Maroroi na Domodra na Tamata ni Veiyalayalati ena iTabatamata e Tubucake Tiko Oqo

E dua na gauna veilauti ena iVola i Momani na nona veisiko na iVakabula sa tucaketale mai na mate vei ira na tamata ena valetabu e Vanuasautu Ni oti e dua na siga ni veivakavulici, veivakabulai, kei na taraicake ni vakabauta, a dusi ira na tamata ko Jisu ki na itabatamata nikua: “E vakarota me ra kau mai na gonelalai.”¹ A masulaki ira ka vakalougatataki ira vakayadua. E veilauti dina na gauna oqo ka ni lululvu kina vakavica na iVakabula vakataki Koya.

Oti, ni vosa vei ira na lewevuqa, a kaya o Jisu:

“Dou raici ira na nomudou lalai.

“Ni ra rai yani … , era raica ni sa tadola na lomalagi, ka raica ni ra sa siro sobu mai lomalagi na agilosi,” ka mai qaravi ira na gonelalai.²

Au dau vakasamataka vakalevu na veika a yaco qo. A rairai vakawaicalataka saraga na yalodra kece na tamata! Era a raica na iVakabula. Era a vakilai Koya. Era kilai Koya. A vakavulici ira. A vakalougatataki ira. Ka lomani ira o Koya. E sega kina ni kurabuitaki ni oti na veika a yaco oqo, era a tubucake na gone oqo me ra vukea na vakadeitaki ni dua na matatamata sautu, vutuniyau, ka dauloloma Vakarisito me vica na itabatamata.³

E sega beka ni vakasakiti kevaka era sota kaya na luveda na veika vakaoya kei Jisu Karisito—dua na ka me na semata na yalodra ki Vua! Sa sureti keda ko Koya, me vaka na Nona sureti ira na itubutubu ena iVola i Momani, me da kauti ira yani na noda lalai ki Vua. E rawa ni da vukei ira me ra kila na nodra iVakabula ka Dauveisereki me vakataki ira na gone oqo. E rawa ni da vakaraitaka vei ira na iwalewale me ra raica kina na iVakabula ena ivolanikalou ka tara cake nodra yavu mai Vua.⁴

Walega qo, a vakavulica vei au e dua noqu itokani vinaka e dua na ka au se bera vakadua ni bau kila baleta na vosa vakaibalebale ni tamata vuku ka a tara nona vale ena dela ni vatu. Me vaka na italanoa ena Luke, ni tauyavutaka na tamata vuku na nona vale, a “kelikeli vakatitobu.”⁵ E sega ni dua na ka e caka ga me rawa se rawarawa—e taura na igu!

Meda tara na noda bula ena uluvatu ni noda Dauveisereki, o Jisu Karisito, ena gadrevi meda vakelia vakatitobu. Meda kauta laivi na veika e vaka na nuku se tawakilikili ena noda bula. Eda na kelikeli tikoga me yacova ni da sa kunei Koya. Ka da vakavulici ira na luveda me ra vauci ira yani Vua ena veicakacaka vakalotu kei na veiyalayalati, me rawa kina ena gauna e yaco mai kina na cava kei na ualuvu veisaqasaqa, ni ra na yaco dina mai, ena lailai sara na kena imawe vei ira “baleta na uluvatu era sa tara kina.”⁶

Na kaukauwa vakaoqo era sega ni yaco wale tu ga. E sega ni na soli yani ki na itabatamata ka tarava me vaka e dua na nodra ivotavota vakawa vakayalo. Na tamata yadua mera kelia mera kunea na vatu.

Eda vulica na lesoni oqo ena dua tale na italanoa mai na iVola i Momani. Ni cavuta na iotioti ni nona itukutuku vei ira na nona tamata na Tui o Penijamini, era soqo yani vakamatavuvale me ra rogoca na nona vosa.⁷ E wasea na Tui o Penijamini na ivakadinadina qaqa kei Jisu Karisito, ka ra yavalati vakatitobu na tamata ena nona ivakadinadina. Era tukuna.

Sa Yalo ni Turaga e kauta mai e dua na veisau levu vei keimami se kina yaloi keimami.

