tokoni cake na veidokai kei na dodonu ena kedra maliwa na Luvena tagane kei na yalewa. E bula tiko na Kalou. O Jisu na iVakabula kei vuravura. Sa parofita ni Kalou o Peresitedi Nelson ena noda siga oqo. Au wasea na noqu ivakadinadina ena dina oqo ena yaca tabu i Jisu Karisito, emeni.