Ka sa lomai keimami me keimami veiyalayalati kei na neimami Kalou me vakayacora na nona lewa … ena veisiga ni neimami bula sa vo.”⁸

Ena namaka beka e dua ni o ira na gonelalai ka yalodina tu vakatitobu vaqori na nodra itubutubu ena yaco me ra saumaki mai ka veiyalayalati. Ia, ena vuku ni inaki sega ni cavuti ena itukutuku, na veiyalayalati era cakava na itubutubu e sega ni mani yaga vei ira na luvedra. Ena vica vata na yabaki e muri, “Ia a sa yaco ni sa lewevuqa vei ira ena itabatamata ka qai tubu tiko mai era sega ni kila na vosa i Penijamini na tui, ni ra a se gone lalai sara ena gauna a vosa kina ko koya vei ira na nona tamata; era sega kina ni vakabauta na nodra ivakarau na nodra qase.

“Era sega ni vakabauta na veika sa tukuni me baleta na nodra tucake tale mai na mate ko ira na mate, era sega talega ni vakabauta na nona lako mai na Karisito . …

Ka ra sa sega ni vinakata me ra papitaiso; se me ra curu ki na lotu. Ka ra sa tamata tawase kina ena vuku ni vakabauta.”⁹

Sa dua na vakasama veivakararamataki dina! Vei ira na itabatamata era tubu cake tiko, e sega ni sa rauta me “ivakavuvuli ni nodra qase” na vakabauti Jisu Karisito.” Era gadreva me ra taukena me nodra na vakabauti Karisito. Ni ra tamata ni veiyalayalati ni Kalou, me da vakota vakacava ki yalodra na gone e dua na gagadre me ra cakava ka maroroya na veiyalayalati vata kei Koya?

Na kena isau e rawarawa ka talei: “Ia eda veivosakitaki Karisito, eda reki ena vukui Karisito, eda vunautaki Karisito, eda parofisaitaki Karisito, ka eda sa volavola me vaka na noda parofisai, me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.”¹⁰ Na vosa i Nifai e vakaibalebale ni dua na sasaga tomani tikoga me vakavulici vei ira na luveda me baleti Karisito. E rawa ni da vakadeitaka ni domodra na tamata ni veiyalayalati e sega ni galu e daligadra na itabatamata e tubu cake tiko oqo ka sega ni ulutaga walega ni Sigatabu ko Jisu¹¹

Na domodra na tamata ni veiyalayalati e kunei ena noda vosa ni ivakadinadina. E kune ena nodra vosa na parofita bula. Ka maroroi tu ena kena mana ena ivolanikalou. E kea ena yaco me ra kilai Jisu kina na luveda ka kunea na isau ni nodra taro. Ekea era na vulica kina vakataki ira na ivunau i Karisito. Ekea era na kunea kina na inuinui. Oqo ena vakarautaki ira ki na dua na gauna ni bula ni vaqara na dina ka bula ena salatu ni veiyalayalati

Au taleitaka na nona vakasala na noda parofita, o Peresitedi Russell M. Nelson.

“Evei na vanua meda na laki rogoci Koya kina?

“Sa rawa meda gole ki na ivolanikalou. Era vakavulica vei keda na veika baleti Jisu Karisito kei na Nona kosipeli, na vakaitamera ni Nona Veisorovaki, kei na ituvatuva cecere ni marau kei na veivueti nei Tamada. Na tabadromuci e veisiga ena vosa ni Kalou sa bibi sara baleta na vakabulai vakayalo vakabibi ena iotioti ni gauna oqo sa voravora cake tikoga. Ni da sa kana magiti ena vosa i Karisito e veisiga, na vosa i Karisito ena tukuna vei keda na sala meda sabaya kina na veika dredre eda a sega ni namaka meda sotava .”¹²

E vakaivei beka na irairai me da kana magiti mai na vosa i Karisito ka rogoci Koya? Ia, e rairai na ka beka ga e vinaka vei iko! E rawa beka ni vakasoqoni vata kei na nomu matavuvale me veivosakitaki na veika e vakavulica vei iko na Yalo Tabu ena nomu vulica na ivolanikalou ni vakayagataki na Lako Mai, Mo Muri Au. E rawa ni nomudou sokumuni vata e veisiga yadua me wiliki e vica na tikina mai na ivolanikalou ka qai vakaraica na madigi me veivosakitaki kina na veika dou vulica ni dou veimaliwai tiko. Raica na ka e vinaka vei iko kei na nomu matavuvale, qai tovolea me vinaka cake e veisiga yadua.

Vakasamataka na veika eso oqo mai na Veivakavulici ena iVakarau ni iVakabula: “Me tauri yadudua, e dua na bogi vakavuvale, dua na vuli ivolanikalou, se veivosaki vakosipeli ena kena irairai beka ni sega soti ni levu na ka e rawa kina. Ia na kena sokumuni na sasaga lalai, rawarawa, ka tokaruataki tiko ena veigauna, e rawa ni kaukauwa cake ka veivaqaqacotaki mai na dua na lesoni vakavudua se cecere. Kakua ni guce, ka kakua ni leqataka me rawati e dua na ka cecere ena veigauna kece. Mo gugumatua tikoga ena nomu sasaga.”¹³

E dua na noda itavi tabu ka bibi duadua oya meda vukei ira na luveda me yaco mera kila vakatitobu vakamatata nio Jisu na Karisito, na Luve ni Kalou Bula, na nodra iVakabula ka Dauveivueti, o Koya e tu ena ulu ni Nona Lotu! E sega ni rawa ni da laiva me vagalui se rogolailai na domoda ni veiyalayalati ni yaco mai na veika e baleti Koya

E rawa ni o vakila beka ni sega ni ganiti iko na itavi oqo ia mo kakua vakadua ni nanuma ni o tu duadua. Kena ivakaraitaki, sa vakadonui vei ira na matabose ni tabanalevu me ra tura na soqoni ni matabose ni qasenivuli vei ira na itubutubu. Ena veibose vakavulatolu oqo, e rawa ni ra soqoni na itubutubu me ra vuli mai na veika era dui sotava yadua, veivosakitaka na sala era sa vaqaqacotaka tiko kina na nodra dui matavuvale, ka vulica na ivakavuvuli bibi ni veivakavulici Vakarisito. E dodonu me yaco na soqoni oqo ena ikarua ni auwa ni lotu.¹⁴ Ena liutaka e dua na lewenilotu ka digitaka o bisopi ka muria ga na ivakarau ni soqoni ni matabose ni qasenivuli, ka vakayagataki kina na Veivakavulici ena iVakarau ni iVakabula me kena ivurevure taumada.¹⁵ Kemuni na bisopi, kevaka se bera ni yaco tiko ena nomuni tabanalevu na matabose ni qasenivuli, cakacaka vata kei na nomu peresitedi ni Wilivola ni Sigatabu kei na matabose ni tabanalevu me tauyavu.¹⁶

Kemuni na noqu itokani vei Karisito, sa vinaka cake sara na veika o ni cakava tiko mai na veika o ni nanuma. Cakacaka tikoga! Era sarasara, vakarorogo ka vuli tiko na luvemuni. Nio vakavulici ira, ona qai kila na kedra ituvaki dina vakaluvena tagane kei na yalewa lomani na Kalou. Era na guilecava beka na iVakabula ena dua na gauna, ia au yalataka vei kemuni ena sega sara ni guilecavi ira o Koya! Ena veigauna oqori ni vosa vei ira na Yalo Tabu ena tudei tu e yalodra kei na nodra vakasama. Ena dua na siga era na vakavoqataka kina na luvemu na ivakadinadina nei Inosi: “Niu sa kila tu koi au ni a tamata yalododonu ko tamaqu—ni a vakavulici au ena nona vosa, kei na veisusugi kei na veivunauci ni Turaga—ka me vakalougatataki ga na yaca ni noqu Kalou ena ka oqo.”¹⁷

Me da ciqoma na veisureti ni iVakabula ka kauti ira mai na luveda ki Vua. Ni da sa vakayacora vakakina, era na kunei Koya. Era na vakilai Koya. Era na kilai Koya. Ena vakavulici ira ko Koya. Ena vakalougatataki ira. Ia, sa na vakaivei, mada na Nona lomani ira. Sa, ka levu, na noqu lomani Koya. Ena Yacana tabu, Jisu Karisito, emeni.